Parei 15
15
Avv'lv'al sena v'nen huan a Musis ti dui apan p'au nen pr
1 #
Livai 12:3. Ardu kinkin avandan a Sutia avrama kavvrp'ep'ei anr tv'ald kavvr ti a, “Ipavr ti dui ahaan p'au nen iknep'a nut v'nen huan a Musis ivri inap'ei, Atua ikalev'la kam'i.” 2Laha, ima kav'i v'lv'elien lil. A Pul m'ei a Panapas arv'ana m'er istudau sanan. Sarei, avtaui ti a Pul m'ei a Panapas m'er hir kinkin uraur apavrav'a eia a Serusalem asnr apusel m'er elta, sena v'nen lera.
3Sarei, sas avtap'er avv'el, kavtpeia arna v'anu a Vunisia m'ei a Sameria, kavvrp'ep'a nut v'anudl avrama kavv'ah a Iesu inap'ei. V'nen lera iani ti tv'ald avrn ip'as ani istudau. 4Dav'a, naran avier a Serusalem, nelnal arna sas m'er apusel m'er elta avlav'r avrav'a al nmahar, laha avvrp'ep'a si udlani Atua iani m'er. 5V'eti m'ertu la avp'lt m'er Varisi kavrama kavv'ah a Iesu ha, avp'tir kavvr ti apavtu v'nen anr a ti dui apan p'au ani pr kasapa v'nen huan a Musis.
Avan m'itin lil arna nut a Serusalem
6Laha, apusel m'er elta avrama kavp'lt a ti apavv'ahur si lera. 7#Parei 10:1-43.Naran atvvrur sarei dav'a, a P'ita ip'tir kavr anr kavr ti a, “Tv'alk udlani, kam'i ktvrndu sera ti tituei Atua iv'li kana asnd a ti kana p'evrp'ep'a v'nen p'as asnr v'anudl a ti apavv'ahi. 8#Parei 10:44; 2:4.Atua, la irndu nl m'ertu udlani ha, ivrp'ep'a ti irn ip'as anr, sena ti itu M'im'iln P'as anr, inep'a nut ittu sarei a nakd inap'ei. 9Hin iahani iuraur anr sena ti ilev'la si stuar a nlr, naran avv'ahi. 10?Sena si lera, inap'i hin kvandinei Atua? ?Inap'i hin kvrn ti pavtu si dv arna v'anudl avv'ah a Iesu, sena ti nakd m'er a tetiad navhua a ti p'vua si dv lera? 11V'eti nakd nvv'ah ti Atua ilev'la nakd sena vtmienan a Mlin a Iesu Kristu uaki, inep'a nut ilev'lar inap'ei.”
12Sarei, nelnal udlani avlak ms kavklu uaki, kavv'rn anr a Panapas m'ei a Pul, naran arvrp'ep'a sei Atua iani a lm'ar asnr v'anudl, iv'i pari lil iv'iv'en sei m'a pari lil m'ertu avtah ani. 13Naran arhiris a v'nenar, a Sim'is ivr sei ml kavr ti a, “Tv'alk udlani, pavv'rn a v'nenak. 14A Saimun itvrp'ep'a sera nut Atua ima asnr v'anudl itauamu inap'ei a ti ipalev'la m'ertuan asnr, sena ti nahan ipav'a eia. 15Si lera iviviln m'a v'nenar pruvet, inep'a ti Paivul ivr ti a, 16#Emus 9:11,12.‘Ipatauatah a si lera, kana p'em'alet ml kahlur nmah kanuisan a Divt la itars sarei ha, kanur sei, la itmaur sarei ha, aau, p'elav'r nai stustu m'er nav'et stustu, sarei kani ti nmah lera ipap'tir ml. 17A ti m'ertu uraur avlak uam apavtala an a Mlin Eia, m'er v'anudl udlani nv'ara anr, a ti nahak ipater aranar. A Mlin Eia la ien si udlani lera, Hin ivri.’
18Atua itrndu sera m'akarienan udlani tituei dau naran na ap'u. 19Sena si lera, kana nv'ah ti nkavani ipahua par asnr v'anudl la avvav v'ahienar kavv'ah Atua ha. 20#Avruh 34:15-17; Livai 18:6-23; Livai 17:10-16.P'vulul a v'nen ipav'a asnr kavvr ti amavhan tim'ah attu sarei asn aitul udlani, amavan si stu m'a tav'et, amavhan sei amlenp'ni, v'aha nadei. 21Sena ti tituei ier dika, m'ertu kinkin avvrp'ep'a v'nen huan a Musis iel arna v'anu lilil udlani kavv'ana aranan al nmah tamat arna Sapat udlani.”
Sei avtaui arna m'itin a Serusalem
22Sarei, apusel m'er elta m'a sas udlani avrn ti apavv'lair m'ertu kinkin kavtap'er a ti apavsapar a Pul m'ei a Panapas kavrav'a Antiuk. Laha, avv'lair a Sutas, tv'el nahan iv'i a Pasapas, m'ei a Sailas arv'i dui lil arna sas.
23Laha, avulul a ruplet iamk kavtau anr avuei, ivr ti a, “Kam'em' nvv'i apusel m'er elta, m'er tv'elm'i udlani. Nvvr ip'as a kam'i, kvv'i tv'elm'em' kavv'i v'anudl kvlak Antiuk, a Siria, m'ei a Silisia. 24Kam'em' ntvrn sera v'nen a ti m'ertu kinkin avandan asnm'em' kavv'ana kavutakm a v'ahienam'i kavani ti kvrn istu kavvr ti dui apan p'au nen pr kavuada v'nen huan a Musis. V'eti kam'em' navtu v'nen kinkin inap'i lera anr. 25Sena si lera, kam'em' udlani nvp'lt kavv'ah ti ip'as a ti p'vv'lair dui kinkin kavtap'er asnm'i apavsapar a Panapas m'ei a Pul, la nvlap'as anr istudau ha. 26Nut pa ti arm'a sena nahan a Mlin Lilad, a Iesu Kristu. 27Sena si lera, kam'em' nvtap'er a Sutas m'ei a Sailas a ti aparvrp'ep'a sei nvulul ani. 28Sena ti M'im'iln P'as m'a kam'em' nvv'ah ti nkavtu si dv uraur kinkin aranam'i ml, v'eti si laha uaki. 29Iv'i ti mavhan tim'ah attu sarei asn aitul, v'aha nadei, v'aha sei amlenp'ni. Mavan si stu m'a tav'et. Ipavr ti mkavan si lera, kam'i pavan si p'as. Ip'as.”
A Sutas m'ei a Sailas arv'ana karmhmah a sas arna nut a Siria
30Laha, naran sas atvtep'a sarar, avrav'a Antiuk kavv'ara a nelnal a ti apavp'lt, kavtu ruplet anr. 31Naran avv'ana aranan, avrn ip'as, sena ti v'nen lera iani ti avp'tir arna nlr. 32A Sutas m'ei a Sailas hir ml arv'i pruvet karv'ana m'er tv'ald ip'arei karani ti avrn ip'as kavp'tir ihua. 33Naran atrlak sarei atlera ip'arei isusupa, tv'ald avtap'er arna tamat a ti apavrav'a asnr apusel.
34V'eti a Sailas irn ti ipalak uam atlera. 35A Pul m'ei a Panapas arlak m'ei ip'arei arna nut Antiuk, karp'lt m'a m'ertu uraur inelnal, kavv'iv'en v'nenan a Mlin Lilad kavvrp'ep'ei.
A Pul m'ei a Panapas artupr hir sena Sun Mak
36Itauatah ml a Pul ivr an a Panapas kavr ti a, “P'erm'alet ml karp'ep'a tv'ald arna v'anu lilil udlani ntrvrp'ep'a sera v'nenan a Mlin Lilad asnr, karla nut inap'ei.” 37Laha, a Panapas iv'ah ti aparlev' a Sun, tv'el nahan iv'i a Mak, ipasapar. 38#Parei 13:13.V'eti a Pul iv'ah ti iap'as a ti aparlav'i ipasapar, sena ti naran avlak a Pamvilia iruh asnr, iasapar ml arna pariar. 39Laha, arv'lv'al ihua ihuadau, karruruh a hir. A Panapas ilev' a Mak karv'a arna nauak iv'a a Saipras. 40V'eti a Pul iv'lai a Sailas, sarei tv'alr udlani avtaur arna vtmienan Atua, laha arv'el. 41Iv'el katpeia a Siria m'ei a Silisia, kani ti sas udlani avp'tir ihua.
বর্তমানে নির্বাচিত:
Parei 15: nmb
হাইলাইট
শেয়ার
কপি
Want to have your highlights saved across all your devices? Sign up or sign in
© 2023 Presbyterian Reformed Church of Australia
