Parei 13
13
1Arna sas Antiuk, pruvet kinkin m'er tisa kinkin avlak, avv'i a Panapas, m'ei a Simiun, avr ti iv'i a P'akm't, a Lusias, iv'i dui a Sairini, a Manain, la ilak asn a Erut, iv'i mlin lil a Kalili, naran isusupa dav'a kadama kalil ha, m'ei a Sul. 2Naran avpatei a Mlin Eia kavln tim'ah kavtu tamat, M'im'iln P'as ivr ti a, “Kam'i pavtau a Panapas m'ei a Sul a ti aparan parei ntv'ara sarei anr sanan.” 3Laha, naran atvln sera tim'ah katvtu sera tamat, avtu lm'ar arna ptr kavtap'er arv'el.
A Panapas m'ei a Sul arvrp'ep'a v'nen p'as arna nut a Saipras
4M'im'iln P'as itap'er inap'i lera, hir arru arv'a arna nut a Selusia, sarei, karlev' nauak karv'a a Saipras. 5Naran arlak a Salamis, arvrp'ep'a v'nenan Atua al nmah tamatar ardu a Isrel. Hin a Sun Mak ilak m'er kasr lm'ar arna pariar.
6Kavv'el arna v'anu dav'a kavier nut a Pavus, kavpasla tiet iamk iv'i dui a Isrel, ihap'il kavr ti iv'i pruvet. Naha tiet lera iv'i a Pasisas. 7Hin ilak asn kavman arna v'anu, nahan iv'i a Sesias Pulas, iv'i dui irndu sei. Kavman lera iv'ara anr a Panapas m'ei a Sul kavr ti irn ti iparn v'nenan Atua. 8V'eti tiet lahara, nahan iv'i a Elimas arna v'nenar ardu a Kris, hin imlanr, a ti ipavav nl kavman lahara a ti imav'ah a Iesu. 9V'eti a Sul, la nahan uraur iv'i a Pul ha, hin ilini a M'im'iln P'as kap'ei ihua, kavr ti a, 10“U nakm klini a hap'ilien udlani kasner m'ertu. Nakm kv'i a natn a Sitan kalep'la si p'as udlani. ?Nakm kutakm a navanel p'asan a Mlin Eia dav'a ipaier v'aran? 11Parn, hilaha, lm'an a Mlin Eia ipaiarh. Nakm m'atam ipastu, mkala neiel ml, ipaier naran ipaviviln ani.”
Iv'amk m'a ti si kinkin inep'a m'elidu m't ima aranan. Laha, iunanut katala a m'ertu kinkin ipauada lm'an kav'av'ei. 12Naran kavman ila si lera itu hin, iv'ah a Iesu katah a v'nenan a Mlin Lilad ihuadau.
A Pul m'ei a Panapas arvrp'ep'a v'nen p'as arna nut Antiuk a Pisitia
13Dav'a, a Pul m'er tv'aln avln a Pavus arna nauak kavier arna v'anu a Peka arna nut a Pamvilia. Laha, a Sun iruh asnr kam'alet dahau a Serusalem. 14V'eti hir arru arln a Peka, karv'el karier Antiuk arna nut a Pisitia. Arna Sapat, arv'a al nmah tamatar arm'ertu a Isrel kavlak. 15Naran atvv'ana sarei arna v'nen huan a Musis m'a v'nenar pruvet, ardu lilil avp'aur nmah tamat, avtep'a v'nen asnr kavvr ti a, “Tv'elm'em', ipavr ti krrn ti parvrp'ep'a v'nen kinkin a ti parmhmah a nelnal, parvri.”
16Laha, a Pul ip'tir kah lm'an eia kavr ti a, “Arm'ertu a Isrel m'a kam'i uraur kvdedrn an Atua, pavv'rn a v'nenak. 17#Avruh 1:7; Avruh 12:51.Atua iv'i Atuar a nelnal a Isrel, hin iv'lair a tetiad kani ti arm'ertuan avp'tir naran avlak kavv'i v'anudl arna nut a Itsip. Arna nut huan hin ilev'lar arna nut lera. 18#Nut Kaka 14:34; TVH 1:31.Ihih ti pai ipanelv'a (40) avan si stu arna nut kaka, v'eti iasranr. 19#TVH 7:1; Susua 14:1.Iutakm a v'anu isaru arna nut a Kenan, katrpr nadep'ar katau anr a tetiam'em' naran avan hlhal.
20 #
MAH 2:16;
1 Sam 3:20. Itauatah a si lera, itaur dui apavv'ana hua m'a m'ertu kavp'aurr pai inelnal iv'av'a pln inellm' (450), dav'a ier naranan a Samuil, iv'i pruvet. 21#1 Sam 8:5; 1 Sam 10:21.Sarei, avmiman mlin kinkin iamk, laha, Atua itau a Sul, iv'i a natn a Kis, kav'i dui arna nl nam'elan a P'ensamin, iv'i mlin arna pai inelv'a (40). 22#1 Sam 13:14; 1 Sam 16:12; Npin 89:20.Laha, naran a Mlin Eia itlev'la sarei, itau a Divt a ti ipav'i mlin lilar, kavrp'ep'ei kavr ti a, ‘Kana ntpasla sarei a Divt, iv'i a natn a Sesi. Hin, Kana nrn ip'as ani arna nlk. Hin iv'i dui iamk ipan si udlani Kana nrni.’ 23Arna nl nam'elan a Divt lera, Atua iani ti Dui iamk, iv'i a Iesu, ip'tir a ti ipalev'lar m'ertu a Isrel, inep'a nut itturan sarei anr inap'ei. 24#Mak 1:4; Luk 3:3.Naran idahma, a Sun ivrp'ep'ei a nelnal a Isrel, kavr ti apavvav v'ahienar kavpaptais. 25#Sun 1:20; Mat 3:11; Mak 1:7; Luk 3:16; Sun 1:27.Naran parian a Sun itv'i ti ipahiris, ivr ti a, ‘?Kam'i kvv'ah ti nv'i ak? Kana nav'i Hin. V'eti, pavrni, ipatauatah a kana, dui ipamk ipama, kana naviviln a ti p'ahsla susan.’
26Tv'alk udlani kvlak arna nl nam'elan a Epraham, m'a kam'i kvdedrn an Atua, Atua itep'a v'nen laha ima asnm'i a ti ipalev'la m'ertu. 27M'ertu avlak a Serusalem m'er mlinar ahavrndau a Kristu m'a v'nenar pruvet la avv'ana aranan arna Sapat udlani ha. Sena si lera avani ti v'nen lera ima katu hin naran avv'ana hua m'ei kavvr ti ikam'a pr. 28#Mat 27:22,23; Mak 15:13,14; Luk 23:21-23; Sun 19:15.Ahavpasla si kinkin iani istu a ti apavrpi sanan, v'eti avmiman an a Pailat a ti aparpep'ni. 29#Mat 27:57-61; Mak 15:42-47; Luk 23:50-56; Sun 19:38-42.Naran atvan sera si udlani Paivul ivri kavrur a Kristu, avlev'lei arna su lamu kavtaui al navap.
30V'eti Atua iani ti ithal ml arna m'ienen. 31#Parei 1:3.Arna napn inelnal, m'ertuan avsapei kavaan a Kalili kavrama a Serusalem, hir avlei. Hilaha, hir avvrp'ep'ei anr arm'ertu a Isrel. 32#Npin 2:7.Hilaha kam'em' ml nrvrp'ep'a v'nen p'as lera a kam'i. 33Sei Atua itturan sarei anr a tetiad tituei, hilaha iten sarei asnd, nvv'i a natr, sena ti isp'alei a Iesu ml arna m'ien, inep'a nut itvr sarei inap'ei, arna Npin plen iru, kavr ti a, Nakm kv'i a Natk dui, dika nv'i a Tetiam. 34#Aisaia 55:3.Atua itvr sarei inap'i laha arna Paivul a ti ipasp'alei ml arna m'ienen a ti p'akn ikahpu naran kinkin, kavr ti a, ‘Kana p'etu si p'sp'as duan a Divt a kam'i.’ 35#Npin 16:10.Arna nut uraur, Paivul ivri ml kavr ti a, ‘Nakm mkam'ahu a ti Dui P'asam p'akn ipapu.’
36A Divt imhmah a m'ertu avsilv' arna naranan, inep'a nut Atua irni inap'ei, dav'a kadam'a. Avtini m'er a tetian, p'akn itapu. 37V'eti Hin la Atua iani ithal ml arna m'ienen ha, iahpu. 38Sena si lera, tv'alk, nrn ti kam'i pavrndu mamh ti kam'em' nrvrp'ep'a v'nen p'as a kam'i, a ti a Mlin Eia ipalev'la si stuam'i, arna nut hua Dui lera uaki. 39Aranan a Iesu uaki, Atua ilev'la m'ertu udlani avv'ahi arna si stu udlani, la v'nen huan a Musis iarndu ti ipan kam'i pavviviln arna nahn Atua ha. 40Sena si lera, pavv'ah mamh kam'i, imahei ti v'nen arpruvet avvrp'ep'ei tituei ipaier kam'i, ivr ti a, 41#Apakuk 1:5.‘Pavrni, kam'i la kvsip'len v'nenan Atua ha, pavrdus nlm'i kavram'a. Sena ti hilaha p'en parei ipamk, ipavr ti m'ertu ipavrp'ep'ei a kam'i, v'eti mkavv'ahi naran kinkin.’ ”
V'anudl istudau avv'ah v'nen p'as, m'ertu a Isrel kinkin avmlani
42Naran ardu a Isrel avrav'a av'aran dan al nmah tamat, v'anudl avmiman a ti aparvrp'ep'a v'nen p'as lera ml arna Sapat lahadei. 43Naran nelnal atvrav'a sarei av'aran al nmah tamat, ardu a Isrel avstudau m'er v'anudl la avv'ah Atua ha, avsapei a Pul m'ei a Panapas. Hir arvr anr karvr ti apavlak ipel arna vtmienan Atua.
44Arna Sapat lahadei, nut pa ti m'ertu udlani arna v'anu lera avrama kavp'lt sena ti apavrn v'nenan Atua. 45V'eti naran ardu a Isrel avla m'ertu udlani lera, nlr iprr ihuadau, avmlen v'nen a Pul ivri, kavv'ana stu m'ei, kavsip'lani. 46V'eti a Pul m'ei a Panapas arp'tir karv'ana ihua karvr ti a, “Iviviln a ti apavrp'ep'a v'nenan Atua a kam'i ipatauamu, v'eti nrla ti kam'i kvsrani kavv'ah ti kaavviviln a silv'ien ikahiris naran. Sena si lera, pavrni, p'vrav'a asnr v'anudl. 47#Aisaia 42:6; 49:6.Sena ti a Mlin Eia itu v'nen a kam'em' inap'i lera kavr ti a, ‘Kana ntauh a ti pav'i lait asnr v'anudl, a ti palev'lar m'ertu arna nut udlani arna nadep'.’ ”
48Naran v'anudl avrn si lera, avrn ip'as ilil kavpata v'nenan a Mlin Eia. Laha, m'ertu udlani la Atua itv'li sarar ha, a ti apavlev' silv'ien ikahiris naran, avv'ahi.
49Laha, v'nenan a Mlin Eia ivrvr kaier nut udlani arna v'anu lil lera. 50V'eti ardu a Isrel avtp' artav'et lilil la avp'lt m'er al nmah tamatar ha, m'er ardu lilil arna v'anu, a ti apavtp'ev' a Pul m'ei a Panapas. Laha, kavsranr arna v'anuar. 51#Mat 10:14; Mak 6:11; Luk 9:5; 10:11.V'eti arninuan neiev' arna tlr, sena ti aparv'iv'en ti hir ahavrn v'nen p'as, sarei karv'a arna v'anu a Ikuniam. 52Laha, arm'ertuan a Iesu avlini a nl p'as m'a M'im'iln P'as.
বর্তমানে নির্বাচিত:
Parei 13: nmb
হাইলাইট
শেয়ার
কপি
Want to have your highlights saved across all your devices? Sign up or sign in
© 2023 Presbyterian Reformed Church of Australia
