The Kisi Old Testament

Kisi Bible © Bible Society in Liberia, 2015.

Mi̍ Mɛ̄lɛ̄ka̍ Ya̍a̍wɛ̄ɛ̄ chɔ̍mnu᷄ŋ nāa̍ E̍bīlāha᷅m chu̍a̍ nāa̍ nda̍ wa̍ īchāli̍ o̍ fo̍ndāŋ yɔ̄mīī tɔ̍ɔ̍ma̍a̍ wa̍, po̍ pi᷅lɛ̍ dīōla̍ŋ āā, Ma̍mi̍lūē fo̍ndāŋ ndɔ̄ɔ̍. E̍bīlāha᷅m wa̍ īchāli̍ o̍ tɛ̍ndīi̍ ndɔ̄ɔ̍ hɔ̄lndɔ̄, a̍ pāa̍le̍ ka̍lāle̍ŋ. Mɛ̄ɛ̍ o̍ chu̍a̍ hɔ̄lla̍, mbo̍ chā wāŋ pīāāndūa̍a̍ īsīsi̍ ndu̍ lāchī nda̍ ya̍a̍. Chɔ̄ɔ̍ nda̍, mbo̍ cha᷄ŋ nya̍, nāa̍ o̍ wa̍ īchāli̍ o̍ tɛ̍ndɛ̄i̍ ndɔ̄ɔ̍ hɔ̄lndɔ̄ wa̍. Mbo̍ kūā mbo̍ kɔ̍ tu̍ndu᷄ŋ lɛ̄ŋ nda̍ o̍ lābɛ̄ŋgu̍ ni̍ŋ. Mbo̍ dīmī āā, “Lā hi̍a̍ū le̍nde̍ le̍. Lā cha᷄l o̍ wūndu̍a̍ŋ o̍ yɔ̄mndo̍ bɛ̄ŋgu̍ lā pɛ̄ŋgi̍. I̍ cho̍ lākɔ̄ mī chu̍ū nya̍ mɛ̄ŋnda̍ŋ mī lā pūlū pēlo᷄ŋ. Lā tōsa̍ tōnya̍ mi̍ lā kēī o̍ ya̍ lo̍. Lā cha᷄l pɔ̍ɔ̍. Mɛ̄ɛ̍ mī to̍o̍si̍a̍l nya̍ nyɛ̄ dīāā pɔ̄mbɔ̄ mī lā dē, ko̍ŋ ke᷅ nya̍ yōōmūmā pɔ̄mbɔ̄, mī lā hīōū.”
Ma̍ dīmūl E̍bīlāha᷅m āā, “Bālā tīɔ̍ɔ̍ŋ, ŋ̄ chɛ᷄l. Kɔ̍.”
Mi̍ E̍bīlāha᷅m kūā chɔ̍ chɔ̍ o̍ tɛ̍ndɛ̄i̍yo̍ ni᷄ŋ nāa̍ Se̍lūā chu̍a̍. Mbo̍ kɔ̍ di̍mūl ndu̍ āā, “Tu̍u̍ ko̍lō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍, nyɛ̄ tūwāa̍ lē yāa̍, mā lōm bēe̍dīi̍yo̍ chɔ̍ chɔ̍.” Mbo̍ kūā chɔ̍ chɔ̍ nāa̍ nāūwāā ndūa̍a̍ cho̍ wa̍, mbo̍ bīī nāū fɔ̍ŋndɔ̍ɔ̍ o̍ che̍lu̍l nyɛ̄ kɛ̄ndɛ̍ī yo̍, mbo̍ kē bu̍ɛ̍īyo̍ ō pīlɛ̍. Mi̍ po̍ bu̍ɛ̍īyo̍ kūā chɔ̍ chɔ̍ mbo̍ kɔ̍ di̍ī mbo̍ sīāŋ. Ma̍ bɛ̄ɛ̄ndīāā nyɛ̄ dīa̍a̍ ma̍ hūŋ a̍ ndu̍, lātūlu̍ a̍ mɛ̄ɛ̄mā nāūwa̍ŋ, mā līīmīa̍ŋnda̍ŋ, a̍ mā pe̍le̍ pe̍li̍a̍ŋ. Mi̍ E̍bīlāha᷅m chu̍ū mīālāā ya̍a̍wa̍ ha̍ā. Ā wa̍ nyɛ̄ dīa̍a̍ dīo̍o̍, mi̍ E̍bīlāha᷅m si᷅m nda̍ īkɛ̄i̍.
Ma̍ nyūnā E̍bīlāha᷅m āā, “Ɔ̍ɔ̄ Se̍lūā la̍a̍ nu̍m?”
Mbo̍ dīmūl nda̍ āā, “Ō chō o̍ tɛ̍ndɛ̄i̍yo̍ ni᷄ŋ.”
O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “I̍ cho̍ mīīŋgū na̍nu᷄ŋ nya̍lāsīāŋ pɛ̄ŋgu̍ wa̍ā nu̍a̍ā kpe̍e̍kpe̍i̍, ndu̍yɛ̍, Se̍lūā la̍a̍ nu̍m chō pōo̍ vīōlɔ̄ɔ̄.”
Se̍lūā wa̍ īsīsi̍ E̍bīlāha᷅m kɔ̄ɔ̄lī o̍ dīō mbō yāŋ ni᷅la̍ŋ. Ndu̍yɛ̍, E̍bīlāha᷅m nda̍ Se̍lūā nda̍ a̍a̍ yu̍wa̍ ni᷅ŋ ta̍u̍. Se̍lūā ndu̍ o̍o̍ hi̍o̍ū ni᷅ŋ te̍le̍ŋ vi̍a̍lāā. Mɛ̄ɛ̍ o̍ tu̍e̍ī nyɛ̍ di̍mi̍ŋ a̍ ndu̍ o̍kɔ̄ɔ̄ wo̍, mbo̍ mām. Mbo̍ dīmī āā, “Ya̍ yu̍wa̍ ni᷅ŋ ho̍ō wo̍ ya̍ vi̍a̍lū vɛ̍lɛ̄ ni̍? Ya̍ ye̍e̍mā vɛ̍lɛ̄ sūɛ̍i̍ wānā pɔ̍nɔ̍ɔ̍ ni̍. Pɔ̍nɔ̍ nī ka̍lāa̍ bɛ̍ɛ̍ ndu̍ yu̍wa̍ ni᷅ŋ.”
Mi̍ Mɛ̄lɛ̄ka̍ Ya̍a̍wɛ̄ɛ̄ nyu̍nā E̍bīlāha᷅m āā, “Vɛ̄ mi̍ Se̍lūā ma᷅m? Vɛ̄ mbo̍ dīmī āā, ‘Ya̍ yu̍wa̍ ni᷄ŋ ho̍ō wo̍, vi̍a̍lū vɛ̍lɛ̄ ni̍?’ Nyɛ̄ o̍ nyɛ̄ cho̍ mī ya̍ Mɛ̄lɛ̄ka̍ Ya̍a̍wɛ̄ɛ̄ I̍ bu̍mba̍ tōsā le̍. I̍ cho̍ mīīŋgū na̍nu᷄ŋ a̍ pɛ̄ŋgo̍o̍ ho̍ō nyīlāsīāŋ. Ndu̍yɛ̍, tē bōōndi̍i̍ kpe̍e̍kpe̍i̍ i̍ nɔ̍ le̍ yɔ̄nɔ᷄ŋndo̍ ve̍ ī fūūlu̍u̍ pɛ̍, Se̍lūā cho̍ pōo̍ vīōlɔ̄ɔ̄ mɛ̄ɛ̍ ya̍ di̍mi̍ yɛ̍.”
Kɛ̍ sīōōŋnde̍ wa̍ Se̍lūā, le̍ he̍ī, mbo̍ vīīnu᷄ŋ āā, “I̍ me̍m te̍.”
Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ dīmī āā, “Ma̍ mām.”

O̍ ko̍ŋ, mi̍ pūa̍a̍ ya̍a̍wa̍ ha̍ā ā cha᷄ŋ kɔ̍la̍ŋ. Ma̍ sīm nāa̍ te̍māa̍ ma̍ mɛ̄ɛ̄ndīa̍ŋ So̍dɔ̄m. Kɔ̄lā nda̍ wa̍ la̍ŋ, mi̍ E̍bīlāha᷅m ku̍ā nda̍ līīlāa̍. Mi̍ Mɛ̄lɛ̄ka̍ Ya̍a̍wɛ̄ɛ̄ di̍mī āā, “Nyɛ̄ ya̍ I̍ cho̍ hūnɔ̄ɔ̄ tōsā wo̍, I̍ cho̍ E̍bīlāha᷅m ndu̍ vīŋ te̍. Kāni̍ fu̍u̍le̍, pūlāle̍ E̍bīlāha᷅m nde̍ŋ lē chō sīmnɔ᷄ŋ ka̍a̍le̍ bɛ̍ndū. Ndu̍yɛ̍, o̍ ndu̍ ni̍ŋ sa̍na̍a̍ ya̍ I̍ cho̍ kāa̍la̍ŋ kpo̍u̍ o̍ chi̍e̍ēŋndo̍ ni᷄ŋ sa̍lā dɔ̄wɔ̄ɔ̄ ni̍. I̍ cho̍ ndu̍ vīŋ te̍, kāni̍ fu̍u̍le̍, I̍ hɛ̍li̍ ndu̍ le̍ mbō dīmu̍l chūāūwāā ndūa̍a̍, a̍ chūāūwāā ndūāā māmāa̍, mā tōsa̍ sūɛ̍i̍ cho̍ sa̍kpō ndu̍yɛ̍, mī ī wā sa̍na̍a̍ ya̍ o̍ hɔ̄l le̍. Tē he̍ī yɔ̄nu̍ŋ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ to̍sa̍ nyɛ̄ o̍ nyɛ̄ ya̍ I̍ chu̍e̍l ndu̍ būŋgɛ̄i̍.”
O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ di̍mūl E̍bīlāha᷅m āā, “Tɔ̍ɔ̍ chō ya̍ kōmāllo̍ kpe̍e̍kpe̍i̍ a̍ dɛ̍nɛ̍ wɔ̍ɔ̍ŋ wāŋnda̍ So̍dɔ̄m a̍ Kōmo̍o̍lūā o̍kɔ̄ɔ̄. Yɔ̄ŋndā ndāla̍ wɔ̍ɔ̍ŋnda̍ŋ lā chō lā bɔ̄ɔ̍. Le̍la̍ŋ, I̍ cho̍ lākɔ̄ mī kɔ̍ chɔ̄ tē mɛ̄ɛ̍ tɔ̍ɔ̍ chō ya̍ kōmāllo̍ yɛ̍, tē le̍nde̍ i̍ cho̍ lēkɛ̍ndɛ̍ī ni̍. Tē ī cho̍ le̍nde̍ le̍, I̍ si̍na̍ vɛ̄lɛ̄.”
Mi̍ pūa̍a̍ ŋīɔ̍ɔ̍ŋnda̍ ā māl ma̍ kūā bā So̍dɔ̄mndo̍. Kɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ ndu̍ lo᷄ nda̍ E̍bīlāha᷅m. Mi̍ E̍bīlāha᷅m sɔ̍ɔ̍ŋgūū Mɛ̄lɛ̄ka̍ īkɛ̄i̍. Mbo̍ nyūnā ndu̍ āā, “Mɛ̄lɛ̄ka̍, bāā le̍ wānāā dɛ̍nɛ̍ wɔ̍ɔ̍ŋnda̍, mā mɔ̍sɔ̍ŋa̍ wānāa̍ cho̍ sa̍kpō nu̍m o̍ hɔ̄l la̍ dīyɔ̄ɔ̄ nda̍ nda̍ā? Te̍ ō wa̍ yɛ̄ mī wānāā sa̍kpūa̍a̍ ŋ̄wāŋ be̍le̍-ŋu̍ɛ̍ɛ̍nu̍ a̍ wa̍ o̍ chi̍e̍e̍ bɛ̍ndōo̍ ho̍ō ni᷄ŋ, bāā mā tɛ̍ɛ̍mbu̍u̍ ndu̍, a̍ chi̍i̍ndīāā ndu̍ le̍ wānāā sa̍kpūa̍a̍ cho̍ lo̍ŋ nda̍ le̍? Mbɔ̄ ke̍ŋ kɔ̍ŋ po̍lo̍ŋ. A̍ mɔ̍sɔ̄ŋā wa̍nāā sa̍kpūa̍a̍ dīū nda̍ wānāā yɔ̄ŋ wɔ̄ɔ̍ŋnda̍ le̍. Tē ke̍ŋ yɔ̍nu̍ŋ pɛ̍, mɛ̄ɛ̍ wānāā sa̍kpūa̍a̍ ni̍ a̍ wānāā yɔ̄ŋ wɔ̄ɔ̍ŋnda̍, mɛ̄ɛ̍ a̍ chu̍a̍ māchūāā nda̍ nyɛ̄ pīlɛ̍. Nūm yāma̍nɔ̄ɔ̍ le̍ chi̍e̍ēŋndo̍ kpo̍u̍ ā chō sūɛ̍i̍ cho̍ sa̍kpō ve̍ tōsā.”
Mi̍ Mɛ̄lɛ̄ka̍ Ya̍a̍wɛ̄ɛ̄ dīmī āā, “Tē I̍ sa̍a̍lu̍ŋ wa̍nāā sa̍kpūa̍a̍ ŋ̄wāŋ be̍le̍-ŋu̍ɛ̍ɛ̍nu̍ So̍dɔ̄m chi̍e̍e̍ pɛ̍, I̍ chi̍i̍ndi̍a̍a̍ ndu̍ le̍ nda̍.”
Mi̍ E̍bīlāha᷅m di̍mī āā, “Ya̍ pu̍u̍lū fo̍ndōo̍ ho̍ō, mɛ̄ɛ̍ ya̍ I̍ bi̍ī kɔ̄llo̍ mi̍ su̍a̍ā nāa̍ nūm Mɛ̄lɛ̄ka̍ Ya̍a̍wɛ̄ɛ̄ chu̍a̍ yɛ̍, I̍ chɔ̍ɔ̍lū wɔ̍ ni̍ko̍ i̍sɔ̍ɔ̍. Tē ō wa̍ yɛ̄ mā wa̍ be̍le̍-hi̍ɔ̍ɔ̍lu̍ a̍ wānāā ŋūɛ̍ɛ̍nu̍, bāā le̍ wānāā ŋu̍ɛ̍ɛ̍nu̍a̍a̍ lo᷅ ka̍ŋ le̍ chīŋāa̍ be̍le̍-ŋu̍ɛ̍ɛ̍nu̍ wa̍ mā tɛ̍ɛ̍mbu̍u̍ chi̍o̍o̍ kpo̍u̍?”
Mi̍ Mɛ̄lɛ̄ka̍ Ya̍a̍wɛ̄ɛ̄ mu̍lī āā, “Tē wānāā sa̍kpūa̍a̍ ā wa̍ ŋ̄wāŋ be̍le̍-hi̍ɔ̍ɔ̍lu̍ a̍ wānāā ŋūɛ̍ɛ̍nu̍ pɛ̍, le̍ nda̍ I̍ tɛ̍ɛ̍mbūū chi̍o̍o̍ le̍.”
Mi̍ E̍bīlāha᷅m di̍mī vɛ̄lɛ̄ āā, “Tē ā wa̍ yɛ̄ ŋ̄wāŋ be̍le̍-hi̍ɔ̍ɔ̍lu̍ ko̍ni̍?”
Mbo̍ dīmī āā, “Tē ā wa̍ ŋ̄wāŋ be̍le̍-hi̍ɔ̍ɔ̍lu̍ pɛ̍, le̍ nda̍ I̍ tɛ̍ɛ̍mbūū ndu̍ le̍.”
Mi̍ E̍bīlāha᷅m di̍mī vɛ̄lɛ̄ āā, “Yāndi̍i̍ Mɛ̄lɛ̄ka̍ Ya̍a̍wɛ̄ɛ̄, du̍a̍u̍nu᷄ŋ tu̍mbe̍ le̍, ke̍ ya̍ fo̍ndāa̍ mī chɔ̍ɔ̍lu̍ īsɔ̄ɔ̍. Tē ā wa̍ yɛ̄ be̍le̍-ya̍a̍?”
Mi̍ Mɛ̄lɛ̄ka̍ dīmī āā, “Tē ā wa̍ be̍le̍-ya̍a̍ pɛ̍, I̍ tɛ̍ɛ̍mbūū ndu̍ le̍.”
Mi̍ E̍bīlāha᷅m di̍mī āā, “Mɛ̄ɛ̍ ya̍ bi̍ī ni᷅ŋ kɔ̄llo̍ mi̍ sūa̍a̍ nāa̍ nūm Mɛ̄lɛ̄ka̍ Ya̍a̍wɛ̄ɛ̄ chu̍a̍ yɛ̍, I̍ su̍a̍ā wɔ̍ vɛ̄lɛ̄. Tē ā wa̍ yɛ̄ bi̍di̍i̍ŋ, bāā mā tɛ̍ɛ̍mbu̍u̍ chi̍o̍o̍ le̍ mɛ̄ɛ̍ nda̍ chō bi̍di̍i̍ŋ ko̍ni̍ yɛ̍?”
Mbo̍ dīmī āā, “Ā wa̍ bi̍di̍i̍ŋ pɛ̍, le̍ nda̍ I̍ tɛ̍ɛ̍mbūū ndu̍ le̍.”
O̍ ko̍ŋ kɔ̍ɔ̍lī, mi̍ E̍bīlāha᷅m di̍mī āā, “A̍ yāndi̍i̍ Mɛ̄lɛ̄ka̍ Ya̍a̍wɛ̄ɛ̄ du̍a̍u̍nu᷄ŋ tu̍mbe̍ a̍ ya̍ le̍, I̍ nyu̍nā wɔ̍ ni᷅ŋ lē pīlɛ̍ kpe̍. Tē ō wa̍ yɛ̄ mī wānāā sa̍kpūa̍a̍ ā wa̍ lo̍ŋ ŋ̍wa᷅ŋ tɔ̍?”
Mbo̍ dīmī āā, “Ā wa̍ lo̍ŋ ŋ̍wa᷅ŋ tɔ̍ pɛ̍, le̍ nda̍ I̍ tɛ̍ɛ̍mbūū chi̍o̍o̍ le̍.” Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ chi̍i̍ sūūki̍āŋndo̍ nda̍ E̍bīlāha᷅m, mbo̍ kūānūŋ. O̍ ko̍ŋ kɔ̍ɔ̍lī, mi̍ E̍bīlāha᷅m mi̍i̍ŋgū o̍ ndu̍ lo̍.

گوێگرتن لە Chɛ̄nɛ̍se̍ē 18