©Wycliffe Bible Translators, Inc. and © The Nigeria Bible Translation Trust 2018 ℗ 2022 Hosanna

Nya Huba

Atə vanya Pəchir Ngyaməngya Yesu ka shawa nyi tə tahəya fa alkama. Shawa nyi tsəu tə ngatə huɓwa, ngə nda ghəya satə alkama nda, nda kwa ɗəa. Nda njir Farisi tə la'a ənga, ngə nda nar nyi nə Yesu, “Ndzama! Ja'inə shawa nghə kwa mər sənda gadlagadla tə katə nji tsa mər tə Pəchir Ngyaməngya.”
Ngə cha wuma, “A da hya kəratsəntə sənda Dauda tə mər ku bəji nda huɓə tə mbatsə nyi, nanda ka nji'inda kwa ma'i kə'i cha wa ya? Cha gwa ku vi həsəli Hyel, ga ɓanghə gwazhilakə nda nja fiya mar Hyel nanda ka nji'inda cha kə'iri, sənda a da tsa'atsa'a ku gadlagadla kənda wa, kəl nda anə fərist. Aa a da hya kəratsəntə ku gadlagadla Musa ənda kala Pəchir Ngyaməngya, fərist nda na tlər ku Mbwa'alə Hyel kwa nau mər tlər tə Pəchir Ngyaməngya ma? Ya a ndə da tə na ənda ɓəliya tənda gadlagadla wa. Yo nar hi jan sənda dəgal matsa Mbwa'alə Hyel. Likatəkatə tə na, ‘Təhuɗə ngə ya ndiya i, a da hatəmachi wa.’ Ma cha a ngabiya təhi ɓwanya nga, a da hyo nda mba jwam ku dza nji kəla bikə wa. Aka Zər Ndə ngə Tlakəu, ma'a nə Pəchir Ngyaməngya.”


Cha ngyar mbwa nda ga yi gwa ku vi pətlənya kənda. Vanya ndə da tangnda ana cha cha tətənyi. Aka nda kwa gwa'a nda səya Yesu na bikəu, nda jau nyi “A ɗatə tsa'atsa'a nja mbandə ndə tə Pəchir Ngyaməngya ya?” Cha nar nda, “Wa ku pama hi, ma kətəng nyi tə təɗə gu gulang tə Pəchir Ngyaməngya, a cho həbiya nyi wa? Səlir ndə ndiya tə kətəng! Aka əngə ja, tsa'atsa'a tanyi nja mər mənakəkur tə Pəchir Ngyaməngya.” Kəl ngə cha nar nyi nə ndə nda, “Ndəɗabiya cha ka.” Kəl ngə cha ndəɗabiya nga ɗa yiying tang wi vanyi nda. Kəl ngə njir Farisi inda biya ga ki mbanya ənda nda kwa ɗa na tsəya Yesu.

Nda Yesu tə ngabiya ənda nda kwa mbanya təkəra cha, ngə cha ngyar mbwa nda. Dlama nji tə nəu nyi. Cha mbandə njir shiləkə dəhəu. Ngə cha təɗəhima nda, ngwa nda da dəkarnyi nə madawa ndara wa cha wa. Cha mər ənga ga cha nyabiya sənda Hyel tə na təkəra cha təwa Ishaya ndər mətakər bəra,
“Janə mava ɗa nda ya tabiya,
ndə nda ya kwa nyida,
na cha ngə yo ngatə məsəɗakur nə gagaɗa.
Yo fəkənyi shanguɗə ɗa,
ana ga cha bəzə nəumar jiri
nə dəhə njir dunəya.
A da cho guhi ndara tsə wa,
ya a da njo ngatə kuraka cha ku yauraki wa.
A da cha kwa udə ɓəlnda chiva nda kaɗə ɓəl wa,
ya a da cho udə chiya təkəsə nda kaɗə tə wa.
Kəl nacha la'a jira kwasa.
Ya dəhə njir dunəya kwa
fəkər da tləm nyi.”


Kəl ngə nja shili na vanya ndə nə Yesu, nda məlləm tə wuləfənda nyi ga katə nyi tsa ndəra. Ngə Yesu tə mbandə ndə nda, ngə cha la'a sə ga ghəya ndəra. Dlama nji'inda dəhə tə mər məngəl ana sənda Yesu tə mər nda. Nda kwa na, “Kwa nau cha ɗa zər Dauda nda na?”
Manda njir Farisi tə ngatə ənga, nda na, “Ana gyalkur Ba'alzabul təl məlləm ngə cho gədlə məlləm.”
Yesu tsəu zəndəbiyatə sənda ku ɗufwa nda, ngə cha nar nda, “Kala təlkur nda təkəbiyadzə təkəra dawa, cho dla. Əngə tanyi tsəu kala mələm ndara ki nda tə təkəbiyadzə təkəra dawa da kwa ta'i wa. Macha Shantan kwa gədlə Shantan, dawa nda cha kwa mər na kərnyi, ama təlkur nyi kwa ɗana taea? Ya macha ana gyalkur Ba'alzabul ngə yo gədlə məlləm, yau, ana mi njikə hi kwa gədla? Aka ənga ja, sənda nda kwa məra ɗatə ka sər tla nəuma nə hi. Kəl ja, macha ana gyalkur Hyel nə ya kwa gədlə məlləm, təlkur Hyel shilitə təkəra hi ndani.
“Aa ya, ndə da kwa nau gwa ku ki gyal kwa gwa fa'aya ki nyi ya? Kəl nda cha ghəya mbiya gyal nda gwadagəu, təvi cho nau fa'aya ki nyi.
“Ndə nda pa'a na'a, ndər dawa ɗa nda. Ya ndə nda pa'a kwa tsəm naya, wiɗənda nda cho wiɗənda. Aka əngə ja, yo nar hi, kala səpəla'a ana ɓwanya ɗimi nda ndə kwa pəa, njo farbikə nyi, kəl ja, kala ndə nda tə pə ɓwanya ɗimi təkəra Shanguɗə Karti, a da nja kwa farbikə nyi wa. Kala ndə nda tə pə ɓwanya ɗimi təkəra Zər ndəu, nja kwa farbikə nyi, kəl ja, ndə nda tə pə ɓwanya ɗimi təkəra Shanguɗə Karti, a da nja kwa farbikə nyi pa'a wa, ndara zamin sakana ndara nda biyama.”


“Njo zəndəbiya wua təwa yayanyi. Wua mənakə kwa yah nguli məsəɗakəu, wua ɗimi tsəu kwa yah nguli ɗimi. Nahi tsapəu! Ama hyo ɗana pə sə mənakə ya pəla'a hya? Sənda nyandə ɗufwa hi nacha hya kwa pa. Ndə ndur kwa nau həbiya sə mənakəu hya'atə ku ɗufəu mənakəu. Ndə pəla'a tsəu kwa həbiya səɗimi aka sə'inda ku ɗufwa cha pəla'a. Yo nar hi, atə pəchir nəuma, madawa kwa da jiganda dəhə ɓwanya kəla kər nda cha pə huɗə Hyel. Aka a təkəra sənda ka pə ngə njo da tlanda nghə nəuma, ndara ko ɗa ka ndə kəla bikəu ndara ndər bikəu.”


Ngə alenya maləm gadlagadla ana njir Farisi tə shili da Yesu ga na, “Maləm, mər sər muniya ea la'a.”
Ngə Yesu tə wum ga na, “Kəl nda nji pəla'a ana nji kəla nəu nya Hyel nə bəji nə ngə kwa gwa'a sər muniya! Kəl ja, a sənda njo char hi matsa chul nə Yunana ndər mətakər wa. Aka tang wi nda Yunana ndər mətakər tə hanyi makər ana ɓupəchi makər ku ta kalfi dəgaləu, əngə tanyi Zər Ndə kwa hanyi makər ana ɓupəchi makər ku mbəla hə'i. Pəshir nəuma, njir Neneva kwa hya'atə ka njir bəji na, ya njir Neneva kwa tlanda nyi nəuma nə njir bəji na, aka nda ngyar mər səpəla'a ga tubi ahir nda səhimi da mafakə Yunana. Ya jan ndə nda ndəɗə Yunana tangna. Pəshir nəuma, mala təltəl nə Sheba kwa hya'atə ka njir bəji na, ya cho tlanda nda nəuma, aka cha hya'atə naɗə gagaɗa ga shili da Saloman ka ga cha səndzə himi da dəma nyi. Ya jan ndə nda ndəɗə Saloman tangna.


“Ma məlləm tə biya ku ndəu, cho ma'i kyatə mbwa ul'ula cho gwa'a mbwar ɓəlsar. Ma'a ɗa cha tari, cho nar nyi nə kərnyi, ‘Yo ɓəl taɗa yo kiɗa nda ya hya'atə kwa.’ Ma cha shili həya ki nda jwajwa'a, tsəkətsəkənyi, ya madami tsəkətsəkə ku nda. Kəl cho ɓəla biya ki shili na alenya məlləm məɗəfa, inda ndəɗə nyi na pəla'akur, nda kwa gwa ngya ku nda. Ngyar ndə nda kwa ɗa ɗimi matsa ənda cha ɗaka ɗa. Əngə tanyi kwa ɗa na njir bəji pəla'a na.”


Tsə'u Yesu kwa ɓwanya, ama nyi ka zamə nyi tə shili ga ta'ita nda biya, nda kwa gwa'a nda ndər nacha. Ngə vanya ndə tə nar nyi nə Yesu, “Jan ama nghə ka zamə nghə tə ta'i biya nda kwa i nda ndər na ka.”
Ngə cha wum ga na, “Ka wa ngə ama ɗa, ya wa ingə zamə ɗa?” Ngə cha char shawa nyi ga na, “Ja'inə ka ama ɗa ka zamə ɗa! Dəhə ndə nda mər sənda Ada ɗa nda kya huɗamələm kwa i, nacha ngə zamə ɗa, kwamə ɗa ana ama ɗa.”

گوێگرتن لە Matta 12