Yowana 5

Yeesu kaawosha omurema

1Bhunu gayo ꞉gaawooye, niibha-yo insikukuru ya Abhayawudi Yerusareemu eyo, Yeesu ˆnaariinyagisha okugenda-yo. 2Yerusareemu ayo, ꞉kyariga kiriwo ekishooko kinene kinu ꞉kyariga nkibhirikirwa mu-Kiebhuraaniya ati, “Ekishooko kya iingʼondi.”#5:2 Omusi gwa Yerusareemu ꞉gwariga guri na orubhago rwa amagina, rwiyindirega omusi gwone kutyo. Orubhago ruyo ꞉rwariga ruri na bhishooko bhyafu. Ebhishooko bhyone kutyo ꞉bhyariga bhiri na amasiina gaabhyo. Ekishooko ekimwi ꞉kyabhirikirwaga ati, “Ekishooko kya iingʼondi” kwa okubha ꞉kyariga kiri ayeeyi na anu ꞉bhaariga mbagusisha giingʼondi na emyandu egindi. Ringira Neyemiya 3:1, 12:39. Ayeeyi na ekishooko kiyo, ꞉ryariga ririwo riitanga, ndibhirikirwaga mu-Kiebhuraaniya ati, Bhetijata. Riitanga riyo ꞉ryariga riiyindirwe na nyumba etaanu gigwatiriiywega na gintimu. 3Mu-nyumba muyo, ꞉bhaariga mbawongera-mo abharwaye bhaafu, abhawofu, abharema, na bhanu bhafuuye emibhiri. [꞉Bhaariga mbarindirira amanji gafurungurwe, 4kwa okubha maraayika wa Nyamuwanga ꞉aariga ˆnaaja okufurungura amanji mw-itanga riyo. Omurwaye unu ꞉aariga ˆnaabha owa okwamba okwingira mu-manji, uyo niwe ꞉aariga ˆnaawora obhurwaye bhunu ꞉aariga ari nabhwo.] 5Mu-bharwaye bhayo, ꞉aariga arimo muunu wumwi unu ꞉aariga arwaye, gyaturire myaka makumi gasatu na munaana. 6Yeesu ˆnaamurora amaamirega mu-nyumba ayo. Na Yeesu ꞉aariga amenyere ati muunu uyo aarwaye nsiku nyafu, ˆnaamubhuusha ati, “Angu, oweenda ubhe muworu?” 7Omurwaye uyo ˆnaamusubhya ati, “Raatabhugenyi, nitari na muunu wa okunsakira niingire mw-itanga, akabhaga kanu amanji agafurungurwa. Nikeenda okwingira mu-manji, omuunu owundi kaantangatira okwingira-mo.” 8Niwe Yeesu ˆnaamubhwira ati, “Iimuka! Gega riiraro ryawo ugende.” 9Ayoayo omuunu uyo ˆnaawora, ˆneetwika riiraro ryaye ˆnaamba okuribhata.

Na orusuku ruyo ꞉rwariga ruri Nsabhaato.#5:9 Nsabhaato. Ringira riingʼana Insabhaato mu-Mangʼana Amakomeeye. 10Ku-nsonga iyo, abhatangasha bha Abhayawudi mbabhwira omuunu unu ꞉aariga awosiibhwe ati, “Reero ni Nsabhaato. Utakwenderwa na ebhiraagiro bhyeswe okwitwika riiraro ryawo.” 11Nawe ˆnaabhasubhya ati, “Omuunu unu aawosha, niwe aambwira ati, ‘Iitwika riiraro ryawo ugende.’” 12Abhatangasha bhayo mbamubhuusha ati, “Niga aakubhwira wiitwike ugende?” 13Nawe omwene ꞉aariga atakumenya unu ꞉aariga amuwosiishe. Yeesu ꞉aariga asookere mu-bhaanu ari ku-mbarika, kwa okubha abhaanu ꞉bhaariga bhari ayo bhaafu.

14Bhunu gayo ꞉gaawooye, Yeesu ˆnaanyoora omuunu uyo mw-ibhanja rya riiyekaru, ˆnaamubhwira ati, “Iitegeeresha, woori waawora. Waasiga okukora ebhikayo kweki, utaaja okunyoora engʼana ebhiibhi okukira riyo.” 15Ayoayo omuunu uyo ˆnaagenda ku-bhatangasha bha Abhayawudi, ˆnaabhabhwira ati ni Yeesu niwe ꞉aamuwosiishe. 16Niwe abhatangasha bha Bhayawudi mbaamba okunyansha Yeesu, kwa okubha ati, ꞉aariga ˆnaawosha abhaanu ku-rusuku rwa Insabhaato. 17Nawe Yeesu ˆnaabhabhwira ati, “Raata kaakora emirimu na woori, anye noone enikora emirimu kutyokutyo.” 18Ku-nsonga ya amangʼana gayo, abhatangasha bha Abhayawudi mbagenderera okwagara injira ya okwita Yeesu, insonga itari ati ꞉aariga atakugwata Insabhaato era, tari ukasiga gayo, ꞉aariga ˆnaaika ati, Nyamuwanga ni esemwene, ˆneekora okubha rwa Nyamuwanga.#5:18 Ringira Abhafiripi 2:6.

Obhuturo bhwa Omwana wa Nyamuwanga

19Yeesu ˆnaabhwira abhatangasha bhayo ati, “Kimari enibhabhwira ati, Omwana wa Nyamuwanga atakutura okukora ryoneryone ku-bhuturo bhwaye. Tari kaakora rinu kaarora esemwene ˆnaakora, kwa okubha goone kutyo ganu esemwene kaakora, nigo gayogayo na Omwana woone kaakora. 20Raata eendere Omwana waaye, kyakora kaamweresha emirimu gyone kutyo ginu kaakora. Na kaaja okumweresha emirimu eminene okukira giyo, insonga muruguure. 21Rwa kutyo Raata kaasuura abhafuuye ˆnaabhayaana obhurame, nikwo kutyo Omwana woone kaayaana obhurame abhaanu bhanu keenda okuyaana. 22Raata atakuramurira omuunu woonewoone, tari ayaaye Omwana waaye obhuturo bhwone kutyo obhwa okuramurira abhaanu. 23Eyibha kutyo insonga abhaanu bhoone kutyo bhayaane ekibharo Omwana rwa kutyo abhayaana Raata. Omuunu woonewoone unu atakuyaana ekibharo Omwana, uyo atakuyaana ekibharo Raata unu ꞉aamutumire.

24“Kimari enibhabhwira ati, omuunu woonewoone unu koongwa amangʼana gaani na okwikirisha unu ꞉aantumire, omuunu uyo ari na obhurame bhunu bhutakuweera. Omuunu uyo atariramurirwa, tari ambukire okusooka mu-rufu, na eengiiye mu-bhurame bhunu bhutakuweera. 25Kimari enibhabhwira ati, akabhaga akaaja, na akabhaga kayo woori kaayikire, kanu abhafuuye bharyungwa riisi rya Omwana wa Nyamuwanga. Na bhanu bharimwitegeeresha, bharibha na obhurame bhunu bhutakuweera. 26Raata niwe obhusimukwa bhwa obhurame bhunu bhutakuweera, na nikwo kutyokutyo ayaaye Omwana waaye, okubha obhusimukwa bhwa obhurame bhuyo. 27Na ayaaye Omwana waaye uyo obhuturo bhwa okuramurira abhaanu, kwa okubha omwana uyo niwe Omwana wa Adaamu. 28Musige okuruguurira amangʼana gayo! Akabhaga akaaja kanu abhafuuye bhoone kutyo bhanu bhari mu-mbiiyira, bharyungwa riisi rya Omwana wa Adaamu. 29Na bharisooka mu-mbiiyira gyebhwe. Bhanu ꞉bhaariga mbakora amajomu, bhariyaanwa obhurame bhunu bhutakuweera, nawe bhanu ꞉bhaariga mbakora amabhiibhi, bhariramurirwa.

30“Kitariwo kiinu kyonekyone kinu enitura okukora kwa obhuturo bhwani. Eniramurira abhaanu rwa kutyo Raata kaambwira. Indamuro yaani ni ya obhurengeresi, kwa okubha nitakukora rwa kutyo anye omwene eneenda, tari enikora rwa kutyo Raata unu ꞉aantumire keenda. 31Raabhe nikabhabhwira amangʼana gaani anye omwene, amangʼana gaani gatakutura okwikirisibhwa ati ni ga kimari. 32Nawe ariwo owundi unu kaanyaaikira amangʼana gaani kw-imwe, uyo ni Nyamuwanga. Na anye nimenyere ati, ganu kaanyaaikira ni ga kimari. 33Emwe ꞉mwatumire abhaanu ku-Yowana Omubhatiisha, omwene woone ˆnaabhabhwira ekimari kinu kiri ku-anye. 34Anye nitakwisiga abhaanu bhaanyaikire, nawe enibhabhwira amangʼana ganu, insonga emwe mwerusibhwe. 35Yowana Omubhatiisha ꞉aariga rwa intara inu ꞉yookaga niimirika mu-kisuute, emwe ꞉mwayendere, mujomererwa obhweru bhwayo ku-kabhaga kafuyi. 36Nawe anye ganu enibhabhwira ni manene okukira aga Yowana, kwa okubha emirimu ginu Raata ꞉aanaaye okukuumisha, ginu enikora, nigyo egyeresha ati Raata antumire. 37Raata, unu ꞉aantumire, omwene ꞉aabhwiriiye abhaanu ˆnaabheeresha ati anye ni niga. Emwe mukyariga okuungwa riisi ryaye na kutooto, na orususo rwaye mukyariga okururora. 38Riingʼana ryaye, ritari mw-imwe kwa okubha mutakunyiikirisha anye unu Nyamuwanga ꞉aatumire.

39“Omuringira mwikomeeresiishe Amakaamo Amataakatiifu, kwa okubha omutoga ati omutura okunyoora-mo obhurame bhunu bhutakuweera. Na Amakaamo gayo nigo aganyaikira anye! 40Na mutakwenda okuuja ku-anye, insonga munyoore obhurame bhunu bhutakuweera. 41Anye nitakwenda okuyaanwa ekibharo na abhaanu. 42Nawe nibhamenyere emwe, ati mu-mitima gyemwe mutakwenda Nyamuwanga. 43Anye niijire kw-isiina rya Raata, nawe muremere okundamira. Nawe omuunu owundi akaaja kw-isiina ryaye omwene, omuuja okumuramira. 44Emwe omutura okwikirisha kutiki, enu mugungyanya emwe abheene na abheene, na obhugungyo bhunu obhusooka ku-Nyamuwanga unu atariko owundi, mutakubhwagara? 45Mwasiga kutoga ati, anye eniija okubhasitaakya ku-Raata. Musa, unu omwisiga niwe aribhasitaakya. 46Raabhe mukeekirisiishe amangʼana ga Musa, mukanyiikirisiishe anye noone, kwa okubha Musa ꞉aakaamire amangʼana gaani. 47Nawe raabhe mukarema okwikirisha amakaamo gaaye, omuuja okwikirisha kutiki amangʼana gaani?”

বর্তমানে নির্বাচিত:

Yowana 5: kya

হাইলাইট

কপি