Luke 18
18
1စီးမှါခ့်ခါ ကိုယ်တော်ယေရှုကား တပယ့်တော်တာတ်တေ အဆေင်အပြတ်သောညယ် အမြဲတမ်း ဆုစိန်နင်းထှာကူ ငှေါဘင်းနာတေ ဥပမာစာနူယောက် မိန့်သမှာ။ 2"မြို့တစ်မြို့ဘေ ဘုရားရှာန်တေအစါတ်၊ ပြည်သူတာတ်တေဒေရီးဒါး အလေးစားသဘင်း တရားသူကြီးဟော်ဝါငှါမှာ။ 3အန်ဘင်းမြို့ဘေငှါဘင်း မုဆိုးမဟော်ဝါကား တရားသူကြီးပါလာန်ဘန်း 'ငါဘင်းအမှုတေ တရားနည်းလမ်းကျသကွန်း ဆုံးဖြတ်သအီယုတ်' ညယ်ပလန်းပလန်း လာန်ဘန်းငှေါမှာ။ 4မှါတ်ရီမှါခ့်ခါ တရားသူကြီးရီးဒါး အရေးအပဲရီဒီဒါး နောက်ဆုံးဘေ ဟိန်ကား 'ငါကား ဘုရားရှာန်ဒေရီးဒါးအစါတ်၊ သမီဆတာတ်တေရီးဒါး ဂရုအစိုက်သဟာဒီဒါး 5အဘင်းမုဆိုးမကား ငါတေ ပလန်းပလန်း နောက်ယှက်သနင်းဘင်းအတွာတ် ဟိန်တေ တရားစီရာန်သအီမားဆာ ထှာကဘန်းလား။ အမှာမားဆာ ဟိန်ကား ငါပါခဏခဏဒီဘန်း ငှေါနင်းလားတေ ရပ်သကလား' ညယ်စဉ်းစားသဘန်းနင်းမှာ" ညယ်မိန့်တော်မူသမှာ။ 6စီးမှါခ့်ခါ ကိုယ်တော်ယေရှုကား "အန်ဘင်း အတရားသဘင်း တရားသူကြီး တွေးသနင်းလားတေ စဉ်းစားသကြီး။ 7အန်နိမ် အတရားသဘင်း တရားသူကြီးစဲဒါး ဟိန်တေ ပလန်းပလန်း လျှောက်သဘင်းဆိတ်တေ ညှာတာသအီဘန်းကား ဘုရားရှာန်ရီးဒါး ဟိန်ဘေ နခူ၊ နတ်ကြယ်ဆုစိန်ဘင်း ဆိတ်တာတ်စေါက်ပေ အဖြည့်ဆည်းသအီညယ် မှါတ်ကွန်း ပဲကူညယ်ထာန်သနင်းကြီးလဲ။ 8ဟနိမ်တေ ငါငှေါကူ၊ ဘုရားရှာန်ကား အန်တာတ် စိန်ဘင်းမှန်သမျှတေ မြန်မြန်ငှေါနိမ် ဖြည့်ဆည်းသအီကူ။ အာနိမ်စါန်းငှေါဒီ ကမ္ဘာစောက်ပေ သမီဆာဆားတော် ပြန်သဘန်းကြွဒီမား အချိန်မှါခ့်ခါ ယုံကြည်သဘင်းဆိတ်တာတ်တေဒေ ကတုံန်လူကူသမား" ညယ်မိန့်တော်မူသမှာ။<br> 9အန်နိမ်အွန်ဘန်း ကိုယ်ကာတ်ကိုယ်ကာ မြင့်မြတ်သမှာညယ် ထာန်သနင်းဟာဘန်း သမီတေဒေ အထာန်သေးသဟာဘင်း ဆိတ်တာတ်တေဒေ ကိုယ်တော်ကား ဥပမာစားနူယောက် မိန့်တော်မူသဘင်းနာကား 10"ပန်းနူမှါခ့်ခါ ဖာရိရှဲဟော်ဝါယောက် အခွန်ကွန်ဘင်းဆိတ်ဟော်ဝါတာတ်ကား ဘုရားဝိုင်သဘန်း ဆုစိန်တင်အတွာတ် ဗိမာန်တော်ပါလာန်မှာ။ 11ဖာရိရှဲကား ဟော်ဝါဆာ စပ်ပန်း 'အို ဘုရားရှာန်၊ ငါကား သမီတေနိမ် လောဖားအတုံန်းငြား၊ အချီဘင်းရီးဒါး အအွန်နား၊ အိမ်ထောင်ရေးရီးဒါး အဖောက်ပြန်သဘန်းနာ အန်းဘင်း အခွန်ကွန်ဘင်းဆိတ်နိမ်ရီးဒါး အချီဘင်းအတွာတ် ဘုရားရှာန်တေ ကျေးဇူးတာန်သမှာ။ 12ငါကား စစ်ရာတ်ပေ ကလိန်းရာတ်ကား အယုတ်ညယ်အအူညယ် ဆုစိန်ဘန်း ငါလူဘင်း ဖူးတေဟက် ပက်ပုံ ပုံဘန်း ပုံငှါတေရီးဒါး ဗိမာန်တော်ဘေ လှူသမှာ' ညယ်ဆုစိန်မှာ။ 13အန်နိမ်စါန်းငှေါဒီ အခွန်ကွန်ဘင်းဆိတ်ကား သမီတေယောက် စစ်ဆာလမ်းစာလားဘေ စပ်ပန်း ဟမုခ်တေစဲ ငါန်းဘန်းအယူစါတ်ညယ် ရင်ဘတ်တုံန်းတေထုသဘန်း 'အို ဘုရားရှာန်၊ အပြစ်တေကန်ဘင်း ငါတေ အစန်ယုတ်' ညယ်ဆုစိန်မှာ။ 14အန်ဘင်းကလိန်းဟူး ကျေမ်းပါထုတ်ခါန်းမှါခ့်ခါ ဘုရားရှာန်ဘင်း ခွာမ်းလွှတ်သလားတေ လူဘင်းဆိတ်ကား ဖာရိရှဲအချီညယ် အခွန်ကွန်ဘင်းဆိတ်ထှာမှာ။ ကိုယ်ကောတ်ကိုယ်ကာ အထာန်ကြီးသဘင်း ဆိတ်တာတ်ကား နိမ့်ချသလား ခံသထှာဟာဘန်း ကိုယ်ကောတ်ကိုယ်တေ နိမ့်ချသဘင်းဆိတ်ကား ချီးမြှောက်သလား ခံသထှာကူ" ညယ်မိန့်တော်မူသမှာ။<br> 15စယ်ယာဘင်း သမီဆတာတ်ရီးဒါး အန်တာတ်ရှာရှာတေဒေ ကိုယ်တော်ယေရှုဘင်း သဟူးယောက် ထိသစိန်းဒင် ကိုယ်တော်ပါ ကော်ကြီးရီဘင်းနာတေ တပယ့်တော်တာတ် ကတုံန်မှါခ့်ခါ ကိုယ်တော်တေ အနောက်ယှက်သကွန်းအတွာတ် တားဆီးသမှာ။ 16အန်နိမ်စါန်းငှေါဒီ ကိုယ်တော်ကား ရှရှာတေကော်ဘန်း "ငါပါ ရှရှာတာတ်တေ ဒီစိန်းယုတ်အာန် အန်တာတ်တေ အတားဆီးသဆာ။ ဘုရားရှာန်ဘင်း သာသနာတော်ကား အဘင်းရှာရှာတေယောက် တူသဘင်းဆိတ်တာတ်အတွာတ် ထှာမှာ။ 17ဟနိမ်တေ ငါချီလားတေငှေါထှာကားဘန်း ရှာရှာဟော်ဝါနိမ် အအွန်ဘန်းကား ဟနိမ်ကား ဘုရားရှာန်ဘင်း သာသနာတော်နောင်းဘေ ဟာ၌မှါခ့်ခါစဲ ဆာန်ရန်ကလားအချီရား" ညယ်မိန့်တော်မူသမှာ။ 18ပန်းနူမှါခ့်ခါ ဂျူးဟလာန်းစါတ်ဟော်ဝါကား ကိုယ်တော်ဒေ "ကောင်းမြတ်သဘင်း ကိုယ်တော်၊ ဟာ၌မှါခ့်ခါစဲအရှီးဘင်းအဆာတ်တေလူကွန်း ငါဟာနိမ် အွန်ထှာကူတေ" ညယ်စိန်ယူမှာ။ 19ကိုယ်တော်ယေရှုကား "ငါတေ ဟမာန်အတွာတ် ကောင်းမြတ်သဘင်းကိုယ်တော်ညယ် ကော်တေ။ ဘုရားရှာန်ဟက်လွဲသပန်း ဟာဟမဲစဲ ကောင်းမြတ်သဘင်းဆိတ်အဘိုဝါး။ 20ပညတ်တော်တေဒေ နာန်မိန်းရှာတ်ခါစီးဘန်းထှာမှာ။ အိမ်ထောင်ရေး အဖောက်ပြန်သလူဝါး။ သမီဆာ အသာန်းရှီးလူဝါး။ သမီပစ္စည်းတေဒေ အကူလူဝါး။ ပက်သဘန်းအငှေါလူဝါး။ အမယ်အဝါတေဒေရိုသေသကြီး" ညယ်မိန့်တော်မူသမှာ။ 21အန်ဘင်းဆိတ်ရီးဒါး "နနူရှာမားဟဲ့ အဘင်းပညက်တော်အားလုံးတေ လိုက်နာသည်မှာ" ညယ်လျှောက်တာန်သမှာ။ 22အန်နိမ် လျှောက်တာန်သဘင်းတေ ကိုယ်တော်ယေရှု သက်ပူမှါခ့်ခါ "နာန် စားနူအွန်ဒင်ငှါယုတ်မှာ။ နာန်ပိုင်သဘင်း ပစ္စည်းဥစ္စာအကုန်လုံးတေ မာရာန်ဘန်း အဘိုဘင်း ဆာန်းရဲဆားတာတ်နင်း လှူတာန်။ အန်နိမ်အွန်ဘန်းကား နာန်ကား ရွှေမြို့တော်ဘေ စည်းစိမ်တေဒေလူကူ။ စီးမှါခ့်ခါ ငါတပယ့်အနေယောက် ငါဟလိန်းဘေဒီရာတ်" ညယ်မိန့်သမှာ။ 23အန်ဘင်း ဂျူးသမီဆာဟလာန်းစါတ်ကား အကြီးကျယ် ဆွာမ်းဘင်းဆိတ်ထှာဘင်းအတွာတ် ကိုယ်တော်ဘင်းတူးဒေ သက်ပူမှါခ့်ခါ အကြီးကျယ် အဆေင့်ပြတ်သလာန်ဘဲမှာ။ 24အန်ဘင်းဆိတ် အဆေင့်ပြတ်သလာန်ဘဲဘင်နားတေ ကတုံန်မှါခ့်ခါ ကိုယ်တော်ကား "ဆွာမ်းဘင်းဆိတ်တာတ်ကား ဘုရားရှာန်ဘင်း သာသတော်နောင်းဘေ ဆာန်လားလူကွန်းကား အကြီးကျယ်ခက်ခဲသမှာ။ 25ဆွာမ်းဘင်းဆိတ်ဟော်ဝါကား ဘုရားရှာန်သာသနာနောင်းဘေ ဆာန်တင်ထာတ် မီထယ်ကနားပေါက်နောင်းဘေ ကုလားအုတ်နနူဆာန်ကူဘင်းကား ပိုသောစဲစယ်ကူ" ညယ်မိန့်တော်မူသမှာ။ 26အန်ဘင်းတူးဒေ သက်ပူဘင်း သမီဆတာတ်ရီးဒါး ကိုယ်တော်တေ "အာနိမ်ငှေါဘန်းကား ဟာနိမ်သမီဆတာတ်ကား ကယ်တာန်သလား ခံသထှာကူဒေ" ညယ်လျှောက်တာန်သကြီးမှာ။ 27ကိုယ်တော်ကား "သမီဆတာတ် အအွန်ရန်ဘင်းနာတေငှါမှာ။ အန်နိမ်စါန်းငှေါဒီ ဘုရားရှာန်အတွာတ်ကား အထှာရန်ဘင်း အဘိုဝါး" ညယ်မိန့်တော်မူသမှာ။ 28အန်၌မှါခ့်ခါ ပေတရုကား "ကိုယ်တော်၊ အလေကား အရာအားလုံးတေ စွန့်သဘန်း ကိုယ်တော်ဟလိန်းဘေ ဒီရာတ်ကြီးလားထှာမှာ" ညယ်လျှောက်တာန်သမှာ။ 29ကိုယ်တော်ကား "ဟနိမ်တေ ငါချီလားတေ ငှေါထှာဘန်းကား၊ ဘုရားရှာန်ဘင်း သာသနာတော်အတွာတ် ကိုယ်ဘင်းကျေမ်းတေ၊ အိတ်တေ၊ အမူးနရှီတေ၊ အမယ်အဝါ၊ ဆာဆအိတ်တေဒေ စွန့်သရန်ဘင်းဆိတ်ကား 30အရာတ်ဘဝဘေ မဲဘင်းနာတေ ခံစားသထှာဘန်း အနားအနာဂတ်ပေရီးဒါး ဟာ၌မှါခ့်ခါစဲအအရှီးဘင်း အဆာတ်တေ လူကူဘင်းနာကား အသေအချာထှာမှာ" ညယ်မိန့်တော်မူသမှာ။ 31စီးမှါခ့်ခါ ကိုယ်တော်ကား တပယ့်တော်ရှစ်နူဘန်းကလိန်းဟူးတေ ဟိန်ပိုက်ပေ ဒီစိန်းဘန်းနာ "သက်ကြီး။ အရာတ် အလေကား ဂျေရုဆလင်ပါ လာန်ဘင်းလမ်းဘေ ထုတ်နင်းကြီးဘန်း။ ပရောဖက်တာတ်ကား သမီဆာဆားတော်ကြောင်းတေ ရေးသဘန်းပဲရီနိမ် အန်ဘင်းဘေ ထှာကဘန်း။ 32ဟိန်တေ တခြားတိုင်းပြေဘင်း သမီဆတာတ် သဟူးနောင်းဘေ အပ်သကြီးကူ။ ဟိန်တေ နီးကြီးကူ။ သန်းကြီးကူ။ အာတ်ဝဲယောက် ထောက်လားတေ ခံသထှာကူ။ 33စီးမှါခ့်ခါ သန်းဘန်း၊ တွောတ်ပန်း သာန်းရှီးကြီးကူ။ အာနိမ်စါန်းငှေါဒီ ဆွန်းရာတ်ထုတ်မှါခ့်ခါ အဆာတ်စားဟာန်းရီကူ" ညယ်မိန့်တော်မူသမှာ။ 34အန်နိမ်စါန်းငှေါဒီ တပယ့်တော်တာတ်ကား ကိုယ်တော်ငှေါဘင်း အဓိပ္ပာယ်တေဒေ အန်တာတ်ဟက် ကဆွန်းပဲလား ခံသထှာဘင်းအတွာတ် အန်ဘင်း အဓိပ္ပာယ်တေဒေ အနားလည်သကြီးရန်နား။ 35စီးမှါခ့်ခါ ကိုယ်တော်ယေရှုယောက် တပယ့်တော်တာတ်ကား ယေရိခေါမြို့ပိုက်ပေ ထုတ်အီမှါခ့်ခါ မိတ်အကတုံန်ဘင်း ဆိတ်ဟော်ဝါကား လမ်းပိုက်ပေ ထုံးဘန်း စိန်နင်းမှာ။ 36ဟိန်ကား သမီဆကလောင်းတုံန်း လာန်ဘဲဘင်း ဆကလားတေ သက်ပူမှါခ့်ခါ ဟမာန်တေ ထှာနင်းမှာငှေါဘင်းနာတေ စိန်ယူဝါမ်မှာ။ 37သမီဆာစယ်ယာကား နာဇရက်မြို့ဟက် ကိုယ်တော်ယေရှု ကြွသလာန်ဘဲမှာညယ် ငှေါကြီးမှာ။ 38အန်၌မှါခ့်ခါ ဟိန်ကား "ဒါဝိဒ်ပင်းဆားတော်ယေရှု၊ ငါတေအစန်ယုတ်" ညယ်ဟာတ်အာန်မှာ။ 39အန်၌မှါခ့်ခါ ကိုယ်တော်ယေရှုယောက်အတူတူ လာန်နင်းကြီးဘင်း ဆိတ်တာတ်ကား ဟိန်တေ ယူရှီရှီနင်းကွန်း တင်းကြီးမှာ။ အာနိမ်စါန်းငှေါဒီ ဟိန်ကား "ဒါဝိဒ်ပင်းဆားတော်ယေရှု၊ ငါတေ အစန်ယုတ်" ညယ်ပိုသော ဟာတ်ပန်းငှေါရာန်မှာ။ 40အန်၌မှါခ့်ခါ ကိုယ်တော်ယေရှုကား ရပ်တာန်ဘန်း အန်ဘင်ဆိတ်တေ ဟိန်ပါကော်ရီဒင် သမီဆာ စယ်ယာတေ အမိန့်အီရာန်မှာ။ အန်ဘင်းဆိတ်ကား အန်ပိုက်ပေထုတ်အီမှါခ့်ခါ 41ကိုယ်တော်ကား "နာန်အတွာတ် ဟာနိမ်အွန်အီထှာကူတေ" ညယ်စိန်ယူမှါခ့်ခါ အန်ဘင်းဆိတ်ကား "ကိုယ်တော်၊ ငါမိတ်တူရှီ ကတုံန်ဟာန်းကာတ်မှာ" ညယ်လျှောက်တာန်သဟာန်းမှာ။ 42ကိုယ်တော်ရီးဒါး "မိတ်တူရှီ ကတုံန်လူဟာန်းစိန်း။ နာန်ယုံကြည်သဘင်းနာကား နာန်တေကုသအီရာန်ဘန်း" ညယ်မိန့်တော်မူသမှာ။ 43ဟိန်ကား ချတ်ချန်းငှေါနိမ် မိတ်တူရှီကတုံန်ဟာန်းဘန်း ဘုရားရှာန်ဘင်း ဂုဏ်တော်တေဒေ ချီးမွမ်းသဘန်း ကိုယ်တော်ယေရှု ဟလိန်းပါ လာန်ငါတ်ပဲမှာ။ အန်ဘင်းအဖြစ်အပျက်တေဒေ ကတုံန်ဘင်း သမီဆတာတ်ရီးဒါး ဘုရားရှာန်ဘင်း ဂုဏ်တော်တေဒေ ချီးမွမ်းသကြီးမှာ။
S'ha seleccionat:
Luke 18: ktpv-rv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.