PUDUT 9
9
Pejani' Allah Idi Noh
1 Idi Allah nengeperuan ni Noh dengan anak-anakneh, idi kebalaNeh nedeh, “Do' muyuh mula' anak idi iuk amé mula', pad manu' tana' ini. 2Idi amung-amung pung, suit, idi lawid, miak matot nemuyuh, idi Ui maré nedeh bang imet muyuh. 3Idi amungdeh miak kenen muyuh, dengan irin pana'. Amung ineh Ui maré kuan muyuh ku akan muyuh. 4 Sebuleng mo' luk na miak kenen, ieh ineh uang pung luk inan dara' nugkeng. Ngaceku dara', ieh ineh ulunneh. 5Kudeng seburur lemulun ngaté lemulun Ui maré ukum até neneh. Ui miak ngaté pung luk ngaté lemulun. 6 Idé-idé luk ngaté lemulun, ieh pana' miak pitayen lemulun. Ngaceku lemulun pangeh pinudut kudeng ayu Allah.
7 “Do' muyuh mula' anak pad inul muyuh iuk amé' mula', aput-aput tana' ini.”
8Idi kebala Allah ni Noh idi anak-anakneh, 9“Ngerawé do'-do', Ui ini ngeletep pejani'Ku kuan muyuh idi kuan inul muyuh, 10idi teh kuan amung-amung pudut luk inan niat, suit, pung, ieh ineh amung-amung luk neremuat rat bang alud ineh. 11Idi Ui ngeletep jani'Ku ini kuan muyuh: Amung-amung pudut luk inan niat ineh na tupu-tupu miak uen ngaté ku ereb. Idi muci na luk idi ereb luk ngusag tana' ini peh. 12Idi ini etu pejani'Ku nemuyuh idi nan amung-amung pudut luk inan niat: 13Ui nganau' tagkangKu bang laput, idi ineh luk ku etu pejani'Ku dengan tana' ini. 14Kareb Ui ngacing laput pa luun tana', idi tagkang ineh miak melagan bang laput ineh, 15idi Ui sikal ngerawé jani'Ku nemuyuh, idi nan amung-amung pudut luk inan niat. Idi na tupu-tupu ereb miak mangun peh, luk ngaté amung-amung pudut luk inan niat. 16Idi kareb tagkang ineh bang laput, Ui miak nier ineh, pad Ui miak ngerawé pejani' luk meruked luk arang Allah dengan amung-amung pudut luk inan niat, idi amung-amung uang tana' ini.” 17Idi kebala Allah ni Noh, “Idi ini etu pejani'luk pangeh litepKu arangKu dengan amung-amung luk inan niat bang tana' ini.”
Noh Idi Anak-Anakneh
18Idi anak-anak Noh luk neremuat rat bang alud ineh, ieh ineh Sem, Ham, idi Yapet. Idi Ham ineh luk taman Kanaan. 19Idi diteluh ini luk anak Noh mangun ku tepun amung lemulun bang tana' ini.
20Idi Noh ineh lun amé' lati', idi ieh luk pun-pun nenibu aceh kabun anggur. 21Idi Noh nengirup abpa' anggur ineh, idi ieh nabuk. Idi ieh netelubid dengan lubpa luun uned lepo kibung. 22Idi Ham luk taman Kanaan ineh nenier tamanneh lubpa. Idi ieh iné' maré kali' kuan dueh kinanakneh luk déi' liang. 23Sem idi Yapet nengalap aceh pekatu kibung, idi nengecang neneh luun tudung didueh idi nenalan lumuut, idi nemapen taman didueh luk lubpa, idi neteketed pad na nenier taman didueh luk lubpa. 24Idi Noh nekulat ratnan abukneh, idi nekali' luk inau' anakneh luk isuut kuanneh. 25Kabalaneh,
“Kediman kuan Kanaan!
Ieh mangun ku demulun amung kinanakneh.
26Ubur kuan Tuhan, luk Allah Sem!
Kanaan ineh mangun ku demulunneh.
27Do' Allah ngerayeh Yapet!
Inulneh miak tudo dengan pupu Sem.
Kanaan miak mangun ku demulun Yapet.”
28Muci ratnan ereb ineh Noh mulun 350 lak. 29Idi ieh naté kareb ulunneh 950 lak.
S'ha seleccionat:
PUDUT 9: BLD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
BALA LUK DO' Lun Bawang Bible © The Bible Society of Malaysia 1982, Second Edition 1998.