Mateo 18
18
China ri lik k'o uwach
(Mr. 9:33-37; Lc. 9:46-48)
1Chupa k'u la' la q'ij, rutijo'n ri Jesús xeqib' ruk' y xkitz'onoj che:
—¿China ri más k'o uwach chupa rutaqanik ri Dios petinaq chila' chikaj? —xecha'. 2Ek'uchiri', ri Jesús xusik'ij jun ralko k'o'm y xuya chikinik'ajal rike.
3Xub'i'ij k'u chike:
—Paqatzij wi kamb'i'ij chiwe: We na kijalk'atij ta rib'inik isilab'ik cha' kixu'an pacha' raltaq ko ak'alab', na kixok ta ri' chupa rutaqanik ri Dios petinaq chila' chikaj. 4Jek'ula', china ri ku'an ch'uti'n che rib' pacha' wa ralko k'o'm, e lik k'o uwach ri' pa rutaqanik ri Dios. 5Yey china ri kuk'ul chupa ri nub'i' junoq na jinta uwach pacha' wa ralko k'o'm, e junam ruk' e in ri kinuk'ulu.
Ri q'atb'al tzij re ri Dios k'o pakiwi ri kakimin jun chik pa mak
(Mr. 9:42-48; Lc. 17:1-2)
6»China ri kaminow pa mak junoq chike wa ch'uti'q#18:6 “Ch'uti'q”: Kuk'il taq wa' ek'o ri na jinta kichuq'ab', ri na jinta kiwach o ri k'ak' xkikub'a' kik'u'x ruk' ri Jesús. kub'ul kik'u'x wuk', e ne más utz katzayab'ax b'i puqul juna nimalaj ka' re ke'em y kak'aq k'u b'i pa ri mar cha' kamuqutaj k'a chuxe'. 7¡Toq'o' kiwach ri tikawex ma lik k'o ri katzaqisan ke chupa ri na utz taj! Ma che ruwachulew lik k'o taq wa'. Pero ¡lik toq'o' k'u uwach ri jun kumin junoq chik pa mak, ma e kape ri q'atb'al tzij re ri Dios puwi'!
8»E uwari'che, we raq'ab' o rawaqan e katzaqisan awe pa mak, chaq'ata b'i y chawesaj b'i chawe. Ma xa ne kuya tob' at t'um o at jetz' katopon pa ri k'aslemal chila' chikaj, chwa ri k'o ukab'ichal raq'ab' y ukab'ichal rawaqan yey katk'aq b'i chi xib'alb'a' pa k'o wi ri aq' na jinta chi uchupik. 9Yey we rawach e katzaqisan awe pa mak, chawesaj b'i y chak'aqa b'i. Ma xa ne kuya tob' xa jun rawach katopon pa ri k'aslemal chila' chikaj, chwa ri k'o ukab'ichal rawach yey katk'aq b'i pa aq' chi xib'alb'a' re tijb'al k'ax.
Ri k'amb'al na'oj puwi ri b'exex sachinaq
(Lc. 15:3-7)
10»Mik'aq b'i uq'ij junoq chike wa e ch'uti'q kub'ul kik'u'x wuk'. Ma kamb'i'ij k'u chiwe, ri ángeles e chajal ke rike xaqi e k'o chwach ri Nuqaw Dios chila' chikaj. 11Ma Ralaxel Chikixo'l Tikawex xk'unik re keb'ukolob'ej ri e sachinaq. 12¿Sa' kich'ob' ri'ix ku'an juna achi we k'o jun ciento ub'exex yey kasach k'u junoq chike? ¿Na keb'uk'ol ta neb'a kan ri' ri noventa y nueve y ke'ek chwa ri juyub' che utzukuxik ri jun xsach kanoq? 13We xuriq k'ut, paqatzij wi kamb'i'ij chiwe: E más kaki'kot ruma ri jun b'exex chikiwa ri noventa y nueve na e ta sachinaq. 14Jek'uri'la', ri Nuqaw k'o chila' chikaj na karaj taj kasach junoq chike ri ch'uti'q kub'ul kik'u'x wuk'.
Su'anik kakuy umak jun chik
15»E uwari'che, we rawatz-achaq' ku'an ri na utz taj chawe, chatch'a't ruk' e la' itukel; chab'i'ij che sa' ri na utz taj u'anom chawe. We xatuta k'ut, ri' xakoj chi utzil chomal rawatz-achaq'. 16No'j we na xatuta taj, jat tanchi ruk'; chak'ama k'u b'i jun o ka'ib' awachb'i'il awuk' cha' jela' e keb' oxib' che utayik sa' ri kab'i'xik.#Dt. 19:15 17We na xeb'uta ta k'u wa keb' oxib', ek'uchiri' chatzijoj chikiwach rutinamit ri Dios. Yey we na xok ta k'u il chike wa', chi'ana k'u ri' che pacha' e kuk'il ri na keta'am ta uwach ri Dios y e kuk'il raj tz'onol puaq re tojonik.#18:17 “Raj tz'onol puaq re tojonik”: Kil “cobrador de impuestos” pa vocabulario. 18Paqatzij wi kamb'i'ij chiwe: Janipa ri kixim ri'ix wara che ruwachulew, kaximitaj chila' chikaj. Janipa ri kikir ri'ix wara che ruwachulew, kakiritaj chila' chikaj.#18:18 Mt. 16:19; Jn. 20:23 19Kamb'i'ij k'u chiwe: We e k'o ka'ib'oq chiwe wara che ruwachulew ku'an junam kik'u'x chwi ri kakitz'onoj pa oración, ri Nuqaw k'o chila' chikaj kuya na chike. 20Ma pa kimolom wi kib' keb' oxib' pa ri nub'i', chiri' in k'o wi ri'in chikinik'ajal rike —xcha'.
21Ek'uchiri', ri Pedro xqib' ruk' ri Jesús y xutz'onoj che:
—Wajawal, ¿janipa laj kankuy umak juna watz-nuchaq' we xu'an ri na utz taj chwe? ¿K'a pa wuqub' laj nawi? —xcha'.
22Ri Jesús xuk'ul uwach:
—Na kamb'i'ij ta chawe xa pa wuqub' laj, ma k'a wuqub' laj chi setenta.
Ri k'amb'al na'oj puwi rachi na kukuy ta umak jun chik
23»Ma ri ku'an chupa rutaqanik ri Dios petinaq chila' chikaj e jela' pacha' ri xu'ano echiri' juna taqanel xraj karilo we na jinta kik'as ri raj chakib' ruk'. 24Ek'u ri' xujeq rajilaxik, xriqitaj lo jun aj chak lik uk'iyal ruk'as#18:24 “Lik uk'iyal ruk'as”: Pa ri ch'a'tem griego kub'i'ij ruk'as wa aj chak e lajuj mil “talentos”, yey jun talento e rajil wo'lajuj junab' re chak. E uwari'che wa aj chak na kuch'ij ta chi k'ana kutoj ruk'as. ruk' y xk'am lo chwach. 25Ek'u wa aj chak ruma na kuch'ij ta chi utojik ruk'as, xtaqan rupatrón che cha' kak'ayix b'i rire, junam ruk' ri rixoqil, ri ralk'o'al y ruk' ronoje rub'itaq re cha' jela' katojtaj ruk'as. 26Pero wa aj chak xuxukub'a' rib' chwach rupatrón y lik k'u xutz'onoj che: “Lal wajaw, lik chinoy'ej ko k'ana la ma kantoj ronoje ri nuk'as che'la” xcha'. 27Ek'u rupatrón lik xjuch' ka'n uk'u'x che ri raj chak. Xukuy k'u umak che ronoje ruk'as y xuya b'i luwar che xe'ek.
28»No'j k'u wa aj chak xew xel b'i, xu'k'ulu lo jun rach aj chak yey wa' k'o jub'iq' uk'as#18:28 “Jub'iq' ruk'as”: Pa ri ch'a'tem griego kub'i'ij ruk'as e jun ciento denarios, yey jun denario e rajil jun q'ij chak. ruk'. Xuchapij k'u puqul e ri' pacha' kujitz'aj, jewa' xub'i'ij che: “¡Chatojola' rak'as wuk'!” xcha che.
29»Ek'u ri rach aj chak xuxukub'a' rib' chwach y lik xutz'onoj che: “Chakuyu ko numak, chinawoy'ej na k'enoq ma kantoj ronoje ri nuk'as chawe” xcha'.
30»No'j rire na xraj taj xroye'ej wa'. Ri xu'ano e xu'ya'a ri jun chik rach aj chak pa cárcel; yey k'a ek'u kesax loq we xutoj na ruk'as.
31»Echiri' xkil taq wa' ri kach aj chakib', lik xok chikik'u'x. Xeb'ek k'ut, xe'kib'i'ij che ri kipatrón ronoje ri xu'an ri jun aj chak. 32Ek'uchiri', rupatrón xutaq uk'amik y xub'i'ij che: “¡At jun aj chak itzel ak'u'x! Ri'in xinkuy amak ri'at che ronoje rak'as, ma lik e xatz'onoj ri' chwe. 33Ta ne e xa'an ri'at jela' pacha' ri xin'an ri'in chawe, ta e xak'ut ri k'axna'b'al ak'u'x che rawach aj chak; no'j na e ta k'u ri xa'ano” xcha'.
34»Ek'u rupatrón lik xpe royowal y xtaqan che kaya'i' pa k'ax y k'a e kesax lo chupa wa' we xutoj na ronoje ruk'as.
35»Jek'ula' ku'an ri Nuqaw k'o chila' chikaj iwuk' ri'ix we k'o junoq chiwe na kukuy ta umak ri ratz-uchaq' ruk' ronoje ranima' —xcha'.
S'ha seleccionat:
Mateo 18: acrN
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2009, Wycliffe Bible Translators, Inc. All rights reserved.