Tuvin - 2011IBT-R (Bible) Non Drama

Tuvin - 2011 IBT-R (Bible) Drama

Адамның үре-салгалының дугайында чугаа бо-дур. Кижи амытанны чаяап тура, Бурган ону Бодунуң овур-хевири-биле кылган. Эр биле херээжен кижини чаяагаш, йөрээп каан. Оларны чаяагаш, оларга «кижи» деп атты берген.
Адам 130 харлыг турда, ооң овур-хевирин дөзеп-салгаан оглу төрүттүнген. Адам оглун Сиф деп адап алган. Сиф төрүттүнген соонда, Адам 800 чыл иштинде чурттаарга, ооң өске-даа оолдары, уруглары төрүттүнген. Адам 930 чыл чурттааш, өлүп калган.
Сиф 105 харлыг турда, ооң оглу Энос төрүттүнген. Энос төрүттүнген соонда, Сиф 807 чыл чурттаарга, ооң өске-даа оолдары, уруглары төрүттүнген. Сиф 912 чыл чурттааш, өлүп калган.
Энос 90 харлыг турда, ооң оглу Кайнан төрүттүнген. Кайнан төрүттүнген соонда, Энос 815 чыл иштинде чурттаарга, ооң өске-даа оолдары, уруглары төрүттүнген. Энос 905 чыл чурттааш, өлүп калган.
Кайнан 70 харлыг турда, ооң оглу Малелеил төрүттүнген. Малелеил төрүттүнген соонда, Кайнан 840 чыл иштинде чурттаарга, ооң өске-даа оолдары, уруглары төрүттүнген. Кайнан 910 чыл чурттааш, өлүп калган.
Малелеил 65 харлыг турда, ооң оглу Яред төрүттүнген. Яред төрүттүнген соонда, Малелеил 830 чыл иштинде чурттаарга, ооң өске-даа оолдары, уруглары төрүттүнген. Малелеил 895 чыл чурттааш, өлүп калган.
Яред 162 харлыг турда, ооң оглу Энох төрүттүнген. Энох төрүттүнген соонда, Яред 800 чыл иштинде чурттаарга, ооң өске-даа оолдары, уруглары төрүттүнген. Яред 962 чыл чурттааш, өлүп калган.
Энох 65 харлыг турда, ооң оглу Мафусал төрүттүнген. Мафусал төрүттүнген соонда, Энох 300 чыл дургузунда Бурганга бүзүрелдиг, дыңнангыр чурттаарга, ооң өске-даа оолдары, уруглары төрүттүнген. Энох 365 хар чурттаан. Ооң назыны ол хире болган-дыр. Энох Бурганга бүзүрелдиг, дыңнангыр чурттап чораан боорга, Бурган ону черден Бодунуң чанынче көжүрүп алган.
Мафусал 187 харлыг турда, ооң оглу Ламех төрүттүнген. Ламех төрүттүнген соонда, Мафусал 782 чыл иштинде чурттаарга, ооң өске-даа оолдары, уруглары төрүттүнген. Мафусал 969 чыл чурттааш, өлүп калган. Ламех 182 харлыында оолдуг болган. Ону Ной деп адап кааш: «Дээрги-Чаяакчыга каргаттырган чер кырынга бистиң кадыг ажыл-агыйлыг амыдыралывысты ол чиигедир» – дээн. Ной төрүттүнген соонда, Ламех 595 чыл иштинде чурттаарга, ооң өске-даа оолдары, уруглары төрүттүнген. Ламех 777 харлыында өлүп калган.
Ной 500 харлыг турда, ооң Сим, Хаам база Иафет деп оолдары төрүттүнген.

گوێگرتن لە Эге дөс 5