Ndút (Séréel)

Lahte bis, Yéesú dëekké taalibe yi sabboo a ana ya, onte wa ham-ham a sañ-sañ líkëe yébítëh ɓéeɓ a paƴaa jéríɗ. Ɗi antee waa wol waarii Nguur ki Koope a paƴi jéríɗɗë. Ɗi won wa tih : « ⁠ ⁠Ngënë kúrëelíi yin waalon : duuɗ neh, nafa neh, yii ñamun neh, hélíis neh, te ow ɓanan kúrëelëh búuɓ lofaa. Tígí habuun ron haneel ɓéeɓ, lah hëmí faam fa níi bín koluun ron gini baaha ra. Te ɗon pay ílíƴ ɓëewë kaa⁠ˈ hamon haneel raa, lah ɗúhí daaha, ɗon paaŋ pënë mí kotton, teeɓi wa biti wa homuy kaah.⁠ ⁠» Ɗaaha, taalibe ya koluute suute, haalute ginna luufa ɓéeɓ na waariyu Uni Neba, na paƴu jéríɗɗë.
Kela⁠ˈ Erot gëernëerí Galile iña na pagu Yéesú a taalibe yi ra, afa kúnëhté, ndah lahte ɓëewí wonu ti Saŋ Batis daa waɗti këllú ɓúudé. I ow kay wonu ti yonente Éelí daa feeñiyoh. Lahte ƴi wonu ti ow kay di yonente ya ɗéɓ rë daa këllú ɓúudé. Ndaa Erot won nufi tih : « ⁠ ⁠Mi lecɗohte lúum Saŋ Batis. Kon ɓëe⁠ˈ na paŋ iñi éemílë⁠ˈ yí ƴaa ɓéeɓ rë, waɗti henan wa ?⁠ ⁠» Erot na anti faha⁠ˈ oli Yéesú.


Koluu apootarra waala húmú wol wa Yéesú rë, wa ɓíllúté rí iña pagu wa ra ɓéeɓ. Wa ɓéeɓ ñéerúuté, hécúuté waal gin-taaha na wonuu Betsaydaa ra. Keluu dúukëlí ɓëewë biti Yéesú saañce ra, wa koluute téebídí. Lahuu wa ɗii na ra, ɗi teeriyohte wa, wonte wa yii leŋke Nguur ki Koope, paƴce jéríɗɗë.
Bi na yëellëh na⁠ˈ⁠a, taalibe yi sabboo a ana ya leɓuute ri, wonu ri tih : « ⁠ ⁠Wone ɓëewí ƴee saañ ginna leɓoh dee ra, wa saame yii túmún wë ɓúkkí wë a tígí homun wa, tígë homu yen dee ra lahay yin.⁠ ⁠» Ndaa ɗi won wa tih : « ⁠ ⁠Ɗon fi ƴah, yérí wë yii nay waa ñame.⁠ ⁠» Wa wonu ri tih : « ⁠ ⁠Fun lahuu mbúurú iip a jén ana kut. Fu wonay biti fun nay lomre ɓëewí ƴee ɓéeɓ ñam maan ?⁠ ⁠» Ɓëewí ƴaalla húmú në rë warutee mit ow júnní iip (5.000). Yéesú won taalibe yi tih : « ⁠ ⁠Wëní wë tooka⁠ˈ goomal-goomal, bina-bina ɓéeɓ waɗtee hen ow sabay iip (50).⁠ ⁠» Taalibe ya pagute yee nahu wa ra, tëekrúuté ɓëewë ɓéeɓ ɗaaha. Yéesú ɓeɓpe mbúurú yí iippa a jénní ana ya, ɓéyíɗté afi yeelte sun, símpé Koope, antee waa lecsa⁠ˈ, yeɗte wa taalibe ya, nahte wa woralsa⁠ˈ wa ɓëewë. Ɓëewë ɓéeɓ ñamute níi laalute. Négírúu wooñnjiida ra, wa líiffé dama sabboo a dama ana.


Lahte bis, Yéesú hécëhté na ɗaŋ Koope ; taalibe ya homute hëbísí. Ɗi meelte wa won tih : « ⁠ ⁠Ɓëewë wonuu biti daa mi wah ?⁠ ⁠» Wa wonu ri tih : « ⁠ ⁠Lahte ɓëewí wonu biti fu Saŋ Batis, lahte ƴi wonu yonente Éelí, i ow kay ɓal wonu ti fu ow kay di yonente yee merees bi koloh ɓúudé.⁠ ⁠» Yéesú meelte wa won tih : « ⁠ ⁠A ɗon, ɗon wonu biti daa mi wah ?⁠ ⁠» Peer tahte won tih : « ⁠ ⁠Daa fu Buura Koo fal ri ra.⁠ ⁠» Tígí daaha, Yéesú kadda⁠ˈ⁠te wa won tih : « ⁠ ⁠Ngënë wëní ow kay yin na.⁠ ⁠» Ɗi antee ɓaat won tih : « ⁠ ⁠So⁠ˈ mi Koy-ɓëe⁠ˈ, mi waɗtee mok níi mok : ɓaha ya, kélfë yí seeƴoh ya a yëeddëh yí kootii Mëyíis ii soo faha⁠ˈ tík íl ; may hawu húl, te waali éeyë fë filoon fi húlí së⁠ˈ, may këllú ɓúudé.⁠ ⁠»


Yéesú antee won ɓëewë ɓéeɓ tih : « ⁠ ⁠Ɓëyí faha⁠ˈ ñéerë⁠ˈ a so⁠ˈ, ɗi helan iñi afi, faraah ri enee kurwahi, anti ñee tal so⁠ˈ. Ɓëyí núp húl ay ñak ñíiní ; ndaa ɓëyí tah ñagi ñíiní af so⁠ˈ, ay lah pesa na ɗúméh rë. Kaah neh biti alal mi ëldúnë caleh ow yaay ñíiní, saŋku afi a ? Ɓëyí iñi so⁠ˈ a wonni so⁠ˈ tah ri sopoh fíi ɓëewë, so⁠ˈ mi Koy-ɓëe⁠ˈ may rii súugëh yiin nay mii aye filiɓ ndami so⁠ˈ, daa ndami Baaso⁠ˈ a malaaka yi sela ya ra. Mee ron won kaaf ka ra ee : lahte ɓëewí ewu ɗon na deh, balaa wa húl, wa ay ot Nguur ki Koope.⁠ ⁠»


Yii waɗtee hen waal peeye filoon fi bee wona⁠ˈ ri iñƴaa ra, Yéesú dëekké Peer, Saŋ a Saak, wa lawute sun daŋ, ɗi na ɗaŋ Koope. Ɗi hom ɗaŋa, kanama lofisohte, búubí na⁠ˈ naa⁠ˈ⁠o níi na hap íl. Ɗee a ɗeh, ow ana feeñiyuute na gonlu a ri : wa húmú Mëyíis a yonente Éelí. Wa fi ƴaa ɓal, búuɓɓí wë naa⁠ˈ naa⁠ˈ⁠o níi na hap íl. Wa gonlu sun fi húlë waɗti húl Yéesú Yerusalem ra. Peer a kooƴƴi húmú nee⁠ˈ⁠ute nee⁠ˈ⁠i misikke. Yúunúu wë rë, wa olute ndami Yéesú a ɓëewí ana ya homu a ri ra. Tígë në takuu ɓëewë a Yéesú rë, Peer won ɗi tih : « ⁠ ⁠Ɓahaa, neɓpe biti yen homun tígí deh, fun yíp dút éeyë : fu lah yínë, Mëyíis yínë, Éelí yínë.⁠ ⁠» Peer húmú yéeh iña na won ɗi ra. Ɗi hom wona, lahte nérí acce húunté wë. Taalibe ya tíitúté húunë húun wë nérë rë. Lahte uni ɗofohte filiɓ nérë won tih : « ⁠ ⁠Bee daa Koy so⁠ˈ. Daa ri bee fal mi ra. Síkíríi rí⁠ ⁠!⁠ ⁠» Wona⁠ˈ una níi wocce ra, taalibe ya olute biti Yéesú a afi kut daa tasu tígë. Wa habute yii baa waa na, te bín fë, wa ɓíllúy ow yee olu wa ra.


Kéy fín fë, cépúu Yéesú a taalibe yi daŋa ra, lahte dúukëlí ɓëewí ayute téebílëhí. Ow di ɓëewë ɓéyíɗté uni won tih : « ⁠ ⁠Ɓahaa, mi ɗaŋ ro biti fu olsiɗ so⁠ˈ koy so⁠ˈ. Mi laha⁠ˈ ri koy kut. Yébítëh daa na ham ri. Te ri ham ri raa yíp ríi ɓeka⁠ˈ liik, hégíƴ faana hégíƴí misikke, púumíl ɓúgë ; balaa yébítëh fë yeris ri raa, hom rii mokla⁠ˈ mokloo níi⁠ ⁠! Mi ɗaŋke taalibe yu lígí yébítëh fë, ndaa wa míníh yin na.⁠ ⁠» Yéesú tahte won ɓëewë tígí daaha tih : « ⁠ ⁠Ɗon fi ɓëy jamanii beh, ɗon fi ɓossi ƴee gémúy Koope ƴee ra, may home ɗon na mi mújdé rën níi kirih ?⁠ ⁠» Ɗi antee won ɓëe⁠ˈ tih : « ⁠ ⁠Kom so⁠ˈ koohu deh⁠ ⁠!⁠ ⁠» Kúkëyë na ac Yéesú në, yébítëh fë kéeníɗté rí feey, hégíƴcé faana hégíƴí misikke. Ndaa Yéesú digiɗte uni túuƴcé yébítëh fë ɗúh líkké rí, yeɗte kúkëyë boffi. Ɓëewë ɓéeɓ éemúté níi éem di ɗee gaana⁠ˈ Koope doole ra.


Bi homu ɓëewë ɓéeɓ éemí wë di iña paŋ Yéesú rë, ɗi won taalibe yi tih : « ⁠ ⁠Hëbí yee nay mi ron wone bee ra affon : so⁠ˈ mi Koy-ɓëe⁠ˈ, may yaayu ɓëewë.⁠ ⁠» Ndaa taalibe ya húmú yíih yee faha⁠ˈ ri waa won ɗa. Koo onay wa nufi yúhúun wë wona bín fë, te wa kaañuy meel Yéesú yin na.


Filoon fe, taalibe ya na taasantuu ɓëe⁠ˈ lukki gaan waa na ra. Bi yúh Yéesú yee nuffi wa, ɗi ɓeɓ kúkëy ƴutuuɗ cëgíɗté hëbísí, antee waa won tih : « ⁠ ⁠Ɓëyí af so⁠ˈ tah ɗi ham kúkëy ti bee nen a ya⁠ˈ ana, ɗeef ɗi ham so⁠ˈ ; te ɓëyí ham so⁠ˈ, ɗeef ɗi ham ɓëe⁠ˈ wol so⁠ˈ ra. Ɓëe⁠ˈ haba⁠ˈ afi biti daa ri lukki ƴin ɗon na ra, daa ri lukki gaan.⁠ ⁠» Saŋ won tígí daaha tih : « ⁠ ⁠Ɓahaa, fun olute ɓëyí líkë⁠ˈ yébítëh tiyu. Biti ri noneh yen na tahte fun kadduute ri.⁠ ⁠» Yéesú won tih : « ⁠ ⁠Ngënë këddíi rí⁠ ⁠! Yúhí biti ɓëyí kaa⁠ˈ⁠aay ron, ñéerë⁠ˈ a ron.⁠ ⁠»

Leɓa⁠ˈ wahtaa waɗ rii ɓéyrëe Koope sun ra, Yéesú caŋke lok biti ay saañ Yerusalem. Ɗi wolte i ow këllëh rí. Wa suute, haalute gin di Samari, saamɗi tígë nay rii home ra. Ndaa biti ri hom saañ Yerusalem tahte ɓëy gina kaa⁠ˈ⁠uute. Keluu Saak a Saŋ yii baa ra, wa wonu Yéesú tih : « ⁠ ⁠Ɓahaa, fu fahaay biti fun kéeníɗ pilliŋa sun fi wa, múkíl wë woo ?⁠ ⁠» Ɗi yíssëhté waa na, wonte affi wa. Wa anutee koloh na suu gin kay.


Homuu wa waala ra, lahte ɓëyí won Yéesú tih : « ⁠ ⁠Tígí mín fúu saañ ɓéeɓ, may ñee talu.⁠ ⁠» Yéesú won ɗi tih : « ⁠ ⁠Tílé yë lahute faam, ƴakka lahute túf, ndaa so⁠ˈ mi Koy-ɓëe⁠ˈ, mi lahay dék.⁠ ⁠» Yéesú won ow kay tih : « ⁠ ⁠Aye fu ñee tal so⁠ˈ.⁠ ⁠» Ndaa ɓëe⁠ˈ won ɗi tih : « ⁠ ⁠Ɓahaa, on so⁠ˈ paaƴ mi pay mi hace baaso⁠ˈ.⁠ ⁠» Yéesú won ɗi tih : « ⁠ ⁠Légéyú hac ɓúudé neh ; kolee fu waareye Nguur ki Koope.⁠ ⁠» Ow kay wonil Yéesú tih : « ⁠ ⁠Ɓahaa, may ñéerë⁠ˈ a ro, ndaa on so⁠ˈ paaƴ, mi pay takohi ɓëyí faam so⁠ˈ.⁠ ⁠» Yéesú won ɗi tih : « ⁠ ⁠Ɓëyí tílë⁠ˈ tílëe heeltee, mínéh non Nguur ki Koope.⁠ ⁠»

گوێگرتن لە Lúkkë 9