YOANE 7
7
1Go edaku ki tea maga wanogoe, Yesu e surata Calilea: nalakena e da masauna mau naga ega surata Yudea, nalakena navarapule maga ni Yudea eu do laaga naga euga mari punue a. 2Go nasaisaiana ki naka ni Yudea, nasaisaiana ni na‐mari‐tap̃aup̃au‐ana e pei m̃aladigi. 3Nalakena tea wanogoe taina maga eu noa ki nia, eu naga, P̃a m̃elu dua ki tokora waia, go p̃a vaki Yudea pano, naga tea vasapiseikiana anigo maga ma euga vunusi nawosiana anigo maga waina ku do mari a. 4Nalakena te naata sikai e da mari panako ki te navatuna mau, go nae e dum̃ana laaga naga ega toko lina. Ku pe to mari naleo maga waina, p̃a tum̃ama piseiki maramana ako. 5Nalakena taina maga ma eu da saralomau asa mau. 6Nalakena tea wanogoe Yesu e noa ki da e naga, Ragi aginau e ko da umai mau; ma ragi animu e doko p̃ia doko sara ragi. 7Maramana e da mari atae pilosi mu mau; ma e do pilosi au, nalakena kinau a do noasokisoki nalo kakana naga nawosiana aneana maga eu sa. 8Nimu kuga sake paki nasaisaiana pano: kinau aga ko da sake paki nasaisaiana waia pano mau; nalakena ragi aginau e ko da umai sua mau. 9Go ragi waina e noa ki sua ra tea maga wanogoe, e ko doko Calilea doko.
10Ma ragi waina taina maga eu sake sua paki nasaisaiana pano, ragi wanogoe nae ma e sake pano, e da pae lina mau, ma e dapala waina e pano panako pano. 11Nalakena tea wanogoe navarapule maga ni Yudea eu laaga asa nasaisaiana, po naga, Nae e doko esava? 12Go natauruuruana warua e doko m̃aleoputo ni taua maga ni naatam̃oli nalo kakana: te seara eu do naga, E pei naatam̃oli wia; ma tea p̃ota seara eu do naga, Ee, ma e do piragi sasap̃o ki taua ni naatam̃oli maga. 13Ma te naata sikai e da pasa lina nalo kakana mau nalakena namatakuana paki navarapule maga ni Yudea.
14Ma ragi waina e po pei m̃aleoputo ni nasaisaiana Yesu e sake paki nasum̃a tapu pano, po pasa piseiki. 15Nalakena tea wanogoe navarapule maga ni Yudea eu maga, po naga, Naatam̃oli waia e atae namidiriana dapale sava, waina e da pei tea vasapiseikiana mau? 16Nalakena tea wanogoe Yesu e pasa dara ra, po naga, Navasapiseikiana aginau e da pei tea aginau mau, ma e pei tea ki tea waina e dip̃aki lua au umai. 17Te naata e pe masauna naga ega mari namasauana aneana, e pe wo atae nalo ni navasapiseikiana, e pe vei tea ki Sup̃e, kite kinau a pe tum̃agu pasa. 18Tea waina e dum̃ana pasa e laaga nasamasamaana aneana: ma tea waina e laaga nasamasamaana ki tea waina e dip̃aki lua e umai, nae e pei lomau, go te namarinaleotageleana e da doko asa mau. 19Moses e da dua mu nawotaeana kite, go sikai kakamu e da do mari nawotaeana mau? Ekasana ku laaga naga kuga mari punue au? 20Taua ni naatam̃oli maga eu pasa dara, eu naga, Ku peani dimon sikai: sei e laaga naga ega mari punue ko? 21Yesu e pasa dara po noa ki da, e naga, A mari nawosiana sikai, go ku maga puti. 22Nalakena tea waia Moses e dua mu natovadaviviana (e da pei nalakena e pei tea ni Moses mau, ma e pei tea ni tamamu maga); go ku dovadavivi naatam̃oli sikai sabbath. 23Naatam̃oli sikai e pe tape natovadaviviana sabbath, naga nawotaeana ki Moses ega ta pei tea tapiriana mau; ku kokona ki nau nalakena a mari naatam̃oli sikai e p̃ia sabbath kite? 24Kuga ta pasa p̃otae pae tea vunusiana mau, ma kuga vasa p̃otae navasap̃otaeana leana.
25Nalakena tea wanogoe tea ni Yerusalem maga seara kakada eu naga, Tea waia e da pei tea waina eu laaga naga euga mari punue a kite? 26Go kuga leo, e pasa lina, go eu da noa ki nia te navatuna mau. Tea maraki maga eu atae lomau naga nae e pei Kristo kite? 27Ma tu atae naatam̃oli waia tokora waina e pae asa umai: ma ragi waina Kristo ega wo umai, te naata sikai ega wo da atae tokora waina e pae asa umai. 28Nalakena tea wanogoe Yesu e pioso roara ni nasum̃a tapu, ragi waina e do pasa piseiki, po naga, Ku atae au, go ku atae tokora waina a pae asa umai: go a da dum̃agu umai mau, ma tea waina e dip̃aki lua au umai e pei lomau, waina nimu ku da atae a mau. 29Ma kinau a atae a, nalakena a m̃elu asa umai, go nae e dip̃aki lua au umai. 30Nalakena tea wanogoe eu laaga naga euga vua soki a: go te naata sikai e da nadi ki nam̃elearuna asa mau, nalakena aura aneana e ko da umai mau. 31Ma taua ni naatam̃oli maga tea laapa kakada eu saralomau asa; go eu naga, Ragi waina Kristo ega wo umai, ega wo mari navaivaiana laapa liu tea maga waina naatam̃oli waia e mari a kite? 32Farisi maga eu dogo taua ni naatam̃oli maga eu do dauruuru tea maga wanogoe nalo kakana; go tea viri warua maga go Farisi maga eu dip̃aki lua tasiga maga naga euga vua soki a. 33Nalakena tea wanogoe Yesu e naga, Ragi kiki aga ko sikoti mu doko, go aga wo pano punusi tea waina e dip̃aki lua au umai. 34Kuga wo laaga au, go kuga wo da pap̃ai au mau: go tokora waina kinau aga toko asa, nimu ku da mari atae umai paki asa mau. 35Nalakena tea wanogoe navarapule maga ni Yudea eu dum̃ada noa ki da, eu naga, Naatam̃oli waia e naga ega vaki esava, naga nigida tuga wo da pap̃ai a mau? E naga ega va punusi tea maga waina eu pei taperavera sari naka ni Hellas, po pasapiseiki naka ni Hellas kite? 36Navasaana wanogoe waina e noae epei nasava, e naga, Kuga wo laaga au, go kuga wo da pap̃ai au mau: go tokora waina kinau aga toko asa, nimu ku da mari atae umai paki asa mau?
37Go naaleatia edaku, tea warua ni nasaisaiana wanogoe, Yesu e lawodu po pioso, e naga, Te naata sikai e pe madou, ega umai punusi au po munu. 38Tea waina e saralomau au, noai sara maga ni noai mauri euga wo sara dave nap̃alauna pano, ega tapala waina navasaana midiriana e noa e. 39Ma e noa tea wanogoe nalo ni Naatana, waina tea maga waina eu saralomau asa euga wo dape a: nalakena Naatana e ko da doko mau; nalakena Yesu e ko da pei tea samasamaniana mau. 40Nalakena tea wanogoe taua ni naatam̃oli maga seara kakada, ragi waina eu dogo navasaana maga wanogoe, eu naga, Tea waia e pei profeta waina lomau. 41Tea p̃ota seara eu naga, Tea waia e pei Kristo. Ma te seara eu naga, Ee, Kristo e pae Calilea umai kite? 42Navasaana midiriana e da noa naga Kristo e pei tea ni nawora ni David, po pae Bethlehem umai, natokoana kiki waina David e doko asa kite? 43Nalakena tea wanogoe natap̃otaeana sikai e pakilina m̃aleoputo ni taua ni naatam̃oli maga nalakena nae. 44Go te seara kakada eu masauna naga euga vua soki a; ma te naata sikai e da nadi ki nam̃elearuna maga asa mau.
45Nalakena tea wanogoe tasiga maga wanogoe eu rumai punusi tea viri warua maga go Farisi maga; go nara eu noa ki da, eu naga, Ekasana ku da piragi a umai mau? 46Tasiga maga wanogoe eu pasa dara, eu naga, Te naatam̃oli e da pasa dapalana te ragi mau. 47Nalakena tea wanogoe Farisi maga eu pasa dara, eu naga, Nimu ma ku pei tea viragisasap̃okiana kite? 48Tea maraki maga sikai kakada e saralomau asa kite? Kite Farisi maga sikai kakada? 49Ma taua waia ni naatam̃oli maga waina eu da atae nawotaeana mau eu pei tea vasasakiana. 50Nikodemo e noa ki da (nae waina e umai punusi a sala vea, e pei sikai kakada), 51e naga, Nawotaeana anigida, e pe ta pea dogo ki naatam̃oli sikai, go e pe ta atae tea waina e do mari a mau, e pe vasa p̃otae a kite? 52Eu pasa dara po noa ki nia, eu naga, Nigo ma ku pei tea ni Calilea kite? P̃a midoaki usiusi po punusi naga te profeta sikai e da pakilina m̃elu Calilea mau.
53Go sara naatam̃oli eu sikasikai paki nasum̃a adeada pano: ma Yesu e paki tava ni Oliva pano.
S'ha seleccionat:
YOANE 7: NTB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible Society of the South Pacific