Gyenesise 11
11
Babɛl abandenden
1Né ewiase ama mukoraa bɛka edwudwolɛ komapɛ twe ɔne edwofua kãa bie. 2Mmerɛ bɔ mmenia tu fili eyia afiteleɛ nen, benwuni aseɛ frɛtɛɛ bie wɔ Sinari aseɛ so, na bɛtenane berɛ. 3Na besisele bɛ nwo kyɛ, “Biamɔ, ɛ́mɔma yɛ́pɛ mmerekese, na yɛto ma ɔbe.” Bɛfale mmerekese bɛyɛle bɛ nyɔboɛ, yeɛ bɛfale ehwaa bɛyɛle bɛ nnɛterɛ. 4Afei besele kyɛ, “Biamɔ, ɛ́mɔma yɛkyekye yɛ kuro, ná yɛsi abandenden bɔ odwu nyameɛso yɛsie so, ná yɛfa yɛle dumaa, amaa yammɔ aya wɔ aseɛ ye aso amukoraa.” 5#Gye 18.21; Edw 14.2; 18.9 AWURADE dwu wale ase ɔɔneane kuro ne abandenden bɔ né mmenia mmaa bési ne. 6Na AWURADE sele kyɛ, “Bɛte mmenia komapɛ, na bɛ mukoraa bɛka edwudwolɛ ko. Ɔ́hyɛ ye bo ye po yeɛ bɛ́yɔ sɔaa ye. Nzaade bɔ bekosusu kyɛ bɛkɔyɔ biala ne, nikye fee ngosi bɛ ate. 7Ɛmɔbra, ɛ́mɔma yɛdwu yɛhɔ ase, ná yɛkakyi bɛ dwudwolɛ ne ma ɔyɛ nwunyaenn, amaa bɛ nu biala ande obiɛngo dwudwolɛ bo ko.” 8#Luk 1.51 Yiti ofi sɔ mmerɛ ne, AWURADE maa bɛbɔle aya wɔ aseɛ ye aso amukoraa, na bɛyakyili kuro ne kyekyelɛ. 9Ɛhe ati yeɛ ɔmaa bɛfrɛ berɛ Babɛl,#11.9: BABƐL: Babɛl bo kyire nwunyanwunya. ofikyɛ AWURADE mane aseɛ so amukoraa dwudwolɛ yɛle nwunyaenn. Na ofi sɔ mmerɛ ne, AWURADE maa bɛbɔle aya wɔ aseɛ ye aso amukoraa.
Sem boso ama
(1 Aberɛso Dwirɛ 1.24-27)
10Sem boso ama mɔ ɛhe: Nzueyilɛ ne asi afoɛ nyɔ, bɔ Sem lili afoɛ ɛyaa ne yeɛ ɔwole Afakesade ɔ. 11Na Sem wole Afakesade nen, ye si ye olili afoɛ ɛyaa nnu, na ɔwole mmaa mmienzua ne mmrasua mɔ koso.
12Afakesade lili afoɛ aburasa ne nnu nen, ɔwole Hyela. 13Na Afakesade wole Hyela nen, ye si ye olili afoɛ ɛyaa nna ne nza, na ɔwole mmaa mmienzua ne mmrasua mɔ koso.
14Hyela lili afoɛ aburasa nen, ɔwole Ebere. 15Na Hyela wole Ebere nen, ye si ye olili afoɛ ɛyaa nna ne nza, na ɔwole mmaa mmienzua ne mmrasua mɔ koso.
16Ebere lili afoɛ aburasa ne nna nen, ɔwole Pɛlɛge. 17Na Ebere wole Pɛlɛge nen, ye si ye olili afoɛ ɛyaa nna ne aburasa, na ɔwole mmaa mmienzua ne mmrasua mɔ koso.
18Pɛlɛge lili afoɛ aburasa nen, ɔwole Reo. 19Na Pɛlɛge wole Reo nen, ye si ye olili afoɛ ɛyaa nyɔ ne ngona, na ɔwole mmaa mmienzua ne mmrasua mɔ koso.
20Reo lili afoɛ aburasa ne nyɔ nen, ɔwole Seruge. 21Na Reo wole Seruge nen, ye si ye olili afoɛ ɛyaa nyɔ ne nzoo, na ɔwole mmaa mmienzua ne mmrasua mɔ koso.
22Seruge lili afoɛ aburasa nen, ɔwole Nahɔ. 23Na Seruge wole Nahɔ nen, ye si ye olili afoɛ ɛyaa nyɔ, na ɔwole mmaa mmienzua ne mmrasua mɔ koso. 24Nahɔ lili afoɛ aburanyɔ ne ngona nen, ɔwole Tera. 25Na Nahɔ wole Tera nen, ye si ye olili afoɛ ɛyaa ko ne buru ne ngona, na ɔwole mmaa mmienzua ne mmrasua mɔ koso.
26Tera lili afoɛ aburasoo nen, ɔwole Abram, Nahɔ ne Haran.
Tera boso ama
27Tera boso ama ole ɛhemɔ: Tera wole Abram, Nahɔ ne Haran; yeɛ Haran koso wole Lɔto. 28Haran wu yakyili ye baba Tera wɔ ye bɔbɔ ye maen nu wɔ Yure bɔ ɔwɔ Kaldea. 29Abram ne Nahɔ begyigyale mmraa. Abram aye ne li Sarae, yeɛ Nahɔ aye ne koso li Milka, bɔ ɔne Yisika bɛ se ole Haran ne. 30Né Sarae te mmotaen; né olle ba.
31Tera fale ɔwa Abram, ye anomaa Lɔto bɔ ɔte Haran awa ne, ye sia Sarae bɔ ɔte ɔwa Abram aye ne, na ɔne bɛ betu befili Yure bɔ ɔwɔ Kaldea kyɛ bɛ́kɔ Kanaan aseɛ so. Nakoso bedwuli Haran nen, bɛtenane berɛ. 32Tera lili afoɛ ɛyaa nyɔ ne nnu, na owuli wɔ Haran.
S'ha seleccionat:
Gyenesise 11: EBP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Esahie Bible © Bible Society of Ghana, 2018.