Gyenesise 7
7
Nzueyilɛ ne
1Na AWURADE sele Nowa kyɛ, “Kɔfo ɛlɛen alaka ne anu, ɛne w’awuro ama mukoraa, ofikyɛ, manwu kyɛ wɔ de ɛtengyɛ wɔ me nyunu wɔ sɔ aworɛ ndoatoasoɛ he anu. 2#Gye 8.20 Ngaka mukoraa bɔ bɛ nwo te ne, fa nyii ne beleɛ nzoo nzoo; ngaka bɔ bɛ nwo nde ne, fa nyii ne beleɛ nyɔ nyɔ; 3ewienu nnomaa mɔ koso, fa nyii ne beleɛ nzoo nzoo, amaa bɛ boso annua wɔ aseɛ ye aso amukoraa. 4Ofikyɛ waha ɛlɛsoo né metɔ nzue megua aseɛ so eyia ne kɔngɔen sɔ alaa eleburanna. Na nikyee biala bɔ mayɔ bɔ ngoa wɔ nu ne, ngokyikyi ngofi aseɛ so. 5#Gye 6.22 Na Nowa yɔle bɔ AWURADE hyɛle ye kyɛ ɔyɔ ne amukoraa.
6Nzueyilɛ wale aseɛ so ne, né Nowa ali afoɛ ɛyaa nzia. 7#Mat 24.38; Luk 17.27 Yiti Nowa, ye mma, ɔye, yeɛ ye mma nemɔ koso bɛ ye mɔ bɛɛfole ɛlɛen alaka ne anu bɛfa bɛperele bɛ ti ngoa befili nzueyilɛ ne anu. 8Ngaka bɔ bɛ nwo te, bɛ bɔ bɛ nwo nde, nnomaa, yeɛ ngaka bɔ bɛtwe bɛ nwo ase mukoraa, 9bɛ nu biala nyii ne beleɛ, bɛ ne Nowa hɔle ɛlɛen alaka ne anu, kyɛbɔ Nyameɛ hyɛle Nowa nen. 10Na ɛlɛsoo pɛle nu ne, nzue yili fale aseɛ ye. 11Na Nowa lili afoɛ ɛyaa nzia ne, ye bosome nyɔ ne anu kyẽa bɔ ɔtɔ so buru ne nzoo ne, sɔ kyẽa ne, aseɛ bo dɔ nzue mukoraa pu wale, na anwuro nzue mboma mɔ koso bukyebukyele. 12Na esue tɔle aseɛ so toonn eleburanna, alehyeleɛ ne alesaleɛ. 13Sɔ kyẽa ne ala, Nowa ne ɔye ne ye mma Sem, Ham, ne Yafɛte, yeɛ ye mma nemɔ aye nza bɔ bɛboka so ne bɛfole ɛlɛen alaka ne. 14Bɛ ne kaka biala kyɛbɔ ye sue si te ɔ, ayɛmmoa biala kyɛbɔ ye sue si te ɔ, kaka biala bɔ ɔtwe ye nwo ase kyɛbɔ ye sue si te ɔ, anomaa biala kyɛbɔ ye sue si te ɔ, yeɛ kaka biala bɔ ole ndaa yeɛ bɛfole nu ɔ. 15Kaka biala bɔ nwomeɛ wɔ ye nu ne, nyɔ nyɔ yeɛ bɛ ne Nowa fole ɛlɛen alaka ne ɔ. 16#Gye 6.19 Kaka biala nyii ne beleɛ fole nu, kyɛbɔ Nyameɛ hyɛle Nowa ne, na afei AWURADE tole Nowa anoa nu. 17Nzueyilɛ ne hɔle so toonn eleburanna wɔ aseɛ so. Ɔhɔle so yili, na ɔmane ɛlɛen alaka ne aso fili aseɛ so maa oturuli nzue ne anyeso anwuro anwuro. 18Nzue ne hɔle so yili paa wɔ aseɛ so, na ɛlɛen alaka ne turuli so wɔ nzue ne anyeso. 19Nzue ne hɔle so yili wɔ aseɛ so alaa maa oodwuli kyɛ ɔkatale mmokaa ndendenn amukoraa bɔ ɔwɔ ewiase so ɔ. 20Nzue ne yili maa mmokaa nemɔ monone, na ɔtrale bɛ hɔle anwuro agyirɛ buru ne nnu. 21Na abɔdeɛ biala bɔ ɔnate aseɛ ye aso wuli: nnomaa, nyɛmmoa, eburo ngaka, ngaka bɔ bɛtwe bɛ nwo ase amu, kuro sona biala, 22#2 Pet 3.6; Yob 22.15-16 yeɛ nikyee biala bɔ ɔwɔ etii so bɔ ngoa nwomeɛ wɔ ye nu ɔ wuli. 23Na nikyee biala bɔ ɔwɔ aseɛ ye aso bɔ ngoa wɔ ye nu ne, Nyameɛ nuane ye boso: kuro sona, ngaka, ngaka bɔ bɛtwe bɛ nwo ase, ewienu nnomaa, onuane bɛ boso fili aseɛ ye aso. Na ɔhale Nowa ngome ne bɛ bɔ bɛboka ye so ne ala. 24Na nzue ne yili wɔ aseɛ so ngyẽa ɛyaa ko ne aburannu.
S'ha seleccionat:
Gyenesise 7: EBP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Esahie Bible © Bible Society of Ghana, 2018.