Лука 24

24-тӥ ЛЮКЕТ

1Арнялэн нырысетӥ нуналаз, туж вазь ик, зыраны дасям ческыт зыно вӧйёс вайыса, кышномуртъёс шайгу доры лыктӥзы. Соосын валче куд-ог мукетъёс но лыктӥзы. 2Соос адӟизы: шайгу бордысь из палэнтэмын. 3Пушказ пыризы но Кузё-Инмарлэсь Иисуслэсь Мугорзэ ӧз шедьтэ. 4Та пумысен паймыса улон дыръязы шӧдтэк шорысь соос азе пиштӥсь дӥськутэн кык пиосмуртъёс султӥзы. 5Кышкаса, йырзэс ошыса улыкузы, соослы шуизы: «Мар тӥ улэпез кулэмъёс пӧлысь утчаськоды? 6Со татын ӧвӧл: Со улӟыса султӥз. Тодады вае али, Галилеяын дыръяз, кызьы Со тӥледлы вераз вал: 7”Адями Пиез сьӧлыко муртъёслэн киязы кутыса сётозы, кортӵогалозы, куинетӥ нуналаз Со улӟыса султоз”». 8Солэсь кылъёссэ соос тодазы вайизы. 9Шайгу дорысь берытскизы но ваньзэ тае дас одӥгезлы ик апостолъёслы, мукетъёслы но – ваньмызлы ивортӥзы. 10Татын вал Магдалина Мария, Иоанна, Иаковлэн анаез Мария но мукет кышномуртъёс. Соос та сярысь апостолъёслы ивортӥзы. 11Соослэн верамзы токма кылъёс кадь гинэ потӥз, соин ик соослы ӧз оске. 12Нош Петр султыса шайгу доры бызьыса мынӥз, мыкыртӥськыса учкиз но Сое биням кыллись дэраез гинэ адӟиз, ас понназ ачиз ортчем ужъёслы паймыса, берлань кошкиз.

13Со нуналэ ик дышетскисьёс пӧлысь кыкез мыно вал Иерусалимысен ог куатьтон стадия кеме интыяськем Еммаус шуон гуртэ, 14вань луэм ужъёс сярысь куспазы вераськыса мыно вал. 15Соос куспазы вераськыса, малпаськыса мынон дыръя Ачиз Иисус, матазы лыктыса, соосын ӵош мынӥз. 16Синъёссы соослэн кыниськемын вал, соин ик соос Сое ӧз тодмалэ. 17Иисус соослы шуиз: «Мар сярысь тӥ куспады вераськыса мынӥськоды, малы тӥ ӝожмытэсь?» 18Соос пӧлысь одӥгез, Клеопа нимоез, Солы ответ сётыса шуиз: «Иерусалиме лыктэмъёс пӧлысь, оло, Тон огнад уд тодӥськы на-а та нуналъёсы отын мар луэм сярысь?» 19Иисус соослэсь юаз: «Мар сярысь?» Солы соос шуизы: «Мар луиз Назаретысь Иисусэн, Кудӥз пророк вал. Инмар азьын, вань калык азьын Со ужын но, кылын но кужмо вал. 20Сое милям архиерейёсмы, кузёйыръёсмы виыны судить карон понна кутыса сётӥзы но Сое кортӵогазы. 21Нош ми оскиськиськомы вал, Со луэ Ачиз, Кудӥз Израилез мозмытыны кулэ. Но, тани, табере туннэ куинетӥ нуналыз ини, кызьы та ваньмыз ортчиз. 22Нош куд-огез нылкышноосмы милемыз паймытӥзы: соос вазь ик шайгу дорын вылӥллям, 23но Солэсь Мугорзэ шедьтӥллямтэ. Берытскизы но, Кылчинъёслэсь возьматскемзэс адӟимы шуыса, вераськизы; Кылчинъёс Со улэп шуыса вераллям. 24Милямъёс пӧлысь но куд-огез шайгу доры мыныса адӟиллям озьы ик, кызьы кышномуртъёс веразы; нош Сое адӟиллямтэ». 25Соку Иисус соослы вераз: «Э, нодтэмъёс, сюлмыныды пророкъёслэн азьланез сярысь вань верамъёссылы оскыны дыг муртъёс! 26Тазьы кулэ ӧй вал-а Христослы курадӟонэз чиданы но Аслаз пиштӥсь данлыказ пырыны?» 27Моисей бордысен кутскыса, вань пророкъёслэсь, быдэс Священной Гожтэмысь Со сярысь верамзэс валэктыса улӥз. 28Мыноно гуртсылы матэ вуизы. Азьлане мыныны турттӥсь мурт кадь Иисус кариськиз, 29нош соос Сое кошкыны лэзьытэк выризы: «Милемын огазе кыль ук, нунал ӝыт пала кыстӥське ини». Иисус корка пыриз но соосын огазе кылиз. 30Соосын сиськыса улыкуз, нянез басьтыса бакель кариз, тӥялтыса соослы сётӥз. 31Соку соослэн синъёссы усьтӥськизы но соос Иисусэз тодмазы. Нош Иисус соос понна адскисьтэм луиз. 32Соос ог-огзылы шуизы: «Асьмелэн пушкамы сюлэммы ӧз ӝуа-а, куке Со асьмелы сюрес вылысен вераз, куке Священной Гожтэмез асьмелы валэктылӥз?» 33Султӥзы но со часын ик Иерусалиме берытскизы, татысен соос дас одӥгназэс апостолъёсты, соосын огазьын пукись мукет эшъёссэс шедьтӥзы. 34Соос веразы, Кузё-Инмар зэмзэ ик улӟыса султӥз но Симонлы возьматскиз шуыса. 35Нош соос сюрес вылын мар луэм сярысь веразы, кызьы соос Иисусэз, нянь тӥялтыкуз, тодмазы.

36Та сярысь вераськыса улыкузы, Ачиз Иисус, соослэн пӧлазы султыса, соослы шуиз: «Ваньдылы каньыл мед луоз». 37Соос куалектыса, кышкаса, пӧртмаськись духез адӟиськом шуыса малпазы. 38Нош Иисус соослы шуиз: «Малы куалекъяськоды, малы таӵе малпанъёс тӥляд сюлмады пыро? 39Учкелэ Мынам киосы, пыдъёсы шоры – Мон Ачим ук та! Йӧтӥське Мон борды, учке: Мынам кадь, духлэн мугорыз но, лыосыз но ӧвӧл ук». 40Тае вераз но соослы киоссэ, пыдъёссэ возьматӥз. 41Шумпотэменызы оскытэк, паймыса улыкузы, Иисус соослы шуиз: «Вань-а тӥляд татын кыӵе ке но сиёнды?» 42Солы соос пыжем чорыг люкет но карасэн чечы сётӥзы. 43Сиёнзэс басьтыса, соос азьын сииз. 44Собере соослы Иисус шуиз: «Тани со, кудӥз сярысь, эшшо тӥледын огазьын улыкум, Мон верай вал: Моисейлэн законаз, пророкъёслэн книгаосазы но, псаломъёсын но Мон сярысь мар гожтэмын, ваньмыз быдэсмыны кулэ». 45Соку Гожтэмъёсыз валан понна соослэсь визьзэс усьтӥз 46но соослы шуиз: «Тазьы гожтэмын, тазьы ик луыны кулэ вал Христосэн: курадӟонэз адӟыны но куинетӥ нуналаз улӟыса султыны. 47Солэн нимыныз сьӧлыкъёслэсь ӧпкельыса куштӥськон но сьӧлыкъёсты куштон сярысь дышетон, Иерусалимысен кутскыса, вань калыкъёс пӧлын тодытэмын луыны кулэ. 48Нош тӥ – тае адӟисьёс-тодытӥсьёс луиськоды. 49Атаелэсь сётэм сӥзёнзэ Мон тӥ вылэ ысто-лэзё; вылысь сётэм кужымен шобырскытозяды, тӥ Иерусалимын улэ».

50Соосты, городысь поттыса, Вифания доры вуттӥз но, Аслэсьтыз кизэ ӝутыса, соосты бакель кариз. 51Бакель карыкуз, соослэсь палэнтӥськыны но Инме ӝутскыны кутскиз. 52Солы йыбырттӥзы но быдӟым шумпотонэн Иерусалиме берытскизы, 53Инмарез данъяса, тау карыса, ялан вӧсяськыса, храмын улӥзы. Аминь.

বর্তমানে নির্বাচিত:

Лука 24: УДМБИБ

হাইলাইট

কপি