Cäk 20
20
Abraɣam ku Abimelek
1Ago Abraɣam jäl ë Mameer ke lɔ piny ë Kanaan thar ciëën të lɔ wöuwic, ku le piɔ̈ɔ̈t në kaam ë Kadec kekë Cur. Ku në nïn liik rëër en ë Jiraar, 2#Cäk 12:13; 26:7. ke lueel an ye Thara tiiŋde nyankënë. Ago Abimelek, melik de Jiraar kɔc tuöc Thara, go yiɛ̈n en. 3Go Nhialic bɛ̈n tëde Abimelek në nyuöthic wakɔ̈u, ku lëk en an, “Yïn rɛ̈ɛ̈r ke yï ye raan cï thou, në biäk de ee tiiŋ cï nöömë, në luɔi yen tiiŋ ë moc.”
4Ku Abimelek aa kën guɔ lɔ kekë yen, go lueel an, “Bɛ̈nydït, bä yɛn riɔ̈ɔ̈k adï wokë kɔckï ku yɛn cïn guöp awäc? 5Acïï Abraɣam lëk yɛn guöpde an ee nyankënë? Ku lueel ë tiiŋde ayadäŋ an ee mänhë. Kënë aa luɔɔi në ɣɛɛr ë piɔ̈u, ku acïn kë cä wööc thïn.”
6Ago Nhialic puɔ̈k nɔm en ë nyuöthic an, “Ee yic, aŋiɛc nɔn ë looi yïn en në ɣɛɛr ë piɔ̈u. Ee yen ë gɛ̈l Ɛn yïn, ke yï cïï ya bï wööc piɔ̈u, yen akɛ̈n Ɛn yïn tɔ jak en. 7Ënɔɔnë, dɔ̈kë raan nɔm tiiŋde. Yen ee tiët, abï lɔ̈ŋ në biäkdu ka yïn cï bï thou. Ku na cïï lɔ dɔ̈k nɔm monyde, ke ŋic ëgɔk nɔn bïn thou wekë kɔcku kedhie.”
8Ago Abimelek pääc ɣɔn amiäk aduduur, ku cɔɔl bänyke kedhie ku guïïr keek ka cï piŋ kedhie, agokï riɔ̈ɔ̈c aläl. 9Go Abimelek Abraɣam cɔɔl, ku lëk en an, “Eeŋö lui yïn wook kërɛɛc dïït cït ë kënë wokë kɔc ke ciɛɛŋdï? Yïn ë ya luöi kë cïï rɔ̈ŋ bï looi.” 10Ku be Abimelek Abraɣam luɔp an, “Eeŋö ye tak, kë ë tɔ yï loi ë kënë?”
11Ago Abraɣam puk nɔm an, “Kënë aa luɔɔi në baŋ ŋiɛc ɛn en nɔn cïn en raan töŋ ee riɔ̈ɔ̈c në Nhialic wut eenë, ka aŋiɛc nɔn bï kek ɛn nɔ̈k ku nömkï tiiŋdï. 12Ku ë yic yen ee nyankäi, ee nyan wää ku man ajɔ nu pei. Aguɔ thiaak. 13Na ɣɔn cööl ë Nhialic ɛn bei pinyda, ku leer ɛn piny lei, ke lɛ̈k tiiŋdï an, ‘Yen luɔiduön bïn riëëu rïïu yïn ɛn nyuɔɔth kï, tëde en raan lɔ yï luɔp në yɛn, ke luel an ee wänmääth.’”
14Ago Abimelek Thara dɔ̈k nɔm Abraɣam, ku gëm Abraɣam thök ku ɣɔ̈k, ku lïïm. 15Ku lëk Abraɣam an, “Kënë ëbɛ̈n ee pinydï, piäätë alɔ tëduön kɔɔr.” 16Ku lëk Thara an, “Yɛn ë wänmuuth gäm agum ë wëëth, ke bï kɔc rɛ̈ɛ̈r në yïn ye jɔ ŋic nɔn kënë yï jak, ku raan ëbɛ̈n abï jɔ ŋic nɔn cïn en kërɛɛc cï looi.”
17Ago Abraɣam Nhialic lɔ̈ŋ, go Nhialic Abimelek tɔ piɔl guöp kekë tiiŋde, ku diäär lïïmke, gokï mïth dhiëëth. 18Luɔi ë cï Bɛ̈nydït baai de Abimelek tɔ rol ëbɛ̈n në këde Thara, tiiŋ ë Abraɣam.
S'ha seleccionat:
Cäk 20: dip-JPB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible in Jieeng de Padang © The Bible Society in South Sudan, 2011.