Godié: Godie Nouveau Testament (New Testament)

Godie Nouveau Testament

'Tänyɩɛ 'mnö Zozii ‑bha lä 'kükëa 'wlu 'nɩ ɔ kwlii‑ lä nä, kä nyɩkpa‑ ‑bhutukpä güo‑ 'kʋ. ‑Mä 'zläbhlänyɔ ‑bhlo 'jluo‑ yëku 'nɩ ɔ yio dëlü 'wlu sä glaa, ɔ lä Kwlienyɔ‑, ‑n gä ‑waa nä, ‑n yi'i yamä 'nɩ n yi kplɔɔ. Ɔ cii‑ lä sɔɔ nä, 'nɩ Zozii yi ɔɔ' sɔɔ fä 'nɩ ɔ yi nyɩkpɔɔ 'taa, ɔ lä n ‑waa nynä ‑mä ‑n yamä nä, ‑n yamä yɩ! Zozii cii‑ lä sɔɔ nä kä 'zläbhlänyɔɔ ‑yamä. 'Nɩ Zozii yio soo, ɔ lä ‑naa soo lä nyɩkpɔ ‑mä, ‑n mʋ Laagɔɔ' 'Cibhisänyɔɔ yëku ‑yä ɔ 'kä‑ä wloo! Ɩyä nyɩkpɔ kä ‑yamä nä, ɩɩ 'cibhie Moyizöö' ‑Jläma ci lä nynä ‑mä ɔ ‑sä nä, ‑n 'gɛ ‑sä ‑yä nyɩkpa 'kä 'sɔɔ yibhë nynä ‑mä ‑n yä 'zaazɩ yamä.


Zozii ‑kʋ Kapɛnayumöduu' plädä 'nɩ Wlomɛɛ‑sʋjaa' 'kämänyɔ ‑bhlo ‑yi, 'nɩ ɔ yio 'wlu slä. Ɔ lä Kwlienyɔ‑, 'naa ‑gänʋnyɔ puu‑ ‑mɔɔ gbëë' sä. Ɔ kplää‑ 'nɩ 'kwlɩ bhɩänöɔ kpänyɩ. Zozii lä kä n yi lä ‑yä n 'kɔ yamä. Nyɩkpɔɔ lä Kwlienyɔ‑, nn' ‑wʋ 'kʋ ‑ŋwa nynä ‑mä ‑mɔɔ, ‑n yi ‑yä ‑n plä 'naa dää ‑mä, wälɩklë‑ yi lä 'naa ‑gänʋnyɔɔ yamä nä, n cia ‑mä ɔ yi yamä. ‑N ni ‑amʋ nä, n ‑kä 'kämänyʋä 'nɩ ‑amʋ ‑mä 'sɩɩ, n 'kämä 'sʋjä. N soo ‑nɔnɔ nynä ‑n mʋ! 'nɩ ɔ mʋ. 'Nɩ n soo 'sɩɩ ‑nɔnɔ nynä ‑n yi! 'nɩ ɔ yi. N kä 'naa ‑gänʋnyɔ ‑soo nynä ‑n nʋ ‑nʋnʋ! nä kɔ nʋʋ. ‑Mä Zozii nuu‑ lä 'sʋjäyuoo' ciciwälɩɩ nä, kä plɛkʋ 'ninio‑. 'Nɩ nyɩkpaa‑ güo‑ bhlä 'kʋ nä, ɔ yiwa soo, ɔ lä n sonö'anyɩ ‑nʋawlɛɛ' nynä ‑mä, ‑mää 'Yizlɛ‑bhlɩnɛ 'mnö 'titi nä, nyɩkpɔɔ' lɔɔ ‑ɔ ‑kä lä nyɩkpɔnɔ 'bhisäkʋ 'sää pɔlötɛtɛ 'kädɛ nä, n 'nöɔ ‑läzä 'ni. N sonö'anyɩ nynä bhutukpä yi 'ylʋʋ ghlää ‑gbäsɩ ‑bha, 'nɩ ‑nänʋä yi 'ylʋʋ säpu ‑gbäsɩ ‑bha 'nɩ wa ‑yä Ablaamʋ ‑yä Yizakö, ‑yä Zakɔpʋ 'sɔ, wa yi 'kʋ lüü ‑mɔɔ Laagɔɔ' 'Leyiduu 'mnö. 'Nɩ nyɩkpaa Laagɔ ‑sä bhlä nynä ‑wa yi ɔɔ' 'Leyiduu 'mnö plä nä, wa yiwa ‑mɔɔ 'tlü 'nɩ wa yiwa jlukʋʋ' 'cucukpaa nëëdë 'pä. Wa yi ‑mɔɔ kʋ 'nɩ wa yi 'tu, 'nɩ wa yi gläwli mnü. Zozii cii‑ lä sɔɔ nä, kɔ ‑soo 'sʋjaa 'kämänyɔɔ, ɔ lä ‑n 'ylɩbhɔ ‑yä ‑n mʋ ‑mä, sä ‑naa pɔlötɛtɛɛ ylä lä nä, sɔɔ yi nʋɔ. ‑Mä ‑lɔɔ' 'tänyɩɛ ‑bhlobhlo 'mnö, kä 'sʋjäyuoo' ‑gänʋnyɔɔ ‑yamä.


'Tänyɩ ‑kʋ ‑lɔɔ 'nɩ Zozii ‑mʋ Pɩɛlöö' ‑gbäsɩɩ 'nɩ Pɩɛlö ɔ 'wʋtɔŋnɔ wätlɩ ‑kukwë bhlɔɔ bhä 'nɩ ɔ puu‑ bhä sä. 'Nɩ Zozii yi 'ŋnɔɔ' ‑klɔgbaa 'taa. Sä ɔ 'tanöɔ‑ lä 'gää nä, kä wätlɩ ‑kukwëa doo‑ 'kpobhuu ‑bhlo 'kʋ 'nɩ 'ŋnɔɔ yi 'kʋ ‑bha 'nɩ ɔ yiwa ŋënü 'nyɛ. ‑Kugbë‑tänyɩɩ' ‑ŋëë bhɛ lä nä, nyɩkpaa' lʋä ‑zizinyenyi ‑kʋ bhlä kätää' nä, wa ‑lä waa' ‑lɛɛ bhutukpä Zozii yëku. ‑Mä Zozii bhlüü‑ nuwälɩ 'kʋ 'nɩ ɔ tlüü‑ ‑zizinyenyinɩ 'nɩ ɩ yiwa kätää' ‑bha. Gupanyʋa 'fɩɩn‑ ‑kʋ bhlä ‑lɔɔ nä, kɔ ‑yamänʋwa. Kɩ plöö‑ lä sɔɔ 'kʋ ‑yä 'plɔfɛtɩ Ezayii' ciciwälɩɩ 'kä glää. Kɔ cii‑ bhlä nynä
Nyɩkpɔnɔ 'mɔɔ‑ bhlüü‑ lä ‑anyɩa 'bhlʋlɛɛ 'kʋ,
'Nɩ ɔ bhlüü‑ lä 'sɩɩ ‑anyɩa 'bhläbhläguu 'kʋ.


Zozii nii‑ lä 'yi nynä ‑mä nyɩkpa ‑bhutukpä 'mɩmɩänöɔ‑ bhä 'kʋ nä, kɔ ‑soo ɔɔ' 'kʋgënyʋa nynä wa ‑yɔsɔ 'plöö ‑mɔɔ 'nyiee klëë' ‑kpʋkpʋʋ 'kʋ. ‑Mä wa 'kä ylä mʋ nä, ‑Jlämöcɩanyɔ ‑bhlo ‑yi 'nɩ ɔ yi Zozii soo, ɔ lä Cɩanyɔ‑, dää 'fɩɩn ‑n yi lä mʋ nä, n yi‑i 'kʋ 'gë. Zozii lä ‑n ni 'yi na, gbogwli‑zakɔkwɩä ‑kä waa' sukwi, 'nɩ ŋɔkʋʋ' nümnü ‑kä ɩɩ' ‑nünü. ‑Mä Nyɩkpɔɔ ‑Yowli nä, ɔɔ ‑wʋ 'wluu puëdä ‑kä. 'Nɩ 'kʋgënyʋa pää' lɔɔ ‑bhlo yi Zozii soo, ɔ lä Kwlienyɔ‑, n yi‑i 'kʋ 'gë ‑mä, ‑n nyɛɛ'ɛ 'tänyɩ. N 'kä 'fɩa n 'bä zizie! 'Nɩ Zozii yio soo, ɔ lä ‑n ‑taa 'kudukuë 'yi ‑yä wa zizie waa' 'kudukuë, ‑mä ‑mɔɔ nä, ‑n gë'ë 'kʋ!


Zozii ‑plä 'gokpë 'nɩ ɔɔ' 'kʋgënyʋa ‑yɔsɔ mʋ bhä. Wa ‑kʋ mʋdä 'nɩ dide 'kädɛ yi bhä. Ɛ ‑gbä 'nɩ 'gokpëa yie bhɛ 'nyu 'kʋ ‑bhlɛ Zozii ŋɔɔ bhä. ‑Mä 'kʋgënyʋa ‑gälɩɔ, wlä Kwlienyɔ‑, ‑n ‑sanyɩ ‑lɔɔ nëë' ‑mä, kä ‑a ku lä! 'Nɩ ɔ yiwa soo, ɔ lä ‑ɔnözä 'nɩ ‑ŋänö bhla'anyɩ bhää? Anyɩa' pɔlötɛtɛɛ ‑wʋ 'kwläkwlä 'ghlü! Ɔ ‑bha lä 'kʋ nä, kɔ gaa‑ ‑vʋvɔlʋʋ ‑yä 'nyie 'sɔ 'kʋ 'nɩ ‑dʋdʋkʋ yi 'plö ‑siin. ‑Mä plɛkʋ 'ninie waa' ‑lefɩɩn, 'nɩ wa ci bhɛ wlä ‑maa nyɩkpɔɔ' 'cësa bhä 'titi 'nɩ ‑vʋvɔlʋ ‑yä 'nyie 'sɔ ŋʋɔ bhä 'klʋkpää?


‑Mä Zozii ‑ŋëë ylä ‑mɔɔ Gadalɛnö‑nyʋaa' 'bhlɩɛɛ 'mnö 'nyi‑kpʋkpʋʋ 'kʋ nä, lesigwlë ‑kʋ bhä ‑lɔɔ. 'Nɩ nyɩkpa 'sɔ, waa' lʋä ‑zizinyenyi ‑kʋ bhlä kätää' nä, wa ‑bha ‑mɔɔ 'nɩ wa yi ‑blɔɔ 'kʋ yi. 'Nɩ wa yio 'yikʋ 'plöö. Nyɩkpayɩ 'sɔ nä, kä wa ‑nyu bhä kpänyɩ 'mnö. Nyɩkpɔɔ' 'plöö bhɔɔ ‑lɔɔ' ‑blɔklëa 'kʋ waa' ‑za. 'Nɩ wa yi woolɩ 'kʋ cie, wlä Laagɔ ‑Yowli‑! Wälɩ ‑sä ‑n 'ylänö‑anyɩ bhä? 'Tänyɩɛ ‑lätee ‑ŋëë 'nɩ ‑n yi‑anyɩ ‑jämɩɩ' 'ŋʋ kää ‑a? ‑Mä bholuzakpö 'kädä ‑kʋ bhä 'sää ‑blëlü ‑gbäsɩ 'nɩ a lü bhä. 'Nɩ ‑zizinyenyii yi Zozii 'wlu slä, ɩ lä ‑n gä‑anyɩ 'tlü nä, bheeje, ‑n fänö‑anyɩ ‑mɔyɩ bholuzakpaa 'mnö! Zozii lä a mʋ ‑mɔɔ! 'Nɩ ‑zizinyenyii yi nyɩkpa 'sɔ kätää' ‑bha 'nɩ ɩ yi bholuzakpaa 'mnö plä. ‑Mä bholuzälöö kwlii 'kükëa' ‑kpʋkpʋ 'kädʋʋ sämɩɩ', 'nɩ ɩ yi 'nyibhlëa 'mnö jɛɛ 'nɩ ɩ yi 'ku. ‑Mä nyɩkpaa ‑wa ‑lä bhlä bholuzälöö 'kʋ lü ‑kää nä, wa guu‑ 'nɩ wa ‑fä duu' 'dö. 'Nɩ nyɩkpaa 'sɔ ‑zizinyenyii ‑bha lä kätää' nä, ɩyä 'klüü 'fɩɩn wa nii‑ lä 'yi nä, ɩɩ' wälɩɩ wa sänɩ bhä. Ɩ ‑kä 'ŋnö 'nɩ dunyʋa 'fɩɩn ‑bha 'kʋ 'nɩ wa yi Zozii ‑blɔkʋ yi. Wa nio‑ lä 'gää 'yi nä, kwa ‑slɔɔ 'wlu nynä ɔ ‑bha waa' 'bhlɩɛ 'mnö.

Escolta Matie 8