Matius 13
13
Yesusti sunumna wana togtoba yamoropne sembe ambatsiogha
(Markus 4:1-9; Lukas 8:4-8)
1Yubu ambatsiogti, sum eneko Yesus aeag anekoa lambom agha mag longorop mag abolag piogti pukamog. 2Pina pukamogpa, nimi maikno elag yingkina winil dalamek. Nimi maikno winil dalamek ane sembe, Yesus sekom agha kabong mag alip toman piroba nhon mag alibag wamogne nenekoag wa'al piogti pukamogpa, nimi maikno taneko mag abolag sekel alamek. 3Sekel alamekpa Yesusti sunumna tol pina yubu maikno ambarelamsiog. Yubu ambarelamsiogti, “Ka'elamlulom! Awe weropne nhondi so'oag wana togtoba maikno toghol palamog. 4Yamoro toglamogpa, wana nenne inaag timbaog. Inaag timbaog wana togna toghogha taneko winang yingkina ni toro teek. 5Wana nenne babe so'o ologhag kirik phalag timbaog. Anekoag timbaogti, so'o ologhari wana toghogha taneko elemag pongo saelbaog. 6Pongo saelbaog aghana, kirik phalag so'o ologhari, yareng weag wa'in kom. Wa'in kom ane sembe heng waelbaogti, bobori pongoroba taneko elemag halo aro ul taog. 7Nenne babe pongoroba alog aba nusamag timbaogti, pongkaog aghana, alog aba tanekori niknibaogpa tebaog. 8Aghana nenne babe so'o mesaag sukuptobag timbaog. So'o mesaag yingkiogne pongkaogti, wali uro wana maubaog. Yo'o nenneri wana teng tombare, nenneri wana teng phende, nenneri wana teng nhon maubaog. 9Aori ka'ebalomne nene nimi niri seneragto saelbamlulom,” seog.
Yesusti, “Tam nene sembe likiptop yubuag agha sunumna ambarelamsin,” aro tibin nembatsiogha
(Markus 4:10-12; Lukas 8:9-10)
10Yesusti ambatsiogpa, eldi yubu ka'ero neleptop nang elag yingkina hailamekti, “Sa'a sembe andi sunumna tol pina likiptop yubuag agha ambarelamsilam?” aro haibaek.
11Wene aro haibaekpa, Yesusti sinag samoro lelamogti, “Imagne ponekori mog so'oag nimi saelba uhiroba aneko samenagna tognoro wamog. Ora nimi sembe tognoro wamlange neneko tibin tanep kom aghana, wene nari tibin nenero ambatnuahinne a'unag talul. 12Nimi etneri elag wamlenge, ‘O'oro saelbanun,’ senelamle tanena, elag nen ma'aro tatnepne maikno talul. Aghana nimi etneri elag wamlenge, ‘Limnun,’ senelamle tanena, elag wamlenge babe kom talul. 13Ane sembe nari ora nimiag yubu ambarelamsindi, likiptop yubuag agha sunumna tol pina ambarelamsin. Undo ambarelamsinba, sin nimi tanekori,
‘Haingdi kemelamukang aghana, wanaag agha ibukang kom.
Aori ka'elamukang aghana, wanaag agha seneraghukang kom.’
14-15Sin nimi tanekoag uro yabalamlange, Yesaya ponekori Allah yubu silimu tiptopne mome toro pibog yubuap sunsunum uro yabalamla. Allahri yubu lelamogti,
‘Israel nimi taneko usog mikip nimi talamek.
Sin ao lep tangkamekti, haing babe up tangkamek.
Sindi ao leptan koma babe, haing uptan koma babe wamseng tanena,
haingdi imnepti, aori ka'ebanepti, wanaag babe seneragnep andarina,
nadamne Allahag samoro yaheng.
Nadamne Allahag samoro yahengpa, wali nembahisene.
Aghana Israel nimi usog mikip tangtop nimi tanekoag uro yabilul nena,
“A'undi sop-sop, ‘Ka'ebahane,’ aro aori ka'elamlulom aghana,
wanaag agha seneraglulom kom.
‘Kembahane,’ aro haingdi kemelamlulom aghana,
wanaag agha iplulom kom,”
seog,’ aro mome toro pibog.#Yesaya 6:9-10 Sinag sunsunum uro yabalamla.
16Aghana a'undi haingdi kembi agha ililamlomdi, aori ka'ebom agha seneraglamlomne sembe wana awi uro wamlulom. 17Yubu sikne agha ambatnuahinne ka'ebahut. A'un wene haingdi ililamlomne eneko samenag wamek nimina, Allah yubu silimu tiplamek nimiri babe, wana porog nimiri babe, ‘Ipsebe,’ senelamek aghana, ibek kom. A'undi aori ka'elamlomne babe sindi, ‘Ka'ebahabe,’ senelamek aghana ka'ebaek kom. Ane sembe a'undi haingdi ililamlomdi, aori ka'elamlomne sembe wana awi uro wali wamlulom,” aro Yesusti ambatsiog.
Yesusti sunumna wana yamoropne sembe tibin nembatsiogha
(Markus 4:13-20; Lukas 8:11-15)
18Yesusti nen tipto ambarelamsiogti, “Ane sembe a'undina, aweag wana togtopne ponekoag tol pina sunuro ambatsin yubu neneko seneragto ka'eamlulom. 19Imagneri mog so'oag nimi saelba uhiroba sembe yubu ambarelamsinba, nimiri aori ka'elamna aghana, wanaag seneragna koma wamnep. Wanaag seneragna kom nimi ni sembe, aori ka'erop yubu neneko sikin wanaag meptaleag aro phia yonge sikini neneko yingkina yubu nene pelepto tolamla. Undo uro yabalamnepne sembe wana togtoba inaag timbaogne sunuro lemna.
20Kirik phalag timbaogne sunuro lemnange neneko, Allah yubu ka'ebi agha elemag awi uro, ‘Saelbanun,’ aro torop nimi sembe lemna. 21Elemag yubu ka'ebandi tomnep aghana, nimi enekori wanaag yubu eneko yareng pelengka urop kom tanena, mo sesog sembe pongoro wamnep. Nimi enekori Allah yubu salero ul piropne sembe ora nimiri elag, ‘Seklebalul,’ aro ulamsengpa to, el luknubahengpa to tanena, kirik phalag timbaog saog nimi wamnepti, elem uro Allah yubu sae limnep. 22Wana toglamnaba, pongoroba alog aba nusamag yingkiogne sunuro lemnange nenekona, Allah yubu ka'erop aghana, sindi wanaag sop-sop, ‘Welaro wamnun,’ aro wana ikin uro seneraglamang nimi sembe lemna. Undo seneraglamangdi, ‘Tup tanun,’ senenne neneri sindi wana toropti, wanaag to'op tangtopneri Allah yubu niknil orop. Oro niknilamlaba, Allah yubu pongoro wana maubanep kom saog wamla. 23Aghana wana so'o sukuptobag togtop nena, Allah yubu ambatsiropne ka'ebi agha seneragtop nimi sembe lemna. Nimi enekori Allah yubu seneragtopneag agha wana maikno uro mauamla. Nenneri wana teng tombare maurop, nenneri wana teng phende maurop, nenneri teng nhon maurop saog uro wamnep,” aro tibin nenero ambatsiog.
Gandum togto merobag o'olaba pongol ingkiropne sembe Yesusti likiptop yubu ambatsiogha
24Yesusti nimi tanekoag sunumna nen nhon ambarelamsiogti, “Imagne ponekori mog so'oag nimi saelba uhiroba sembe sunumna sumbatsinun. Awe weropne nhondi eldi aweag wana togtoba walinge toghol piroba saog uro wamla. 25Gandum wana walinge toghol piog aghana, inipnag nimi ni malamekpa, el aisange nhondi tognoro aweag yingkina gandum wana walinge meamogha anabiag o'olaba wana malinge togholaog. 26Gandum wana togtoba aneko pongolamogpa, kemelamekpa gandum wana mauroba nusamag o'olaba babe pongol yabiog.
27Pongolamogpa kembaekti, awe ngainge ponekori arukna taneko yingkina sikini ponekoag yubu lelamekti, ‘Nai, awe webaomag wana togtoba walinge agha toghom kom te? Sa'a sembe o'olaba nenne tano pongkao?’ aro haibaek.
28Wene aro haibaekpa, awe ngainge ponekori, ‘Nari kom, anena na aisange yingkina wana togtoba walinge tognonge anabiag malinge togholao,’ seog. Seogpa awe ngainge arukna tanekori, ‘Nai, wela sembalam? O'olaba wenero toboghol pukap te?’ aro haibaek.
29Wene aro haibaekpa, awe ngainge ponekori, ‘Undo unuaheng kom. O'olaba malinge wenelapmun tanena, gandumap ma'aro wenero yaleagti wenel peheng kom. 30Wene lilopmunba, walingeap malingeap ma'aro pongoro yabilul. Gandum whi tale sum eneko agha nari kaongolamik nimiag aruklamsineri, “O'olaba malinge samenag wembamundi, kaupto aukag tapmundi, gandumna amik kaongkamundi, poloro palirop aeag liro piplulom,” aro ambatsinun,’ seog,” aro likiptop yubuag agha Yesusti sunumna sumbatsiog.
Imagneri elap ma'arop nimi maikno saelba uhiroba sembe Yesusti sunumna ambatsiogha
(Markus 4:30-32; Lukas 13:18-21)
31Sin nimi tanekoag nen sunumna nhon ambarelamsiogti, “Imagne ponekori mog so'oag nimi saelba uhiroba nenekona, nimi nhondi eldi aweag kwarang si togtopne saog uro wamla. 32Kwarang si togtopne olog sirikne wamla aghana, nimiri aweag memna tanena, pongoro waelbandi, sae la'aniro ni aweag meroba phelekto pongkanep. Nubu tanba, winang im toman yabirop winang tanekori kal sae tanekoag ae solanep,” aro Yesusti sunuro ambatsiog.
33Nen sunumna nhon babe ambarelamsiogti, “Imagne ponekori mog so'oag nimi maikno saelba uhiroba sembe sunumnana undo. Kelabo nhondi, ‘Kwaneng roti winiro tamneba walero nubu talul,’ aro yamoro pairoba kwaneng roti anekoag ma'aro pimnep. Ma'aro piple tanena, anam aukag tamna komag kwaneng roti tamneba aneko nubu talul. Ane saog uro Imagne ponekori mog so'oag nimi saelba uhiroba mo nubu talul,” aro likiptop yubuag ambatsiog.
Yesusti likiptop yubuag nimi ambarelamsiogne sembe tibin nembatsiogha
(Markus 4:33-34)
34Yesusti undo nimi maikno tanekoag ambarelamsiogne likiptop yubuag agha sunumna tol pina ambarelamsiog. Sunumna tol pina likiptop yubuag lero koma yubu nhon babe nimi maikno whingag ambatsiog kom. 35Undo ambarelamsiog nena, “Samenag Allah yubu silimu tiptop nangdi mome toro pibek yubuap sunsunup talul,” aro ambarelamsiog. Allah yubu silimu tiptopneri mome toro pibog nena,
“Si a'alamneri, sunumna tol pina likiptop yubu toman lelamnun.
Mog so'o ane sunuro yabiog sumag agha tognoro wamlange lag nenero ambarelamsinun,”
aro mome toro pibog.#Sepna 78:2
Yesusti likiptop yubuag o'olaba pongol ingkiropne sembe ambatsiog yubu tibin nembatsiogha
36Wene aro ambatsiogti, Yesusti nimi maikno taneko laplobi agha aeag aneko wa'iog. Wa'iogpa Yesusti yubu ka'ero neleptop nimi taneko yaekti, Yesusag hailamekti, “Andi nunag ambatto gandum togto merobag o'olaba pongol ingkiropneag sunumna tol pina leplam yubu neneko tibin nenero ambatsululam te?” aro haibaek.
37Haibaekpa tibin nenero ambarelamsiogti, “Awe so'oag wana walinge togtopne poneko sen nena, na mog so'oag nimi tahinge sembe lemna. 38Awe senne nenekona, mog so'o ane sembe lemna. Wana walinge togtopne senne nenekona, Imagneri kelmabo meap saelba ulamsil nimi sembe lemna. O'olaba senne nenekona, phia yongeag nelepto ul pirop nimi sembe lemna. 39Aisange yingkina o'olaba wana malinge toghol ingkiropne sen nena, phia sikini nubunge sembe lemna. Gandum whi tanba, kaongoro polorop sum sen nena, nia mangkina mog so'oag wamlange komobanep sum sembe lemna. Pongoroba kaongoro polorop nimi sen nimina, Allah arukna imagnang malaikat sembe lemna. 40O'olaba wembi agha aukag talamlonga saog uro nia mangkina mog so'oag wamlange komobanep sum eneko babe undo uro yabilul. 41Na mog so'oag nimi tahingeri saelba ulamsinep nimi wepsirop sum enekoag, nari arukna imagnang malaikat pogsineba, malinge ni tobogahukang. Sa'a-sa'ari nimi wana kiliro malingeag nembahinepne ni wamlengeap, irikna phiro urop nimiap salero wimbahukang. 42Wimbahiikti auk nubunge libaglamlengeag tobogahukang. Aneko sin si keleng tereba yo lelem engero wamukang. 43Aukag tobogahiikpa, wana porog nimi taneko Sikini Nubungeri saelba uhirobag wamikti, heng tingiro wareropne saog uro imang warelamukang. Wene aro lemnange a'un aori ka'ebalomne nene nimi niri seneragto saelbamlulom,” aro eldi yubu ka'ero neleptop nimiag tibin nenero ambatsiog.
Nimi tup nembahineba phendeag sunumna tol pina likiptop yubuag ambatsiogha
44Yesusti nen tipto ambarelamsiogti, “Imagne ponekori mog so'oag nimi saelba uhiroba sembe sunumna sumbatsinun. Nimi nhondi ora nimiri so'oag yabalamnari, el tup nembaneba nhon liliag wamneba imnepne saog uro wamla. Ora nimiri so'oag irop tup nembaneba aneko nen sap tognoro pimnepti, wana awi lelem el saeag uroba ni aneko nimiag kamna toro tol pindi, ‘Waliaba neneko naringe talul,’ aro so'o aneko kamna kapto tomnep.
45-46Nen sunumna nhon Imagne ponekori mog so'oag nimi saelba uhiroba sembe sumbatsinun. Nimi nhondi kamna kapto tongoro ulamnari, heng-henga tingiroba mutiara walinge ero tongorop. Ero pabalamnari, heng-henga tingiroba mutiara kamna alikinag sirikne nhon imnep. Imna tanena nimi eneko saombandi, eldi saeagha ni wamneba nimiag kamna kapto tol pinep. Kamna tomnange agha nen yingkina heng-henga tingiroba mutiara kamna alikinag sirikne aneko tolanep. Imagne ponekori mog so'oag nimi saelba uhiroba ane saog uro wamla,” seog.
Ikan lip tangtop aghag sunumna sunuro ambatsiogha
47Yesusti nen tipto yubu lelamogti, “Nen sunumna nhon Imagne ponekori mog so'oag nimi saelba uhiroba aneko sembe sumbatnuahin. Ikan lip tangtop ag mag longorop mag nubungeag tobogtopba, ikan nhon saog, nhon saog lip tangtop ag saog wamla. 48Ikan lip tangtop ag enekoag ikan teknero liptan tanena, ikan orop nimi tanekori kiliro mag abolag pail ingkirop. Pailandi pulingkina ikan taneko wepto palirop. Ikan malinge taneko toboglamsinepti, walinge taneko ikan paliroba anekoag liro pairop. 49Ane saog uro nia mangkina mog so'oag wamlange komobanep sum eneko Allah arukna imagnang malaikat yingkina nimi yoaba urop nimiap wana porog nimiap wepsukang. 50Wepsiikti yoaba urop nimi taneko auk nubunge libaglamlengeag tobogahukang. Aneko sin si keleng tereba yo lelem engero wamukang,” aro ambatsiog.
Tup nembahineba wendogneap samenneap abeneag sunumna tol pina ambatsiogha
51“Ni ambatsin yubu ka'ebalomne aneko seneraglom te?” aro Yesusti sin haibahiogpa sindi, “Nu seneraghap,” seek.
52Wene seekpa, Yesusti yubu lelamogti, “Undop pagha tanena, nari sunumna nen nhon ambatnuahin. Musari yubu amohirop nimiri nari yubu Imagneri mog so'oag nimi saelba uhiroba sembe ambarelamsin yubu eneko seneragto el tangtop tanena, sin nimi taneko nhin a'ero-a'ero ae ngainge nhon saog wamla. Ae ngainge ponekori wali-waliaba paia urop ae lomag wa'ina tup nembahineba samenag paia uropneap, wendog paia uropneap abeneko imnep. Ni phende abeneko paia urobag wamlange poa la'anilamlaba, keknep tanep,” aro ambatsiog.
Nazaret nimiri, “Yesus sembe nu karong,” aro yag lambaeka
(Markus 6:1-6; Lukas 4:16-30)
53Yesusti ni anekoa likiptop yubu sunumna tol pina ambatsiogti, aeag anekoa lambom agha piog. 54Lambaogti eldinge asag piog. Piogti Yahudi nimiri Allah yubu lero winirop aeag aneko pina nimi amoro ambarelamsiog. Ambarelamsiogpa ka'ebaek nimi tanekori, “Yaghe, mane agha ambarelamsil,” seek. “El neneko etneri wana hekaoba, undo ambarelamsil? Mikip huropneag agha Allah mikibari uanepne ulamla? 55Ili ponekona ae soropne kom te? Ilin kel enekona Maria ane wamlaba, ilipsabona Yakobusap, Yusupap, Simon apna, Yudasap tane wamang kom te? 56Ilipsa'elabo babe tane wamang kom te? Undop pagha tanena, eldi ni aneko seneragto ulamlange ene etneri elag piboba ulamla?” aro lelamek. 57Wene aro lelamek nena, eldi sin wana mali nembamsiogpa lebek. Wana mali taekti, wa'eplamekpa Yesusti, “Allahri yubu silimu tiptop nimi elenge asag agha lambahori, yog nimiri asag Allah yubu ambatsisoba, yog asag nimiri el kipto ka'ebanep. Ot Allahri yubu silimu tiptop nimiri elenge asag Allah yubu ambatsirop tanena, elenge asag nimiap elenge ae lomag nimiap tanekori el ka'ero kiptop kom,” aro ambatsiog.
58Wene aro ambatsiogti, el sin Nazaret nimi nusamag wamogpa, elag sikne aro wana palilamek komne sembe, Allah mikibari uanepne maikno uaog kom.
বর্তমানে নির্বাচিত:
Matius 13: kklKOS
হাইলাইট
শেয়ার
কপি
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
