Лука 22

22-тӥ ЛЮКЕТ

1Матэ вуиз Пасха шуыса нимаськись Юмал Нянь Сиён праздник. 2Архиерейёс, книга тодӥсьёс Сое кызьы ке но виён амал утчазы, но калыклэсь кышказы. 3Дас кык пӧлысь одӥгезлэн Искариот шуон Иудалэн пушказ шайтан пыриз. 4Со мынӥз но архиерейёсын, кузёйыръёсын Иисусэз кутыса сётон сярысь вераськиз. 5Соос шумпотӥзы, солы коньдон сётоно кариськизы. 6Иуда кыл сётӥз но, калыктэм азьысен Сое кутыса сётон вылысь, кельшымон дыр утчаса улӥз.

7Юмал нянь сиён нунал вуиз, соку Пасхалы ыжпиез вандыны кулэ вал. 8Иисус Петрен Иоаннэз ыстыса шуиз: «Мынэлэ, милемлы Пасха ыжпиез дасялэ». 9Иисуслэсь соос юазы: «Кытчы милемыз дасяны косӥськод?» 10Соослы Со шуиз: «Тани, тӥ городэ пырыкуды, пумитады кувшинэн ву нуись мурт шедёз; кудаз корка со пыроз, со сьӧры мынэ. 11Коркалэн кузёезлы шуэлэ: ”Дышетӥсь тынэсьтыд юа: кудаз комнатаын Мон дышетскисьёсыным валче Пасха ыжпиез сиыны быгато?” 12Со тӥледлы коркалэсь вӧлдыса дасям бадӟым палзэ возьматоз; отчы дасялэ». 13Соос мынӥзы, адӟизы: ваньмыз вал озьы, кызьы Со вераз. Пасхалы ыжпиез вандыса дасязы.

14Часэз вуэм бере дас кык апостолъёсын ӵош Со ӝӧк сьӧры пуксиз. 15Иисус соослы вераз: «Аслам курадӟонэлэсь азьло Мынам туж потэ вал тӥледын валче та Пасха ыжпиез сиеме. 16Тӥледлы верасько: Инмар Эксэйлыкын со быдэсмытозь, сое уг ни сиы». 17Чаша кутыса, тау карыса шуиз: «Басьтэлэ тае но куспады люкылэ, 18тӥледлы верасько: Инмар Эксэйлык вуытозь, виноград емышлэсьсэ винаез Мон уг ни юы». 19Нянь басьтыса, тау карыса тӥялтӥз но соослы тазьы вераса сётӥз: «Та Мынам Мугоры, со тӥ понна сётӥське; Монэ буре вайыса, тае быдэсъялэ». 20Ӝытан бере чашаез кутыса сётӥз но шуиз: «Та чаша Мынам Вирам Выль Сӥзён луэ, со тӥ понна кисьтӥське. 21Тани, Монэн огазьын ӝӧк вылын Монэ вузаса сётӥсьлэн киыз. 22Адями Пи мынэ ке но, кызьы Со сярысь азьвыл ик гожтэмын вал, но куректон луоз со муртлы, кин Сое вузаса сётоз». 23Соос пӧлысь кин меда тае лэсьтоз шуыса, соос ог-огзылэсь юаны кутскизы. 24Соос пӧлысь кудзэс бадӟымез шуыса лыдъян пумысен соос куспын ченгешон но вал. 25Иисус соослы шуиз: «Эксэйёс калыкъёсын кузёясько, соосты кутыса возисьёс ӟеч карисьёс шуыса нимасько. 26Нош тӥ озьы эн улэ: кин тӥ пӧлысь бадӟымез, покчи мурт кадь кариськы, нош кивалтӥсь медо кадь мед кариськоз. 27Кин бадӟымгес: сиськись-а яке утялтӥсь-а? Сиськись ӧвӧл-а? Нош Мон тӥ пӧлын медо кадь. 28Визь сынаськыса улон дыръёсы тӥ Монэн огазьын вал. 29Кызьы Мыным Атае Эксэйлык сӥзиз, Мон но тӥледлы Эксэйлык сӥзисько, 30Эксэйлыкысьтым ӝӧк сьӧрам мед сиёды, мед юоды, Израильлэсь дас кык выжыоссэ судить карыны престолъёс вылэ мед пуксёды». 31Кузё-Инмар шуиз: «Симон! Симон! Тани, шайтан куриз вал тӥледыз чабеез кадь пужныны. 32Но Мон тон понна вӧсяськи, тынад осконэд медаз начармы вал шуыса. Тон нош ик берыктӥськид ке, агай-вынъёстэ юнматы». 33Петр Солы ответ сётӥз: «Кузё-Инмаре! Тонэн ӵош мон пытсэтэ но, кулыны мыныны но дась». 34Нош Иисус солы шуиз: «Тыныд верасько, Петр, туннэ атас чортытозь, Монэ уд тодӥськы шуыса, куинь пол куштӥськод». 35Иисус дышетскисьёсызлы шуиз: «Мон тӥледыз пуйытэк, сумкатэк, пыдкутчантэк ыстылӥ, малы ке но ёрмыса улӥды-а?» Соос ответ сётӥзы: «Номырлы но ӧм ёрме». 36Соку Иисус соослы шуиз: «Нош табере, кинлэн пуйыез вань, басьты сое, озьы ик сумка но; нош кинлэн ӧвӧл, дӥськуттэ вуза но палаш басьты. 37Тӥледлы верасько: Мон вылын быдэсмыны кулэ тазьы гожтӥськем но: ”Законлы пумит улӥсьёсын оградэ пыртэмын луоз”. Уго мар Мон сярысь верамын, ӝоген ваньмыз быдэсмоз ини». 38Соос шуизы: «Кузё-Инмар! Тани татын кык палашъёс». Иисус соослы шуиз: «Тырмоз».

39Потӥз но огдышемен ик Елеон гурезе мынӥз. Со бӧрсьы дышетскисьёсыз но мынӥзы. 40Интыязы вуэм бере соослы шуиз: «Вӧсяськелэ, визь сынаськонэ медад сюре шуыса». 41Нош Ачиз соос дорысь из лэзьыса вуттымон кеме кошкиз но пыдесъяськыса, вӧсяськыса 42шуиз: «Атае! Та чашаез Мон вӧзтӥ ортчытыны ӟеч эриктэ сётысалыд ке! Но со Мынам эрикея медаз лу, Тынад эрикедъя мед луоз». 43Инмысь Кылчин вуиз но Сое юнматыса улӥз. 44Шугадӟонъёс пӧлын улыкуз, эшшо но тыршыса вӧсяськиз. Солэн пӧсямез музъем вылэ усьылӥсь вир шапыкъёс кадесь вал. 45Вӧсяськемысь султыса, Со дышетскисьёсыз доры лыктэм бераз адӟиз: соос куректэменызы умме усиллям. 46Иисус соослы шуиз: «Малы тӥ изиськоды? Визь сынаськонэ медад сюре шуыса, султыса вӧсяське».

47Иисус тае вераса улон куспын калык вуиз. Соослэн азязы лыктӥз дас кык дышетскисьёс пӧлысь одӥгез, Иуда нимоез. Со Иисус доры, Сое чупаны шуыса, матаз мынӥз. Соослы Иуда таӵе тодмет уго вераз: «Кинэ чупало, Со ик Со вань». 48Нош Иисус солы шуиз: «Иуда! Чупаса-а тон Адями Пиез вузаськод?» 49Соин огазьын луэмъёс, ужпумлэсь кытчы мынэмзэ адӟыса, Солы шуизы: «Кузё-Инмар! Палашен ум шукке-а?» 50Соос пӧлысь одӥгез архиерейлэн ляльчиезлэсь бур пельзэ ӵогыса уськытӥз. 51Соку Иисус шуиз: «Дугдэ, тырмоз». Солэн пель бордаз йӧтӥськыса, сое бурмытӥз. 52Солы пумит люкаськем архиерейёслы, храмлэн кузёйыръёсызлы, тӧроослы Иисус шуиз: «Йырвандӥсь мурт доры сямен, мечъёсын, зыръёсын Монэ кутыны потӥды! 53Котькуд нунал Мон тӥледын огазьын храмын вал, тӥ Мон вылэ кидэс ӧд ӝутэ. Но али – тӥляд дырды, пеймыт улонлэн кузёяськон вакытэз».

54Иисусэз кутыса нуизы, архиерейлэн корказ вайизы. Нош Петр палэнэтӥ мынӥз. 55Азбар шоры тылскыса огазе пуксем беразы Петр но соос куспы пуксиз. 56Одӥг медо нылкышно солэсь тыл дорын пукемзэ адӟиз но со шоры сак учкыса шуиз: «Таиз но Соин ӵош вал». 57Нош со, Иисуслэсь куштӥськыса, кышномуртлы шуиз: «Мон Сое уг тодӥськы». 58Ӝоген мукетыз сое адӟыса шуиз: «Тон но соос пӧлысь». Нош Петр та адямилы шуиз: «Ӧвӧл». 59Одӥг час мында дыр ортчиз, эшшо кин ке но гижысь-пиньысь кутскыса вераз: «Зэм ик, таиз но Соин ӵош вал, со Галилеяысь мурт ук». 60Нош Петр со адямилы шуиз: «Уг тодӥськы, мар тон вераськод». Соку ик, со вераськон куспын, атас чортӥз. 61Соку Кузё-Инмар берыктӥськыса Петр шоры учкиз; нош Петр Кузё-Инмарлэсь верам кылзэ тодаз вайиз: «Атас чортытозь, куинь пол Мон бордысь куштӥськод». 62Педло потыса, зар бӧрдыны кутскиз.

63Иисусэз кутыса возись адямиос Сое сантэм каризы, жугизы. 64Шобыртыса, Солэн ымныраз тышкаса, Солэсь юазы: «Тодмад ке, кин Тонэ шуккиз, вера». 65Солы пумит трос мукет сантэман кылъёс веразы на.

66Нунал вордӥськем бере калыклэн тӧроосыз, архиерейёс, книга тодӥсьёс люкаськизы. Соос Иисусэз асьсэлэн сӥнедрионазы пыртӥзы 67но Солы шуизы: «Тон-а Христос? Вера милемлы». Иисус соослы шуиз: «Тӥледлы верай ке но, тӥ уд оске; 68тӥлесьтыд юай ке но, тӥ Мыным ответ уд сётэ, уд но лэзе Монэ. 69Табере Адями Пи Инмар кужымлэн бурпалаз пуксёз». 70Ваньзы шуизы: «Озьыен, Тон Инмар Пи?» Иисус соослы ответ сётӥз: «Тӥ вераськоды, Мон шуыса». 71Нош соос шуизы: «Асьмелы кыӵе возьматон-тодытон кулэ на? Уго ми асьмеос Солэн ымысьтыз потэм кылъёсты пельынымы кылӥмы!»

বর্তমানে নির্বাচিত:

Лука 22: УДМБИБ

হাইলাইট

কপি