GÉNESIS 6
6
Runacuna, jatun na alicunata rurashcamanda
1Gentecuna cai pachapi ninandapacha mirai callarishpami, ashtaca ushicunata charirca. 2Taita Diospaj churicunaca, gentecunapaj ushicuna juyaillacunapacha cajta ricushpami, chai huarmicunamanda agllashpa, paicunapaj huarmicuna cachun japinajurca. 3Chaimandami Mandaj Diosca, cashna nirca: “Gentecuna causaita causachunga napacha saquishachu. Paicunaca huañuna aichayujcunami. Paicunaca, patsaj ishcai chunga huatacamanllami causanga” nircami.
4Chai punllacunapica, Taita Diospaj churicunaca, runacunapaj ushicunahuanmi huahuacunata charirca. Chai huahuacunaca, ninan jatun runacunami carca. Paicunaca, punda huatacunamandami, tucuicuna rijsishca, ninan shinlli runacuna carca.
5Cai pachapi causaj runacunaca, ashtaca na alitalla ruranajujtami, Mandaj Diosca ricurca. Paicunapaj shungupica, jatun na alita ruranatallami yarinajurca. 6Shina cajpimi Mandaj Diosca, cai pachapi runata rurashcamandaca, shungupi nanachijshnami, ninandapacha llaquirirca. 7Shinamandami Mandaj Diosca cashna nirca: “Cai pachapi tucui ñuca rurashcacunataca, runacunatapash, llucashpa purij animalcunatapash, jahuata rij alasyu animalcunatapash, tucui shuj animalcunatapashmi tucuchisha. Caicunata rurashcamandaca, ninandapachami llaquirini” nircami.
8Shina cashpapash Mandaj Diosca, Noé runagu alita ruraj cashcata ricushpami, ninanda alicachishpa ricurca.
Noé runaca, huambuna jatun huasita rurashcamanda
9Noé runapaj miraicunaca, caicunami: Noé runaca, paipuracunapi ricujpica, alitalla ruraj, ima pandatapash na rurajmi carca. Noé runaca, Taita Diostaca tucuipi aliguta cazushpami causajurca. 10Noé runaca, Sem, Cam, Jafet shuti, quimsa churicunatami charirca.
11Cai pachapi causajcunaca, Taita Diospaj ñaupajpica, ninandapacha huaglishpa na alitalla ruranajushpami, ninan llaquicunahuanlla causanajurca. 12Taita Diosca, tucuilla cai pachapi causaita charijcunaca, napacha alicuna cajtami ricurca. 13Chaimandami Taita Diosca, Noé runataca cashna nirca: “Paicuna na alita rurashcamandami, cai pachapica ninan llaquicunahuanlla junda causanajun. Chaimandami, causaita charij tucuicunataca, tucui cai pachandi tucuchigrini. 14Canga, gofer shuti caspicunahuan, huambuna jatun huasita rurai. Chaitaca, shican shican ucucunahuan rurashpa, ucumambash, canllamanbash, breahuan jabishpa quilpangui. 15Chaitaca cashna rurangui: Patsaj quimsa chunga picha metro largota, ishcai chunga ishcai metro chaupi anchota rurangui. Shinallata, jahuaman jatundaca, chunga quimsa metro chaupita rurangui. 16Chai huambuna huasipica, jahua manñamanda, uraiman tupushpaca, chaupi metropishna shuj ventanata rurangui. Chaihuan pacta, pungutapash rurangui. Chai huasitaca, quimsa altibajohuan rurangui. 17Ñucami ninan tamiata, cai pachaman cachamugrini. Cai pachapi causajcunatapash, tucui ima tiyajcunatapash tucuillami tucuchigrini. 18Ashtahuangarin, Ñuca, canhuan, ari nishcatami pactachishpa callarigrini. Chaimandami cambash, cambaj churicunapash, cambaj huarmipash, cambaj churicunapaj huarmicunapash, huambuna jatun huasiman canhuan yaicunga. 19Cai pachapi causaita tucui charijcunatapash, ima animalcuna cajpipash, paipuralla shuj jari, shuj huarmi, huambuna jatun huasi ucuman churangui. Paicunapash, canshnallata causashpa catichun, chashna churangui. 20Alasyu animalcunamandaca, imashna cashpapash, paipuralla, shuj animalcunamandaca, imashna cashpapash paipuralla, alpata llucashpa purij animalcunamandaca, imashna cashpapash, paipurallami yaicunajunga. Ima animalcuna cashpapash paipurallami, ishcai ishcai, canhuan yaicunajunga. Paicunapash causangapami, chashna yaicunajunga. 21Shinallata, tucui ima micunacunatapash tandachishpa alichingui. Chai micunami, cambash, animalcunapash, micushpa shinlli tucungapa canga” nijurcami.
22Shina nijpimi Noé runaca, Taita Dios imashna mandashcashnallata, tucuita pactachirca.
S'ha seleccionat:
GÉNESIS 6: QVI16
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.