लूका 11

यीशु न चेलों तैं प्रार्थना करण सिखै

(मत्ती 6:9-13)

1एक बार यीशु कै जगा मा प्रार्थना कनु छौ। अर जब वेन प्रार्थना कैरियाली छै, तब वेका एक चेला न वेकू बोलि, “प्रभु, जन यूहन्‍ना बपतिस्मा देण वळन अपणा चेलों तैं प्रार्थना करण सिखै ठिक उन्‍नि तुम हमतै भि सिखै द्‍या।” 2तब वेन ऊंकू बोलि, “जब तुम प्रार्थना करिल्या त इन बुलयां कि,

“‘हे हमरा पिता, तुमरो नौ पवित्र मणै जौ,

तुमरो राज अऽ।

3अर हमरि रोज की रुट्‍टी

हमतै रोज द्‍या।

4अर हमरा पापों तैं माफ कैरा,

जन हम ऊंतैं माफ करद्‍यां,

जु की हमरा खिलाप मा पाप करदिन,

अर शैतान की बातों का द्‍वारा हम भकलै नि जा।’”

5तब यीशु न ऊंकू बोलि, “माणी ल्या तुम मा बटि कै को एक दगड़्या च, अर वु अधि रात मा तुमरा पास ऐके बोलो कि, ‘दगड़्या जरा तीन रुट्‍टी दे दे। 6किलैकि मेरु एक दगड़्या सफर कैरिके अभि हमरा इख ऐ, अर वेतैं खिलाणु कू मि मा कुछ भि नि च।’ 7तब उ भितर बटि जबाब द्‍यो कि, ‘मितैं परेसान नि कैर, अब मिन द्‍वार बन्द कैरियाली, अर मेरा बाल-बच्‍चा मि दगड़ि बिस्तर मा छिन, इलै मि उठी के त्वेतै नि दे सकदु।’

8“मि तुमतै बतै देन्दु कि, दगड़्या होण का नाता अगर उ उठी के वेतैं नि द्‍यो, पर जब वेकू वु दगड़्या वे बटि बिन झिझकयां रुट्‍टी मंगणु रालु, तब रुट्‍टी मंगण की वजै से वु उठी के वेकी जरुरत का मुताबिक वेतैं दे दयालु।”

प्रार्थना की ताकत

(मत्ती 7:7-11)

9अर मि तुमतै बतै देन्दु, “मांगा, त तुमतै दिये जालु, खुजैल्या त तुम पैल्या, खखटैल्या त तुम खुणि खुलै जालु। 10किलैकि जु कुई मंगदु च वेतैं मिलदु च, अर जु खुज्यान्दु च उ पौन्दु च, अर जु खखटान्दु च वे खुणि खुलै जान्दु। 11अर तुम मा बटि इन्द्रयो बुबा कु च कि जब वेकू नौनु वे बटि रुट्‍टी मांगु त उ वेतैं ढुंगो द्‍यो, या माछु मांगु त माछा का बदला मा उ वेतैं गुरौ द्‍यो? 12या अगर अण्ड़ा मांगु त वेतैं बिच्छी द्‍यो? 13इलै जब तुम बुरा ह्‍वेके भि अपणा बाल-बच्‍चों तैं अच्छी चीज देण जणद्‍यां, त जु लोग स्वर्ग मा रौण वळा पिता बटि मंगदा छिन ऊंतैं वु पवित्र आत्मा किलै नि द्‍यालु।”

यीशु शैतान से भि जादा ताकतबर

(मत्ती 12:22-30; मर 3:20-27)

14अर यीशु एक मनखि मा बटि गूंगु बणै देण वळा खबेस तैं निकळणु छौ, जब उ निकळि गै त गूंगु बुलण लगि गै, अर यू देखि के लोग हैरान ह्‍वे गैनी। 15पर भीड़ का लोगु मा बटि कुछ न बोलि कि, “यू खबेसों का अधिकारी बालजबूल की मदद से खबेसों तैं निकळदु।” 16तब कुछ लोगु न वेकी अजमैस करण खुणि वे बटि एक स्वर्गीय चिन्‍न की मांग कैरी। 17पर यीशु ऊंका मनों की बात जाणि गै अर वेन ऊंकू बोलि, “अगर कै राज्य का दुई हिस्सा ह्‍वे जनदिन, त उ राज्य बरबाद ह्‍वे जान्दु। अर उन्‍नि कै घौर का भि अगर दुई हिस्सा ह्‍वे जनदिन, त उ भि बरबाद ह्‍वे जान्दु, 18त अब तुम मितैं इन बता, ‘अगर शैतान खुद ही अपणा खिलाप ह्‍वे जालु, त वेको राज कनकै बणयूं रालु?’ अर यू मि तुम बटि इलै पूछणु छौं, किलैकि तुम मेरा बारा मा बुल्द्‍यां कि मि बालजबूल याने की शैतान की मदद से खबेसों तैं निकळदु छौं। 19अगर जु मि बालजबूल की मदद से खबेसों तैं निकळदु छौं, त तुमरि शिक्षा का मुताबिक चलण वळा खबेसों तैं कै की मददळ निकळदिन? इलै वु लोग ही तुमतै गळत साबित करला। 20पर अगर जु मि परमेस्वर की सामर्थळ खबेसों तैं निकळदु, त ईं बात तैं सुणिल्या कि परमेस्वर को राज तुमरा नजदीक ऐ गै।

21-22“अर जब एक ताकतबर मनखि अपणा घौर अर जैजाद की रखवळी करदु, अर वेकी रखवळी खुणि अपणा पास हथियार भि रखदु, ताकि वेकी जैजाद बचि रौ। मगर मि तुमतै बतै देन्दु, कि जब वेसे भि जादा ताकतबर मनखि वे पर हम्‍ला करदु अर जीती जान्दु, त वेकी ईं जैजाद तैं वु अपणा लोगु मा बांटि देन्दु। तब यू ताकतबर मनखि वेका हथियार तैं लूछि लेन्दु जौं पर वे मनखि को भरोसा छौ। 23जु मेरा दगड़ा मा नि च उ मेरा खिलाप च, अर जु मेरा दगड़ा मा लोगु तैं इकट्‍ठा नि करलु उ ऊंतैं परमेस्वर बटि दूर लि जान्दु।”

खबेस को वापिस लौटी के औण

(मत्ती 12:43-45)

24“अर जब कुई खबेस कै मनखि बटि भैर निकळदु, त उ खबेस सूखि जगों मा आराम करण की जगा खुज्यान्दु, अर जब वेतैं आराम करण की जगा नि मिलदी तब उ बुल्दु कि, ‘मि वापिस अपणा वे ही घौर मा चलि जौलु जख बटि निकळि छौं।’ 25तब उ वापिस ऐके वे घौर तैं साफ-सुत्रो अर सज्युं-धज्युं पौन्दु। 26फिर उ खबेस वापिस जैके अपणा दगड़ा मा सात और भि बुरा खबेसों तैं लेके औन्दु, अर ऊ वे मनखि मा रौण लगि जनदिन, अर तब वे मनखि की दसा पैलि से भि और बुरी ह्‍वे जान्दी।” 27अर जब यीशु यों बातों तैं बुलणु ही छौ, कि भीड़ मा बटि एक जनानि न ऊँची आवाज मा बोलि, “धन्य च वा कोख जैमा तू रै, धन्य च वा माँ जिं को तिन दूद पेई।” 28पर वेन बोलि, “धन्य त ऊ छिन जु परमेस्वर का वचन तैं सुणदिन अर वेका मुताबिक चलदा भि छिन।”

बिस्वास नि करण का बानो यीशु को चितौण

(मत्ती 12:38-42)

29अर जब लोग जादा होण लगि गैनी तब यीशु न बोलि, “यू लोग चिन्‍न खुज्यौदिन, मगर यों तैं परमेस्वर का रैबर्या योना का चिन्‍न का अलावा कुई चिन्‍न नि दिखये जालु, किलैकि ये जमना का लोग दुष्‍ट छिन। 30अर जन #योना 3:4योना रैबर्या नीनवे नगर का लोगु खुणि एक चिन्‍न ठैरि, उन्‍नि मनखि को पुत्र भि ये जमना का लोगु खुणि एक चिन्‍न ठैरलु।

31“अर #1 राजा 10:1-10; 2 इति 9:1-12दक्छिण की महाराणी न्याय का दिन पर ये जमना का लोगु का दगड़ा मा खड़ि होलि अर तुमतै दोषी ठैराली, किलैकि जब वींन राजा सुलैमान का ज्ञान का बारा मा सुणी, तब वा धरती का छोर बटि ऐ। पर सुणा, इख त उ च जु की राजा सुलैमान से भि महान च, पर तुम वे पर बिस्वास नि करद्‍यां।

32“अर नीनवे नगर का लोग भि न्याय का दिन पर ये जमना का लोगु का दगड़ा मा खड़ा होला अर तुमतै दोषी ठैराला, किलैकि ऊंन योना रैबर्या का द्‍वारा कियां परचार तैं सुणी के पस्ताप कैरी। पर सुणा, इख त उ च जु की योना रैबर्या से भि महान च, पर तुम वे पर बिस्वास नि करद्‍यां।”

उज्याळा को जीवन ज्या

(मत्ती 5:15; 6:22,23)

33तब यीशु न ऊंतैं उदारण देके बोलि, “कुई मनखि द्‍यू बाळि के छिपै के नि रखदु, अर ना ही वेतैं कै कटोरा का तौळ ढकै के रखदु, बल्किन मा एक ऊँची जगा पर रखदु, ताकि भितर औण वळा लोगु तैं उज्याळु मिलु। 34अर तुमरा आंखा तुमरा सरील खुणि एक द्‍यू का जन काम करदिन, इलै अगर जु तुमरा आंखा शुद्ध राला त तुमरा पूरा सरील मा उज्याळु होलु, पर अगर जु तुमरा आंखा अशुद्ध राला त तुमरा पूरा सरील मा भि अन्धेरु रालु। 35इलै ध्यान रखा, कि कखि तुमरो उज्याळु अन्धेरा मा नि बदलि जौ। 36इलै अगर जु तेरु पूरु सरील उज्याळा मा च अर वेको कुई भि अंग अन्धेरा मा नि हो, त तू यू जाणि ले कि यू सभि अंग इन चमकला जन वे बगत होन्दु, जब द्‍यू अपणी चमक का द्‍वारा त्वेतै उज्याळु देन्दु।”

फरीसी अर शास्‍त्रियों से साबदान

(मत्ती 23:1-36; मर 12:38-40)

37अर जब यीशु इन बोन्‍नु ही छौ, कि फरीसी दल मदि एक मनखि वेसे बिन्ती कैरिके वेतैं अपणा इख खाणुक पर बुलै। अर उ वेका इख भितर जैके खाणुक खाणु कू बैठि गै। 38तब फरीसी दल का मनखि न यू देखि अर हैरान ह्‍वे गैनी कि, वेन खाणुक खाण से पैलि अपणा हाथों#11:38 यहूदी लोगु का रीति-रिवाज का मुताबिक खाणुक खाण से पैलि हाथों तैं क्‍वीना बटि उन्द धोण भौत जरुरी छौ (मर 7:1-5)। तैं नि ध्वे। 39प्रभु न वेकू बोलि, “तुम फरीसी लोग कटोरा अर थकुला तैं भैरि-भैर मजौन्द्‍यां, मगर तुमरा भितर लालच अर बुरै भुरीं छिन। 40अरे लाटों, जैन भैर को हिस्सा बणै, क्या वेन भितर को हिस्सा नि बणै? 41अगर जु तुम पवित्र मन से दान दिल्या त सुणा, तब तुम खुणि सब कुछ शुद्ध ह्‍वे जालु।

42“हे फरीसी दल का लोगु, तुम पर हाय च, किलैकि तुम पुदीना अर सुदाब नौ का पौधा को अर इन्‍नि बन्‍नि-बन्‍नि किसम का साग-पातो को भि #लैव्य 27:30दसुं हिस्सा देन्दयां। पर न्याय अर परमेस्वर का प्यार तैं टाळि देन्दयां, जब की तुमरो यू फरज छौ कि अपणा मन तैं शुद्ध बणै के परमेस्वर का प्यार तैं अर वेकी आज्ञा को पालन तुम खुद भि कना रौन्दा, अर यू ही तरीका लोगु तैं भि सिखौन्दा। 43फरीसी दल का लोगु तुम पर हाय च, किलैकि तुम प्रार्थना भवनों मा आदर-सम्मान मिलण वळी जगा पर बैठण पसन्द करद्‍यां, अर तुम चन्द्‍यां, कि बजारों मा लोग तुमतै नमस्कार कैरा। 44अर हाय च तुम पर, किलैकि तुम त ऊं कबरों का जन छाँ जौं को कुई अता-पता नि च, अर लोग बिन जणयां ऊंका मथि चलदिन।”

45तब एक शास्‍त्री न यीशु तैं जबाब दिनी, “गुरुजी, इन बोलि के त तुम हमरि बेजती कना छाँ।” 46यीशु न बोलि, “हे शास्‍त्रियों तुम पर भि हाय च, किलैकि तुम नियम-कानूनों का बोझ तैं मनखियों पर लादि देन्द्‍यां जौं तैं उठौण कठिन च, पर तुम खुद ऊं नियम-कानूनों को पालन करण कि कोसिस नि करद्‍यां। 47अर हाय च तुम पर, किलैकि परमेस्वर का जौं रैबर्यों तैं तुमरा ही पितरों न मारी छौ, तुम ऊंकी कबरों तैं याद रखणु खुणि एक चिन्‍न बणौन्द्‍यां। 48हाँ, तुम ऊंकी ही कबरों तैं बणौन्द्‍यां, जौं तैं तुमरा पितरों न मरवेयलि छौ, इलै तुम अपणा पितरों की यों करतूतों का गवा छाँ, अर ऊंका ऊं कामों से सैमत भि छाँ। 49इलै परमेस्वर की #नीति 8:12अकल न बोलियालि छौ कि, ‘मि ऊंका पास रैबर्यों अर खास चेलों तैं भेजलु। अर वु लोग यों भेज्यां लोगु मा बटि कुछ लोगु तैं सताला अर कुछो तैं त मारी भि द्‍याला।’

50“अर दुनियां की शुरुवात से लेके अभि तक जथगा भि रैबर्यों को खून किये गै, ऊं सभ्यों की मौत को #उत्पति 42:22; 2 इति 24:22; यहेज 3:18हिसाब ये जमना का लोगु बटि लिये जालु। 51#उत्पति 4:8हाबिल की हत्या से लेके #2 इति 24:20-22जकरयाह रैबर्या की हत्या तक जैको ल्वे परमेस्वर का मन्दिर अर वेदी का समणि ह्‍वे छौ। अर मि तुमतै बतै देन्दु कि, ऊं सभ्यों की हत्या को हिसाब ईं पीढ़ी का लोगु बटि लिये जालु। 52अर हाय च तुम शास्‍त्रियों पर, किलैकि तुमुन परमेस्वर का ज्ञान की चाबी ले त दिनी, मगर तुमुन खुद ही नि सिखी अर ना दुसरो तैं सिखण देई अर ना ही ऊंतैं वेमा जाण देई।”

53अर जब यीशु वे शास्‍त्री का इख बटि निकळि गै, त शास्‍त्री अर फरीसी दल का लोग वे बटि खार खाण लगि गैनी, अर वेका पिछनै पोड़ि गैनी। अर भौत सि बातों का बारा मा ऊ यीशु बटि सवाल-जबाब करण लगि गैनी। 54अर ऊ ईं ताक मा छा कि वेका गिच्‍चा बटि कुई इन्दरि बात निकळि जौ, जैका बाना ऊ वेतैं पकड़ी सैका।

বর্তমানে নির্বাচিত:

लूका 11: GBM

হাইলাইট

কপি