These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᐊᓐᑕ ᒪᒃ ᐊᓕᐱᔅ ᑲ ᐃᓯᓂᐧᑲᑕᒡ ᐱᔅᑯᑎᓇᐤ ᐊᑯᑕ ᑲ ᐃᑐᑕᑦ ᐎᔾ ᒋᓴᔅ᙮ ᐎᐱᒡ ᒥᓐ ᐎᔭᐱᓂᔨᒡ ᐊᓐᑕ ᒋᓴᐊᔭᒥᐊᐅᒋᐛᐱᒡ ᒥᓐ ᒋ ᐃᑐᑕᐤ᙮ ᒥᓯᐛ ᒪᒃ ᐊᓂᔭᔪᐛ ᐃᔪᐛ ᒋ ᐸᒋ ᓂᑐᐛᐱᒥᑯᐤ᙮ ᑲ ᐛᐛᔨᐱᑦ ᐊᑯ ᒂ ᒋᔅᑯᑎᒧᐛᑦ᙮ ᐊᓐᒡ ᒪᒃ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᑭᔭ ᐊᓐᒡ ᐸᕆᓯᔨᒡ ᒋ ᐸᓱᐛᐅᒡ ᐃᔎᐛ ᐊᒋ ᐎᒋ ᐱᓯᒂᑎᓯᒪᔨᒋ ᓇᐸᐛ᙮ ᐊᑯᑕ ᐊᓐᑕ ᐊ ᒥᒐᑎᓇᓄᐎᒡ ᑲ ᐸᓱᐛᒡ ᐊᓂᔭ ᐃᔎᐛ᙮ ᐊᑯ ᒂ ᐃᑕᒡ ᐊᓂᔭ ᒋᓴᓴ, “ᒋᔅᑯᑎᒪᒐᓱᐤ, ᒋ ᒐᔅᑯᐛᑭᓄᐤ ᐅ ᐃᔎᐤ ᒪᒂᒡ ᐊᒋ ᐎᒋ ᐱᓯᒂᑎᓯᒪᑦ ᓇᐸᐛ᙮ ᐃᑎᔅᑕᐤ ᐊᓐᑕ ᒧᓱᔅ ᐅᐎᓱᐛᐅᓂᒡ ᒐᒋ ᓂᐸᐊᑭᓄᐅᑦ ᐊ ᐸᐱᒧᓯᓇᑎᐛᑭᓄᐅᑦ ᐃᔎᐤ ᐊ ᒐᔅᑯᐛᑭᓄᐅᑦ ᑯᑎᑲ ᓇᐸᐛ ᓂᑐᐎᔾ ᐊ ᐃᓯ ᐎᒐᐛᑦ᙮ ᑕᓐ ᒪᒃ ᐊ ᐃᑕᔨᑎᒥᓐ ᒋᔾ ?” ᐊᐅᒄ ᐅᔭ ᑲ ᐃᑕᒡ ᐊᒋ ᐎ ᓇᓂᑐᐤ ᑯᒂᒋᐊᒡ ᒐ ᐱᑯᓂᒥᒂᓂ ᐅᔭ ᐎᓱᐛᐅᓂᔪᐤ, ᑭᔭ ᐱᑯᓂᒥᒐᓂ ᒋᐸ ᑎᑯᓂᔪᐤ ᒐ ᐃᓯ ᒪᒥᓯᒪᒡ᙮
ᒥᒄ ᒪᒃ ᐊᓐᑕ ᐊᔅᒋᒡ ᒋ ᐃᓯ ᓄᐛᐱᔪᐤ ᒋᓴᔅ, ᒂ ᒥᓯᓇᐃᒐᑦ ᐊᓐᑕ ᐃᔭᑲᒡ ᐅᑎᒋᔾ ᐊ ᐊᐱᒋᑕᑦ᙮ ᒪᒂᒡ ᒪᒃ ᐊᓐᑕ ᐊ ᓂᐳᐅᒡ ᐊ ᐊᔨᐧᑭᒥᐊᒡ ᒐᒋ ᐃᓯ ᐎᑎᒪᑯᒡ ᑕᓐ ᑲ ᐃᓯ ᑯᒂᒋᒪᒡ, ᒋ ᓴᑐᑲᐳᐤ ᒋᓴᔅ ᐊᑯ ᒂ ᐃᑕᑦ, “ᑕᓐ ᐊᓐ ᐊᐛᓐ ᐊᓐᑕ ᐊ ᑎᓯᔭᒄ ᐊᑲ ᓂᑕ ᐅᒋ ᒥᒋᑐᑕᐧᒃ ᐎᔾ ᓂᔅᑎᒻ ᒋᑭ ᐱᒧᓯᓇᑕᐛᐤ ᐊᓂᔭ ᐃᔎᐛ᙮” ᒥᓐ ᒂ ᓄᐛᑲᐳᐅᑦ ᐊᑯ ᒥᓐ ᒂ ᒥᓯᓇᐃᒐᑦ ᐊᓐᑕ ᐃᔭᑲᒡ᙮
ᐃᔅᐱ ᑲ ᐸᑐᐛᒡ ᐅᔭ ᐊ ᐃᔅᒋᔄᔨᒋ, ᐸᐸᐃᒄ ᒋ ᐊᑎ ᔅᑐᑕᐅᒡ, ᓂᔅᑎᒻ ᐊᓐᒡ ᑲ ᒋᓴᐃᔪᒡ᙮ ᒐᒃ ᒥᒄ ᐎᔾ ᒋᓴᔅ ᒋ ᑕᐤ ᐊᓐᑕ ᑭᔭ ᐊᓂᔭᔪᐛ ᐃᔎᐛ᙮ ᒂ ᓴᑐᑲᐳᐅᑦ ᒋᓴᔅ ᐊᑯ ᒂ ᐃᑕᑦ ᐊᓂᔭᔪᐛ ᐃᔎᐛ, “ᐃᔎᐤ, ᑕᓐᑕ ᐊ ᑕᒡ ᐊᓐᒡ ᑲ ᒪᒥᓯᒥᔅᒡ ? ᓇᒪᐎᔾ ᐊ ᑕᐤ ᐊᐛᓐ ᐊᒋ ᓂᓱᐅᓇᒋᒥᔅᒃ ?”
ᐊᑯ ᐊᓐ ᐃᔎᐤ ᒂ ᐎᑎᒧᐛᑦ ᒋᓴᓴ ᐊ ᐃᑕᑦ, “ᓇᒪ, ᐅᑎᐸᔨᒋᒐᐤ᙮” ᒋᓴᔅ ᒪᒃ ᒋ ᐃᑕᐤ, “ᓇᒪ ᑭᔭ ᓂᔾ ᒋ ᓂᓱᐅᓇᒋᒥᑎᓐ᙮ ᒪᒋ, ᐊᑲᐎᔾ ᒥᓐ ᒥᒋᑐᑕ᙮”

ᐃᔅᐱᔅ ᒋᓴᔅ ᒥᓐ ᐊ ᐃᔨᒪᐊᑦ ᐊᓂᔭ ᐃᔪᐛ ᒋ ᐃᑕᐤ, “ᓂᔾ ᐊᐅᒄ ᑲ ᒥᔨᒂᐤ ᐃᔪᒡ ᐛᔅᑕᐅᓂᔪᐤ ᐅᑕ ᐊᔅᒋᒡ᙮ ᐊᓐ ᐊᐛᓐ ᑲ ᓇᓴᐅᑦ ᒋᑭ ᐊᔭᐤ ᐱᒪᑎᓯᐅᓂᔪᐤ ᐛᔅᑕᐅᓂᒡ ᐅᒡ ᑭᔭ ᓇᒪ ᒋᑭ ᐅᒋ ᐱᒧᑕᐤ ᐅᓂᑎᐱᔅᒋᓯᐅᓂᒡ᙮”
ᐊᑯ ᐊᓐᒡ ᐸᕆᓯᔨᒡ ᒂ ᐃᑕᒡ, “ᒥᒄ ᒋᔾ ᒋ ᑎᐸᒋᒥᑎᓱᓐ, ᓇᒪ ᑕᑈᒥᑭᓐ ᐊᓐ ᑲ ᐃᔅᒋᔄᔨᓐ᙮”
ᒋᓴᔅ ᒂ ᐃᑕᑦ, “ᐊᑎ ᒥᒄ ᓂᔾ ᐊ ᑎᐸᒋᒥᓱᔭᓐ ᑕᑈᒥᑭᓐ ᑕᓐ ᐊ ᐃᔅᒋᔄᔭᓐ᙮ ᐛᔅ ᓂ ᒋᔅᒐᔨᑕᓐ ᑕᓐᑕ ᐛᒋᔭᓐ ᑭᔭ ᑕᓐᑕ ᒐ ᐃᑐᑕᔭᓐ᙮ ᒋᔨᐛᐤ ᒪᒃ ᓇᒪ ᒋ ᒋᔅᒐᔨᒥᓇᐛᐤ ᑕᓐᑕ ᐛᒋᔭᓐ ᑭᔭ ᑕᓐᑕ ᒐ ᐃᑐᑕᔭᓐ᙮ ᒥᒄ ᑕᓐ ᐊ ᐃᓯᓄᐛᒄ ᐊᐛᓐ ᐊᐅᑯᓐ ᐊᓂᔭ ᐊ ᐃᓯ ᑎᐸᔅᑯᓇᒄ, ᓂᔾ ᒪᒃ ᓇᒪ ᓂ ᑎᐸᔅᑯᓇᐤ ᐊᐛᓐ᙮ ᑎᐸᔅᑯᓂᒐᔭᓇ ᒪᒃ ᒋᑭ ᑕᑈᒥᑭᓐ ᐊᓐ ᑕᓐ ᒐ ᐃᓯ ᑎᐸᔅᑯᓂᒐᔭᓐ᙮ ᐛᔅ ᓇᒪ ᓂ ᐸᐃᑯᓯᓐ ᐊ ᑎᐸᔅᑯᓂᒐᔭᓐ, ᓄᑕᐎᔾ ᐊᓐ ᑲ ᐸᒋ ᐃᑎᓴᐅᑦ ᐊᐅᑯᓐ ᐊᓐ ᐛᒋᐃᑦ᙮ ᐃᑎᔅᑕᐤ ᐊᓐᑕ ᒋᐎᓱᐛᐅᓄᐛᒡ ᓂᓱ ᐊᐛᓐᒋ ᐸᐃᑯᓄᒡ ᐊ ᐃᑎᑕᑯᓯᒡ ᐊ ᐎᑕᒡ ᑕᓐ ᑲ ᐃᓯ ᐛᐸᑕᒡ ᐊ ᐃᔅᐱᔨᒡ ᒐᒂᔪᐤ, ᑕᑈᒥᑭᓂᔪᐤ ᐊᓂᔭ ᑕᓐ ᐊ ᐃᔅᒋᔄᒡ᙮ ᓂ ᑕᑈᓐ ᑕᓐ ᐊ ᐃᑕᒋᒥᓱᔭᓐ ᑭᔭ ᐅᑕᐎᒪᐤ ᐊᓐ ᑲ ᐸᒋ ᐃᑎᓴᐅᑦ ᐎᑎᒻ ᐊ ᑕᑈᐅᒡ᙮”
ᐊᑯ ᒂ ᐃᑕᒡ, “ᑕᓐᑕ ᐊ ᑕᑦ ᒍᑕᐎᔾ ?” ᒋᓴᔅ ᒂ ᐃᓯ ᐎᑎᒧᐛᑦ, “ᓇᒪ ᑕᑈ ᒋ ᒋᔅᒐᔨᒥᓇᐛᐤ ᑭᔭ ᓄᑕᐎᔾ ᓇᒪ ᒋ ᒋᔅᒐᔨᒪᐛᐤ᙮ ᐛᔅ ᒋᔅᒐᔨᒥᔭᒄ ᓄᑕᐎᔾ ᑭᔭ ᒋᐸ ᒋᔅᒐᔨᒪᐛᐤ᙮”
ᐊᐅᒄ ᐅᔭ ᑲ ᐃᔅᒋᔄᑦ ᒋᓴᔅ ᐊᓐᑕ ᒋᓴᐊᔭᒥᐊᐅᒋᐛᐱᒡ ᑲ ᒋᔅᑯᑎᒪᒐᑦ ᐊᓐᑕ ᑲᒋ ᑭᓄᐛᔨᑕᑭᓄᔨᒋ ᐱᔅᑎᓂᒐᐅᓇ᙮ ᓇᒪ ᒪᒃ ᐊᐛᔪᐛ ᐅᒋ ᒪᑯᓂᑯᐤ ᐛᔅ ᓇᒪ ᐊᔅᒄ ᐅᒋ ᐅᑎᒋᐱᔪᐤ ᐊᓐᑕ ᒋᐸ ᒪᑯᓇᑭᓄᐤ᙮

ᐊᑯ ᒥᓐ ᒂ ᐃᑕᑦ ᒋᓴᔅ, “ᓂᑭ ᔅᑐᑕᓐ, ᒋᑭ ᐸᒋ ᓇᓂᑐᐛᐱᒥᓇᐛᐤ ᒥᒄ ᒪᒃ ᐊᐅᑯᓐ ᒐ ᐃᓯ ᓂᐱᔭᒄ ᐊ ᒋᔅᑭᒪᒄ ᒋᒥᒐᑎᓯᐅᓄᐛᐛ᙮ ᓇᒪ ᒪᒃ ᒋᑭ ᒋ ᐃᑐᑕᓇᐛᐤ ᐊᓐᑕ ᒐ ᐃᑐᑕᔭᓐ᙮”
ᐊᑯ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒂ ᐃᔅᒋᔄᒡ, “ᐊᓂᔭ ᒪ ᑲ ᐃᔅᒋᔄᑦ, ᓇᒪ ᒋᑭ ᒋ ᐃᑐᑕᓇᐛᐤ ᐊᓐᑕ ᒐ ᐃᑐᑕᔭᓐ᙮ ᒋᑭ ᓂᐸᐃᓱᐤ ᑲᑭᔭ ᐊᓂᔭ ᐛᒋ ᐃᔅᒋᔄᑦ ?”
ᒋᓴᔅ ᒪᒃ ᒋ ᐃᑕᐤ, “ᓂᑕᒡ ᒋ ᐅᒋᓇᐛᐤ ᒋᔨᐛᐤ ᓂᔾ ᒪᒃ ᐊᓐᑕ ᐃᔅᐱᒥᒡ ᓂ ᐅᒋᓐ᙮ ᐅᑕ ᐊᔅᒋᒡ ᒋ ᐅᒋᓇᐛᐤ ᒋᔨᐛᐤ, ᓂᔾ ᒪᒃ ᐎ ᓇᒪ ᐅᑕ ᐊᔅᒋᒡ ᓂ ᐅᒋᓐ᙮ ᔅᒋ ᐎᑎᒪᑎᓇᐛᐤ ᒐ ᓂᐱᔭᒄ ᐊ ᒋᔅᑭᒪᒄ ᒋᒥᒐᑎᓯᐅᓄᐛᐛ᙮ ᐊᐅᑯᓐ ᒪᒃ ᑕᑈ ᒐ ᐃᓯ ᓂᐱᔭᒄ ᐊ ᒋᔅᑭᒪᒄ ᒋᒥᒐᑎᓯᐅᓄᐛᐛ, ᐊᑲ ᑕᑈᑎᒪᒂ ᐊᐅᑯᓐ ᐊᓐ ᓂᔾ ᑕᑈ ᐊ ᐊᐎᔭᓐ᙮”
ᐊᑯ ᒂ ᑯᒂᒋᒪᒡ ᒋᓴᔅ ᐊ ᐃᑕᒡ, “ᐊᐛᓐ ᒪᒃ ᒋᔾ ?” ᒋᓴᔅ ᒂ ᐃᓯ ᐎᑎᒧᐛᑦ, “ᐊᓐᑕ ᐅᔅᑭᒡ ᑲ ᒋᒋᐱᔨᔭᓐ ᐊ ᒋᔅᑯᑎᒪᒐᔭᓐ ᐊᑯᑕ ᓴᔅ ᑲ ᐎᑎᒪᑎᑯᒡ ᐊᐛᓐ ᐊ ᐊᐎᔭᓐ᙮ ᒥᒐᓇ ᒐᒂᔪᐛ ᒐᒋ ᐎᑎᒪᓐ ᒐᒋ ᐅᒋ ᑎᐸᔅᑯᓂᑯᐅᔭᒄ᙮ ᒥᒄ ᒪᒃ ᓂᑭ ᐎᑎᒧᐛᐅᒡ ᐃᔪᒡ ᐅᑕ ᐊᔅᒋᒡ ᐊᓂᔭ ᑕᓐ ᑲ ᐃᓯ ᐸᑐᐅᒃ ᐊ ᐊᔨᒧᑕᐧᒃ ᐊᓐ ᑲ ᐸᒋ ᐃᑎᓴᐅᑦ, ᐛᔅ ᒧᔅ ᐎᔾ ᑕᑈᐅᒐᔨᑕᑯᓱᐤ᙮”
ᐊᓐᒡ ᒪᒃ ᐃᔪᒡ ᐊᓐᑕ ᑲ ᑕᒡ ᓇᒪ ᐅᒋ ᓂᔅᑐᑐᐛᐅᒡ ᒋᓴᓴ ᐅᑕᐎᒪᐛ ᐊᓂᔭᔪᐛ ᑲ ᐊᔨᒧᒪᔨᒋ᙮ ᐊᑯ ᒋᓴᔅ ᒂ ᐃᑕᑦ, “ᐃᔅᐱ ᒋᔅᑕᔎᑕᒂ ᐃᔪᐤ ᐅᑯᓯᓴᓐ ᐊᑯ ᒐ ᒋᔅᒐᔨᒥᔭᒄ ᐊᐅᒄ ᓂᔾ ᐊ ᐊᐎᔭᓐ᙮ ᒋᑭ ᒋᔅᒐᔨᑕᓇᐛᐤ ᑭᔭ ᐊᑲ ᐃᑐᑎᒪᓐ ᒐᒂᓐ ᐸᑐᔅ ᑲ ᐃᑎᓱᒥᑦ ᓄᑕᐎᔾ ᒐᒋ ᐃᑐᑎᒪᓐ᙮ ᒥᒄ ᐊᓂᔭ ᑕᓐ ᐊ ᐃᑎᓱᒥᑦ ᐅᑕᐎᒪᐤ ᒐᒋ ᐎᑎᒧᒡ ᐊᔪᐅᒄ ᐊᓂᔭ ᒐ ᐎᑎᒧᒡ᙮ ᐊᓐ ᒪᒃ ᑲ ᐸᒋ ᐃᑎᓴᐅᑦ, ᓂ ᐎᒐᐅᒄ, ᓇᒪ ᓂ ᐅᒋ ᓂᑭᑎᒄ ᒥᒄ ᒐᒋ ᐸᐃᑯᓱᐅᒡ ᐛᔅ ᒧᔅ ᓂ ᐃᑐᑎᒺᓐ ᐎᔾ ᑕᓐ ᐊ ᐃᓯ ᓇᐊᔨᑎᒥᐃᑯᑦ᙮”
ᒥᒐᑦ ᒪᒃ ᐊᓐᒡ ᐊᐛᓐᒋ ᑲ ᐸᑐᐛᒡ ᒋᓴᓴ ᐅᔭ ᐊ ᐃᔅᒋᔄᔨᒋ ᒋ ᑕᑈᔭᔨᒪᐅᒡ᙮

ᒋᓴᔅ ᒪᒃ ᒋ ᐃᑕᐤ ᐊᓂᔭᔪᐛ ᒍᐤ ᐃᔪᐛ ᑲ ᑕᑈᔭᔨᒥᑯᑦ, “ᒧᔅ ᓂᓇᐃᑎᒪᒂ ᓂᒋᔅᑯᑎᒪᒐᐅᓇ, ᒋᔨᐛᐤ ᐊᐅᒄ ᑕᑈ ᓂᒋᔅᒋᓄᐊᒧᐛᑭᓐᒡ᙮ ᒋᑭ ᒋᔅᒐᔨᑕᓇᐛᐤ ᑕᑈᐅᓐ ᑭᔭ ᒋᑭ ᐊᐱᐧᑯᓂᑯᓇᐛᐤ ᐊᓐ ᑕᑈᐅᓐ᙮”
ᐊᑯ ᒂ ᐃᑕᒡ, “ᐊᓂᔭ ᐊᑉᕋᐊᒻ ᐊ ᑕᑦ ᓂᒋ ᐅᒋ ᐊᓂᔅᒐ ᐱᒪᑎᓯᓇᓐ, ᓇᒪ ᓂᑕ ᓂ ᐅᒋ ᐊᐱᒋᐊᑭᓂᑐᑕᑯᓇᓐ ᐊᐛᓐ᙮ ᒐᒂᓐ ᒪᒃ ᐛᒋ ᐃᔅᒋᔄᔨᓐ ᒋᑭ ᐊᐱᐧᑯᓂᑯᓇᐛᐤ ?”
ᒋᓴᔅ ᒂ ᐃᓯ ᐎᑎᒧᐛᑦ ᐊ ᐃᑕᑦ, “ᑯᐃᔅᒄ ᒋ ᐎᑎᒪᑎᓇᐛᐤ, ᒥᓯᐛ ᐊᐛᓐ ᑲ ᒥᒋᑐᑕᐧᒃ ᑎᐸᔨᒥᑯᐤ ᐊᓂᔭ ᑕᓐ ᐊ ᐃᓯ ᒥᒋᑐᑕᐧᒃ᙮ ᐊ ᐅᑦ ᐊᐱᒋᐊᑭᓂᑐᑕᐛᑭᓄᐅᑦ ᐊᐛᓐ ᓇᒪ ᒧᔅ ᐎᒍᐤ ᐊᓐᑕ ᐅᒋᒪᒪ ᐊ ᑕᔨᒋ ᒥᒄ ᐊᓐ ᐅᑯᓯᓯᒪᐤ ᐊᐅᒄ ᐊᓐ ᒋᒋᐛ ᐛᒋᑦ ᐊᓐᑕ᙮ ᐊᐱᐧᑯᓂᑕᒂ ᒪᒃ ᐅᑯᓯᓯᒪᐤ ᒥᒋᑥᐅᓂᒡ ᐅᒡ ᑕᑈ ᒋᑭ ᐊᐱᐧᑯᓂᑯᓇᐛᐤ᙮ ᒋ ᒋᔅᒐᔨᒥᑎᓇᐛᐤ ᐊᑉᕋᐊᒻ ᐊ ᑕᑦ ᐊᒋ ᐅᒋ ᐊᓂᔅᒐ ᐱᒪᑎᓯᔭᒄ, ᒥᒄ ᒪᒃ ᐃᔭᐱᒡ ᒋ ᐎ ᓂᐸᐃᓇᐛᐤ ᐊᑲ ᐎ ᓂᑐᑎᒪᒄ ᑕᓐ ᐊ ᐃᓯ ᒋᔅᑯᑎᒪᒐᔭᓐ᙮ ᓂᑦ ᐊᔨᒧᑕᓐ ᑕᓐ ᑲ ᐃᓯ ᐛᐸᑎᔨᑦ ᓄᑕᐎᔾ᙮ ᒋᔨᐛᐤ ᒪᒃ ᑭᔭ ᐊᓂᔭ ᑕᓐ ᐊ ᐃᑎᓱᒥᑕᒄ ᒍᑕᐎᐛᐤ ᐊᐅᒄ ᐊᓂᔭ ᐊ ᐃᑐᑎᒺᒄ᙮”
ᐊᑯ ᐊᓐᒡ ᒍᐤ ᐃᔪᒡ ᒂ ᐃᓯ ᐎᑎᒧᐛᒡ ᐊ ᐃᑕᒡ, “ᐊᑉᕋᐊᒻ ᓄᑕᐎᓇᓐ᙮” ᐊᑯ ᒋᓴᔅ ᒂ ᐃᑕᑦ, “ᑕᑈ ᐊᑉᕋᐊᒻ ᐊ ᑕᑦ ᑲ ᐅᒋ ᐊᓂᔅᒐ ᐱᒪᑎᓯᐛᒂ ᐊᓂᔭ ᑕᓐ ᑲ ᐃᑎᑦ ᐊᑉᕋᐊᒻ ᐊᐅᑯᓐ ᒋᐸ ᐃᑎᓇᐛᐤ᙮ ᔅᒋ ᐎᑎᒪᑎᓇᐛᐤ ᐊᓐ ᑕᑈᐅᓐ ᑕᓐ ᑲ ᐃᓯ ᐸᑎᒪᓐ ᐊᓐᑕ ᒋᓴᒪᓂᑐᐤ ᐊ ᑕᑦ ᐅᒋ, ᒥᒄ ᒪᒃ ᐃᔭᐱᒡ ᒋ ᐎ ᐸᒋ ᓂᐸᐃᓇᐛᐤ᙮ ᐊᓂᔭ ᐎᔾ ᐊᑉᕋᐊᒻ ᓇᒪ ᓂᑕ ᒋᐸ ᐅᒋ ᐃᑐᑎᒻ ᐅᔭ᙮ ᐊᐅᑯᓐ ᐊ ᐃᑎᔭᒄ ᑕᓐ ᐊ ᐃᑎᑦ ᒍᑕᐎᐛᐤ᙮” ᐊᑯ ᒥᓐ ᒂ ᐃᓯ ᐎᑎᒧᐛᒡ ᐊ ᐃᑕᒡ, “ᒋᓴᒪᓂᑐᐤ ᐊᐅᒄ ᒥᒄ ᐊ ᐸᐃᑯᓯᑦ ᐊ ᐅᑕᐎᔭᒡ᙮ ᓇᒪ ᓂᑐᐎᔾ ᓂ ᐅᒋᓇᓐ᙮”
ᐊᑯ ᒋᓴᔅ ᒂ ᐃᑕᑦ, “ᑕᑈ ᒋᓴᒪᓂᑐᐤ ᐛᑕᐎᐛᒂ, ᒋᐸ ᓴᒋᐃᓇᐛᐤ ᐛᔅ ᒋᓴᒪᓂᑐᐤ ᐊ ᑕᑦ ᓂ ᐅᒋᓐ ᑭᔭ ᐅᑕ ᐱᔭᒋ ᑕᔭᓐ᙮ ᓇᒪ ᓂᔾ ᓂ ᐅᒋ ᐸᒋ ᐃᑎᓴᐅᓱᓐ, ᐎᔾ ᒋᓴᒪᓂᑐᐤ ᓂᒋ ᐸᒋ ᐃᑎᓴᐅᒄ᙮ ᒐᒂᓐ ᐛᒋ ᐊᑲ ᒋ ᓂᔅᑐᑎᒪᒄ ᑕᓐ ᐊ ᐃᔅᒋᔄᔭᓐ ? ᓇᒪ ᒋ ᐎ ᓂᓇᐃᑕᓇᐛᐤ ᑕᓐ ᐊ ᐃᓯ ᒋᔅᑯᑎᒪᒐᔭᓐ ᐊᐅᑯᓐ ᐛᒋ ᐊᑲ ᓂᔅᑐᑎᒪᒄ᙮ ᒥᒋᒥᓂᑐᐤ ᐊᐅᒄ ᐛᑕᐎᔭᒄ, ᐊᓂᔭ ᐊ ᐃᓯ ᓂᑐᐛᔨᒥᑕᒄ ᒐᒋ ᐃᓯ ᒥᒋᑐᑎᒺᒄ ᐊᐅᑯᓐ ᒥᒄ ᐛ ᐃᑐᑎᒪᒄ᙮ ᒧᔅ ᒋ ᓂᐸᐃᐛᐤ ᑲ ᐃᔅᐱᔅ ᑎᑯᓂᔨᒡ ᐅᔭ ᐊᔅᒋᔪᐤ᙮ ᓇᒪ ᓂᑕ ᐅᒋ ᓂᑐᐛᔨᑎᒻ ᑯᐃᔅᒄ ᒐᒋ ᐃᓯ ᐎᑕᑭᓄᐎᒡ ᒐᒂᔪᐤ ᐛᔅ ᓇᒪ ᓇᔅᒡ ᑎᑯᓂᔪᐤ ᑕᑈᐅᓂᔪᐤ ᐊᓐᑕ ᐊ ᑕᑦ᙮ ᒧᔅ ᑭᑭᒋᔭᐤ ᐛᔅ ᐊᐅᑯᓐ ᒋᒋᐛ ᐊ ᐃᑕᑎᓯᑦ, ᐊᐅᒄ ᒪᒃ ᐊᓐ ᑕᑈ ᐛᐅᑕᐎᑐᑕᑯᑦ ᐊᓂᔭᔪᐛ ᑲ ᑭᑭᒋᔭᔨᒋ᙮ ᓂᔾ ᒪᒃ ᒧᔅ ᑯᐃᔅᒄ ᓂᑦ ᐃᔅᒋᔄᓐ ᐊᐅᒄ ᒪᒃ ᐊᓐ ᐛᒋ ᐊᑲ ᑕᑈᑐᐅᔭᒄ᙮ ᓇᒪ ᐛᐛᒡ ᐸᐃᒄ ᐊᓐᑕ ᐊ ᑎᓯᔭᒄ ᒋᑭ ᒋ ᐎᑕᓇᐛᐤ ᑲ ᒥᒋᑐᑎᒧᐛᓇ᙮ ᑯᐃᔅᒄ ᒪᒃ ᒧᔅ ᐊ ᐃᔅᒋᔄᔭᓐ ᒐᒂᓐ᙮ ᒐᒂᓐ ᒪᒃ ᐛᒋ ᐊᑲ ᒋ ᑕᑈᑐᐅᔭᒄ ? ᐊᓐ ᐊᐛᓐ ᒋᓴᒪᓂᑐᐛ ᐊ ᑕᔨᒋ ᑲ ᐅᒋᑦ ᓂᑐᑎᒻ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ ᒋᔨᐛᐤ ᒪᒃ ᓇᒪ ᒋᓴᒪᓂᑐᐤ ᐊ ᑕᑦ ᒋ ᐅᒋᓇᐛᐤ ᐊᐅᑯᓐ ᐛᒋ ᐊᑲ ᓂᑐᑎᒪᒄ᙮” ᐊᔪᐅᒄ ᐅᔭ ᑲ ᐃᔅᒋᔄᑦ ᒋᓴᔅ᙮

ᐊᓐᒡ ᒪᒃ ᒍᐤ ᐃᔪᒡ ᒋ ᐃᑕᐅᒡ ᐊᓂᔭ ᒋᓴᓴ, “ᓂᒋ ᑕᑈᓇᓐ ᑲ ᐃᔅᒋᔄᔭᒡ ᓴᒪᕆᔭ ᐊ ᐅᒋᔨᓐ ᑭᔭ ᐊ ᐱᒋᔅᑲᔅᒃ ᒥᒋ ᐊᒐᐧᒄ ?”
ᒋᓴᔅ ᒪᒃ ᒋ ᐃᑕᐤ, “ᓇᒪ ᓂ ᐱᒋᔅᑲᒄ ᒥᒋ ᐊᒐᐧᒄ᙮ ᓂ ᒋᔅᑕᔨᒪᐤ ᓄᑕᐎᔾ ᒥᒄ ᒪᒃ ᒋᔨᐛᐤ ᓇᒪ ᒋ ᒋᔅᑕᔨᒥᓇᐛᐤ ᓂᔾ᙮ ᓇᒪ ᓂ ᓇᓂᑐᐛᔨᑕᓐ ᑕᓐᑕ ᒐᒋ ᐅᒋ ᒋᔅᑕᔨᒥᑯᔭᓐ᙮ ᒥᒄ ᒪᒃ ᑕᐤ ᐊᐛᓐ ᐊ ᓂᑐᐛᔨᑕᐧᒃ ᒐᒋ ᒋᔅᑕᔨᒥᑯᐅᒡ, ᐎᔾ ᒪᒃ ᐊᐅᒄ ᑕᐸᔅᑯᓇᑦ ᐊᓂᔭ ᐊᐛᔪᐛ ᐊᑲ ᒋᔅᑕᔨᒥᔨᒋ᙮ ᑯᐃᔅᒄ ᒋ ᐎᑎᒪᑎᓇᐛᐤ, ᐊᓐ ᐊᐛᓐ ᒐ ᓂᓇᐃᑎᒧᒂ ᑕᓐ ᐊ ᐃᔅᒋᔄᐅᒡ ᓇᒪ ᓂᑕ ᒋᑭ ᐅᒋ ᓂᐳᐤ᙮”
ᐊᑯ ᐊᓂᔭᔪᐛ ᒍᐤ ᐃᔪᐛ ᑲ ᐃᑎᑯᑦ, “ᑭᔭ ᒋᔭᔅᑎᓇᐅᔭᒡ, ᑕᑈ ᐊ ᐱᒋᔅᑲᔅᒃ ᒥᒋ ᐊᒐᐧᒄ᙮ ᐊᑉᕋᐊᒻ ᒋ ᓂᐳᐤ ᒪᒃ ᐊᓐᒡ ᐅᒋᔅᒋᐛᐃᒐᓱᒡ ᒋ ᓂᐳᐅᒡ᙮ ᒋᔾ ᒪᒃ ᐊ ᐃᔅᒋᔄᔨᓐ ᐊᓐ ᐊᐛᓐ ᒐ ᓂᓇᐃᑎᒧᒂ ᑕᓐ ᐊ ᐃᔅᒋᔄᐅᒡ ᓇᒪ ᓂᑕ ᒋᑭ ᐅᒋ ᓂᐳᐤ᙮ ᒋᑦ ᐃᑕᔨᑕᓐ ᐊ ᒋᔾ ᒪᐅᒡ ᐊ ᒋᔅᑕᔨᑕᑯᓯᔨᓐ ᐃᔅᐱᔅ ᐊᑉᕋᐊᒻ ? ᐊᑉᕋᐊᒻ ᒋ ᓂᐳᐤ ᑭᔭ ᐊᓐᒡ ᐅᒋᔅᒋᐛᐃᒐᓱᒡ ᒋ ᓂᐳᐅᒡ, ᐊᐛᓐ ᒪᒃ ᒋᔾ ᐊ ᐃᑕᔨᒥᓱᔨᓐ ?”
ᒋᓴᔅ ᒂ ᐎᑎᒧᐛᑦ ᐊ ᐃᑕᑦ, “ᓂᔾ ᒐᔅᑕᔨᑕᑯᐃᑎᓱᔭᓇ ᓇᒪ ᓇᔅᒡ ᒐᒂᓐ ᒋᑭ ᐅᒋ ᐃᓯᓇᑯᓐ ᐊᓐ ᐊ ᒋᔅᑕᔨᑕᑯᐃᑎᓱᔭᓐ᙮ ᓄᑕᐎᔾ ᐊᐅᒄ ᒐᔅᑕᔨᑕᑯᐃᑦ, ᐊᓐ ᑲ ᐃᔅᒋᔄᔭᒄ ᐊ ᐅᒋᓴᒪᓂᑐᒥᔭᒄ᙮ ᓇᒪ ᓂᑕ ᒋ ᐅᒋ ᒋᔅᒐᔨᒪᐛᐤ ᒥᒄ ᒪᒃ ᓂᔾ ᓂ ᒋᔅᒐᔨᒪᐤ᙮ ᐃᔅᒋᔄᔭᓇ ᒪᒃ ᐊᑲ ᒋᔅᒐᔨᒥᒃ, ᓂᑭ ᑭᑭᒋᔭᓐ ᒧᔭᒻ ᒋᔨᐛᐤ ᐊ ᐃᓯ ᑭᑭᒋᔭᔭᒄ᙮ ᒥᒄ ᒪᒃ ᓂ ᒋᔅᒐᔨᒪᐤ ᑭᔭ ᓂᓇᐃᑎᒺᓐ ᐅᑦ ᐃᔨᒧᐅᓐ᙮ ᐊᓂᔭ ᒍᑕᐎᓄᐤ ᐊᑉᕋᐊᒻ ᒋ ᒧᒋᒐᔨᑎᒻ ᐊᒋ ᒋᔅᒐᔨᑕᐧᒃ ᒐ ᐛᐸᑕᐧᒃ ᓂᒋᓯᑲᒥᔪᐤ᙮ ᒋ ᐛᐸᑎᒻ, ᒋ ᒥᔽᔨᑎᒻ ᒪᒃ᙮”
ᐊᑯ ᐊᓐᒡ ᒍᐤ ᐃᔪᒡ ᒂ ᐃᑕᒡ, “ᓇᒪ ᐛᐛᒡ ᐱᑕᑕᒡ ᒋ ᑕᑐᔪᐛ ᐳᓇᓯᓐ, ᑕᑈ ᐊ ᔅᒋ ᐛᐱᒪᐤ ᐊᑉᕋᐊᒻ ?”
ᒋᓴᔅ ᒂ ᐃᑕᑦ, “ᑯᐃᔅᒄ ᒋ ᐎᑎᒪᑎᓇᐛᐤ, ᐊᔅᒄ ᐊᑲ ᐅᒋ ᐱᒪᑎᓯᑦ ᐊᑉᕋᐊᒻ, ᓴᔅ ᓂᒋ ᑕᓐ᙮”
ᐊᑯ ᑲ ᒪᒧᓴᒋᓇᒡ ᐊᓯᓂᔭ ᒐ ᐸᐱᒧᓯᓇᑕᐛᒡ᙮ ᒥᒄ ᒪᒃ ᒋᓴᔅ ᒋ ᑲᓱᔅᑐᐛᐤ ᐊᑯ ᑲ ᐎᐎᑦ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮

گوێگرتن لە ᒠᓐ 8