Matìyò 3
3
Fàʼ kə Dzwan wə ù kə nyiə nəniy mwi m-à-zə̀ mìy
(Mâk 1.1-8; Lukâs 3.1-18; Dzwan 1.19-28)
1A sòŋə fə ghà fə̀, Dzwan wə ù kə nyiə̀ nəniy mwi m-à-zə̀ mìy ə zù bù a mbvə̀n ə̀ kə̀sisi a mbwòʼ ə̀ Dzùdiyà, kaʼ yə̀ ani nàʼà ntwùm ə̀ Kə̀zə̀, 2dzìy yə̀ awò àghù yìy a ghu nə, “Ghà kyemì ŋwô bə̂ anə bɛb təli, aŋwòə fəkəmə̀ Zə̀kìy bû kaʼ ani saʼ aghee we.” 3Dzwan kə də̌ wè ntwùm ə̀ Kə̀zə̀ wə̀, Ìzayà, kə dzîy nəniy a sòŋə fə ù kə dzây tsə nə̀, “Wè lìy bwoʼo kə̀bòŋ a mbvə̀n ə̀ kə̀sisi, dzìy tsə nə̀,
‘Byay na tsə nə dzəd
awò Mwe ə̀ Mbyi,
Zəŋi tsə nə̀ dzə̀d ə̀ we doʼo tsə tsitsi.’ ”
4Dzwan kə dzə̀ŋì kəli təndzwu ghu kə zəŋi nəniy anə ŋwù tə nyàm ìlìy yìy ghu tyoŋə nə̀ à də̀ kəkàmêl.#3.4 Kàmêl kìy də nyàm ìlìy yìy ì kə byoʼò tsə̂ ùfyiə wiy. U də̌ nə̀ kwò fìy anə isəd ghu zəŋi nəniy anə gùw nyàm. Ufânyiə uwe wiy kə də̀ təbe nə̀ zuw tiy. 5Aghee bù a kə̀lə̀ Dzwan nə̀ ghu ŋwô bə̀ a Yèlusalèm, nə̀ a mbwòʼ ə̀ Dzùdiyà ìdzə̀m, nə̀ anə lòʼo tə̀ liy tə tə̀dzə̀m akə̀lə̀ Dzwìy Dzudàn. 6Ghu dìy dzày yə̀ bɛb tə ghu, Dzwan ə nyə̀ ghu nə̀ mwi m-à-zə̀ mìy anə dzwì Dzudàn.
7Abù Dzwan kôʼ tsə nə̀ ndə̀mə̀ àghě Falàsî nə̀ àghě Sadùsî yìy nyiə̀ lwe bə̀ ŋwò ani bù nìy mwi a lòʼo kə ù kə nyiə̀ nəniy mwi m-à-zə̀ mìy ate, u dzày yə̀ a ghu nə, “Gha yə ghà bəbə yə à də̀ zwə tə̀ bɛbə tiy,#3.7 Zwə tiy də aghû yə̀ ghu zəŋə nəniy ŋwam tə yiə tiy nə̀ àyiə àbɛbə yiy à tswù ndìə̀ gha nə̀ ghà tu ŋwô fyi anə fòŋə̀ Kə̀zə̀ ìŋəmə̀ yìy ə? 8Ghà ki zəŋə yə ayiə yə a dê nəniy nə̀ ghà mə kyèmì ŋwò bə̀ anə bɛb təli. 9Ghà kə môʼ dzə̀ nə̀ ghà də ŋwô ani tu ŋwò fyi anə mfəm, yəə ghà dzîy nə̀ ghà də awi Ablàhâm. Mə ndzəmə̀ dzìy bə̀ ŋwò â ghà nə̀, Zə̀kìy də ani bwad fə̀d kə atay yə anə awi Ablàhâm. 10Ifuw yiy mə dòʼò təŋ bə̀ ani fòŋ màʼà ŋkàʼ anə təghàŋə. Abu à də kə kâʼ fə̀ ghaa fiy fə də muə way utam ùdzoŋə̀ wìy ghu kî fòŋə̀ myàʼà ŋwò kâʼ fə ghà fə̀ ghu piə̀ maʼà kə anə uvə̀lə̀. 11Mə nyiə̀ ghà nə̀ mwi m-à-zə̀ mìy ani dè tsə nə̀ ghà mə kyèmì fyi ŋwò bə̀ anə bɛb təli, Wù lìy wìy kwuni bè ŋwò adzəmə̀ mìə̀, ù mə miə tsîy fyi. Mə kə̀ bôʼ kwoʼ kpe nəway ani bòʼò gùw tə we. Ù kì kwunə zəŋə tsə nə̀ Zwàykə̀zwekiy bû azoŋə̀ ghà, ù saʼ aghě bɛbə yə, ù nyə̀ sòʼò ghu nə̀ mfəm anə uvə̀lə̀. 12Ù bè təŋə nə̀ nəli kə we kiy ani bù fyɛbi màʼà fyi kə zwiy tə asaŋ anə asaŋ. Ù kî nìy na yə̀ àsaŋ ə we anə uta, ù kwuni nìy pìə̀ màʼà kə zwiy tə anə uvə̀lə̀ wə̀ u də nimə kòʼò dzə̀ wày.”
Dzwan ə nyə̀ Yesù nə̀ mwi m-à-zə̀ mìy
(Mâk 1.9-11; Lukâs 3.21,22)
13Yesù ə dyaŋi ŋwò tsə a Galìlî bù akə̀lə̀ Dzwan anə dzwì Dzudàn nə̀ Dzwan nyiə̀ we nə̀ mwi m-à-zə̀ mìy. 14Dzwan ə kaʼ ani kwuni twe dzìy nə̀, “À mə̀ kpe wô ani nyə̀ mìə̀ nə̀ mwi m-à-zə̀ mìy, wò kàmə̀ bè akə̀lə̀ mìə̀ iyîkìə̀?”
15Yesù ə bə̀lì yə̀ we nə̀, “I kwu ani dòʼò aghii nyiə, â ŋgàŋ ani zəŋi mà təŋ tsə ayiə àdzə̀m a də nəniy tsitsi anə sə k-a-zə̀.” Dzwan ə dyaŋi bɛmə kə ani nyə̀ we nə̀ mwi m-à-zə̀ mìy.
16Abù Dzwan nyiə̀ tsə Yesù nə̀ mwi m-à-zə̀ mìy, Yesù ə ŋwò fyi kwoʼ kə anə mwi, u kòʼ byiwuŋ kiy ŋwô fwiy tsə nəniy, Zwày k-a-zə̀ kìy ə tswi bə̀ yəə à də̀ kəbubumə, bù ma tsə azoŋə̀ we. 17Dzə̀ ə foŋ fyi tswi bə̀ an-a-vələ dzày tsə nə̀, “À wə̀ də̌ wa nam ù tsukə̀ wìy, ù zəŋə fòŋ yam ŋgee dzwabə̀ nəniy.”
বর্তমানে নির্বাচিত:
Matìyò 3: isu
হাইলাইট
শেয়ার
কপি
Want to have your highlights saved across all your devices? Sign up or sign in
© CABTAL 2023
