Luqas 19

Yesusnawa Zekkiwoosna

1Yesus Iyyarikoni katamaassi kamo aatte hamdifer. 2Estak Zakkiwoos yiste girbo zuutife baasso gaanynya sina otum asu feer. 3Bar Yesus aaffer sinnamato biyanak sholet feer. Sinuntano yer'ba kawuna sinna boor'a daraasa showotan kabi chowa biyak aane chime. 4Yesus aatte hamana ugnaasta barin biyak sina eelle isa teeni i'ota kesi. 5Yesus esta kar'fena kabaasik den kaanne biyaat: «Zakkiwosno, Taptera kerowa; hash hawung neeki keer feeshanak sholsuwa» yi. 6Zakkiwoos dey taptere kerere girak Yesusnin keeba ephphe hami. 7Es baron biya asuni meya zuuttere: «Boor' sina asusa keer muu muunak giriwa» yit Yesusniista unyisete.

8Sinuntano Zakkiwoos yerere Yesusnin: «Daamiiso, fa otumnaasi isa kununon tukamiisik imanawa. Asuniistan eshak ephna waaga faafaanane acheech kushu zagira wolgunawa» yi.

9-10Yesus: «Asuni Naa tishi barin sholoknawa fu'oknatu yewa. Han asus dey Abrahamni naa sinna boor'a hash hawung faru han keyaasik siniwa» yi.

Asir Wostinynyani Beso

(Mat. 25:14-30)

11Darani meya es baron odesefeen Yesus isa beso baassok make. Bar Yerusalem tai'sena boor'a asuni meyak Ha'oosi taato yaara kar'difanne faar sinna baassok beste. 12Es bari boor'a ekka yi: «Taattere yoonak woka daa hama isa ulfinto asu feer. 13Hamnoyfegedo zeemme wostinynyabaasasin asirin teegere: ‹Ta wolla yoonanneen nagadera bu'sutiwa› yit asir miinani imaat hami. 14Sinuntano es daasi asuni meya barin oomtesete boor'a: ‹Han asus innoosta taattonak aane sholefeni› yire hamnanneen orfo wosinin wossete.

15«Sinuntano es asus taattere daabaasta wolle ye. Es wostinynyabaasik imna waagaason nagadesere awune faaron buu'sisetemato arunak teegsi. 16Issoonsa wostinynyaas yeere: ‹Daamiiso, imta birriis asiron buu'ewa› yi. 17Daambaas: ‹Ne ma'a wostinynya, ma'aron zagitwa. Garo wuzaasik amanamto sinna bestetwa. Asir katamaason ha'sutak ha'suni hugna neek imingwa› yi. 18Hepsani wostinynyaas dey yeere: ‹Daamiiso imta birriis uuchon buu'ewa› yi. 19Daambaas dey: ‹Ne uuch katamaason ha'sutak taassingwa› yi.

20«Oom wostinynyaas dey yeere ekka yi: ‹Daamtaaso, erbesi birira kunsina birrinees hanifawa. 21Ne kunsunoytaason ephtar; Buknoytaason dey kar'tar; Ne keena budu asu sinta boor'a digengwa› yi. 22Daambaas dey ekka yi: ‹Ne mangu wostinynya, han wolumneesik neyista mangsu kar'anawa. Ta kunsunoynaason ephar, buknoynaason kar'a keena budu asu sinnaason aritannen; 23Ta yaara waagnaason koontobaasneen ephanak awagan baankini keer kunsu beyisso?› 24Estan Daamiis esta yeese baassok: ‹Waagaason barkin ephpha asir birri faana barik imtiwa› yi. 25Baasso wolgire: ‹Daamiiso, barki asir birriba faarwa› yisete. 26Daamiis ekka yi: ‹Nittok makefawungwa, faana barik daytera imterwa. Sinuntano foontoosatan barik fa barnu ootterwa. 27Sinuntano ta baassosta taattonak sholonoy ta gumaasakitonin hani teshshera taaki sina worutiwa.› »

Yesus Akama Ulfinak Yerusalem Giri

(Mat. 21:1-11; Mar. 11:1-11; Yoha. 12:12-19)

28Yesus es baron makenanneen orfo ek Yerusalem hamak nawoni meeni sina zeemi. 29Dabrazayitini kumaasi tesha fa Betefagenewa Bitaniyane sinfa katama tai'senaase nawobaasasin heppin ekka yire wosi: 30«Ek sinnitiista fa ke'eessi hamtiwa. Estak oonu barista duunoyna hanyani nawa tuptera yerefeen danati. Kotta yootiwa. 31Oonu: ‹Awuniron kottifetirinso?› yisere mamussefaatene: ‹Daamiisik sholsu sinna boor'awa› » uti.

32Wostere hama baasso Yesus maktenaasimato danete. 33Hanyaasi abani meya kotefeen biyere: «Awuniron kottifetirinso?» yisete. 34Baasso dey wolgire: «Daamiisik sholsu sinna boor'awa» yisete. 35Estan hanyaason Yesusniki ephphe yeesete. Geshobaasta maya kunussere Yesus duunak zagsete. 36Asuni meya bar hamfena ugnaasta maybesiison yiir'et feeseter.

37Dabrazayitini kumaastan kerefa ugnaasta tai'sesefe kabaasik basa nawoni meya biisete biistera artonoy wuza zuuttambaase asik girak tuumere kaambesiison teggire Ha'ooson ekka yit galattesete. 38«Daamiisa sunak yeefe taatoos suustowa. Den samak naga, ulfina dey tegira fa Ha'oosik sinun» yisete.

39Daraasa ganesi fe isa isa Ferisawini meya Yesusnin: «Assinynyano, han nawoneesakito shaakkusonek zaguwa» yisete. 40Bar dey: «Nittok makefawungwa, baasso shaakkisefeknu shu'aasikito chaagerwa» yi.

Yesus Yerusalemki Katamaasik Waasi

41Yesus Yerusalem katamaassi tai'sere katamaason biyaat barik waasi. 42Ekka dey yi: «Neek naga sinni baron hawung aamse arita! Sinuntano hash ne aafaassin aachewe. 43Ne gumaas biratoneeson ojba ojje ganeya gedde neen shana bessone wona yoonirwe. 44Ha'oos neen fu'ok yaana baron aane aruwe sinna boor'a neennawa ne sikaloossi fa naanggotneesikitone asin worsone. Boktonoy isa shu'anu shu'aasta diira aafa bestona wuza.»

Yesus Betemeqdesiissin Naggaddeesin Kalle Kisi

(Mat. 21:12-17; Mar. 11:15-19; Yoha. 2:13-22)

45Estan Yesus betemeqdesiissi girire estak nagadet fe baassotin kalle kisi. 46Ekka dey yi: « ‹Ta keyaas Ha'o shiiphtona keyatu sinana› yisteratu tichche. Sinuntano nitto bo'inynyani meeni dugadug zagseti» yi.

47Yesus wonna wonna es betemeqdesiissi assit feer. Maagni gaanynye meenewa tumaasi assinynyana, daraasin ha'sife oom asuni meena barin woruk sholset feeseter. 48Sinuntano daraas zuuttere barki tai'sere odet feeseter sinna boor'a isa wuzane zaguk aane chimoto.

বর্তমানে নির্বাচিত:

Luqas 19: YemsaNTL

হাইলাইট

কপি