Mataayo 14
14
Okwitwa kwa Yowana Omubhatiisha
(Maariko 6:14-29; Ruuka 9:7-9)
1Bhunu omukama Yerode Antipa#14:1 Yerode Antipa. Ringira riingʼana rinu mu-Mangʼana Amakomeeye. ꞉aariga ˆnaatunga mu-kyaro kya Gariraaya, ˆnoongwa amangʼana ganu Yeesu ꞉aariga ˆnaakora. 2ˆNaabhwira abhajuuma bhaaye ati, “Omuunu uyo ni Yowana Omubhatiisha! Asuukire okusooka mu-bhafuuye! Kyakora ari na obhuturo bhwa okukora ebhigwa.”
3Yerode ꞉aaikire kutyo, kwa okubha niwe ꞉aariga agwatire Yowana amubhoyere mu-jeera. ꞉Aamubhoyere kwa okubha Yowana ꞉aamubhwiriiye amangʼana amabhiibhi ganu Yerode ꞉aariga akorere, okugabhura Yerodiya. Yerodiya, ꞉aariga ari mugasi wa Firipo, omumura waabho Yerode. 4Ku-nsonga iyo, Yowana ꞉aabhwiraga Yerode ati, “Itakwenderwa mu-bhiraagiro bhya Nyamuwanga okugabhura omugasi wa omumura waanyu.”#14:4 Ringira Abharaawi 18:16, 20:21. 5Mmbe, Yerode ˆnaamba okwagara injira ya okumwita, nawe ꞉aariga ˆnoobhaya abhaanu, kwa okubha abheene ꞉bhaariga bhamenyere ati Yowana ꞉aariga ari muragi wa Nyamuwanga.
6Mu-nsikukuru ya okwibhurwa kwa Yerode, omuyara wa Yerodiya ˆnaabhinira abhagenyi. Yerode ˆnaajomerwa muno. 7Niwe Yerode ˆnaarayira okuyaana omuyara uyo kyonekyone kinu araamusabhe. 8Mmbe, Yerodiya ˆnaasooyeresha omuyara waaye uyo ati asabhe omutwe gwa Yowana Omubhatiisha. Niwe omuyara uyo woone ˆnaabhwira Yerode ati, “Ntuurira omutwe gwa Yowana Omubhatiisha kw-isiniya kunu.” 9Omukama Yerode ˆnaasurumbara muno, nawe kwa okubha ꞉aamurayiriiye mu-meeso ga bhagenyi bhaaye, ˆnaaragirira bhamuyaane. 10Mmbe, Yerode ˆnaatuma omuunu ˆnaagenda mu-jeera, ˆnaabhutura Yowana omutwe. 11Omuunu uyo ˆnaaja nagwo guri kw-isiniya, ˆnaayaana omuyara uyo, omuyara uyo woone ˆnaagusira ku-nyiramwene. 12Abheeyigira bha Yowana ꞉bheejire bhoongwa amangʼana gayo, mbagenda okugega omubhiri gwa Yowana, mbagubhiika. Kimwi mbasirira Yeesu amangʼana.
Yeesu kaayaana abhaanu bhiwumbi bhitaanu ebhyokurya
(Maariko 6:30-44; Ruuka 9:10-17; Yowana 6:1-14)
13Bhunu Yeesu ꞉oonguuywe amangʼana gayo, ˆnaariinya mu-bhwato, ˆnaagenda enu bhaanu bhatari, insonga eekare omwene. Nawe abhaanu mbamenya enu ꞉aagendere, mbasooka mu-misi geebhwe, mbaribhataga maguru mbamuseeta-yo. 14Mmbe, bhunu obhwato ꞉bhwagobhere, Yeesu ˆneeka, ˆnaarora esangi enene erya abhaanu. ˆNaabhafwira ekigongo ˆnaawosha abharwaye bheebhwe.
15Okuyika keegoro, abheeyigira bhaaye mbaaja mbamubhwira ati, “Anu kiri, ni mw-ibhara, na riisuubha ryaguuye. Raga abhaanu bhanu, bhagende mu-magunguri okwigurira ebhyokurya.” 16Yeesu ˆnaabhasubhya ati, “Kubhaki bhagende, emwe, ni emwe mubhayaane ebhyokurya.” 17Abheene mbamusubhya ati, “Kitari na ebhyokurya anu! Kiri na mikaate etaanu, na nswi ebhiri era.” 18Yeesu ˆnaabhabhwira ati, “Mubhindeetere anu.” 19Niwe ˆnaabhwira abhaanu bhayo ati bheekare ansi ku-manyansi. ˆNaagega emikaate etaanu na ginswi giibhiri girya, ˆnaaragamira ku-rwire, ˆnaakumya Nyamuwanga. Kimwi ˆnaabhuturabhutura emikaate, ˆnaayaana abheeyigira bhaaye emikaate giyo, na ginswi. Abheeyigira bhaaye mbagabhira abhaanu. 20Abhaanu bhoone kutyo mbarya, mbeeguta. Abheeyigira bhaaye mbakumanya ebhisaaga, mbeejusha bhikapo ekumi na bhibhiri. 21Abhaanu bhanu ꞉bhaariiye ebhyokurya bhiyo, abharume era ꞉bhaariga bhari bhiwumbi bhitaanu, abhagasi na abhaana ꞉bhataabharirwe.
Yeesu kaaribhata ku-nyanja
(Maariko 6:45-52; Yowana 6:15-21)
22Ayoayo Yeesu ˆnaasiiga abheeyigira bhaaye ati, bhariinye mu-bhwato, bhatangate okugenda ngʼambu. Omwene ˆnaasigara akyaragana na riisangi rya abhaanu. 23Bhunu ꞉aamarire okuragana na abhaanu, ˆnaariinya mu-kiima okusaasaama Nyamuwanga. Ekisuute nkiingira akyari mu-kiima eyo omwene. 24Mw-ibhaga riyo, obhwato bhunu ꞉bhwariga bhurimo abheeyigira, ꞉bhwariga bhuri mu-bhusibha agati, mbubhumwaga na amabhooka, kwa okubha omuyaga ꞉gwariga ngubhayinga.
25Giingʼoko gya okwamba gikyari okukookoroma, Yeesu ˆnaabhaja-ko, enu ˆnaaribhataga iiguru ku-nyanja. 26Bhunu abheeyigira bhaaye ꞉bhaamurorere ˆnaaribhataga ku-manji, mboobhaya muno, mbamwaya mbaaikaga ati, “Omusambwa!”
27Kimwi Yeesu ˆnaabhabhwira ati, “Musiiriike era, musige kuubhaya! Ni anye.”
28Peetero ˆnaamusubhya ati, “Ee Raatabhugenyi, raabhe ni awe kimari, mbwira noone nikuuje-ko, nindibhata ku-manji.” 29Yeesu ˆnaamusubhya ati, “Ambe nuuje!” Peetero ˆneeka mu-bhwato, ˆnaaribhata ku-manji ˆnaagenda ku-Yeesu. 30Nawe bhunu omuyaga ꞉gwayembere, Peetero ˆnoobhaya muno, ˆnaamba okusika mu-manji. ꞉Eejire aarora ati kaasika ˆnaamwaya ati, “Ee Raatabhugenyi, nyeerura!” 31Ayoayo Yeesu ˆnaamugwata okubhoko, ˆnaamubhwira ati, “Awe uri na bhwikirisha bhutooto, kubhaki weetimaata?”
32Bhunu Yeesu na Peetero ꞉bheengiiye mu-bhwato, omuyaga ngutemekera. 33Mmbe, bhoone kutyo bhanu ꞉bhaariga bhari mu-bhwato, mbaramya Yeesu, mbamubhwira ati, “Kimari, uri Mwana wa Nyamuwanga!”
Yeesu kaawosha abharwaye bha Genejareeti
(Maariko 6:53-56)
34Bhunu Yeesu na abheeyigira bhaaye ꞉bhaayikire ngʼambu, mbeengira mu-kyaro kya Genejareeti. 35Abhaanu bheenda eyo ꞉bheejire bhaamenya ati ni Yeesu, mbatuma abhaanu bhasire amangʼana mu-bhyaro bhya ayeeyi bhyone kutyo. Abhaanu mbaaja mbareetera Yeesu abharwaye bheebhwe. 36Abhaanu bhayo mbasabha Yeesu asige abharwaye bhakuunʼye-ko era ku-bhisumi bhya emwaro ebhya ingibho yaaye. Yeesu ˆneekirisha. Na abharwaye bhoone kutyo bhanu ꞉bhaakuuniishe ku-bhisumi bhiyo, mbawora.
S'ha seleccionat:
Mataayo 14: kya
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023, Wycliffe Bible Translators, Inc. All rights reserved