Yohana 18

Wanna ge Zeso ne

Mat 26.36-54; Mrk 14.32-50; Luk 22.39-51

1Guwa̰ ge Zeso kaɗe mbe go ge na Ba ta, a ge na nda ge ame hateya ma kan ta mbo mam buwal, ge àa tol ne kedro̰ wa lee gene yà. Gaaso a̰me kaa sok mbe go, a ge na nda mbe ma waɗ ge ne zì. 2Yudas, ndu ge mà ɓyan Zeso ya gezi, ka kuwa sok mbe kuwa waɗme, ge dape, Zeso mage na nda ge ame hateya ma ka mbo seɗ ta gogoy ge ne yà. 3Yudas mbo ya ɔwabe asagar ma na pe go, ɓanna ge num ge koy zok ge Dok ne wa ma, num mbe ge ga̰a̰l ge nda ge kee tuwaleya ma way mage Farisi ma ho̰ na num ma. Asagar mbe ma kaa ge maa kaŋ walam ma, ge ol gil mage ɗuli ma ge maa tok go. Àa ge num ɓan mbo gaaso mbe zì yà. 4Sok mbe go, ajo̰o̰ Zeso ka kuwa fare ge ɓyare seɗ na ma kuwa peɗ ɗe, mbo num ndwa zì yà, ele num go: Ḛ ɓyare huɗi de? 5Àa gwan ge ne janna go: Zeso ge suwal Nazareɗ ne. Jan num go: A mbi sḛ ne. Zane no, Yudas, ndu ge mà ɓyan ne ya gezi, wa ya mḛḛya ge num dagre. 6Sok ge Zeso jin̰a num go ne na ne ɗe, àa tigri yà ge guwa̰, àa kan suwa se yà. 7Gwan dwage num eleya go: Ḛ ɓyare huɗi de? Àa jan ne go: Zeso ge suwal Nazareɗ ne. 8Zeso gwan ge num janna go: Mbi daa jan ḛ ya go, ne mbi ne kade. Kaɗɗa ḛ ɓyare mbi ɗe, ḛ n̰a nda gegene mbe ma no mboya. 9A go mbe no, fare ge jin̰a num mbe ma wa dee ya huyya no. Jin̰a go: Baa, num mbe ge mo ho̰ num koyya mbi tok go ma, mbi be ban a̰me ɗu to. 10Sok mbe go, Simo̰ Piyer kaa ge kasagar na tok go, ndage ne ge na vum zì ya zum, chal ga̰a̰l ge nda ge kee tuwaleya ma way ge waɗe ndu ge tèmel ge ne tɔgwa lee matoson go, kun ne gezi. Àa ka tol ndu ge tèmel mbe Malkus. 11Ɗaŋɗe, Zeso jan Piyer go: Guwa̰ ge mo kasagar ge na vum zì, mo dwaɗ go mbi ge pool njoɗ yal ge mojo̰o̰ mbi Ba ho mbi na wa ge ne pe go to de?

Zeso ge ga̰a̰l ge nda ge kee tuwaleya ma way ma ndwa se

Mat 26.57-75; Mrk 14.53-72; Luk 22.54-65

12Ge sok mbe go, asagar ma, num ga̰a̰l ge waɗe ɓanna ge nda ge koy Yahuɗ ma, àa wan Zeso, àa vwal ne. 13Àa gene ne zḛḛ ɓiya ge An#18.13 An kaa ga̰a̰l ge kee tuwaleya ge waɗe ge wal ne, guwa̰, Kayf gaa eya ne no., ge Kayf kaa zok ge ne van ndwa se yà. Ago, ge del mbe go, Kayf kaa ga̰a̰l ge nda ge kee tuwaleya ma way ge waɗe ne. 14Zane no, Kayf kaa ndu ge yuwale Yahuɗ ma ga̰a̰l ma daa ja ne ge zḛḛ ya go: Ne nde-nde go, ndu ɗu suu ne ge ɓase ma pe.

15Simo̰ Piyer mage ndu ge ame hateya ge ɗogle a̰me ɗu ka kàre Zeso pe. Ndu ge ame hateya mbe mage ga̰a̰l ge nda ge kee tuwaleya ma way ge waɗe ka kuwa ta kuwa, waɗ dagre ge Zeso ge ga̰a̰l ge nda ge kee tuwaleya ma way ge waɗe zok pul diŋ yà. 16Ɗaŋɗe, Piyer gaa mḛḛya ge zok wa zum. Ndu ge ame hateya mbe ge a ge ga̰a̰l ge nda ge kee tuwaleya ma way ge waɗe ka kuwa ta mbe waɗ-ɗa zum, jan kale ge koy zok wa fare, guwa̰, gene Piyer ya diŋ. 17Kale ge koy zok wa mbe jan Piyer go: Mo ɗe, mo be ɗu, ge ndu mbe nda ge ame hateya ma buwal zige ne to de? Gwan ge ne janna go: To, mbi dagre ge num to. 18Ajo̰o̰ sok ka kee eyalam ɗe, nda ge tèmel mage nda ge koy zok ge Dok ne wa ma mbaa ol, àa mḛḛ ne wa go ɔwalla. Piyer mbo ya num ta ɔwal ol waɗme.

19Ga̰a̰l ge nda ge kee tuwaleya ma way ge waɗe mbe ele Zeso fare ge ne nda ge ame hateya mage ne fare ge hate num ma pagal. 20Zeso gwan ge ne janna go: Mbi ka jan fare ma zum ge nda ta peɗ. Mbi ka hon hateya ge zok kee kaɗeya ge Yahuɗ ma way mage zok ge Dok ne zì ɗaɗag, sok ge Yahuɗ ma peɗ kwate no ne go. Mbi be jan a̰me ge wayya zì ɗu to. 21Mo ele mbi fare daa to, mo ele fare daa vare zoo num ge ka za̰a̰ mbi ma, ge fare ge mbi ka jan num ma pagal. Àa kuwa fare ge mbi ka jan num mbe ma kuwa hetel. 22Sok ge jin̰a go mbe ɗe, ndu ge koy zok ge Dok ne wa a̰me ɗu ge mḛḛ sok mbe go, kale yaa Zeso tɔgwa pul zì teleɗ, jan go: A fare ge mo gwan ga̰a̰l ge nda ge kee tuwaleya ma way ge waɗe ne janna ne no de? 23Zeso gwan ge ne janna go: Kaɗɗa mbi be jan fare kwaɗa to, ngay fare ge n̰aal ge mbi jin̰a ne mbe gale. Ɗaŋɗe, kaɗɗa fare ge mbi jin̰a temel, ge dape mo wa yaa mbi de? 24Sok mbe go, An teme ne mbo Kayf, ga̰a̰l ge nda ge kee tuwaleya ma way ge waɗe ta yà, tok ma vwalla zì gale.

25Ge fare mbe ma ndwa zì, Simo̰ Piyer wa ya gale mḛḛya ge na sok mbe go ɔwal ol. Nda ele ne go: Mo ɗe, mo be ɗu, ge ndu mbe nda ge ame hateya ma buwal zige ne to de? Ee na wa janna go: Bà jo̰o̰, mbi dagre ge num to. 26Ga̰a̰l ge nda ge kee tuwaleya ma way ge waɗe ndu ge tèmel a̰me ɗu kaa ge sok mbe go. A ge ndu ge Piyer daa kṵṵ ne tɔgwa sele. Ndu ge tèmel mbe ele Piyer go: Mo daa be ndu ge mbi kuwa ḛ ge Zeso ge gaaso zì ya ne to de? 27Ɗaŋɗe, Piyer gwan ee na wa iya. Sok mbe go gaw, baare tol fiyaso.

Zeso ge goformo̰ Pilaɗ ndwa se

Mat 27.1-2, 11-30; Mrk 15.1-9; Luk 23.1-25

28Guwa̰, Yahuɗ ma ga̰a̰l ma wan Zeso ge Kayf diŋ mbo ge goformo̰ ge Rom ma way sok kun sariya zì yà. Sok ge àa dee yà, sok gale wa ya aaram vḛḛ. Ɗaŋɗe, ga̰a̰l mbe ma be waɗ sok mbe zì yà to, ge dape, maa mà kee ge haɗ ta seŋre be zam kaŋ zam ge vḛḛso ge Paska ne. 29A ge pe, goformo̰ Pilaɗ wuwa ya num ta zum no, ele num no go: Ḛ see ma̰ fare ge sone ge ndu mbe no ta de? 30Àa gwan ge ne janna go: Daa no go i see fare ge sone ge ne ta to no, i daa mà gene ne ya mo ndwa se de. 31Pilaɗ jan num go: Ḛ sḛ ma wa̰a̰ ne, ḛ kun ne sariya ge ḛ eeya ma pagal. Yahuɗ ma ga̰a̰l ma gwan ge ne janna go: Ḛ nda ge Rom ma be hon i vin̰a go i kṵṵ sariya swày ge ndu pagal to. 32A go mbe no, fare ge Zeso jin̰a wa mbo mbo huyya no, ndwa ngayya go ne seɗ swày mà pe gyana de. 33Sok mbe go, Pilaɗ gwan na sok kun sariya zì yà, hoɗ asagar ma na wa go, num gene na Zeso ya. Sok ge àa gene ne ya, ele ne go: Mo gan ga̰a̰l ge Yahuɗ ma way ne de? 34Zeso gwan ge ne janna go: A mo sḛ duwa fare mbe ne jan mbi koo ndu a̰me jin̰a mo ne jan de? 35Pilaɗ gwan ge ne janna go: Mbi be Yahuɗ ne to, mo pe rusu mage ga̰a̰l ge nda ge kee tuwaleya ma way ma ɓin̰a mo ya ne mbi tok go. Mo kee ma̰ kaŋ de? 36Zeso gwan ge ne janna go: Mbi muluk be ge dunin̰a nee ne to. Daa na mbe go, mbi nda ge tèmel ma daa mà iyal kyarga ndwa teleya go, àa ɓin̰a mbi ge Yahuɗ ma ga̰a̰l ma tok go to. Ɗaŋɗe, mbi dwage ḛ go mbi muluk be muluk ge go go ne to. 37Pilaɗ ele ne go: Mo gan ga̰a̰l ne ɗaŋ de? Zeso gwan ge ne janna go: A mo jan nee ne no: Mbi gan ga̰a̰l ne. Mbi too ya se mage mbo ya ge dunin̰a zì ndwa kee sayda ge fare ge fareba pagal. Ndu ge go na ge fareba nee ne, za̰a̰ mbi za̰a̰. 38Pilaɗ ele Zeso go: Fareba pe wanna gyana de? Pilaɗ gwan waɗ-ɗa zum Yahuɗ ma ta, jan num go: Kaɗɗa ge mbi, mbi be seɗ fare a̰me ɗu ne ta, ndwa kun sariya ne pagal to.

Pilaɗ kun sariya swày ge Zeso pagal

39Ɗaŋɗe, ge mojo̰o̰ hada ge ḛ ḛ ee keeya go, del tatab ge vḛḛso ge Paska ne go, ago mbi doo ḛ ndu ge daŋay a̰me zum ɗu. Ḛ ɓyare go mbi doo ḛ zum gan ga̰a̰l ge Yahuɗ ma way de? 40Ge sok mbe go, àa ɗege oyya go: Be ne to, ɗaŋɗe, Barabas. Zane no, Barabas kaa ndu ge fiiri vin̰a ne.

বর্তমানে নির্বাচিত:

Yohana 18: kiaGRB

হাইলাইট

কপি