Marcos 3
3
Jesús ja deja mechehui saisiametana
(Mateo 12.9-14; Lucas 6.6-11)
1Neicha Jesús nubiana jadhitati jude ete su. Dapia piada deja mechehui anina. 2Piada piada dapia Jesús cuadhiji cuana netitaina ahua Jesús ja janahua tsine su deja esaisiameta ahua mahue eba puji. Ahua daja Jesús ja deja esaisiameta su, da su tuneda Jesús etuaquisata. 3Daja mecuana sa piba puana biame, Jesús ja deja mechehui uja cuatsasiatana:
—Pueque upia. Netianaque ecuanaju duju su.
4Da su Jesús ja dapia yanita ebaji cuana uja quisabatana:
—¿Ai ni da su saida ya puji janahua tsine su? ¿Ahua saida janahua tsine su ai saida cuana ya puji? ¿Ahua ai madhada cuana ya puji? ¿Ahua saida janahua tsine su quebata d'eji su ya puji? ¿Ahua pamanu ja puji? Mepibaenique. ¿Ai ni saida ya puji janahua tsine su?
Beju pamapa dapia yanita cuana mitanatana. Cuaja jeutsu taji mahue batana huecuana. 5Jesús ja chamapebarereatana huecuana pibapiba, duinini neje, tuna sa muesumu cuana tadada ba putsu. Da su Jesús ja deja mechehui cuatsasiatana:
—Piraraque mique ebai.
Beju deja ja mesa ebai piraratana. Mesa eme beju saida puibana. 6Fariseo cuana beju daja ba putsu, tipeida cuinanatana. Echua puji Herodes sa deja cuana neje jadhitatitana huecuana. Tuneda cama cuaja Jesús emanuame puji jaquisatitana.
Dueji cristiano cuana ja Jesús tije atana
7Da su beju Jesús bai su putiana mesa discípulo cuana neje. Dueji cristiano cuana tu tije putitana. 8Galilea, Judea, Idumea yahua, Jerusalén ejude000netia puetana huecuana. Jordán ena chu bene, ejude detse banime Tiro, Sidón jenetia di puetana huecuana. Jesús ja ai nimetiuda cuana yatani shanapatana huecuana su, tu peje su puetana eba puji. 9Cristiano cuana dueji putsu, Jesús ja mesa discípulo cuana cuatsasiatana canoa paduseta huecuana dapia enubi puji. 10Jesús ja jucuada cristiano cuana saisiametana putsu, pamapa nedaji cuana jadhitatitana tu peje su. Janunununuati huecuana Jesús ed'apaba puji. Da putsu, Jesús canoa su nubiana. 11Einid'u madhadaji cuana ja di Jesús chamatana su, tipeida tu butse su sanatana huecuana. Uja tsiatsiatana huecuana:
—Mida da Diusu sa Ebacua.
12Da su Jesús ja einid'u madhada cuana jubida cuatsasiatana uja:
—Be daja cristiano cuana quisaji.
Jesús ja piada tunca beta ejaitiana discípulo cuana dharetana
(Mateo 10.1-4; Lucas 6.12-16)
13Da su beju Jesús putiana murucu aida su. Tsua putsu, mesa dharejiji deja cuana ihuatana tu peje su. 14Beju piada tunca beta ejaitiana deja cuana dharetana. Huaratiatana huecuana tu ebuqueta huecuana puji, mesa quisa saida cuana quisaquisa paputita puji. 15Tucheda tiatana huecuana einid'u madhada cuana cristiano cuana peje jenetia ejusiacuina puji. 16-19Uja banimeta huecuana:
Simón. Jesús ja tueda Pedro ebani tiatana.
Jacobo. Juan sa edue. Tata Zebedeo sa ebacua.
Juan. Jacobo sa edue. Tata Zebedeo sa ebacua. Jesús ja tuatseda Tiri esitu ebani tiatana.
Andrés.
Felipe.
Bartolomé.
Mateo.
Tomás.
Jacobo. Alfeo sa ebacua.
Tadeo.
Simón. Tueda da cananista partido jenetia.
Judas Iscariote. Tueda da Jesús menajatiaji.
Jesús sa familia cuana ja tueda dusuja adhaatana tusa ete su
(Mateo 12.22-32; Lucas 11.14-23; 12.10)
20Da su beju Jesús pia ete su putiana ediadia puji. Neicha beju cristiano cuana dueji jadhitatitana. Da putsu, Jesús, mesa discípulo cuana neje cuaja diadia taji mahue jabatiana. 21Mesa edue cuana ja shanapa putsu, putitana huecuana tu yani su da jenetia mecuana sa ete su Jesús edusu puji. Daja dusuja adhaatana huecuana, “Jesús beju chuataitanajiji”, cristiano cuana eputani putsu.
Jacuatsasiati ebuetsuaji cuana Jesús madhabatana
22Beju jacuatsasiati ebuetsuaji cuana Jerusalén ejude jenetia dapia anitaina. Tuneda di Jesús madhabatana. Uja atana huecuana:
—Ye Jesús da Ishahuaji. Pamapa mesa ai nimetiuda yatani cuana beju Ishahua sa tucheda neje yatani. Einid'u madhada cuana ejusiacuinatani Ishahua sa tucheda neje.
Daja Jesús madhabataina huecuana.
23Da su Jesús ja tu naja su ihuatana huecuana. Bahue quisa cuana neje quisapirutana huecuana uja:
—¿Ai Ishahua tu mehua jajusiacuinati cua bata? 24Ahua quebata huaraji aida sa cristiano cuana esajasajata su, ahua tuneda cama eichetita su, beju tueda huaraji aida sa tucheda etaitanapeyu. 25Daja huecha quebata familia edue cama eichetita su, tueda familia da etaitanape. 26Daja huecha ahua Ishahua ja quitaita mesa einid'u madhada cuana jusiata cua su, mesa tucheda etaitanape. Aimue mesa einid'u madhada quitaita ejusiata mahue. Ahua daja yata su, tueda quitaita emajaitiani pu cua nime.
27‘Daja huecha aidhe deja tucheda sa ete su nubija tsi epu puji, equene deja tucheda risi taji. Deja risi putsu, da su etse tsi pu cua.
28‘Meid'abaenique. Yama micuana jubida equisainia, ai jucha papu biame cristiano cuana ja yatani, Diusu ja perdonata cua. Tu neje madhada hue emimitani cuana perdonata cua.
29Daja biame, quebata Espíritu Santo neje madhada hue emimi su, tueda aimue Diusu ja eperdonata mahue.
30Tuneda da, “Jesús da Ishahuaji”, putana putsu, Jesús ja daja jubida quisatana huecuana.
Jesús sa cuara, edue cuana neje tu yani su putiana
(Mateo 12.46-50; Lucas 8.19-21)
31Da su beju Jesús sa cuara, edue cuana cuinatana. Ete etsequeini su netisenatana huecuana. Jesús ete etsequeini su pacuinana puji quisametana huecuana. 32Beju cristiano cuana Jesús pehue je ete dume su anitaina. Uja Jesús quisatana huecuana:
—Mique cuara, edue cuana etsequeini su enetita. Beju echacutani huecuana mi.
33Da su Jesús ja quisatana huecuana uja:
—Yama micuana equisa aidhe quema cuara, edue cuana.
34Mesa discípulo cuana mehuitu putsu, uja quisatana huecuana:
—Ye cuana da quema cuara, edue cuana pu cua nime. 35Quebata cuana ja Diusu sa tsada ai cuana yatani, tuneda da quema cuara edue cuana pu cua nime.
বর্তমানে নির্বাচিত:
Marcos 3: tna
হাইলাইট
শেয়ার
কপি
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
