Cishingini: Uzuwakpani u Savu n Cishingini; n aba'in a na a Zagbai a Uzukpani New Testament

Uzuwakpani u Savu n Cishingini; n aba'in a na a Zagbai a Uzukpani

Kafu a yaꞋan aduniyan, Akaka a i ta̱ lo. Akaka a i ta̱ koɓolo n Ka̱shile, Akaka kpamu ili i te i ɗa n Ka̱shile. Wi ta̱ n Ka̱shile ali kafu ayin a̱ ugiti.
U yaꞋin ili ra̱ka̱ nannai, babu ili i na a yaꞋin i na u kpa̱ɗa̱i kuyaꞋan. Akaka a nam pa a ɗaɗa kumiꞋi ku wuma ra̱ka̱, ɗa wuma u nan lo u tuka̱i n kutashi u uma. Kutashi ku na ku tsa akana a̱ ka̱yimbi, ka̱yimbi ta na ka fuɗa ka̱ kimba̱ kutashi ka ba.
Vuma vi yoku ɗa, kula ku ni ku ɗa Yahaya, vuza na Ka̱shile ka̱ suki tsu kalingata ka̱ ni. U ta̱wa̱i kudana uma ili i na yi mayun a ukuna u kutashi adama a na uma e neke a̱ɗu. A̱yi a̱ ka̱ci ka̱ ni a̱yi ɗa kutashi ka ba, amma u ta̱wa̱ ta̱ kudana uma ili i mayun adama a kutashi ka. Kutashi ku mayun, ku na ki a̱ kutuka̱ n kutashi adama a yaba dem, ki ta̱ ɗe a̱ kuta̱wa̱ a aduniyan, gogo na ta na ku yawa ta̱ ɗe!
U ta̱wa̱i punu a aduniyan a na u yaꞋin, amma aduniyan e yeve yi ba. U ta̱wa̱i a iɗika i ni, amma uma a̱ ni a isa yi ba. Amma uma o yoku a isai ni, ali ɗa e nekei ni a̱ɗu e le. Ɗaɗa u nekei le utsura o okpo muku n Ka̱shile. Ana esheku e le a aduniyan a matsai le, u zuwa o okpo muku n Ka̱shile ba. Ka̱shile a̱ ka̱ci ka̱ ni ɗa u zuwai le o okpo muku n ni.
Akaka a o okpoi vuma ɗa u yongoi na n a̱tsu. Wi ta̱ ushani n kasingai koɓolo kpamu n ili i mayun. Ce ene ta̱ tsugbayin ci ni, tsu ɗa ta na wi isai adama a na a̱yi ɗa Maku ma̱ Ka̱shile endeꞋen.
Yahaya u danai ukuna u mayun adama a̱ ni, ɗa u salai, “A̱yi ɗa n yaꞋankai ɗa̱ kadanshi adama a̱ ni: ‘Vuza na n laꞋi umaci na a aduniyan u laꞋa mu ta̱ n tsugbayin adama a na wi ta̱ n wuma kafu a matsa mu.’ ” Adama a ucigi u gbayin u ni a kubana wa̱ tsu, wi ta̱ n kasingai a̱ tsu ra̱ka̱. U ci yaꞋansa ta̱ una̱singai a kubana a̱ ubuta̱ u tsu ayin dem. Uma a a isai Wila̱ adama a Musa, amma a isai kasingai m mayun kpamu adama e Yesu Kishi Kirisiti. Babu vuza na u saꞋwai kene Ka̱shile. Maku ma ɗaɗa endeꞋen, vuza na wi derere n Ka̱shile, ɗevu n Esheku kpamu, a̱yi u zuwa ta̱ uma e yeve ili i na Ka̱shile ko yotsoi mayin.


Aza e kelime a Ayahuda a Urishelima a̱ suki anan ganu vi yoku n aza a̱ kuɓa̱nka̱ ulinga a̱ A̱Ꞌisa̱ a Gbayin u Yahaya vuza na wi a kuyaꞋan kusumbu ka akucina. A bana e ece yi, “Avu ɗa vi ci yaꞋan ya?”
U iwain kushuku le, amma u dansai mejege, u danai, “Mpa ɗa Kishi ka ba.”
Ɗaɗa e ecei ni, “Avu ɗa baci Kirisiti Kishi ba, avu ɗa tamkpamu ya? Iliya ɗa vi?”
Wu ushuki, “A̱Ꞌa̱, mpa ɗa ba.”
E ecei ni, “Avu Keneki† ku uzagbi kaꞋa?”
Wu ushuki, “A̱Ꞌa̱, mpa Keneki kaꞋa ba.”
Ɗaɗa a danai, “Avu ɗa ya? Ushuku tsu, ka̱ta̱ ci ciya̱ tsu bana tsu dana aza a na a̱ suki tsu. Yayi vu danai avu vi?”
Wu ushuki le n ili i na keneki Ishaya u danai:
“Mpa ka̱la̱ka̱tsu e meɗevile e mere mu une,
‘Lapulai uye adama a Vuzavaguɗu.’ ”
Afarishi† ele ɗa a̱ suki alingata a. E ecei, “Avu ɗa baci Kishi ba, ko Iliya, ko Keneki ku uzagbi ba, yi ɗa̱i i zuwai ɗa vi yaꞋin kusumbu ka akucina tsu nam pa?”
Yahaya u danai le, “N yaꞋin kusumbu ka akucina† m mini, amma punu na a̱ ubuta̱ u koɓolo u nam pa vuza yoku ɗa vu na i yevei ba. A̱yi ɗa vuza na u kuta̱wa̱ ka̱ca̱pa̱ ka̱ va̱. N yawa ko n foɗo ataka a̱ ni ba.”
Ili i nam pa ra̱ka̱ i yaꞋan ta̱ a̱ likuci i Bataniya a kasana ko Kuɗolu ku Urdu a̱ ubuta̱ u na Yahaya wi a kuyaꞋanka uma kusumbu ka akucina.

Ana kayin ka asai, ɗa Yahaya we enei Yesu† a̱ kuta̱wa̱ kucina yi, Yahaya u danai, “Na va ɗaɗa Ma̱giri ma̱ Ka̱shile† ma na u tsu takpa unushi u uma punu a aduniyan. A̱yi ɗa vuza na n yaꞋin ɗe kadanshi ka̱ ni ana n danai wi lo a̱ kuta̱wa̱, ‘Vuza na n laꞋi umaci na aduniyan u laꞋa mu ta̱ n tsugbayin adama a na wi ta̱ n wuma kafu a matsa mu.’ Mi ishi n yeve a na a̱yi ɗa ba, amma mi ta̱ a kuyaꞋansa kusumbu ka akucina m mini adama a na n zuwa uma a Israila e yeve yi.”
Ɗaɗa Yahaya u danai, “Me enei Ayinviki a̱ Ka̱shile† a̱ uta̱i gaɗi tsu moɗoi ɗa ma̱ yikpa̱i a gaɗi vi ni ɗa ma shamgbai ɗe. Mi ishi n yeve a na a̱yi ɗa ba, amma ana Ka̱shile ka̱ suki mu n yaꞋansa kusumbu ka akucina m mini, ɗa u danai mu, ‘Ayin a na baci ve enei Ayinviki a̱ Ka̱shile a̱ kucipa̱ u vuza ɗa a shamgbai ɗe, a̱yi na lo va a̱yi ɗa vuza na vi a̱ kula̱nsa̱ va. A̱yi ɗa vuza na u ci yaꞋan kusumbu ka akucina n Ayinviki a̱ Ka̱shile.’ Me enei nannai u yaꞋin u Yesu. Adama a nannai, mi ta̱ a kudana ɗa̱ mayun a̱yi ɗa Maku ma̱ Ka̱shile.”

Ana kayin ka asai kpamu, Yahaya ɗe m mukumitoni† n ni n re a kuyaꞋanka uma kusumbu ka akucina kpamu, ɗa we enei Yesu a nwalu, ɗa u danai, “Indanai, Ma̱giri ma̱ Ka̱shile† ma na!”
Ana mukumitoni n re n nan lo a panai Yahaya u danai nannai, ɗa o tonoi Yesu. Ɗa Yesu u kpatalai ɗa we enei le o kutono yi, ɗa we ecei, “Yi ɗa̱i yi a̱ kula̱nsa̱?”
A̱ ushuki, “Rabbi, te vi o kuyongo?” (“Rabbi” ɗaɗa “Malum”.)
Wu ushuki, “Ta̱wa̱i ye ene.” (Ayin a nan lo a ɗaɗa derere n viyum vu na̱shi vu kanna.) A banai koɓolo n a̱yi ɗa e enei ubuta̱ wa, ɗa a shamgbai n a̱yi ali kanna ko kotsoi.
Makumitoni me te ma ɗaɗa Andarawu vangu vu Sima Biturusu. Ili i na Andarawu u yaꞋin gogo va lo i ɗaɗa u la̱nsa̱i vuza ni ɗa u danai ni, “Ce ene ta̱ Kishi ka!” (N Ciyahuda a danai “Kishi” ka ɗa kpamu e ci ɗeke “Kirisiti” derere ɗa wi n Cihelene.†) Ɗaɗa Andarawu u ɗikai Sima a kubana u Yesu.
Yesu wi indanai ni ɗa u danai, “Avu ɗa Sima. Esheku a̱ nu a ɗa Yahaya.† YaꞋan o bono e ɗeke wu Kefasu,” (“Kefasu” ɗaɗa kpamu “Biturusu”.)

Ana kayin ka asai kpamu, Yesu u cigai kubana a̱ Ga̱lili. U cinai Filibu ɗa u danai ni, “Tono mu.”
Besaida likuci i Filibu i ɗa yi ishi koɓolo n i Andarawu m Biturusu. Filibu u la̱nsa̱i Nataniya ɗa u danai ni, “Ci ciya̱ ta̱ vuma vu na Musa u ɗanakai tsu adama a̱ ni a̱ Wila̱. Eneki a kpamu a ɗana ta̱ adama a̱ ni. A̱yi ɗa Yesu, maku ma̱ Isuhu,† Nazara kpamu likuci i ni i ɗa.”
Amma Nataniya u danai Filibu, “Ili i singai yi ta̱ a̱ kuta̱ a Nazara?”
Filibu wu ushuki, “Ta̱wa̱i ye ene.”
Ana Yesu we enei Nataniya a̱ kuta̱wa̱ wa̱ ni, ɗa u danai, “Na ɗa matsukaya ma mayun mi Israila. A̱yi vuza vu kalyaꞋa ɗa ba.”
Nataniya we ecei, “Nini ɗa̱i vi yevei mu?”
Yesu wu ushuki, “Kafu Filibu u ɗeke wu, me enei wu ta̱ a̱ kumiꞋi ku maɗanga ma̱ ma̱biri.”
Ɗaɗa Nataniya u danai, “Malum, avu Maku ma̱ Ka̱shile maꞋa. Avu ɗa Mogono ma aza a Israila.”
Ɗa Yesu we ecei, “Vi neke ta̱ ka̱ɗu nu mpa adama a na n danai me enei wu ta̱ a maɗanga ma? Yi ta̱ e kene ili i na i laꞋi na m gbayin.”
Ɗa Yesu u danai le, “Mi ta̱ a kudana ɗa̱ mayun, yi ta̱ e kene gaɗi u ɓa̱yuwa̱i n alingata a̱ Ka̱shile a kukumba gaɗi n a̱ cipa̱i u Maku ma Vuma.”†

گوێگرتن لە Yahaya 1