Matthew 9

Iesu na utu meni-pehari embo enu kojena

(Mark 2:1-12; Luke 5:17-26)

1Eto Iesu na e nga ta vihito umo oiho ta pambuto amita da ta puvuna. 2Eto embo vahai utu meni-pehari avo eto besi ta herekari mihahija avo embomeni na humbuto Iesu ta degi puvuo enana be humota ere ua avo Iesu na kito utu meni-pehari embo ta degi ke einge ena, “No ari sasapura avo hotembeto ere toruhona avo eto tunga javotoho e.” ainge enu, 3Judea embomeni ta ke pepeni kiari embopo na amita ke ingito ungo oenga ke mine ara ea, 4eto enana ta hotembari do ere puvutohua avo Iesu na kito enana ta degi ke einge ena. “Ungota jo ta hotembari sapura do eto ere puvutohoi? 5Ari haiteko davore? Eto embo na no ari sasapura ere toruhona aisuja amo ari ngahia retemo embo na umo kojeto ereto pambu aisuja amo ari ngahia re? 6Ungo ke be ae ere ova avo eto God na Embo ta Meni ta degi sovera ikari amina enda ta embomeni ta ari sasapura hotembeto toaguja avo ungo ke be ava ari erevi aisona,” ainge enana ta degi eto hapereketo utu meni-pehari embo ta degi einge ena, “Ereto no besi siriketo humbuto bande ta pambujo,” ainge enu, 7ereto bande ta pahunu 8embomeni na kito joru ue God na embo ta degi sovera isapamane ikena avo hotembeto God jakeka ea.

Iesu na Matthew humbunu ambo ambo ena

(Mark 2:13-17; Luke 5:27-32)

9Eto Iesu na degi avo toto pahue embo ta tax sirikari embo javo Matthew avo pure ari besi ta arumbeto mihinu kito ambo ambo aja ke enu Matthew ereto Iesu ambo ambo ena. 10Eto Iesu na Matthew ta bande ta indie mihinu tax sirikari embopo te Moses ta ke pepeni poekari embopo te na puvuto Iesu te amita ambotani te ga arumbeto indie mihio, 11enana Pharisees embomeni na ari avo kito Iesu ta ambotani ta degi einge eto ingia, “Ungota ahe poekari embo na do eto embo sasapura ga ere indei?” 12ke avo ijio Iesu na ingito mine einge ena, “Doctor na ambure umbae embomeni ta degi mane pambaguja rate ambure humbari embomeni ta degi pere pambaguja. 13Eto God ta ke kajari ta einge mihia, ‘ungota o teto pene gaga ta tembari avo na uje ae rate ungo embomeni kito jo ururou osa ava uje ere ona.’ ke amita be avo deire pambuto ungo oenga siriketo kivujo. Na puvuto embo jajavotoho mane rate sasapura avo ano kokonjeketo God ta degi puvurora oru ue ere ona.”

Ajirekari be avo Iesu na ahe poekena

(Mark 2:18-22; Luke 5:33-39)

14Eto John bapataito ari embo ta ambotani nei uhoho na Iesu ta degi puvuto einge eto ingia, “Enana Pharisee embomeni te dago te ungotenau ari mahu avo eto mahainge donda ajireketo eagora rate do eto ambotani no na donda ajirekae teho iragore?” ainge eo 15Iesu na ke mine einge ena, “Eto embo na kakara jimbuto pondo aisuja amo amita namei kamei na ajirekari hotembae tunga javotoho na indagora rate embo pambasuja amo namei kamei na osaga kogue indari ajirekasora ainge dombo na irae asona iji puvuto ere hua amikote enana osaga kogue indari ajirekasora.

16Eto ari mamahu ta ari amo bande sisi ainge pasarira. Eto embo na sisi eha ojeto kaeto hirasuja amo iji na kajau giroro eto tohekasuja, ehako ga veasuja. 17Eto nei amo kae harau gogore na jasari ai ta kae tureto mane ikagora vurereketo veasuja avo eto harau eha geriketo tureto ai ta ikasuja amo javotoho na iresuja.”

Iesu na Judea ta embo okose ta iae mahu pehari avo enu vasiri te erena

(Mark 5:21-43; Luke 8:40-56)

18Eto Iesu na ke ainge ijie mihinu Judea ta embo okose vahai na amita degi puvuto paunge teteri eto ke einge ena, “Nau iae eha pehihei umo pambuto ingeni tembao vasiri te eraja ere puvutuhona.” ainge enu 19Iesu te amita ambotani te amiga pambua. 20Eto degi ta pahuo evohu vahai amo jua tapa 12 amita jo ta orosa ere vovuahija amina Iesu kito 21einge hotembena, “Na amita bo hame aisona amo kojasona,” ainge hotembihe kuta puvuto amita bo pekihi ta hame unu 22Iesu egerembeto kito ke einge ena, “Nau iae tunga javotoho ejo. Umo na humota be ere oa avo eto kojasoa,” ainge ijinu amikote evohu amo kojena.

23Eto Iesu na Judea ta embo okose ta bande ta puvuto horenu bijapuri ari embomeni puvuto sisi sasi ijie mihio kito 24“Ungo araha ta pambuvu! Kakara emo pehaera teho evo ere ua,” ainge enu enana ke avo ingito kege ganini eo. 25Iesu na enu arahata pahuo kakara hereketo mihina ai ta horeto amita ingeni ta jiginu vasiri te erena 26eto ari ainge ena amita duru avo enda embomeni tapa ingia.

Iesu na tihi kuru ari embo heriso enu tihi kujeto kia

27Eto Iesu na degi avo toto pahunu tihi kuru ari embo heriso na duru ingito ihiketo Iesu ambo ambo eto gagaha ijie ke einge ea, “David ta Meni, dago ta osaga kito jo e!” ainge ijio 28Iesu bande jo ta horenu tihi kuru ari embopo ambota horeo, Iesu na enana ta degi einge eto ingina, “Eto ungo hotembiheva amo na ungota tihi hirikari haite avo hotembihevete.” ainge enu “Bada, dago ainge ere hotembihera” ke ainge eo 29Iesu na enana ta tihi ta hame ue ke einge ena, “Ungo ke be do ereva ainge puvuresuja,” ainge ijinu 30tihi hirikenu kia. Eto Iesu na enana ta degi ke ngahia na einge ena, “ari erevi embo nei ta degi mane avo ingesora,” ainge ena.

31Rate enana Iesu ta ke agi ae eto pambuto enana ta embomeni tapa ta degi eo ingia.

Iesu na enu ke ambu embo ihiketo ke ena

32Eto tihi kuru ari embo ta tihi hirikenu pahuo embo vahai ahihi sapura na horari avoeto ke ambu mihahija avo embomeni na humbuto puvuo 33Iesu na ahihi sapura ohimbenu pahuo embo amo ihiketo ke enu embomeni na kito vani vini eto ke einge ea, “Dago ari einge Israel enda ta kiae pekota ari erevi ere kogora.” ainge ea 34rate enana Pharisee embomeni na kito ungo oenga ari ainge avo asi ue Iesu ta degi hini kambari ue ke einge ea, “Amo ahihi sasapura ta okose na amita sovera ikaguja avoeto ahihi sasapura ere ohimbihia.”

Iesu na embomeni kogunu jo ena

35Eto Iesu na da tapa ta hembuhe Judea embomeni ta giu ari bande amita duru javotoho avo hande ue embomeni ta memenga ambure enu irae ena. 36Eto embomeni hamo mine umbae ue osaga neite neite kogue mihahera avo Iesu na kina rate hondate ari irae o sheep simba eagora embo aingeko irae kito jo ena. 37Avoeto amita ambotani ta degi ke einge ena, “Ve na pupusumbeto sari ere ua rate ondeto humbari embo isapamane mane 38avoeto ji ve Mamo ta degi penunu evujo pure embo nei ikau ve ondare.” ainge Iesu na ena.

বর্তমানে নির্বাচিত:

Matthew 9: OKVH

হাইলাইট

কপি