LUKA 9

1Iye wakungulwile kumi ni aali, waahele tachi ni chiyulo helu lia andemoniu eswe, ni cha kuwuka misongo. 2Waatumine mukwambujola wanangana wa Zambi, ni kuhindwisa mieji. 3Wambile kuli ayo ngwenyi, Kanda nukambata nichimwe ha wenyi wenu, chipwe mulumbu, chipwe chipakumuna, chipwe mbolo, chipwe mbongo, ka; chipwe kanda nukapwa ni mbinja jiali. 4Mu zuwo Heswaho muvunjila, muze mwene nukatwame, muze mwene nukatuhukemo. 5Waze eswe kechi kanutambula, muze munukatuka ku limbo lize, nukakukumwine fufuta ku yiliato yenu chikapwe Shindakenyo hali ayo. 6O akatukile, apalikile ndusu mu yihunda, nikwambujola sango lipema, nikuwuka kweswe.

7Achi, nguvulu Heronde wevwile ha yuma yize yeswe alingile, iye wakakashanyine chikolo, mumu achambile kuli amwe ngwo, Yoano hanahinduka hakachi ka afu; 8kuli akwo ngwo, Eliya hanasoloka, akwo ngwo, Umwe wa kuli aprofeta a shakulu hanasoloka. 9Mba Heronde wambile ngwenyi, Yoano hingunamutape, alioze yono iya ngunamwivu yuma yipwa haha? Iye wafupile kumumona.

10Apostolo muze te hahiluka, amwambulwilile yuma yize yeswe alingile. Iye Waatwalile, wakatukile akaye ukawo ku puya ya ku limbo lize, jina lialio, Mbeteseta. 11Alioze mbunga ha kuchinyingika, amukawile. Iye waatambwile kanawa, wahanjikile kuli ayo ha kutwala ku wanangana wa Zambi, wawukile waze ayijile. 12Tangwa liaputukile kwendala; ni e kumi ni aali ejile kuli iye, ambile ngwo, Shikenu ni mbunga, aye ku yihunda ya kujingilika, ni ku minda, akapombe, akawane kulia; mumu muno tuli mu puya. 13Iye wambile kuli ayo ngwenyi, Ahenu, alie. O ambile ngwo, Kutushi nacho, shina mbolo jitano ni yishi aali; shina mutuya tukalanjile wano atu eswe kulia. 14Mumu kwapwile ngwe tununu atano a malunga. Iye wambile kuli tumbaji twenyi ngwenyi, Atwamisenu ngango, ngwe makumi atano, ngango ni ngango. 15O alingile chocho, atwamishine eswe. 16Iye wanjile mbolo jitano ni yishi aali, nikuhetula meso kwilu, wajiwahishile, wajipalwile, wajihanyine kuli tumbaji twenyi ajisele kumeso ja mbunga. 17O alile ni eswe akuchile; mba anjile yize yasalileho ya kusambuka kuli ayo, ya yipalupalu, kumi ha yipakili ni yipakili yiali.

18Shimbu machilemba ukawenyi, tumbaji twenyi apwile hamwe nenyi: waahulile ngwenyi, Kuchi mbunga akunguvuluka? 19O amukumbulwile ngwo, Yoano Chipapachisa; ahoze akwo ngwo, Eliya; ni akwo ngwo, Umwe wa kuli aprofeta a shakulu hanahinduka. 20Iye ngwenyi, Yenu kuchi nwakunguvuluka? Petulu wamukumbulwile ngwenyi, Mwe Kristu wa Zambi. 21Alioze waakanjishile, waambile kanda akaambulula chuma chino kuli niumwe. 22Ngwenyi, Chatamba mwe Mwana Mutu kwivwa lamba linji, akalituneye kuli makulwana, ni asasendote akwa lutwe, ni akwa kusonyeka, akamushihe, ni ha tangwa liamuchitatu akahinduke.

23Iye wambile kuli eswe ngwenyi, Kachi umwe mazanga kungukaula, akalikale iye mwene, akazundule kulusu yenyi tangwa ha tangwa, akangukaule. 24Mumu mweswawo mazanga kulamwina mwono wenyi kumakautokesa; ahoze mweswawo matokesa mwono wenyi mumu hali yami, kumakaulamwina. 25Mumu kuchi mutu mafumbuka, kachi malipichisa hashi heswe, akalitokese mwene? 26Mumu mweswawo mevwa sonyi hali yami ni ha maliji jami, mwe Mwana Mutu kumakamuvwila sonyi, muze meza mu uhenya wenyi mwene, ni wa Tato, ni wa angelo asandu. 27Ahoze chamwenemwene ngunambe kuli yenu ngwami, Kwali amwe a kuli waze anamana kuno, kechi kufwa ndo mamona wanangana wa Zambi.

28Ni kulutwe ha maliji ano, ngwe matangwa nake, watwalile Petulu ni Yoano ni Tiangu, wakandukile ha mulundu mukulemba. 29Shimbu machilemba, meso jenyi alumukine, ni mahina jenyi alumukine atoma ni a kuhenyahenya. 30Kumanyi, malunga aali ahanjikile nenyi, Mose ni Eliya; 31wano asotokele mu uhenya, ahanjikile ha kutwala ku kufwa chenyi chize mafwa ku Yerusaleme. 32Ahoze Petulu, ni waze apwile hamwe nenyi, azembelele tulo, ni muze alawile pundu, amwene uhenya wenyi ni malunga aali waze amanyine hamwe nenyi. 33Mba shimbu machikatuka kuli iye, Petulu wambile kuli Yesu ngwenyi, Mwata, Chinapeme hali yetu kupwa kuno; tutungenu yisakila yitatu; chimwe hali yena, ni chikwo hali Mose, ni chikwo hali Eliya: se kanyingikine chize ambile. 34Shimbu machamba yino yuma, lelwa liejile, liaazulaminyine chizulie: o evwile woma shimbu anjilile mu lelwa. 35Ni liji liatuhukile mu lelwa ngwo, Yono mwe Mwanami, ngunamuzange, mwivwenu. 36Ni muze te liji hiliapalika, awanyine Yesu ukawenyi, o aholele, kalwezele niumwe ha matangwa aze yuma yize amwene.

37Ha tangwa likwo, muze te hapalumuka ku mulundu, mbunga yinene atakanyine nenyi. 38Kumanyi, lunga wa ku mbunga wakololokele ngwenyi, Longeshi, ngunaliumbu kuli yena, tala kuli mwanami wa lunga: mumu iye mwanami wa wika. 39Spiritu kakumukwata, susumuku matetwoka, mamutanyisa, nikututumuna fulufulu, chikalu kutusuka kuli iye, kakumufwita chikolo. 40Naliumba kuli tumbaji twe amutuhwise, o kahashile. 41Yesu wakumbulwile, ngwenyi, Yenu! chisemuko kuchishi Ufulielo, chapiya, ndo mwiji muka mungupwa hamwe ni yenu, mungulihumikiza ni yenu? Neha mwané kuno. 42Alioze shimbu te achili nikwiza, ndemoniu wamulimbwile, wamutunyishine chikolo. Yesu wakanjishile Spiritu ya luchisa, wahindwishile mwana-lunga, wamuhilwishile kuli tato. 43O eswe alishimwokene ha ulamba wa Zambi.

Ni shimbu eswe akomokene ha yuma yize yeswe alingile, wambile kuli tumbaji twenyi ngwenyi, 44Maliji ano anjile mu matwi jenu; mumu kumakakunjika mwe Mwana Mutu mu moko ja atu. 45Alioze kanyingikine liji lino, liahengamine kuli ayo, chocho kahashile kuchimona, o evwile woma kumuhula ha liji lino.

46Kuhangulula chapwile hakachi ko, hali yoze mapwa munene wahiana hakachi ko. 47Muze Yesu amwene kulihangulula cha mbunge jo, wanjile mwana mukepe, wamutumbikile ku lumbu lienyi. 48Wambile kuli ayo ngwenyi, Mweswawo matambula yono mwana mukepe mu jina liami, mangutambula yami: ni mweswawo mangutambula yami, matambula yoze wangutumine: mumu yoze mukepe Wahiana eswe hakachi kenu, mwenawo munene.

49Yoano wakumbulwile ngwenyi, Mwata, twamwene umwe kanatuhwisa andemoniu mu jina lie; twamukanjishile, mumu keshi kukaula ni yetu. 50Yesu wambile kuli iye ngwenyi, Kanda nakamukanjisa; mumu yoze keshi kulimika ni yenu hamwe ni yenu ali.

51Mba muze matangwa a kumutambula mwilu himamanunuka watalikishile meso jenyi ni tachi mukukanduka ku Yerusaleme. 52Iye watumine tunganda kulutwe lia meso jenyi: o ayile, anjilile mu chihunda cha A-Samaria, hanga amululikile. 53O kamutambwileko, mumu meso jenyi atalikishile ku Yerusaleme. 54Muze tumbaji twenyi, Tiangu ni Yoano, achimwene, ambile ngwo, Mwene, unazange twambe kahia kahulumuke mwilu ni kwalesa ngwe alingile Eliya, nyi? 55Alioze watewulukile, waámbilile, ngwenyi, Kunwanyingikine a ku Spiritu yoze nuli, 56mumu mwe Mwana Mutu kejile mukwonwona mwono wa atu alioze mukuulamwina. O ayile ku chihunda chikwo.

57Shimbu anayi mu jila, umwe wambile kuli iye ngwenyi, Mwene, mungukukaula kweswako muoya. 58Yesu wambile kuli iye ngwenyi, Mikuza kali ni mena, ni tujila a mwilu ali ni yaswa; alioze mwe Mwana Mutu keshi haze ha kushachila mutwe wenyi. 59Iye wambile kuli mukwo ngwenyi, Ngukaule. Alioze wakumbulwile ngwenyi, Mwene, ngutayize kama nguhange kuya, ngufunde tata. 60Alioze Yesu wambile kuli iye ngwenyi, Afu afunde afu jo; alioze yako yena, ukambujole wanangana wa Zambi. 61Mukwo nawa wambile ngwenyi, Mungukukaula, Mwene; alioze ngutayize kama nguhange kushika ni waze ali ku zuwo liami. 62Yesu wambile kuli iye ngwenyi, Niumwe se hanase kwoko henyi ku sharua, nyi matala kunyima, matela wanangana wa Zambi.

বর্তমানে নির্বাচিত:

LUKA 9: Csa

হাইলাইট

কপি