Génesis 5
5
Adanpa mirayninmanta
(1 Cr 1.1-4)
1Adanmanta miramuq runakunaqa kaykunan karanku. Qallariyninpi runata Dios unanchaspaqa, rikch'ayninman rikch'ayniyoqtan 2qarita warmita ruwaran. Hinaspan ruwasqan p'unchaw paykunata bendecispa “runakuna” nispa suticharan.
3Adanqa 130 watayoq kashaqtinmi huk qari wawanpas kallarantaq. Chay wawanqa Adanpa rikch'ayninman rikch'akuqmi karan. Paymanmi sutinta churaran Set sutiwan. 4Adanqa kawsaran 800 watataraqmi wawan Setpa nacesqanpa qepanmanqa. Chay tiempopin Adanpaqa kallarantaq qari wawankuna hinallataq warmi ususinkunapas. 5Adanqa 930 watankaman kawsaran. Hinaspan wañukapuran.
6Setqa 105 watanpiñan kasharan. Hinaqtinmi huk qari wawan nacemuran. Paymanmi sutinta churaran Enós sutiwan. 7Setqa kawsaran 807 watataraqmi wawan Enospa nacesqanpa qepanmanqa. Chay tiempopin Setpaqa kallarantaq qari wawankuna hinallataq warmi ususinkunapas. 8Setqa 912 watankaman kawsaran. Hinaspan wañukapuran.
9Enosqa 90 watanpiñan kasharan. Hinaqtinmi huk qari wawan nacemuran. Paymanmi sutinta churaran Cainán sutiwan. 10Enosqa kawsaran 815 watataraqmi wawan Cainanpa nacesqanpa qepanmanqa. Chay tiempopin Enospaqa kallarantaq qari wawankuna hinallataq warmi ususinkunapas. 11Enosqa 905 watankaman kawsaran. Hinaspan wañukapuran.
12Cainanqa 70 watanpiñan kasharan. Hinaqtinmi huk qari wawan nacemuran. Paymanmi sutinta churaran Mahalaleel sutiwan. 13Cainanqa kawsaran 840 watataraqmi wawan Mahalaleelpa nacesqanpa qepanmanqa. Chay tiempopin Cainanpaqa kallarantaq qari wawankuna hinallataq warmi ususinkunapas. 14Cainanqa 910 watankaman kawsaran. Hinaspan wañukapuran.
15Mahalaleelqa 65 watanpiñan kasharan. Hinaqtinmi huk qari wawan nacemuran. Paymanmi sutinta churaran Jared sutiwan. 16Mahalaleelqa kawsaran 830 watataraqmi wawan Jaredpa nacesqanpa qepanmanqa. Chay tiempopin Mahalaleelpaqa kallarantaq qari wawankuna hinallataq warmi ususinkunapas. 17Mahalaleelqa 895 watankaman kawsaran. Hinaspan wañukapuran.
18Jaredqa 162 watanpiñan kasharan. Hinaqtinmi huk qari wawan nacemuran. Paymanmi sutinta churaran Enoc sutiwan. 19Jaredqa kawsaran 800 watataraqmi wawan Enocpa nacesqanpa qepanmanqa. Chay tiempopin Jaredpaqa kallarantaq qari wawankuna hinallataq warmi ususinkunapas. 20Jaredqa 962 watankaman kawsaran. Hinaspan wañukapuran.
21Enocqa 65 watanpiñan kasharan. Hinaqtinmi huk qari wawan nacemuran. Paymanmi sutinta churaran Matusalén sutiwan. 22Enocqa kawsaran 300 watataraqmi wawan Matusalenpa nacesqanpa qepanmanqa. Hinaspapas Enocqa kawsaran Diospa munasqanman hinan. Hinaspan Enocpaqa kallarantaq qari wawankuna hinallataq warmi ususinkunapas. 23Enocqa 365 watankama kawsaran. 24Enocqa Diospa munasqanman hina kawsaran. Chayraykun paytaqa kawsashaqllata Dios Tayta pusakapuran.
25Matusalenqa 187 watanpiñan kasharan. Hinaqtinmi huk qari wawan nacemuran. Paymanmi sutinta churaran Lamec sutiwan. 26Matusalenqa kawsaran 782 watataraqmi wawan Lamecpa qepanmanqa. Chay tiempopin Matusalenpaqa kallarantaq qari wawankuna hinallataq warmi ususinkunapas. 27Matusalenqa 969 watankaman kawsaran. Hinaspan wañukapuran.
28Lamecqa 182 watanpiñan kasharan. Hinaqtinmi huk qari wawan nacemuran. 29Paymanmi sutinta churaran Noé sutiwan. Hinaspan khaynata niran:
—Kay wawan kay allpa pachapi ñak'arispa llank'asqanchismanta samariyta qowasunchis. Saynataqa ñak'arishanchis, kay allpa pachata Dios maldecisqanraykun, nispa.
30Lamecqa 595 watataraq wawan Noeypa nacesqanpa qepanmanqa kawsaran. Chay tiempopin Lamecpaqa kallarantaq qari wawankuna hinallataq warmi ususinkunapas. 31Lamecqa 777 watankaman kawsaran. Hinaspan wañukapuran.
32Noeyqa 500 watanpiñan kasharan. Hinaqtinmi qari wawankuna nacemuran. Paykunamanmi sutinta churaran Sem sutiwan, Cam sutiwan hinallataq Jafet sutiwan ima.
বর্তমানে নির্বাচিত:
Génesis 5: QEAÑT
হাইলাইট
শেয়ার
কপি
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
