ലൂക്കോസു 18
18
ഒന്റു മ്‌ണ്ടേസിമ് ഒന്റു നായഗാറാന്‌മ്
1അദ്‌ക്ക് പ്‌റ സോറ്റു പോഗാദെ പരേസുഡൊ എന്നുവാദ്‌ന പറ്റി പഡിസ്യ ഏസ്സ് തന്ന് സൊല്ലുപഡി നഡാക്ക്‌ന്റവാര്‌ക്ക് ഒന്റു കദെ സൊന്നാന്: 2<<ഒന്റു പട്ടണാത്ത്‌ല് സാമിന അഞ്ചത്തവാന്‌മ് ആള്‌ഗാള് തനാന പറ്റി എന്ത് സൊന്റാരെന്റ് നെനേക്കാദേമ് ഇര്‌ക്കുവ ഒന്റു നായഗാറാന് ഇന്താന്. 3അയി പട്ടണാത്ത്‌ല് ഒന്റു മ്‌ണ്ടേസിമ് ഇന്താള്. അവാള് എ്ഡെക്കെ്ഡേക്ക് അയി നായഗാറാന് പട്ട്‌ക്ക് ബന്ത്: <തനാന കൊഡിമെപഡ്‌സ്‌ന്റവാനോഡ നായനൊഡിന്ത് മുഡിവു മാഡി കയിതാങ്കുഡോമെ> എന്റ് സൊന്നാള്.
4അത്തെ ഗേന്ത് കൊഡുക്ക്യ അയാള്‌ക്ക് എഞ്ചോ നാള് മനേസ്സില്ലാദിന്ത്‌ദ്. പ്‌റ അയാള്: <എനാക്ക് സാമിന അഞ്ചിക്കില്ലെ, ആള്‌ഗാള് എനാന പറ്റി എന്ത് സൊന്റാരെന്റ് നാന് നെനേക്കുവാദ്‌മില്ലെ. 5എന്റാല്‌മ് ഈ മ്‌ണ്ടേസി എനാന നച്ചിരിപഡുസുവാദ്‌നാലെ നാന് അവാള്‌ക്ക് ബേ്ണ്ടി നായനൊഡിന്ത് മുഡിവു മാഡി കൊഡുക്കുവെ. അത്തെ മുഡിവു മാഡി കൊഡുക്കാദെ പോന അവാള് പിന്നേമ് ബന്ത് എനാന നച്ചിരിപഡുസുവ> എന്റ് മനേസ്സ്‌ല് നെനേത്താന്.>>
6പ്‌റ ആണ്ടവാന് ഇത്തെ സൊന്നാന്: <<ഈ നേര്‌മെഗാറാനല്ലാത്ത നായഗാറാന് സൊന്നാദ്‌ന കേ്ള്‌ന്. 7അത്ത്യാന ഉദാവിക്ക് ബേ്ണ്ടി റാവുപഗാല് തനാന നെനേത്ത് കേ്യിവ താന് തെരിന്തെ്ഡ്‌ത്തിര്‌ക്കുവ ആള്‌ഗാള്‌ക്ക് ബേ്ണ്ടി സാമി നായനൊഡിന്ത് സട്ടന മുഡിവു മാഡി കൊഡുക്കമാട്ടാന? 8സാമി ബേഗ അവാര്‌ക്ക് ബേ്ണ്ടി നായനൊഡിന്ത് മുഡിവു മാഡി കൊഡുക്കുവാന്. എന്റാല്‌മ് മന്‌സാനായി പ്‌റാന്തവാന് ബര്‌ഗാട്ടി ബൂമില് തനാന നമ്പിര്‌ക്ക്‌ന്റവാര്‌ന കണ്ട്‌പ്‌ഡിക്ക്യ മുഡിമ?>>
കന്ത്യ കെ്ട്ടുവ കാസ് പിരിക്ക്‌ന്റവാന്‌ത്ത്‌മ് പരിസാന്‌ത്ത്‌മ് കദെ
9തമ്മ നേര്‌മെഗാറാര് എന്റ് പെരിമെപട്ട് അഡ്‌ത്തവാര്‌ന നാണഗെ്ഡ്‌സുവ ലേസ ആള്‌ഗാള്‌ക്ക് ഏസ്സ് ഒന്റു കദെ സൊന്നാന്: 10<<റാഡാള് പരേസ്യ സാമിബീ്ഡ്‌ക്ക് പോനാര്. അദ്‌ല് ഒരുത്താന് കന്ത്യ കെ്ട്ടുവ കാസ് പിരിക്ക്‌ന്റവാന്‌മ് ഒരുത്താന് പരിസാന്‌മ് ആയിന്താന്. 11പരിസാന് അലാക്ക നിന്റ് കൊണ്ടു ഇത്തെ പരേസ്‌നാന്: <ദെയിവമേ, നാന് പ്‌ഡിങ്കിപറ്‌ത്ത് എ്ഡ്‌ക്ക്‌ന്റവാര്‌ന പാസേഗൊ, കേ്ഡ്‌ഗെ്ട്ടവാര്‌ന പാസേഗൊ, ബേസ്യാഡ്‌ന്റവാര്‌ന പാസേഗൊ, ഈ കന്ത്യ കെ്ട്ടുവ കാസ് പിരിക്ക്‌ന്റവാന്‌ന പാസേഗൊ അല്ലത്താദ്‌നാലെ നാന് നിനാക്ക് നണ്ണി സൊന്റെ. 12ഒന്റു ബാരാത്ത്‌ല് റാഡ് ജമ്പ് നാന് തീനി തിന്നാത്ത പരേസ പരേസ്‌ന്റെ, എനാക്ക് കെ്ഡേക്കുവ എല്ലാ സൊത്തുലിന്ത്‌മ് പത്ത്‌ല് ഒന്റു ബാഗന നിനാക്ക് തന്റെ> എന്റ് പരേസ്‌നാന്.
13ആന കന്ത്യ കെ്ട്ടുവ കാസ് പിരിക്ക്‌ന്റവാന് ദൂരാത്ത്‌ലിന്ത് കൊണ്ടു മേലോഗന നോഡ്യ ഗുഡി നെനേക്കാദെ ദുക്കപട്ട് കൊണ്ടു: <ദെയിവമേ, പാവ ഗേന്ത് നഡാക്കുവ എനാന നീ ഗവപഡുഡോമെ> എന്റ് സൊന്നാന്. 14നാന് നിമാക്ക് ഒറേപ്പായി സൊന്റെ, കന്ത്യ കെ്ട്ടുവ കാസ് പിരിക്ക്‌ന്റവാന് സാമി കണ്ണ്‌ക്ക് നേര്‌മെഗാറാനായി ബീ്ഡ്‌ക്ക് പോനാന്. പരിസാന് അത്ത്യല്ല. തനാന താനെ ദൊഡ്ഡവാന് മാഡ്‌ന്റവാന്‌ന സാമി സ്‌ന്നവാന് മാഡുവാന്. തനാന താനെ സ്‌ന്നവാന് മാഡ്‌ന്റവാന്‌ന സാമി ദൊഡ്ഡവാന് മാഡുവാന്.>>
ഏസ്സ് സ്‌ന്ന മക്കാള്‌ഗാള്‌ക്ക് ബാക്ക്‌വര കൊഡുക്കുന്റാന്
15ലേസ ആള്‌ഗാള് തമ്മ് മക്കാള്‌ഗാള്‌ന കയി ബെത്ത് പരേസി ബ്‌ഡ്യ ഏസ്സ് പട്ട്‌ക്ക് എ്ഡ്‌ത്ത് ബന്താര്. സൊല്ലുപഡി നഡാക്ക്‌ന്റവാര് അദ്‌ന കണ്ട് അവാര്‌ന നൊഡിന്താര്. 16ആന ഏസ്സ് മക്കാള്‌ഗാള്‌ന അര്‌ഗെ ബര്യ ബ്‌ളിത്ത് തന്ന് സൊല്ലുപഡി നഡാക്ക്‌ന്റവാര്‌ക്ക്: <<മക്കാള്‌ഗാള്‌ന എന്ന് പട്ട്‌ക്ക് എ്ഡ്‌ത്ത് ബര്യ ബ്‌ഡ്‌ന്, അവാര്‌ന തഡ്‌ക്കാദേന്, എന്ത്‌ക്കെന്റ് സൊന്ന ഇവാര്‌ന പാസെ ഇര്‌ക്ക്‌ന്റവാര്‌നാത്തെ സാമി ആളുവാദ്. 17സാമി ആളുവാദ്‌ന ഒന്റു പ്‌ള്ളെ എത്തെ തങ്കാരിക്ക്‌ന്റോ അദേപാസെ തങ്കാരിക്കുഡൊ. അല്ലത്തവാന് ആര്‌മ് സാമി ആളുവാദ്‌ന കാണമാട്ട്‌റ് എന്റ് നാന് സത്ത്യമായിമ് നിമാക്ക് സൊന്റെ>> എന്റ് സൊന്നാന്.
പണഗാറാന് ആയിര്‌ക്കുവ എഗുദാര് തലെവാന്
18ഒന്റു എഗുദാര് തലെവാന്: <<നല്ലവാനായിര്‌ക്കുവ ഗുരുവെ, എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന കെ്ഡേസ്യ നാന് എന്ത് ഗേയ?>> എന്റ് കേ്ട്ടാന്.
19അദുക്കുള ഏസ്സ് അയാള്‌ക്ക്: <<നീ എന്ത്‌ക്ക് എനാന നല്ലവാന് എന്റ് സൊന്നാദ്? ആര്‌മ് നല്ലവാരല്ല, സാമി താനെത്തെ നല്ലവാന്. 20<ബേസ്യാഡ ബേ്ഡ, കൊലെഗേഗ ബേ്ഡ, ത്‌റ്‌ഡ ബേ്ഡ, കുറ്റഗാറാര് അല്ലത്തവാര്‌ന കുറ്റഗാറാര് എന്റ് സൊല്ല ബേ്ഡ, അവ്വ്യപ്പാന്‌ന മദ്‌സുഡൊ>#പയണ 20:12; മറിസി സൊല്ലുവ സട്ട 5:16–20 എന്റ് ബെത്ത്‌റ്‌ക്കുവ സട്ടഗാള്‌നെല്ല നിനാക്ക് തെരിമല്ല>> എന്റ് സൊന്നാന്.
21അദുക്കുള എഗുദാര് തലെവാന്: <<ഗുരുവെ, ഈ സട്ടഗാളെല്ല നാന് സ്‌റ്‌പ്പാത്ത്‌ലിന്തേ ഗേന്ത് ബന്റെ>> എന്റ് സൊന്നാന്.
22അദ്‌ന കേ്ട്ട് ഏസ്സ്: <<നിനാക്ക് ഇന്നി ഒന്റു കൊറേവു ഗുഡി ഇര്‌ക്ക്‌ന്റ്, നിനാക്ക് ഇര്‌ക്കുവാദ്‌ന ഒട്ടുക്കു ബിറ്റ്, പണാന ഒന്റുമില്ലാത്തവാര്‌ക്ക് ദാന ഗേഡൊ. അന്നാപ്പ് മേലോഗാത്ത്‌ല് നിനാക്ക് സൊത്തു കെ്ഡേക്കുവു. പ്‌റ എന്ന് പിന്ന്‌ക്ക് ബാ>> എന്റ് സൊന്നാന്.
23അയാളൊന്റു ദൊഡ്ഡ പണഗാറാന് ആയിന്താദ്‌നാലെ ഇദ്‌ന കേ്ട്ട് അപ്പാര ദുക്കപട്ടാന്. 24അയാള് ദുക്കപട്ടാദ്‌ന കണ്ട് ഏസ്സ്: <<സാമി ആളുവാദ്‌ക്ക് കെ്ട്ട്‌പട്ട് ഇര്‌ക്കുഡൊ എന്നുവാദ് പണഗാറാര്‌ക്ക് സെറ്റെ കഡ്‌പ്പാത്തെ. 25ഒന്റു പണഗാറാന് സാമി ആളുവാദ്‌ക്ക് കെ്ട്ട്‌പട്ട് ഇര്‌ക്കുഡൊ എന്നുവാദ് സെറ്റെ കഡ്‌പ്പാത്തെ. അദ്‌ന ബ്‌ഡ സൂഞ്ചി ഓട്ടെ മേലെ ഒന്റു ഒട്ടഗ നൊഗേവാദ് എത്ത്‌റാഗോ എ്ള്‌പ്പ>> എന്റ് സൊന്നാന്.
26ഇദ്‌ന കേ്ട്ടിന്തവാര്: <<അത്ത്യാന ആര്‌ക്ക് തപ്പിസി കഡാക്ക്യ മുഡിമ്?>> എന്റ് ഏസ്സ്‌ന കേ്ട്ടാര്.
27ആന ഏസ്സ്: <<മന്‌സാന്‌ക്ക് ഗേയ മുഡ്യാത്ത കാര്യ സാമിക്ക് ഗേയ മുഡിമ്>> എന്റ് സൊന്നാന്.
28അദുക്കുള പത്ത്‌റോസു: <<നോഡു, എമ്മ എല്ലാദ്‌നാമ് ബ്‌ട്ട്‌തള്ളി നിന്ന് പിന്ന്‌മേലെ ബന്ത്‌റ്‌ന്റേമ്>> എന്റ് സൊന്നാന്.
29-30അദുക്കുള ഏസ്സ് അവാര്‌ക്ക്: <<നാന് സത്ത്യമായി നിമാക്ക് സൊന്റെ, സാമി ആള്യ ബേ്ണ്ടി തന്ന് ബീ്ഡ്‌നാഗോ, പെ്ണ്ട്‌നാഗോ, അണ്ണാര്‌തമ്പ്യാര്‌നാഗോ, അവ്വ്യപ്പാന്‌നാഗോ, മക്കാള്‌നാഗൊ ബ്‌ട്ട്‌തള്ള്‌നവാര്‌ക്ക് ഇദ്‌ഗാളെല്ല ഈ ഉലഗാത്ത്‌ല് അളാവുക്കു മീ്റി കെ്ഡേക്ക്‌മ്. അദ്‌താനേമല്ല ഇന്നി ബരുവ ഉലഗാത്ത്‌ല് അവാര്‌ക്ക് എന്നാല്‌ക്ക്‌മ് ഇര്‌ക്കുവ പെ്ളേപ്പ്‌മ് കെ്ഡേക്ക്‌മ്>> എന്റ് സൊന്നാന്.
ഏസ്സ് താന് സാവാദ്‌ന പറ്റി മൂറാവാദ്‌മ് സൊന്റാന്
31പ്‌റ ഏസ്സ് തന്ന് സൊല്ലുപഡി നഡാക്കുവ പന്നന്റാള്‌ഗാള്‌നാമ് കൂട്ടി പോയി അവാര്‌ക്ക്: <<ഇദാ, നമ്മ എര്‌സലേമ്‌ക്ക് പോന്റാമ്, മന്‌സാനായി പ്‌റാന്തവാന്‌ന പറ്റി സാമിദാസ്‌ഗാള് എ്ള്‌ദിര്‌ക്കുവാദെല്ല നഡാക്ക്‌മ്. 32എഗുദാര് അയാള്‌ന എഗുദാരല്ലാത്ത ജാദിഗാള് കയിക്ക് ബ്‌ട്ട് കൊഡുക്കുവാര്. അവാര് അയാള്‌ന ഏസ്സികാട്ടിമ് നാണഗെ്ഡിസിമ് മോന്തേക്ക് തുപ്പിമ്, 33അവാര് അയാള്‌ന സാട്ടെവാര്‌ല് അഡിത്ത്‌മ് ഗേന്ത പ്‌റ കൊല്ലുവാര്. ആന അയാള് മൂറാവാദ് നാള് ഉജുര്‌ളാഗുവാന്>> എന്റ് സൊന്നാന്.
34ആന ഏസ്സ് സൊല്ലുപഡി നഡാക്ക്‌ന്റവാര്‌ക്ക് ഈ കാര്യഗാള് ഒന്റുമു നെപ്പ് കെ്ഡേക്കാലെ. എന്ത്‌ക്കെന്റ് സൊന്ന ഏസ്സ് സൊന്ന കാര്യഗാള്‌ക്കിര്‌ക്കുവ അര്‌ത്തന മറേത്ത് ബെത്തിന്താന്. അയാള് എന്ത്‌ന പറ്റി സൊന്റാനെന്റ് അവാര്‌ക്ക് തെര്യാലെ.
പിച്ചെ്ഡ്‌ക്കുവ ഒന്റു കുറുഡാന്‌ന ഏസ്സ് തെ്ള്‌സ്‌ന്റാന്
35ഏസ്സ് എരിഗോവു പട്ടണാക്കര്‌ഗെ എജ്ജ്‌ഗാട്ടി പിച്ചെ്ഡ്‌ത്ത് കൊണ്ടു ഒന്റു കുറുഡാന് ബട്ട്യോരാത്ത്‌ല് കുക്കാന്തിന്താന്. 36ആള്‌കൂട്ട പോവ ജദ്ദന കേ്ട്ട്: <<എന്ത് നഡാക്ക്‌ന്റ്>> എന്റ് അയി കുറുഡാന് കേ്ട്ടാന്. 37<<നസറേത്ത്‌ഗാറാന് ഏസ്സ് ബന്ത് പോന്റാന്>> എന്റ് ആള്‌ഗാള് അയാള്‌ക്ക് സൊന്നാര്.
38അദുക്കുള അയി കുറുഡാന്: <<ഏസ്സേ, ദാവീദ് കാല്‌ക്ക് പട്ടവാനെ, എനാന ഗവപഡുഡോമെ>> എന്റ് ദൊഡ്ഡാദ്‌ക്ക് ബ്‌ളിത്ത് അഗാറ്‌നാന്.
39കൂട്ടാത്ത്‌ല് പോന്റവാര് അയി കുറുഡാന്‌ന <<സപ്പെന്റിര്>> എന്റ് സൊല്ലി നൊഡിന്താര്. ആന അയി കുറുഡാന്: <<ഏസ്സേ, ദാവീദ് കാല്‌ക്ക് പട്ടവാനെ, എനാന ഗവപഡുഡോമെ>> എന്റ് സേത്തി സേത്തി ആലാത്താന്.
40ഏസ്സ് അദ്‌ല് നിന്റ്: <<അയി കുറുഡാന്‌ന തന്ന് പട്ട്‌ക്ക് എ്ഡ്‌ത്ത് പോയ>> സൊന്നാന്. അയി കുറുഡാന് അര്‌ഗെ ബന്ത പ്‌റ ഏസ്സ് അയാള്‌ന: 41<<നാന് നിനാക്ക് എന്ത് ഗേന്ത് തരുഡൊ എന്റ് നീ ആസെപഡ്‌ന്റായി?>> എന്റ് കേ്ട്ടാന്.
<<ആണ്ടവാനെ, എനാക്ക് കണ്ണ് കാട്ടുഡൊ>> എന്റ് അയി കുറുഡാന് സൊന്നാന്.
42ഏസ്സ് അയി കുറുഡാന്‌ക്ക്: <<നിനാക്ക് കണ്ണ് കാട്ടുഡൊ, നിന്ന് നമ്പിക്കെ നിനാന തെ്ളിസിര്‌ക്ക്‌ന്റ്>> എന്റ് സൊന്നാന്. 43അന്നാല് താനെ അയാള്‌ക്ക് കണ്ണ് കാട്ട്‌റ്റ്. അയാള് സാമിത്തെ ദൊഡ്ഡവാന് എന്റ് സൊല്ലി ഏസ്സ് പിന്ന്‌മേലെ പോനാന്. ഈ നഡാന്ത കാര്യന കണ്ട എല്ലാ ആള്‌ഗാള് <<സാമിത്തെ ദൊഡ്ഡവാന്>> എന്റ് സൊന്നാര്.
বর্তমানে নির্বাচিত:
ലൂക്കോസു 18: സാമി സേദി
হাইলাইট
শেয়ার
কপি
Want to have your highlights saved across all your devices? Sign up or sign in
New Life Computer Institute
