मत्ती 9
9
येसुचे या कङ् अचल्तीबे म्ही गीत फेन्न लजेत्पल
(मर्कुस् २:१-१२; लुका ५:१७-२६)
1हुजु लीप्चे येसु दोङ्गरी क्रेत्जेत्ज्यीम् ग्येइ क्योम्सङ् र्हङ्की सहर् कफर्नहुम्री दोःज्यीम् स्येःज्यी। 2ओसेम् म्हीमाचे या कङ् अचल्तीबे नेत् स्यप्पे म्ही गीत थेइ तीत्प न्हेन्बतेङ् बक्च्य क्योङ्लेनो नाज्यीम् येसु मुबे ग्लारी बज्यी। थेङ्चे हुजु म्हीमाकी बीस्वास् म्रङ्जेत्ज्यीम् हुजु नबत सुङ्ज्यी, “ज, सेम् कोङ्न लउ, एइ पाप् क्षमा तबल मुब।” 3ओसेम् डेत्-डेत् धर्म लोप्पोन्माचे थेङ्यीमान्हङ् चोले पङ्ज्यी, “चु म्हीचे पर्मेस्वर्की नीन्द स्य्हेङ्टीब मुब।” 4तर येसुचे थेङ्यीमाकी सेम्की तम् गोज्यीम् सुङ्ज्यी, “एङ्यीमाचे तले चोतेबे अज्यब म्हेन्ब? 5पङो देरेम्, चु म्हीत ‘एइ पाप् क्षमा तज्यी’ पङ्बतेङ् ‘रेःज्यीम् ब्रउ’ पङ्बरी खजु देबल तल? 6तर म्हीइ जत चु जम्बुलीङ्री पाप् क्षमा स्य्हेङ्बे अधीकार् मुब पङ्ज्यीम् ङ एङ्यीमात ङोन्स्ये मुब।” ओसेम् थेङ्चे हुजु या कङ् अचल्तीबे म्हीत सुङ्ज्यी, “रेःगो, ओसेम् र्हङ्की तीत्स दुत्ज्यीम् दीम्री य्हरो!” 7ओसेम् हुजु म्ही रेःज्यीम् दीम्री य्हर्ज्यी। 8चु तेःङेन्की लक् म्रङ्ज्यीम् य्हक्को म्हीमा लोङ्ज्यी। ओसेम् म्हीमात चोतेबे अधीकार् न्हङ्बे पर्मेस्वर्त थेङ्यीमाचे तोप्ज्यी।
येसुचे मत्तीत ङ्होत्जेत्पल
(मर्कुस् २:१३-१७; लुका ५:२७-३२)
9येसु हुजु ग्लाचे स्येःटीमम् थेङ्चे मत्ती पङ्बे तीरो दुत्पे म्ही गीत तीरो दुत्पे ग्लारी टीटीबल म्रङ्जेत्ज्यी। थेङ्चे थेत, “ङइ लीप्चे ब्रउ” बी सुङ्ज्यी। ओसेम् हुजु तीरो दुत्पे म्ही रेःज्यीम् थेङ्की लीप्चे ब्रज्यी।
10हुजु लीप्चे येसु मत्तीइ दीम्री डबमातेङ् बक्च्य स्य्हेःब सोल्बरी स्य्हुःजेत्ज्यी। हुजु बेलोरी तीरो दुत्पे य्हक्को म्हीमातेङ् पापीमाएनो खज्यीम् थेङ्तेङ् बक्च्य चबरी टीज्यी। 11फरीसीमाचे चु म्रङ्ब बीसेम् थेङ्की डबमात ङ्योत्ज्यी, “एङ्यीमाकी लोप्पोन्चे तले तीरो दुत्पे म्हीमा, ओसेम् पापीमातेङ् बक्च्य चब#९:११ तीरो दुत्पे म्हीमा, ओसेम् पापीमातेङ् बक्च्य चब- यहुदी अगुवामाचे यहुदी धर्म अनुसार् खल्चे पङ्लेनो पापीमातेङ् बक्च्य चबथुङ्ब स्य्हेङ्ज्यी पङ्सम् थेएनो असुद्दतेङ् पापी तब बी म्हेन्ब मुबल।?” 12येसुचे चु थ्येःब बीसेम् चोले जोहप् न्हङ्जेत्ज्यी, “अनबे म्हीमात डाक्टर् अतो, तर नबे म्हीमात तोःब। 13ङ्यीउ ओसेम् धर्म छ्येःरी ब्रीबे चु तम्की अर्थ गोउ, ‘ङ एङ्यीमा ग्यम्से ठा अय्हीन्, तर दया स्य्हेङ्खइ म्हेन्ब।’#होसे ६:६ तलेपङ्सम् ङ धर्मीमात अय्हीन् पापीमात ङ्होत्परी खज्यी।”
ङ्यीम्बु टीबे बारेरी ङ्योत्पल
(मर्कुस् २:१८-२२; लुका ५:३३-३९)
14हुजु लीप्चे बप्तीस्मा पीन्बे युहन्नइ डबमा येसु मुबे ग्लारी खज्यीम् चोले ङ्योत्ज्यी, “ङ्यीमातेङ् फरीसीमा य्हक्को र्हङ्ब ङ्यीम्बु टीब, तर थेङ्की डबमामी तले ङ्यीम्बु अटीबल?” 15येसुचे थेङ्यीमात जोहप् न्हङ्जेत्ज्यी, “भ्या डोन्री दुलहा जन्तीमातेङ् मुबे बेलोरी थेङ्यीमाचे ङ्यीम्बु टीब? तर चोतेबे बेलो खस्ये मुब, दुलहात थेङ्यीमा ग्यम्से फेःज्यीम् बोर्स्ये मुब, हुजु लीप्चे थेङ्यीमा ङ्यीम्बु टीस्ये मुब।
16 “खल्चेएनो बोक्ट येन्री छार् येन्खेन्चे अख्य। तलेपङ्सम् छार् येन्खेन् रुप्ज्यीम् बोक्ट येन्त झेन् डेःलाब, ओसेम् येन् झेन् य्हक्को डेःस्ये मुब।
17 “ओसेम् खल्चेएनो बोक्ट डीइ गल्दरी छार् अङ्गुर्की नीङ्गु अयु, युज्यी पङ्सम् हुजु गल्द थीज्यीम् नीङ्गु य्हर्ब। तर छार् नीङ्गु छार् डीइ गल्दरीनो युब ओसेम् ङ्य्हीनो न्होङ्स्ये अरे।”
याइरस्की जमेतेङ् अमकोल गी फेन्बल
(मर्कुस् ५:२१-४३; लुका ८:४०-५६)
18येसुचे चोले सुङ्टीबे बेलोरी यहुदी सासक् गी हुजुरी खज्यी। ओसेम् थेङ्त पुइ जुःज्यीम् पङ्ज्यी, “ङल जमे देरेकीनो स्यीज्यी, तर थेङ् ब्योन्खज्यीम् थेइ जोरी थेङ्की फ्या थेन्पीन्जेत्सम् थे सोस्ये मुब।” 19ओसेम् येसु रेःजेत्ज्यीम् डबमातेङ् बक्च्य हुजु सासक्की लीप्चे स्येःजेत्ज्यी।
20हुजु बेलोरीनो ल्हेगोर् गी य्हङ्से का य्हर्स्यीनो टीबे नेत् स्यप्पे अमकोल गी येसुइ ग्यप्चे खज्यीम् थेङ्की न्हम्जइ न छुज्यी। 21तलेपङ्सम् थेचे र्हङ्की सेम्री, “ङचे थेङ्की न्हम्जकीनो छुम्यङ्लेनो ङ फेन्स्ये मुब” बी म्हेन्बल मुबल। 22ओसेम् येसुचे ग्यप्चे दोःज्यीम् स्हीःमम् हुजु अमकोलत म्रङ्जेत्ज्यीम् सुङ्ज्यी, “जमे, सेम् कोङ्न लउ, एइ बीस्वास्चे एत फेन्नलबल मुब।” हुजु बेलोरी हुजु अमकोल फेन्ज्यी।
23हुजु लीप्चे येसु सासक्की दीम्री दोःजेत्ज्यी, थेङ्चे हुजुरी दुखइ बाजा र्हप्पे म्हीमातेङ् क्राबे म्हीमात म्रङ्जेत्ज्यी। 24ओसेम् येसुचे थेङ्यीमात सुङ्ज्यी, “एङ्यीमा जम्मनो दोरी य्हरो, अमकोल स्यीबल अरे, तर म्हेर्बलकीनो मुब।” चु तम् थ्येःज्यीम् थेङ्त खीसइतीज्यीम् थेङ्यीमा ङ्येत्ज्यी। 25तर य्हक्को म्हीमात दोरी पीत्प बीसेम् थेङ् न्हङ्री वङ्जेत्ज्यी, ओसेम् हुजु अमकोलइ या चुङ्ज्यीम् सेन्जेत्ज्यी, ओसेम् अमकोल रेःज्यी। 26ओसेम् चु तम् हुजु य्हुल्की जम्म ग्लामारी थ्येःज्यी।
येसुचे कन म्ही ङ्य्हीतेङ् लेम्ब म्हीत फेन्नलजेत्पल
27येसु हुजु ग्लाचे स्येःजेत्टीमम् ग्यम्री कन म्ही ङ्य्ही थेङ्की लीप्चे खज्यीम् क्रीङ्ज्यीम् पङ्ज्यी, “ओ दाउद्की ज, ङ्यीमात दय स्य्हेङ्जेतो!” 28ओसेम् हुजु कन म्ही ङ्य्ही थेङ् स्य्हुःबे दीम्रीएनो खज्यी। ओसेम् येसुचे थेङ्य्हीत ङ्योत्जेत्ज्यी, “एङ्य्हीत ङचे मीः म्रङ्नलब खम्ब पङ्बे बीस्वास् मुब?” थेङ्य्हीचे पङ्ज्यी, “मुब, प्रभु।” 29हुजु लीप्चे थेङ्चे थेङ्य्हीकी मीःरी छुजेत्ज्यीम् सुङ्ज्यी, “एङ्य्हीकी बीस्वास् अनुसार् एङ्य्हीत तखइ।” 30ओसेम् थेङ्य्हीचे मीः म्रङ्ब खम्ज्यी, येसुचे थेङ्य्हीत, “चु तम् खल्तेएनो थस्येतो!” बी कुल्जेत्ज्यी। 31तर थेङ्य्ही हुजु ग्लाचे य्हर्ज्यीम् थेङ्की बारेरी हुजु प्रदेस्की जम्म ग्लामारी स्येत्ज्यी।
32थेङ्मा हुजु ग्लाचे डोङ्ज्यीम् स्येःटीबे बेलोरी म्हीमाचे म्हङ् स्यप्पे लेम्ब म्ही गीत येसुज बज्यी। 33येसुचे हुजु म्हङ् तेत्लाजेत्प बीसेम् हुजु लेम्ब म्ही तम् पङ्ब तीप्ज्यी। ओसेम् म्हीमा तेःङेन् तज्यीम् पङ्ज्यी, “चोतेब इस्राएल्री खेमेनो तबल अरेबल!” 34तर फरीसीमाचे पङ्ब तीप्ज्यी, “चुत म्हङ्माकी ग्यल्बोचे म्हङ् ल्हप्पे सक्ती पीन्बल तज्यीम् थेचे म्हङ्मा तेत्लाब खम्ब।”
नङ्बोमा चेक्कीनो
(मर्कुस् ६:३४; लुका १०:२)
35येसुचे जम्मनो ज्यीद सहर्मातेङ् नम्समा तज्यीम् स्वर्गइ य्हुल्की बारेरी ज्यबे सम्तर् प्रचार् स्य्हेङ्जेत्ज्यी, ओसेम् थेङ्चे यहुदीमा र्हुब् तबे दीम्मारी लोप्जेत्ज्यी। ओसेम् जम्म थोचेथोइ नेत् स्यप्पे म्हीमात फेन्नलजेत्ज्यीम् ब्रजेत्ज्यी। 36य्हक्को म्हीमात म्रङ्जेत्ज्यीम् थेङ्की सेम्री दय खज्यी। तलेपङ्सम् थेङ्यीमा गोर्तेन् अरेबे ग्युःमा र्हङ्ले छेर्बतेङ् दुखचे प्लेःबल मुबल। 37ओसेम् थेङ्चे डबमात सुङ्ज्यी, “दुत्थोस्येकी अन्न य्हक्को मुब, तर नङ्बोमा चेक्कीनो मुब। 38होत्तज्यीम् अन्नइ ङ्होप्तत प्रार्थना स्य्हेङो, ओसेम् थेङ्चे अन्न दुत्परी नङ्बोमा पीत्युजेत्खइ।”
বর্তমানে নির্বাচিত:
मत्ती 9: WTDG
হাইলাইট
শেয়ার
কপি
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
