Génesis 3
3
Adán Evapiwan Diosta mana kasukusqankumanta
1Diospa llapallan salqa animalkuna ruwasqanmantaqa mach'aqwaymi aswan más astuto karan. Hinaspan chay mach'aqwayqa warmita khaynata niran:
—¿Cheqaqtapunichu Diosri nisurankichis, huertapi llapallan sach'akunapa rurunta ama mikhunaykichispaq? nispa.
2Chaymi warmiqa contestaran khaynata:
—Manan. Aswanmi huertapi llapallan sach'akunapa rurunkunata mikhunaykupaqqa permitisqa kashayku. 3Ichaqa Diosmi niwanku: “Huertapa chawpinpi kaq sach'apa ruruntaqa, aman mikhunkichishchu nitaq tupayunkichispashchu, saynapi ama wañunaykichispaq”, nispa.
4Ichaqa mach'aqwayñataqmi warmita niran:
—¡Chayqa manan cheqaqchu! ¡Qankunaqa manan wañunkichishchu! 5Aswanmi Diosqa yachan chay sach'apa rurunta mikhuqtiykichis hinalla, qankunapa ñawiykichis kicharikunanta. Saynallataqmi Diosqa yachan, allin kaqkunata hinallataq mana allin kaqkunatapas yachaspa, Dios hina kanaykichista, nispa.
6Hinaqtinmi warmiqa chay sach'apa rurunta rikuran. Chay sach'apa rurunqa mikhunapaqmi sumaq munayllaña karan hinallataq allin yachayniyoq kanapaq ima. Chaymi warmiqa chay sach'apa rurunta pallaspa mikhuran. Hinallataq qosanmanpas haywaykuran mikhunanpaq. Chaymi qosanpas mikhuran. 7Hinaqtinmi chay sach'apa rurunta mikhuruqtinku hinalla, ishkayninkupa ñawinku kicharikuran. Chaymi cuentata qokuranku q'alalla kasqankuta. Chayraykun paykunaqa higos sach'apa rap'inta siraranku, q'alalla kasqankumanta tapakunankupaq.
8Chaymantan runaqa warminpiwan wayra wayramusqan tarde horasta, Dios huertapi purisqanta uyariranku. Hinaqtinmi paykunaqa apurayllamanña sach'a-sach'a ukhupi pakakuranku, saynapi paykunata Dios ama rikumunanpaq. 9Ichaqa Señor Diosmi waqyamuran khaynata:
—¿Maypitaq kashankirí? nispa.
10Chaymi runaqa khaynata contestaran:
—Huertapi purisqaykitan uyarini. Hinaspan q'alalla kasqayrayku manchakuymanta pakakurani, nispa.
11Hinaqtinmi Diosqa khaynata tapuran:
—¿Pitaq q'alalla kasqaykitari nisurankí? ¿Icha qanqa “aman mikhunkichu” nisqay sach'apa rurunta mikhururankí? nispa.
12Chaymi runaqa contestaran:
—Noqapa compañeray kananpaq qowasqayki warmin, chay sach'apa rurunta mikhunaypaq qowaran; chaymi noqaqa mikhururani, nispa.
13Hinaqtinmi Señor Diosqa warmita tapuran khaynata:
—Qanri, ¿imatataq ruwarunkí? nispa.
Chaymi warmiqa khaynata contestaran:
—Mach'aqwaymi engañaruwaran. Chaymi chay sach'apa rurunta mikhurani, nispa.
14Chaymi Señor Diosqa mach'aqwayta khaynata niran:
—Kay ruwasqaykiraykun,
llapallan tukuy clase animalkunamanta, maldecisqa kanki.
Kunanmanta wichaymanqa qasqonpallanmi purinki,
polvo allpatataqmi mikhunkipas.
15Hinaspan qantawan warmitawan cheqninachisqaykichis, enemigontin kanaykichispaq.
Qanpa mirayniykipas warmipa mirayninwanmi cheqninakunqaku.
Chay warmipa mirayninmi umaykipi sarusunki.
Ichaqa qantaqmi talonninpi kaninki, nispa.
16Warmitataqmi Diosqa khaynata niran:
—Onqoq rikhuriqtiykin ñak'ariyta yapasqayki.
Wawaykikunata onqokuspaykin ancha nanaywan onqokunki.
Ichaqa sayna nanaywan wawaykita onqokushaspapas, qosaykiwanmi kayta munanki.
Paytaqmi dominasunkipas, nispa.
17Runatataqmi Señor Diosqa khaynata niran:
—“Aman mikhunkichu kay sach'apa rurunta”, nisqayta mana kasukuspaykin, qanqa warmiykita kasukuspa, chay sach'apa rurunta mikhuranki.
Chayraykun qanpa kawsaykipi enteron allpaqa maldecisqa kanqa.
Chaymi kay allpapi imata tarpuspapas, pisipaspa hump'illaña llank'anki.
Sayna ñak'ariywan llank'aspan, llank'asqaykipa rurusqanta mikhunki, asta kay pachapi kawsanayki p'unchawkama.
18Kay allpapin wiñanqa kishkakuna, k'isakuna;
campopi wiñaq qorakunatan mikhunkipas.
19Hump'illaña llank'aspan mikhunata tarikunki,
wañuspa allpaman kutinaykikama.
Qanqa allpamanta ruwasqan kanki;
allpallamantaqmi tukupunkipas, nispa.
20Chaymantan Adanqa warminpa sutinta churaran Eva sutiwan, pay llapallan kawsaq runakunapa maman kananta yachasqanrayku. 21Señor Diosmi Adanpaq hinallataq Evapaqwan ima, qaramanta p'achata ruwapuran. Hinaspan paykunata p'achachiran. 22Hinaspan Diosqa niran:
—Runaqa hukninchis hinan kunanqa kapun, allin kaqta hinallataq mana allin kaqtapas yachasqanrayku. Hinaspapas payqa yanqañataq wiñaypaq kawsay qokuq sach'apa rurunta pallaruspa mikhurunman. Hinaspan wiñay kawsayniyoq karunman. Chayqa manan allinchu kanman, nispa.
23Chaymi Señor Diosqa Edén nisqa huertamanta runata qarqomuran chakra allpapi llank'ananpaq; chay allpamantan runaqa ruwasqa karan. 24Chay Edén nisqa huertamantan Diosqa runata qarqomuran. Hinaspan chay huertapa intiq lloqsimunan lawpi, *querubinwan sutichasqa *angelkunata churaran. Hinaspapas churallarantaqmi huk rawrashaq *espadatapas tukuy lawman muyuqta, saynapi wiñay kawsay qokuq sach'aman riq ñanta cuidananpaq.
বর্তমানে নির্বাচিত:
Génesis 3: QEAÑT
হাইলাইট
শেয়ার
কপি
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
