 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

دَبَّاجِ لَدّٜ طِ جَوْمِرَاوٛ اَللَّه تَغِ ڢُو، مبٛودِ ࢡُرِ طِ ࢨٛيْرٜ؞ ندِ ࢨَمِ دٜبّٛ‏: «غٛونغَ اَللَّه وِعِ تَا عٛنْ ࢩَامَ ࢡِࢡّٜ لٜطّٜ جَرْنٜ ڢُو نَ؟» دٜبّٛ جَابِ مبٛودِ‏: «مِنْ مبَاوَنْ ࢩَامُغٛ ࢡِࢡّٜ لٜطّٜ جَرْنٜ؞ عَمَّا کٛ لَارَنِ ࢡِࢡّٜ لٜکِّ غٛنْکِ شَکَ جَرْنٜ کَمْ، اَللَّه وِعِ‏: تَا ࢩَامٜ طٜ، تَا مٜىٰمٜ طٜ بٛو، نغَمْ تَا مَايٛنْ‏!» مبٛودِ وِعِ دٜبّٛ‏: «وٛودَا‏! عٛنْ مَايَتَا‏! عَمَّا اَللَّه عَنْدِ، ࢩَلَادٜ ندٜ عٛنْ ࢩَامِ طٜ، غِتٜ مٛوطٛنْ مَࢡِّتِتّٛ، عٛنْ لَاتٛتٛ بَنَ اَللَّه، عٛنْ عَنْدَنْ کٛ وٛنِ بٛوطُّمْ عٜ کَلُّطُمْ؞» دٜبّٛ يِعِ ࢡِࢡّٜ لٜکِّ مَنْ وٜلَنِ ࢩَامُغٛ، طٜ ݠٛتَّنِ غِتٜ، طٜ مبٛوطِ مَسِنْ حَا حٛکُّغٛ حَکِّيلٛ؞ عٛحٛوعِ حَا ࢡِࢡّٜ مَاکِ، عٛࢩَامِ، ندٜنْ عٛحٛکِّ غٛرِيکٛ مٛ طٛنّٛ کٛمْبِ مَاکٛ، غٛرْکٛ بٛو ࢩَامِ؞ لَوْ غِتٜ مَࢡّٜ مَࢡِّتِ، ࢡٜعَنْدِتِ ࢡٜ تٜمْبُࢡٜ؞ نغَمْ مَاجُمْ ࢡٜمبَمِ حَاکٛوجِ عِبِّ، ࢡٜمبَطِ طُمْ بَنَ غُدٜ؞
ندٜ حِيرِ، ࢡٜنَنِ سٛࢩٛ، اَللَّه جَوْمِرَاوٛ طٛنْ وَانْشَ ندٜرْ جَرْنٜ؞ غٛرْکٛ عٜ دٜبّٛ مُوطُمْ ࢩُکِّ يٜىٰسٛ اَللَّه جَوْمِرَاوٛ شَکَ لٜطّٜ جَرْنٜ؞ جَوْمِرَاوٛ اَللَّه عٜوْنِ نٜطّٛ، ࢨَمِمٛ‏: «تٛيْ نغٛنْطَا؟» نٜطّٛ جَابِ‏: «مِنَنِ سٛࢩٛ مَاطَ ندٜرْ جَرْنٜ؞ مِحُلْتٛرِ، نغَمْ مِتٜمْبٛ؞ نغَمْ مَاجُمْ ࢩُکِّيمِ؞» اَللَّه جَوْمِرَاوٛ ࢨَمِ‏: «مٛيْ عَنْدِنْ مَ عَتٜمْبٛ؟ مَلَّ عَࢩَامِ ࢡِࢡّٜ لٜکِّ کِ کَطْنٛمَامِ ࢩَامُغٛ غٛ؟» نٜطّٛ جَابِ‏: «دٜبّٛ غٛنْدُطٛ بٜى عَمْ، مٛ ندٛکُّطَامِ، حٛکِّ يَمْ ࢡِࢡّٜ لٜکِّ، مِࢩَامِ؞» اَللَّه جَوْمِرَاوٛ وِعِ دٜبّٛ‏: «نغَمْ طُمٜ مبَطَّا طُمْ؟» دٜبّٛ جَابِ‏: «مبٛودِ عٜسْتِ يَمْ، مِࢩَامِ؞» ندٜنْ اَللَّه جَوْمِرَاوٛ وِعِ مبٛودِ‏: «ندٜ عَوَطِ طُمْ، عَ نَالَاطٛ شَکَ دَبَّاجِ عٜ کُوجٜ لَدّٜ ڢُو؞ عَدَسٛتٛ دٛوْ رٜىٰدُ مَاطَ، عَࢩَامَنْ مبُلْوُلْدِ بَلْطٜ نغٜىٰندَمْ مَاطَ ڢُو؞ مِوَطَنْ کٛنَّاغُ حَکُّندٜ مَاطَ عٜ دٜبّٛ، حَکُّندٜ دَࢩْغٛلْ مَاطَ عٜ دَࢩْغٛلْ مَاکٛ؞ غٛطّٛ دَࢩْغٛلْ مَاکٛ نَمٜتٜ حٛورٜ، عَنْ بٛو عَنغَتَنْ مٛ تٜݠّٜرٜ؞» ندٜنْ عٛوِعِ دٜبّٛ‏: «مِطُطِّنَنْ لُووٜ دَࢩْکِ مَاطَ؞ عَدَࢩَنْ بٜى بٛنٜ؞ عَيٜنْوَنْ غٛنْدَلْ بٜى غٛرْکٛ مَاطَ، عَمَّا عٛلَامٛتٛ دٛوْ مَاطَ؞» ندٜنْ عٛوِعِ نٜطّٛ‏: «عَجَࢡَنِ دٜبّٛ مَاطَ، عَࢩَامِ ࢡِࢡّٜ لٜکِّ کِ کَطْنٛمَامِ ࢩَامُغٛ؞ نغَمْ دَلِيلَ مَاطَ مِنَالِ لٜسْدِ؞ بٜى بٛنٜ کٜࢡَتَ کٛ ࢩَامَ حَا مَارِ بَلْطٜ مَاطَ ڢُو؞ ندِ ڢُطْنَنْتٜ غِعٜ عٜ غِنغِلّٜ، عَࢩَامَنْ حَاکٛوجِ غٜسٜ؞ بٜى وُلْوٜىٰندٜ يٜىٰسٛ مَاطَ ࢩَامْرَتَ ࢩَامْدُ مَ، حَا تٛ عَلٛرْتَکٜ حَا مبُلْوُلْدِ، نغَمْ حَا مَارِ عَحٛوعَ؞ عَنْ عَ مبُلْوُلْدِ، حَا مبُلْوُلْدِ بٛو لٛرٛتٛطَ‏!»
نٜطّٛ عِنْدِ دٜبّٛ مُوطُمْ حَوَّ، بَنَ وِعْغٛ «غٜىٰتٛ»، نغَمْ کَنغْکٛ وٛنِ دَادَ يٜىٰطْࢡٜ ڢُو؞ جَوْمِرَاوٛ اَللَّه وَطَنِ ءَادَمُ عٜ دٜبّٛ مَاکٛ کٛلْتٜ لَرٜ، عٛࢡٛرْنِ ࢡٜ؞ عٛوِعِ‏: «ندَا، ندٜ نٜطّٛ لَاتَکٜ بَنَ غٛوتٛ مٜىٰطٜنْ، عٛعَنْدِ کٛ وٛنِ بٛوطُّمْ عٜ کَلُّطُمْ؞ جٛنْتَ کَمْ تَا عٛڢٛرْتَ جُنغٛ مَاکٛ، عٛحٛوعَ بٛو ࢡِࢡّٜ لٜکِّ نغٜىٰندَمْ؞ تٛ عٛࢩَامِ، عٛيٜىٰطَنْ حَا ڢٛرٛيْ؞» ندٜنْ جَوْمِرَاوٛ اَللَّه وُرْتِنِمٛ جَرْنٜ عَدْنِنْ، نغَمْ عٛرٜمٛيَ لٜسْدِ ندِ عٛحٛوعَنٛ عٜ مُوطُمْ؞ ࢡَاوٛ ندٜ عٛرِيوِمٛ، عٛدَرْنِ کٜرُبَعٜنْ حَا ڢُونَانغٜ جَرْنٜ عَدْنِنْ بٜى کَاڢَحِ طٜلْکَنْکِ بَنَ طٜمْنغَلْ يِيتٜ، کِ طٛنْ يِرْلَ ندٜرْ بَکٜىٰجٜ ڢُو، نغَمْ عَيْنُغٛ لَاوٛلْ جَحْرَنْنغٛلْ حَا لٜکِّ نغٜىٰندَمْ؞

گوێگرتن لە لَاتَانٛوجِ 3