ഓഗന്നാന് 7
7
ഏസ്സ് ഗുഡുസുലു കെ്ട്ടി ഗേവ നോമ്പിക്ക് പോന്റാന്
1അദ്‌ക്ക് പ്‌റ ഏസ്സ് ഗലീല നാഡ്‌മേലെ സുറ്റി നഡാന്താന്, എഗുദാര് അയാള്‌ന കൊല്ല്യ പരാന്താദ്‌നാലെ എഗുദ നാഡ്‌മേലെ സുറ്റി നഡാക്ക്യ മനേസ്സില്ലാദിന്ത്‌ദ്. 2അദുക്കുള എഗുദാര് ഗുഡുസുലു മാഡി ഗേവ നോമ്പിമ് അഡ്‌ത്തിന്ത്‌ദ്. 3അദ്‌നാലെ ഏസ്സ് തമ്പ്യാമ് ഏസ്സ്‌ക്ക്: <<നീ ഗേവ കാര്യഗാള്‌ന നിന്ന് സൊല്ലുപഡി നഡാക്ക്‌ന്റവാര്‌മ് കാണ്യ ബേ്ണ്ടി ഇദ്‌ലിന്ത് എഗുദ നാഡ്‌ക്ക് പൊ. 4പേര് കെ്ഡേസ്യ ആസെപഡ്‌ന്റവാര് ആര്‌മ് സൂഗാന ഒന്റുമു ഗേവാദില്ല്യല്ല. നീ ഈ കാര്യഗാള്‌ന ഗേവദാന നീ ആരെന്നുവാദ്‌ന ഉലഗാത്ത്‌ല ആള്‌ഗാള്‌ക്ക് കാട്ടി കൊഡു>> എന്റ് സൊന്നാര്. 5എന്ത്‌ക്കെന്റ് സൊന്ന അയാള് തമ്പ്യാമ് ഗുഡി അയാള്‌ല് നമ്പിക്കെ ബെക്കാലെ.
6അദ്‌ക്ക് ഏസ്സ് അവാര്‌ക്ക്: <<എനാക്ക് ഒത്ത നേര ഇന്നിമ് ബരാലെ. ആന നിമാക്കൊ ഏദ് ഗളിഗേക്ക് ബേ്ഡ്‌മാനാല് കാര്യഗാള് ഗേല. 7ഉലഗാത്ത്‌ല ആള്‌ഗാള്‌ക്ക് നിമാന തൊറേയ മുഡ്യാമാട്ട. ആന അവാര് ഗേവ കാര്യഗാള് കെ്ട്ട കാര്യഗാള് എന്റ് നാന് സൊല്ലുവാദ്‌നാലെ അവാര് എനാന തൊറേന്റാര്. 8നിമ്മ നോമ്പിക്ക് പോനു. എനാക്ക് ഒത്ത നേര ഇന്നിമ് ബരാത്താദ്‌നാലെ ഈ നോമ്പിക്ക് നാന് പോവാദില്ലെ>> എന്റ് സൊന്നാന്. 9ഇത്തെ അവാര്‌ക്ക് സൊല്ലി തള്ളി അയാള് ഗലീല നാഡ്‌ല് താനെ ഇന്താന്.
10എന്റാല്‌മ് അയാള് തമ്പ്യാമ് നോമ്പിക്ക് പോന പ്‌റ ഏസ്സ്‌മ് എദ്‌ക്ക പോഗാദെ സൂഗാന പോനാന്. 11ആന നോമ്പി ഗളിഗേല് എഗുദാര്: <<അവാന് ഏദ്‌ല്?>> എന്റ് കേ്ട്ട്‌കൊണ്ടു അയാള്‌ന പരാന്താര്.
12ആള് കൂട്ടാത്ത്‌ല് ഏസ്സ്‌ന പറ്റി ഇത്തെ മൊത്തനാക്ക് പജിക്കിപജിക്കി സൊല്ല്യ പ്‌ഡിത്താര്: <<അയാള് നല്ലവാന്>> എന്റ് ലേസ ആള്‌ഗാള്‌മ് <<അല്ല, അയാള് ആള്‌ഗാള്‌ന ബഞ്ചിക്ക്‌ന്റാന്>> എന്റ് ബേ്റെ ലേസ ആള്‌ഗാള്‌മ് സൊന്നാര്. 13ആന എഗുദാര്‌ക്ക് അഞ്ചി ആള്‌ഗാള് കേ്ള്‌ക്കുവ പാസെ ആര്‌മ് അയാള്‌ന പറ്റി നായനൊഡ്യാലെ.
നോമ്പി ഗളിഗേല് ഏസ്സ് പഡ്‌സ്‌ന്റാന്
14നോമ്പി പാദി ആഗാട്ട്യെല്ല ഏസ്സ് സാമിബീ്ഡ്‌ക്ക് പോയി പഡിസ്യ പ്‌ഡിത്താന്. 15<<പഡിപ്പില്ലാത്ത ഇയാള്‌ക്ക് ഇത്ത്‌റ അറുവു ഏദ്‌ലിന്ത് കെ്ഡേത്ത്‌ദ്?>> എന്റ് സൊല്ലി എഗുദാര് അദിസ്യപട്ടാര്.
16അദുക്കുള ഏസ്സ് അവാര്‌ക്ക് ഇത്തെ ബദ്‌ല് സൊന്നാന്: <<നാന് പഡുസുവ ബുദ്ദിനായ എന്ന് നായല്ല, എനാന സൊല്ലി ബ്‌ട്ടവാന് പഡിസ്യ സൊന്ന ബുദ്ദിനായത്തെ. 17സാമി പിര്യപഡുവാദ്‌ന ഗേയ ആസെപഡ്‌ന്റവാന് ഈ ബുദ്ദിനായ സാമിലിന്ത് ബരുവാദൊ ഇല്ലെ നാനാഗ സൊല്ലുവാദൊ എന്റ് നെപ്പ്‌കെ്ഡേസുവാന്. 18അവനവാന് അദിഗരാത്ത്‌ല് നായ സൊന്റവാന് തനാക്ക് പേര്‌പെരിമെ കെ്ഡേസ്യ നോഡുന്റാന്. ആന തനാന സൊല്ലി ബ്‌ട്ടവാന്‌ക്ക് പേര്‌പെരിമെ കെ്ഡേക്കുഡൊ എന്റ് നോഡുന്റവാന് സത്ത്യമുള്ളവാന്‌ത്തെ. അയാള് കള്ളകവാഡ് ഇല്ലത്തവാന്‌ത്തെ. 19മോസെ നിമാക്ക് സാമി ബെത്ത സട്ടാന തന്ത്‌റ്‌ക്ക്‌ന്റാനല്ല? എന്റാല്‌മ് നിമ്മ് കൂട്ടാത്ത്‌ല് ആര്‌മ് അയി സട്ടപഡി നഡാക്കുവാദില്ലെ. പിന്നെന്ത്‌ക്ക് നിമ്മ എനാന കൊല്ല്യ നോഡുവാദ്?>>
20അദുക്കുള ആള്‌ഗാള്: <<അന്നാപ്പ് നിനാക്ക് കെ്ട്ടജാദി തട്ടിര്‌ക്ക്‌ന്റ്. നിനാന ആര് കൊല്ല്യ നോഡുന്റാര്?>> എന്റ് സൊന്നാര്.
21അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<നാന് ഒന്റു അദിസ്യ ഗേന്തെ. അദ്‌ന കണ്ട് നിമ്മൊട്ടുക്കു അദിസ്യപഡ്‌ന്റ്‌റ്. 22മോസെ നിമാക്ക് പരിസേദനെ സാത്ത്‌റ ഗേവ സട്ട ബെത്ത് തന്താദ്‌നാലെ നിമ്മ ഒയിവു നാള്‌ല് ഒന്റു മഗാന പരിസേദനെ സാത്ത്‌റ ഗേന്റ്‌റ്. [ആന ഇദ് ഗേയ പ്‌ഡിത്താദ് മോസെ ഇന്ത കാലാത്ത്‌ലല്ല, പാട്ടനാമ് കാലാത്ത്‌ല് താനെത്തെ.] 23മോസെ ബെത്ത സാമി സട്ടാന നഡാത്ത്യ ബേ്ണ്ടി ഒയിവു നാള്‌മ് ഒന്റു മഗാന പരിസേദനെ സാത്ത്‌റ ഗേന്റ്‌റ്. അത്ത്യാന ഒന്റു മന്‌സാന്‌ന നാന് ഒയിവു നാള് ഒന്റേപെ്ട്ട് തെ്ള്‌സ്‌നാദ്‌നാലെ നിമ്മ എന്ത്‌ക്ക് എനാന മൊനേക്ക് തെ്ട്ട്‌ന്റ്‌റ്? 24കണ്ണ്‌ക്ക് കാണുവ പാസെ നിമ്മ ബിദിക്കാദേന്. നേര് എന്തെന്റ് തെരിന്ത പ്‌റ ബിദിന്.>>
ഇയാള് ക്‌റ്‌സ്‌ത്ത്‌ത്തേഗ?
25അദുക്കുള എര്‌സലേമ്‌ല് ഇര്‌ക്ക്‌ന്റവാര്‌ല് ലേസ ആള്‌ഗാള്: <<അവാര് കൊല്ല്യ പരാക്കുവാദ് ഇയാള്‌നത്ത്യല്ല? 26ആന ഇദാ നോഡെ, അയാള് എദ്‌ക്കാത്തെ നായ സൊന്റാന്. എന്റിന്ത് ഗുഡി അവാര് അയാളോഡ ഒന്റുമു സൊല്ലുവാദില്ലെ. ഇയാള് ക്‌റ്‌സ്‌ത്ത്‌ത്തെ എന്റിന്നി സെരിക്ക്‌മ് അദിഗാരിഗാള്‌ക്ക് തെരിന്ത്‌ദൊ? 27എന്റാല്‌മ് ഇയാള് ഏദ്‌ലിന്ത് ബന്താനെന്റ് നമാക്ക് തെരിമ്. ആന ക്‌റ്‌സ്‌ത്ത് ബര്‌ഗാട്ടി അയാള് ഏദ്‌ലിന്ത് ബന്റാനെന്റ് ആര്‌ക്ക്‌മ് തെര്യാമാട്ട>> എന്റ് സൊന്നാര്.
28അദ്‌നാലെ ഏസ്സ് എഗുദാര് പരേസുവ ബീ്ഡ്‌ല് പഡിസികൊണ്ടു ഇര്‌ക്കാട്ടി, <<നിമാക്ക് എനാന തെരിമ്. നാന് ഏദ്‌ലിന്ത് ബന്തേനെന്റ്‌മ് നിമാക്ക് തെരിമ്. നാന് എന്ന് അദിഗരാത്ത്‌ല് ബന്താദല്ല. ആന എനാന സൊല്ലി ബ്‌ട്ടാദ് സത്ത്യമുള്ളവാന്‌ത്തെ. അയാള്‌ന നിമാക്ക് തെരിവാദില്ലെ. 29ആന നാന് അയാള് പട്ട്‌ലിന്ത് ബന്താദ്‌നാലേമ് എനാന അയാള് സൊല്ലി ബ്‌ട്ടാദ്‌നാലേമ് എനാക്ക് അയാള്‌ന തെരിമ്>> എന്റ് ദൊഡ്ഡാദ്‌ക്ക് സൊന്നാന്.
30അദുക്കുള ആള്‌ഗാള് ഏസ്സ്‌ന പ്‌ഡിക്ക്യ ഓരാഡ്‌നാര്. ആന അയാള്‌ക്കുള്ള നേര ബരാദിന്താദ്‌നാലെ ആര്‌മ് അയാള്‌ന അണ്ണാലെ. 31എന്റാല്‌മ് ആള്‌ഗാള്‌ല് എഞ്ചോ ആള്‌ഗാള് ഏസ്സ്‌ന നമ്പ്‌നാര്. <<ക്‌റ്‌സ്‌ത്ത് ബര്‌ഗാട്ടി ഇയാള് ഗേന്താദ്‌ന ബ്‌ഡ മൊത്തന അദിസ്യമാന അഡ്യാളഗാള് അയാള് ഗേവാന?>> എന്റ് അവാര് സൊന്നാര്.
കാവ കാക്കുവ പട്ടളഗാറാര് ഏസ്സ്‌ന പ്‌ഡിക്ക്യ ഓരാഡ്‌ന്റാര്
32ആള്‌ഗാള് ഏസ്സ്‌ന പറ്റി ഇത്തെ ആങ്കീങ്ക് പജിക്കിപജിക്കി സൊല്ലുവാദ്‌ന പരിസാര് കേ്ട്ടാര്. അദ്‌നാലെ ഏസ്സ്‌ന പ്‌ഡിക്ക്യ എഗുദാര് പൂസാരി തലെവാര്‌ഗാള്‌മ് പരിസാര്‌ഗാള്‌മ് കാവ കാക്കുവ പട്ടളഗാറാര്‌ന സൊല്ലി ബ്‌ട്ടാര്.
33അദുക്കുള ഏസ്സ്: <<നാന് ഇന്നി സെറ്റെ നേരത്തെ നിമ്മോഡ ഇര്‌ക്ക്‌ന്റെ. പ്‌റ എനാന സൊല്ലി ബ്‌ട്ട അപ്പാന് പട്ട്‌ക്ക് നാന് പോന്റേന്. 34നിമ്മ എനാന പരാക്കുവുറു. ആന നിമ്മ എനാന കാണമാട്ട്‌റ്. നാന് ഇര്‌ക്കുവ പട്ട്‌ക്ക് നിമാക്ക് ബര്യ മുഡ്യാമ്‌മാട്ട>> എന്റ് സൊന്നാന്.
35അദുക്കുള എഗുദാര്: <<നമ്മ കാണാദിര്‌ക്ക്യ ബേ്ണ്ടി ഏദെ്ഡേക്ക് ഇയാള് പോയ നെനേക്ക്‌ന്റാന്? എവനഗാറാര് പട്ട്‌ല് ജില്ലമ്പുല്ലാത്ത് ആയിര്‌ക്കുവ നമ്മ് ആള്‌ഗാള് പട്ട്‌ക്ക് പോയി എവനഗാറാര്‌ന പഡിസ്യാത്തെ നെനേക്ക്‌ന്റാനൊ? 36<നിമ്മ എനാന പരാക്കുവുറു. ആന നിമ്മ എനാന കാണമാട്ട്‌റ്. നാന് ഇര്‌ക്കുവ പട്ട്‌ക്ക് നിമാക്ക് ബര്യ മുഡ്യാമ്‌മാട്ട> എന്റ് ഇയാള് സൊന്നാദ്‌ക്ക് അര്‌ത്ത എന്ത്?>> എന്റ് അവാര് തമാക്ക് തമാക്ക് സൊന്നാര്.
ഉജുരു തരുവ നീര് പണ്ണി
37നോമ്പി തീരുവ കഡേസി നാള് ബന്ത്‌ദ്. അയി നാള്‌ത്തെ മുക്ക്യമാന നാളായിന്ത്‌ദ്. അയി നാള് ഏസ്സ് ഇ്ളാഗി നിന്റ് കൊണ്ടു: <<അറാക്കെ എ്ഡ്‌ക്ക്‌ന്റവാനെല്ല എന്ന് പട്ട്‌ക്ക് ബന്ത് കുഡിക്കുഡൊ. 38സാമി ബൊക്കുലു എ്ള്‌ദിര്‌ക്കുവ പാസെ എനാന നമ്പ്‌ന്റവാന് നെഞ്ച്‌കുളാക്കിന്ത് ഉജുരു തരുവ നീര് ഇര്‌ക്കുവ നാലിഗാള് ഒളുഗുമു>> എന്റ് ദൊഡ്ഡാദ്‌ക്ക് ആലാത്ത് സൊന്നാന്. 39തനാന നമ്പ്‌ന്റവാന്‌ക്ക് കെ്ഡേക്ക്യ പോവ സാമിനിഗാല്‌ന പറ്റിത്തെ ഏസ്സ് ഇത്തെ സൊന്നാദ്. അന്ന മാട്ട് ഏസ്സ്‌ക്ക് മദ്‌പ്പ് കെ്ഡേക്കാദിന്തനാലെ നമ്പ്‌ന്റവാര്‌ക്ക് സാമിനിഗാല് കെ്ഡേക്കാദിന്ത്‌ദ്.
ഏസ്സ്‌ന പറ്റി ആള്‌ക്കൊന്റു നായ സൊന്റാര്
40ഏസ്സ് സൊന്ന നായഗാള്‌ന കേ്ട്ട് ആള് കൂട്ടാത്ത്‌ലിന്ത ലേസ ആള്‌ഗാള്: <<ഇയാള് നേര്‌മായിമ് സാമി സൊല്ലി ബ്‌ഡ്‌വെ എന്റ് സൊന്ന അയി സാമിദാസ്‌ത്തെ?>> എന്റ് സൊന്നാര്.
41ബേ്റെ ലേസ ആള്‌ഗാള്: <<ഇയാള് ക്‌റ്‌സ്‌ത്ത്‌ത്തെ>> എന്റ് സൊന്നാര്.
ആന ലേസ ആള്‌ഗാള്: <<കണ്ടിപ്പായിമ് ക്‌റ്‌സ്‌ത്ത് ഗലീലാലിന്തല്ല ബരുവാദ്? 42ദാവീദ് കാല്‌ക്ക് പ്‌റാന്ത് ദാവീദ് പെ്ളേത്തിന്ത ബെദ്ദ്‌ലെഗേമ് എന്നുവ ഊരുലിന്ത്‌ത്തെ ക്‌റ്‌സ്‌ത്ത് ബരുവാദ് എന്റ് സാമി ബൊക്കുലു എ്ള്‌ദിര്‌ക്കുവാലെഗ?>> എന്റ് സൊന്നാര്. 43ഇത്തെ ആള്‌ഗാള് ഏസ്സ്‌ന സൊല്ലി ഒന്റൊന്റു കച്ച്യാനാര്. 44അവാര്‌ല് ലേസ ആള്‌ഗാള് ഏസ്സ്‌ന പ്‌ഡിക്കുഡൊ എന്റ് നെനേത്താര്. ആന അവാര് ആര്‌മ് അയാള്‌ന അണ്ണാലെ.
എഗുദാര് തലെവാര്‌ഗാള് ഏസ്സ്‌ന നമ്പുവാദില്ലെ
45അത്തെ കാവ കാക്കുവ പട്ടളഗാറാര് എഗുദാര് പൂസാരി തലെവാര്‌ഗാള്‌മ് പരിസാര്‌ഗാള്‌മ് പട്ട്‌ക്ക് തിരിഗി ബന്താര്. അദുക്കുള അവാര്: <<നിമ്മ എന്ത്‌ക്ക് അയാള്‌ന പ്‌ഡിത്ത് ബരാലെ>> എന്റ് അയി കാവഗാറാര്‌ന കേ്ട്ടാര്.
46അദുക്കുള അയി കാവ കാക്കുവ പട്ടളഗാറാര്: <<അയാള് നായനൊഡിവ പാസെ ഇന്നാവരിദി ആര്‌മ് നായനൊഡ്യാലെ>> എന്റ് സൊന്നാര്.
47അദുക്കുള പരിസാര്: <<നിമാനാമ് അയാള് സദിത്താന? 48നമ്മ് അദിഗാരിഗാള്‌ല് ആഡൊ പരിസാര്‌ഗാള്‌ല് ആഡൊ ആരാറ്റ അയാള്‌ന നമ്പിര്‌ന്റാര? 49ആന ഈ ആള്‌ഗാള്‌ക്ക് മോസെ ബെത്ത സാമി സട്ടാന തെര്യ. അദ്‌നാലെ അവാര് സാപ്പ പ്‌ഡിത്തവാര്‌ത്തെ>> എന്റ് സൊന്നാര്.
50ആന മുദാല് ഏസ്സ് പട്ട്‌ക്ക് പോയിന്തവാന്‌മ് അയി പരിസാര് കൂട്ടാക്ക് പട്ടിന്തവാന്‌മാന നിക്കോദിമോസു അവാര്‌ക്ക്: 51<<ഒന്റു മന്‌സാന് ഗേന്താദ് എന്തെന്റ് അയാളോഡ മുദാല് കേ്ള്‌ക്കാദേമ് അയാള് ഗേവാദ് എന്തെന്റ് തെര്യാദേമ് മോസെ നമാക്ക് ബെത്ത സാമിസട്ട അയാള്‌ന കുറ്റ ബിദിക്ക്‌ന്റ?>> എന്റ് കേ്ട്ടാന്.
52അവാര് അയാള്‌ക്ക്: <<നല്ല കാര്യത്തെ. നീയിമ് ഗലീല നാഡ്‌ലിന്ത്‌ത്തെ ബന്റവാന? സാമി സൊല്ലുസുലാക്കാന പഡിത്ത് നോഡു, ഗലീലാലിന്ത് സാമി സൊല്ലി ബ്‌ഡുവെ എന്റ് സൊന്ന അയി സാമിദാസ്#7:52 സാമിദാസ് മുദാല് എ്ള്‌ദ്‌നാദ്‌ന നോഡി എ്ള്‌ദ്‌ന പാദി കായിദാത്ത്‌ല് സാമി സൊല്ലി ബ്‌ഡുവെ എന്റ് സൊന്ന അയി സാമിദാസ് എന്റ്‌ത്തെ എ്ള്‌ദിര്‌ക്കുവാദ് ബരുവാദില്ലെന്റ് അന്നാപ്പ് നിനാക്ക് തെരിമ്>> എന്റ് സൊന്നാര്.
53 # 7:53 മുദാല് എ്ള്‌ദ്‌നാദ്‌ന നോഡി എ്ള്‌ദ്‌ന പാദി കായിദാത്ത്‌ല് 7:53 ലിന്ത് 8:11 മാട്ടുള്ള സൊല്ലുസുലാക്ക ഇല്ലെ [അത്തെ ഒന്റൊന്റാള്‌മ് അവനവാന് ബീ്ഡ്‌ക്ക് പോനാര്.
বর্তমানে নির্বাচিত:
ഓഗന്നാന് 7: സാമി സേദി
হাইলাইট
শেয়ার
কপি
Want to have your highlights saved across all your devices? Sign up or sign in
New Life Computer Institute
