Матвей 1
1
Исуслӧн увтыр
(Лк. 3:23-38)
1Кристос Исуслӧн чужан вужыс#1:1 чужан вуж ─ родословие, происхождение мунӧ Авраамсянь, сэсся Давидсянь. Сылӧн чужан вужыс сэтшӧм:
2Авраамлӧн чужӧм Исак, Исаклӧн чужӧм Яков, Яковлӧн чужӧм Иуда да сылӧн воннэс. 3Иудалӧн чужӧмась Фарес да Зара ─ нылӧн мамныс вӧлӧм Фамар. Фареслӧн чужӧм Эсром, Эсромлӧн ─ Арам, 4Арамлӧн ─ Аминадав, Аминадавлӧн ─ Насон, Насонлӧн ─ Салмон, 5Салмонлӧн ─ Вооз. Сылӧн мамыс вӧлӧм Рахав. Воозлӧн чужӧм Овид. Сылӧн мамыс вӧлӧм Руф. Овидлӧн чужӧм Иессей. 6Иессейлӧн чужӧм Давид ӧксу#1:6 ӧксу ─ царь.
Давид ӧксулӧн чужӧм Соломон. Сылӧн мамыс одзжык вӧлӧм Урийлӧн инь. 7Соломонлӧн чужӧм Ровоам, Ровоамлӧн ─ Авей, Авейлӧн ─ Аса, 8Асалӧн ─ Иосафат, Иосафатлӧн ─ Иорам, Иорамлӧн ─ Озия, 9Озиялӧн ─ Иоафам, Иоафамлӧн ─ Ахаз, Ахазлӧн ─ Езекия, 10Езекиялӧн ─ Манассия, Манассиялӧн ─ Амон, Амонлӧн ─ Иосия, 11Иосиялӧн чужӧм Иоаким, Иоакимлӧн ─ Иехония да сылӧн воннэс. Нія чужӧмась Израиль отирӧс Вавилон муӧ вашӧтӧм одзын.
12Вавилон муӧ отирӧс вашӧтӧм бӧрын Иехониялӧн чужӧм Салафиль, Салафильлӧн ─ Зоровавель, 13Зоровавельлӧн ─ Авиуд, Авиудлӧн ─ Елиаким, Елиакимлӧн ─ Азор, 14Азорлӧн ─ Садок, Садоклӧн ─ Аким, Акимлӧн ─ Елиуд, 15Елиудлӧн ─ Елеазар, Елеазарлӧн ─ Матфан, Матфанлӧн ─ Яков, 16Яковлӧн чужӧм Ӧсип. Ӧсиплӧн Мария иньыс вайӧм Исуссӧ, кӧдӧ шуисӧ Кристосӧн#1:16 Кристос ─ Израильлӧ кӧсйӧм Мездӧтісь, Енлӧн Мавтӧм .
17Сідзкӧ, Авраамсянь Давидӧдз вӧлі даснёль чужан вуж. Давидсянь Вавилон муӧ вашӧттӧдз вӧлі даснёль чужан вуж. И Вавилон муӧ вашӧтӧм кадсянь Кристослӧн чужӧмӧдз вӧлі даснёль чужан вуж.
Исуслӧн шогмӧм
(Лк. 2:1-7)
18Кристос Исус чужӧм сідз:
Исуслісь Мария мамсӧ вӧлі корасьӧмась Ӧсип сайӧ. Ны ӧтлаасьтӧдз казялӧмась Марияыслісь Вежа Ловсянь новйӧтчӧмсӧ. 19Ӧсипыс вӧлӧм веськыта олісь#1:19 веськыта олісь ─ праведный морт. Сія Мариясӧ абу мӧдӧм лэбтыны йӧз одзын рожа кулянас, сійӧ мӧдӧм гусьӧн лэдзны.
20Кӧр Ӧсипыс лӧсьӧтчӧм сідз керны, сылӧ вӧтӧ уськӧтчӧм Енлӧн ангел. Ангелыс шуӧм: «Ӧсип, Давидлӧн зон! Эн пов босьтны Мариясӧ ас саят. Сія ваяс кагасӧ Вежа Ловсянь. 21Марияыс ваяс зонӧс, сетан тэ Сылӧ нимсӧ Исус#1:21 Исус ─ нимыс аркмӧм Ешуа еврей нимись. Еврей кылын сія вежӧртӧтӧ «Дӧсвидзисьным мездас». . Ассис отирсӧ Сія мездас умӧль керӧммезсиныс».
22Быдӧс сідз лоис, медбы керсис Енсянь юӧртісь#1:22 Енсянь юӧртісь ─ пророк пыр Дӧсвидзисьлӧн эта висьтавлӧмыс:
23─ Нывка сьӧктас, ваяс зонӧс.
Эммануил ним Сылӧ сетасӧ.
Нимыс висьталӧ: миянкӧт Ен.
24Саймӧм бӧрас Ӧсипыс керӧм Дӧсвидзисьлӧн ангелыс тшӧктӧм#1:24 тшӧктӧм ─ заповедь, повеление сьӧрті. Сія Мариясӧ босьтӧм иньӧн. 25Зоныс чужтӧдз Ӧсипыс сыкӧт ӧтлаын абу узьлӧм. Мариялӧн чужӧм медодзза кага ─ Зон. Зоныслӧ Ӧсипыс сетӧм нимсӧ Исус.
Асывланись мывкыда отир
বর্তমানে নির্বাচিত:
Матвей 1: БЮ19
হাইলাইট
শেয়ার
কপি
Want to have your highlights saved across all your devices? Sign up or sign in
