Ruuka 18

Ekirengekanyo kya okusaasaama Nyamuwanga uremeeye-ko

1Yeesu ꞉aariga ˆneenda okubhwira abheeyigira bhaaye ati omuunu akasaasaama ku-Nyamuwanga eyeendwa asige okuyigwa. Niwe ˆnaabhabhwira ekirengekanyo kinu, 2ˆnaabhabhwira ati, “Ku-musi omurebhe, ꞉aariga ariwo omuramusi wumwi. Omuramusi uyo, ꞉aariga atakuyaana Nyamuwanga ekibharo, na atakwigana bhaanu. 3Ku-musi guyo, ꞉aariga arimo omugasi omukimari. Omugasi uyo ꞉aariga ˆnaagenda ku-muramusi uyo kiyana okumwisaasaama, ˆnaamubhwiraga ati, ‘Enikwisaasaama unsakire, abhasoko bhaani bhasige okunteesha ebhiinu bhyani.’

4“Omuramusi uyo ꞉aamarire ebhaga enene aremerega okusakira omugasi uyo. Nawe ku-bhuteero, ˆneeyaikira mu-mutima gwaye ati, ‘Anye nitakuyaana Nyamuwanga ekibharo, na nitakwigana bhaanu. 5Nawe, kwa okubha omukimari unu kaanyanshanyansha muno, woori nimuyaane era ebhiinu bhyaye asige okugenderera okunyansha ˆnaanyijaga-ko kiyana!’ ”

6Niwe, Yeesu ˆnaaika ati, “Mwitegeereshe kujomu kutyo omuramusi uyo kaaika, raabhe kutyo ari na mutima mubhiibhi! 7Abhasorwa bha Nyamuwanga abhamuririra mu-ngeta na mu-mwisi mbeendaga abhasakire. Mmbe ikabha kutyo Nyamuwanga atakutura okubhayaana bhinu bhibheesire? Angu arikoora okubhasakira? 8Enibhabhwira ati, kaaja okubhayaana bhwangu ganu gabheesire. Nawe, bhunu Omwana wa Adaamu arisubha mu-kyaro anu, angu kaaja okunyoora abhaanu bhakyari na obhwikirisha mu-mitima gyebhwe?”

Ekirengekanyo kya Omufarisaayo na omutobhesha wa riigooti

9Na ꞉bhaariga bhariwo abhaanu abhandi bhanu ꞉bheeroraga ati nibho abharengeresi muno, enu mbajeeraga abhaanu abhandi. Niwe Yeesu ˆnaabhabhwira ekirengekanyo, ˆnaaika ati, 10“꞉Bhaariga bhariwo bhaanu bhabhiri, mbagenda mw-iyekaru okusaasaama Nyamuwanga. Owumwi ꞉aariga ari Omufarisaayo, na owundi ꞉aariga ari omutobhesha wa riigooti. 11Omufarisaayo uyo ˆnaayambaara, ˆnaasaasaama ku-Nyamuwanga, ˆnaamubhwiraga amangʼana gaaye omwene ˆnaaika ati, ‘Ee Nyamuwanga, enikukumya, kwa okubha anye nitari mukayi rwa abhaanu abhandi. Abhaanu abhandi ni bhawubhaaru, abhandi mbangʼeeni, na abhandi ni bhataasi bha meega. Na, anye nitari rwa omutobhesha wa riigooti unu! 12Anye eniiyima ebhyokurya kabhiri ku-bhwoyo, na nikanyoora ebhiinu, ku-bhiinu ekumi, enikuyaanaga ekiinu ekimwi.’ 13Nawe omutobhesha wa riigooti weeki, ˆnaasigara areera-wo kutooto. Weeki ꞉ataasakire na kuragamira ku-rwire, tari omwene ꞉aariga ˆneebhuma ku-kifubha kyaye era enu asurumbaaye,#18:13 Abhayawudi ꞉bhaariga bhari na intungwa eya okwibhuma ku-kifubha bhakabha bhasurumbaaye. ˆnaaikaga ati, ‘Nyamuwanga, nuunfwire ekigongo, anye niri muunu wa bhikayo!’ ”

14Kimwi Yeesu ˆnaagenderera, ˆnaaika ati, “Enibhabhwira ati, omutobhesha wa riigooti uyo ꞉aasubhire iika Nyamuwanga amwabhiiye ebhikayo bhyaye. Nawe Omufarisaayo uyo Nyamuwanga ꞉ataamwabhiiye! Omuunu akeegega, Nyamuwanga kaamutuura emwaro. Na omuunu akeetuura emwaro, Nyamuwanga kaamutuura iiguru.”

Yeesu keendera abhaana abhatooto iinonkwe

(Mataayo 19:13-15; Maariko 10:13-16)

15Kimwi rusuku rumwi, abhaanu mbareetera Yeesu abhaana bheebhwe abhajaare, insonga Yeesu abhakuunʼye-ko okubhayaana giinonkwe. Bhunu abheeyigira bhaaye ꞉bhaarorere kutyo, mbaamba okubhagonya. 16Nawe, Yeesu ˆnaabhirikira abhaanu bhayo, ˆnaaikaga ati, “Musige abhaana abhatooto bhaaje ku-anye, musige okubhagaanya, kwa okubha, abhaanu rwa abhaana bhanu, obhukama bhwa Nyamuwanga ni bhwebhwe. 17Enibhabhwira ekimari ati, omuunu woonewoone unu atakwikirisha obhukama bhwa Nyamuwanga rwa omwana omutooto, atakutura okubhwingira-mo kajaanende.”

Omutungi omuniibhi kaabhuusha Yeesu

(Mataayo 19:16-30; Maariko 10:17-31)

18Omutungi wumwi, ꞉aabhuusiishe Yeesu ati, “Omwiyigisha owa omutima omujomu, nikore kutiki ninyoore obhurame bhunu bhutakuweera?”

19Yeesu ˆnaamubhwira ati, “Kubhaki owumbirikira ati owa omutima omujomu? Atariwo omuunu woonewoone owa omutima omujomu, tari ni Nyamuwanga omwene era! 20Awe, umenyere ebhiraagiro bhya Nyamuwanga, ebhyaika ati, ‘Waasiga okutaara ameega, waasiga okwita omuunu, waasiga okwibha, waasiga okubheeyeresha omuunu, yaana abheebhusi bhaawo ekibharo.’#18:20 Ringira Obhungʼaanyi 20:12-16; Ekiyiityo kya Ebhiraagiro 5:16-20.” 21Omutungi uyo ˆnaamusubhya ati, “Ebhiraagiro bhiyo nibhigwatirega okwambira mu-bhwana bhwani.”

22Bhunu Yeesu ꞉oonguuywe amangʼana gayo, ˆnaamubhwira ati, “Usuyiiywe engʼana rimwi era. Gega ebhiinu bhyawo bhyone kutyo ugushe. Ukanyoora giiyera, ugabhire abhatobhu. Ukabhagabhira, owubha wiibhiikiiye mu-rwire ku-Nyamuwanga. Ukamara okukora kutyo uuje unseete.” 23Omutungi uyo ꞉eejire okuungwa kutyo ꞉aasurumbaaye muno. ꞉Aasurumbaaye kwa okubha ꞉aariga ari muniibhi muno. 24Bhunu Yeesu ꞉aamurorere asurumbaaye muno, ˆnaaika ati, “Kukomeeye muno, abhaniibhi okwingira mu-bhukama bhwa Nyamuwanga! 25Gawuuyire muno ku-ngamiya okutura mw-iwundu rya insindani, okukira omuniibhi okwingira mu-bhukama bhwa Nyamuwanga!”

26Abhaanu ꞉bheejire bhoongwa amangʼana gayo mbaaika ati, “Mmbe woori, nniga unu aritura okwerusibhwa?” 27Yeesu ˆnaabhabhwira ati, “Amangʼana ganu abhaanu bhatakutura okukora, gayo nigo Nyamuwanga kaatura okukora.” 28Niwe Peetero ˆnaabhwira Yeesu ati, “Iitegeeresha, eswe kisigire ebhiinu bhyeswe bhyone kutyo, nkikuseeta!”

29Yeesu ˆnaaika ati, “Enibhabhwira ekimari ati, omuunu akabha asigire omusi gwaye, asigire omugasi waaye, asigire abhayiiri bhaaye, asigire abheebhusi bhaaye na abhaana bhaaye, ku-nsonga ya obhukama bhwa Nyamuwanga, 30kimari omuunu uyo ariramira maafu muno okukira ganu ꞉aasigire. Kaagaramira akyari mu-kyaro anu. Na mu-kyaro kinu kiriija, arinyoora obhurame bhunu bhutakuweera.”

Yeesu kaaikira orwa akasatu okufwa na okusuuka kwaye

(Mataayo 20:17-19; Maariko 10:32-34)

31Yeesu ˆnaaja ku-mbarika na abheeyigira bhaaye ekumi na bhabhiri, ˆnaabhabhwira ati, “Mwitegeereshe! Woori ekiriinyagisha okugenda Yerusareemu. Omwana wa Adaamu ꞉aakaamiiywe amangʼana na abharagi mu-makaamo geebhwe. Amangʼana gayo agagenda okukuumira goone kutyo Yerusareemu eyo. 32Omwana wa Adaamu kaaja okutuurwa mu-mabhoko ga bhanu bhatari Bhayawudi. Abhaanu bhayo abhaaja okumusangʼaya na okumufuma, mbamufubhurira na amafwefwe. 33Na, abhaaja okumubhuma ebhibhooko, bhakamara mbamwita. Nawe orusuku rwa akasatu, arisuuka.”

34Amangʼana gayo Yeesu ꞉aabhwiriiye abheeyigira bhaaye, bhatagasombookeeywe, kwa okubha insonga yaago ꞉yaariga iyibhisire, bhatakuyimenya.

Yeesu kaawosha omuwofu abheeye Yeriko

(Mataayo 20:29-34; Maariko 10:46-52)

35Yeesu ˆnaarebherera okuyika mu-musi gwa Yeriko. Bhunu ꞉aaribhataga aariga ariwo omuwofu wumwi ꞉eekaayega ku-mbarika ayeeyi na injira, ˆnaasabhiirishaga ebhiinu. 36Bhunu ꞉oonguuywe abhaanu bhaafu mbaturaga ku-njira ayo, ˆnaabhuusha ati, “Kiriyoki?” 37Abhaanu mbamubhwira ati, “Yeesu wa Naajareeti niwe kaatura.” 38Kimwi omuwofu uyo ˆnaamura obhuraka ˆnaaika ati, “Yeesu, Omuyiiri Dawudi,#18:38 Omuyiiri Dawudi. Ringira riingʼana rinu mu-Mangʼana Amakomeeye. nuunfwire ekigongo!” 39Abhaanu abhandi ꞉bhaariga bhatangatire bhariwo imbere. Mbagaanya omuwofu uyo, mbamubhwira ati, ajibhire. Nawe omwene, ˆnaagenderera okwamura obhuraka ˆnaamubhirikiraga ati, “Omuyiiri Dawudi, nuunfwire ekigongo!”

40Yeesu ˆnaayambaara, ˆnaasiiga abhaanu bhareete omuwofu uyo. Bhunu omuwofu uyo ꞉aamuyikire-ko, Yeesu ˆnaamubhuusha ati, 41“Oweenda nikukorereki?” Weeki ˆnaaika ati, “Raatabhugenyi, eneenda noone nirore.” 42Yeesu ˆnaamubhwira ati, “Mmbe nuurore! Obhwikirisha bhwawo bhwakuwosha.” 43Ayoayo, ˆnaamba okurora, ˆnaaseeta Yeesu enu ˆnaagungyaga Nyamuwanga. Na abhaanu bhoone kutyo bhunu ꞉bhaarorere amangʼana gayo, mbaamba okukumangya Nyamuwanga.

বর্তমানে নির্বাচিত:

Ruuka 18: kya

হাইলাইট

কপি