ഓഗന്നാന് 18
18
ഏസ്സ്‌ന പ്‌ഡിക്ക്‌ന്റാര്
1ഇത്തെ പരേസി തീന്ത പ്‌റ തന്ന് സൊല്ലുപഡി നഡാക്ക്‌ന്റവാരോഡ ഏസ്സ് കെദ്ദുറോനു എന്റ് സൊല്ലുവ അഡിവാരാക്ക് അക്കരെ പോനാന്. അയാള്‌മ് അയാള് സൊല്ലുപഡി നഡാക്ക്‌ന്റവാര്‌മ് അദ്‌ലിന്ത ഒന്റു ദോട്ട കുളാക്ക് പോനാര്.
2തന്ന് സൊല്ലുപഡി നഡാക്ക്‌ന്റവാരോഡ ഏസ്സ് അദ്‌ക്ക് എ്ഡെക്കെ്ഡേക്ക് പോയി കൊണ്ടിന്താദ്‌നാലെ അയാള്‌ന കാട്ടി കൊഡുത്ത ജൂദാന്‌ക്ക്‌മ് അയി എ്ഡെ തെരിന്തിന്ത്‌ദ്. 3അത്തെ ജൂദാന് പട്ടളഗാറാര്‌നാമ് എഗുദാര് പൂസാരി തലെവാര്‌ഗാള്‌മ് പരിസാര്‌ഗാള്‌മ് സൊല്ലി ബ്‌ട്ട ലേസ സാമിബീ്ഡ് കാവഗാറാര്‌നാമ് കൂട്ടി ബന്താന്. അവാര് പന്ത തീഗാള്‌മ് ബ്‌ളാക്ക്‌ഗാള്‌മ് പ്‌ഡിത്ത്‌കൊണ്ടു ബാള്‌ബഡിഗാളോഡാത്തെ അദ്‌ക്ക് ബന്താദ്.
4തനാക്ക് നഡാക്ക്യ പോവാദ്‌നെല്ലെ തെരിന്തനാലെ ഏസ്സ് ബെ്ളിഗെ പോയി: <<നിമ്മ ആര്‌ന പരാക്ക്‌ന്റ്‌റ്?>> എന്റ് അവാര്‌ന കേ്ട്ടാന്.
5<<നസറേത്ത്‌ഗാറാന് ഏസ്സ്‌ന പരാക്ക്‌ന്റേമ്>> എന്റ് അവാര് സൊന്നാര്.
അദുക്കുള: <<അയാള് നാന്‌ത്തെ>> എന്റ് ഏസ്സ് സൊന്നാന്. ഏസ്സ്‌ന കാട്ടി കൊഡുക്ക്യ പോവ ജൂദാന്‌മ് അവാരോഡൊപ്പ അദ്‌ല് നിന്റിന്താന്. 6അയാള് നാന്‌ത്തെ എന്റ് ഏസ്സ് സൊല്ലുഗാട്ടി അവാര് പിന്തറ പിന്തറ പോയി മണ്ണ്‌ക്ക് ബ്‌ന്താര്.
7<<നിമ്മ ആര്‌ന പരാക്ക്‌ന്റ്‌റ്?>> എന്റ് അയാള് പിന്നേമ് അവാര്‌ന കേ്ട്ടാന്.
<<നസറേത്ത്‌ഗാറാന് ഏസ്സ്‌നത്തെ>> എന്റ് അവാര് സൊന്നാര്.
8<<അയാള് നാന്‌ത്തെ എന്റ് നിമാക്ക് സൊന്നേനല്ല? നിമ്മ എനാനാത്തെ പരാക്കുവദാന ഇവാര്‌ന പോയ ബ്‌ഡ്‌ന്>> എന്റ് ഏസ്സ് അവാര്‌ക്ക് സൊന്നാന്. 9<<നീ എനാക്ക് തന്തവാര്‌ല് ആര്‌മ് കെ്ട്ട് പോഗാലെ>>#ഓഗന്നാന് 6:39 എന്റ് താന് സൊന്നാദ് അദേപാസെ നഡാക്ക്യ ബേ്ണ്ടിത്തെ ഏസ്സ് ഇത്തെ സൊന്നാദ്.
10അദുക്കുള സീമോനു പത്ത്‌റോസു തന്നോഡിന്ത ബാള്‌ന ഊരി എ്ഡ്‌ത്ത് പോയി എഗുദാര് ദൊഡ്ഡ പൂസാരി ഗിലാസഗാറാന് ബല കാദ്‌ന സെത്തി തള്ള്‌നാന്. അയി ഗിലാസഗാറാന് പേര് മല്‌ക്കോസു എന്റ്‌ത്തെ.
11ഏസ്സ് പത്ത്‌റോസുക്കു: <<നിന്ന് ബാള്‌ന ഒറേക്ക് ഇക്ക്, അപ്പാന് സാമി എനാക്ക് തന്ത്‌റ്‌ക്കുവ കജട്ട സെമ്പ്‌ലിന്ത് നാന് കുഡിക്കുഡോമല്ല?>> എന്റ് സൊന്നാന്.
ഏസ്സ്‌ന അന്നാസ് പട്ട്‌ക്ക് എ്ഡ്‌ത്ത് പോന്റാര്
12പ്‌റ പട്ടളഗാറാര്‌മ് പട്ടള തലെവാന്‌മ് സാമിബീ്ഡ് കാവഗാറാര്‌മ് ഏസ്സ്‌ന പ്‌ഡിത്ത് കെ്ട്ടി, 13മുദാല് അന്നാസ് പട്ട്‌ക്ക് എ്ഡ്‌ത്ത് പോനാര്. അയാള് അയി ബര്‌സ്സാത്ത്‌ല എഗുദാര് ദൊഡ്ഡ പൂസാരി ആയിന്ത കയ്യപ്പാവു മാമനച്ചാന് ആയിന്താന്. 14ജനഗാള്‌ക്ക് ബേ്ണ്ടി ഒരുത്താന് സാവാദ് നല്ലാദ്‌ത്തെ എന്റ് എഗുദാര് തലെവാര്‌ഗാള്‌ക്ക് സൊന്നവാന്‌ത്തെ ഈ കയ്യപ്പാവു.
പത്ത്‌റോസു ഏസ്സ്‌ന തെര്യ എന്റ് സൊന്റാന്
15സീമോനു പത്ത്‌റോസുമു ഏസ്സ് സൊല്ലുപഡി നഡാക്കുവ ബേ്റൊന്റൊരുത്താന്‌മ് ഏസ്സ് പിന്ന്‌മേലെ പോനാര്. സൊല്ലുപഡി നഡാക്കുവ അയി ബേ്റൊന്റൊരുത്താന് എഗുദാര് ദൊഡ്ഡ പൂസാരിക്ക് നല്ല പളാക്കുള്ളവാന് ആയിന്താന്. അദ്‌നാലെ അയാള് ഏസ്സോഡൊപ്പ എഗുദാര് ദൊഡ്ഡ പൂസാരി ബീ്ഡ് നഡ്‌കളാക്ക് കഡാന്താന്. 16ആന പത്ത്‌റോസു നഡ്‌കളാക്ക് കഡാക്കുവ ബാസാക്ക് ബെ്ളിഗെ താനെ ഇന്താന്. അദുക്കുള എഗുദാര് ദൊഡ്ഡ പൂസാരിക്ക് പളാക്കുള്ളവാന്‌മ് സൊല്ലുപഡി നഡാക്ക്‌ന്റവാന്‌മ് ആയിന്ത അയി ബേ്റൊന്റൊരുത്താന് ബെ്ളിഗെ ബന്ത് ബാസ കാവഗാറിസിക്ക് സൊല്ലി പത്ത്‌റോസുന ഉളാക്ക് കൂട്ടി പോനാന്.
17അദുക്കുള അയി ബാസ കാവഗാറിസി: <<നീയിമ് ഇയാള് സൊല്ലുപഡി നഡാക്ക്‌ന്റവാര്‌ല് ഒരുത്താന?>> എന്റ് പത്ത്‌റോസുന കേ്ട്ടാള്.
അദുക്കുള പത്ത്‌റോസു: <<നാന് അല്ല>> എന്റ് സൊന്നാന്.
18അയി നാള് സളി പ്‌ഡിത്തിന്താദ്‌നാലെ ഗിലാസഗാറാര്‌മ് സാമിബീ്ഡ് കാവഗാറാര്‌മ് തീക്കി അദ്‌ക്ക് സുറ്റീല് നിന്റ് തീ കായിന്ത് കൊണ്ടു ഇന്താര്. പത്ത്‌റോസുമു അവാരൊപ്പ നിന്റ് തീ കായിന്ത് കൊണ്ടിന്താന്.
എഗുദാര് ദൊഡ്ഡ പൂസാരി ഏസ്സ്‌ന കേ്ള്‌വി കേ്ള്‌ക്ക്‌ന്റാന്
19അദുക്കുള അയാള് സൊല്ലുപഡി നഡാക്ക്‌ന്റവാര്‌ന പറ്റിമ് അയാള് പഡുസുവ കാര്യഗാള്‌ന പറ്റിമ് എഗുദാര് ദൊഡ്ഡ പൂസാരി ഏസ്സ്‌ന കേ്ട്ടാന്.
20അദുക്കുള ഏസ്സ്: <<നാന് എല്ലാര്‌ക്ക്‌മ് എദ്‌ക്കത്തെ സൊല്ലിര്‌ക്ക്‌ന്റെ, എഗുദാര് പരേസുവ ബീ്ഡ്‌ഗാള്‌ല്‌മ് എല്ലാ എഗുദാര്‌മ് കൂഡുവ സാമിബീ്ഡ്‌ല്‌മ് നാന് ഒപ്പ പഡിസിര്‌ക്ക്‌ന്റെ. ഒളിസിമറേസി ഒന്റുമു സൊല്ലാലെ. 21നീ എന്ത്‌ക്ക് എനാന കേ്ള്‌വി കേ്ള്‌ക്കുവാദ്? നാന് സൊന്നാദ് എന്തെന്റ് കേ്ട്ട്‌റ്‌ന്റവാര്‌ന കേ്ള്, നാന് സൊന്നാദ് എന്തെന്റ് അവാര്‌ക്ക് തെരിന്റ്>> എന്റ് സൊന്നാന്.
22ഏസ്സ് ഇത്തെ സൊല്ലുഗാട്ടി സാമിബീ്ഡ് കാവഗാറാര്‌ല് അയാളര്‌ഗെ നിന്റിന്ത ഒരുത്താന്: <<എഗുദാര് ദൊഡ്ഡ പൂസാര്യോഡ ഇത്തേത്തെ ബദ്‌ല് സൊല്ലുവാദ?>> എന്റ് സൊല്ലി ഏസ്സ് സെ്ഗ്‌ഡ്‌ക്ക് ഒന്റു അഡി കൊഡുത്താന്.
23ഏസ്സ് അയാള്‌ക്ക്: <<നാന് തപ്പായി എന്തൊന്റു കാര്യ സൊല്ലിന്തദാന അദ് എന്തെന്റ് ഇദ്‌ലിര്‌ന്റവാര്‌ക്ക് സൊല്ലി കൊഡു. ആന നാന് സൊന്നാദ് സെരി ആയിന്തദാന പിന്നെ എന്ത്‌ക്ക് എനാന അഡിക്കുവാദ്?>> എന്റ് സൊന്നാന്. 24അദുക്കുള അന്നാസ് അയാള്‌ന കെ്ട്ട്‌ന കെ്ട്ടോഡ താനെ എഗുദാര് ദൊഡ്ഡ പൂസാരി കയ്യപ്പാവു പട്ട്‌ക്ക് സൊല്ലി ബ്‌ട്ടാന്.
പത്ത്‌റോസു ഏസ്സ്‌ന തെര്യ എന്റ് പിന്നേമ് സൊന്റാന്
25സീമോനു പത്ത്‌റോസു തീ കായിന്ത് കൊണ്ടു നിന്റ്‌റ്‌ക്കാട്ടി: <<നീയിമ് അയാള് സൊല്ലുപഡി നഡാക്ക്‌ന്റവാര്‌ല് ഒരുത്താനല്ലഗ?>> എന്റ് ലേസ ആള്‌ഗാള് അയാള്‌ന കേ്ട്ടാര്.
അദുക്കുള അയാള്: <<നീ സൊന്നാദ് സെര്യല്ല>> എന്റ് സൊല്ലി <<അദ് നാനല്ല>> എന്റ് സൊന്നാന്.
26എഗുദാര് ദൊഡ്ഡ പൂസാരി ഗിലാസഗാറാര്‌ല് ഒരുത്താന്‌മ് പത്ത്‌റോസു കാദ്‌ന സെത്തി തള്ള്‌നവാന്‌ക്ക് സൊന്തഗാറാന്‌മ് ആയിന്ത ഒരുത്താന്: <<നാന് നിനാന അയാളോഡ ദോട്ടാത്ത്‌ല് കണ്ടെ>> എന്റ് സൊന്നാന്. 27അദുക്കുള പത്ത്‌റോസു: <<നീ സൊന്നാദ് സെര്യല്ല>> എന്റ് പിന്നേമ് സൊന്നാന്. അന്നാല് താനെ കോയിമ് കൂഗുറ്റു.
ഏസ്സ് പീലത്തോസു മുന്നുക്കു
28റാവെ താനെ എഗുദാര് തലെവാര്‌ഗാള് ഏസ്സ്‌ന കയ്യപ്പാവു പട്ട്‌ലിന്ത് നാഡ് തലെവാന് കോട്ടേക്ക് എ്ഡ്‌ത്ത് പോനാര്. ആന അവാര് തമ്മ് സട്ട്‌മെ്ട്ട്‌പഡി അയിത്ത്യ പഡാദിര്‌ക്ക്യ ബേ്ണ്ടി കോട്ടെ കുളാക്ക് പോഗാലെ. എന്ത്‌ക്കെന്റ് സൊന്ന അയിത്തപഡാത്തവാര് ആയിന്താത്തെ പെസഗെ സാപ്പാഡ് തിന്ന്യ മുഡിമ്. 29അദ്‌നാലെ പീലത്തോസു ബെ്ളിഗെ അവാര് പട്ട്‌ക്ക് ബന്ത്: <<ഈ മന്‌സാന്‌ന പറ്റി നിമ്മ എന്ത് കുറ്റ സൊന്റുറു>> എന്റ് അവാര്‌ന കേ്ട്ടാന്.
30അദുക്കുള അവാര്: <<ഇയാള് കുറ്റ ഗേഗാദിന്തദാന എമ്മ ഇയാള്‌ന നിന്ന് പട്ട്‌ക്ക് എ്ഡ്‌ത്ത് ബന്ത്‌റ്‌ക്കമാട്ടേമ്>> എന്റ് സൊന്നാര്.
31അദുക്കുള പീലത്തോസു: <<നിമ്മ താനെ ഇയാള്‌ന എ്ഡ്‌ത്ത് പോയി നിമ്മ് സട്ടപഡി ഇയാള്‌ക്ക് ദെ്ണ്ടണെ ബിദിന്>> എന്റ് അവാര്‌ക്ക് സൊന്നാന്.
അദുക്കുള എഗുദാര്: <<ഒരുത്താന്‌ന കൊല്ലുവാദ്‌ക്കുള്ള അദിഗര എമാക്കില്ലെ>> എന്റ് സൊന്നാര്. 32അവാര് ഇത്തെ സൊല്ലുഗാട്ടി താന് എത്തെ സാവാന് എന്നുവാദ്‌ന പറ്റി ഏസ്സ് സൊന്ന കാര്യ അദേപാസെ നഡാന്ത്‌ദ്.
33പീലത്തോസു പിന്നേമ് കോട്ടെ കുളാക്ക് പോയി ഏസ്സ്‌ന ബ്‌ളിത്ത് ബരിസ്സി: <<നീ എഗുദാര് രാജാവ?>> എന്റ് കേ്ട്ടാന്.
34അദ്‌ക്ക് ഏസ്സ്: <<ഇദ് നീ താനെ നെനേത്ത് സൊല്ലുവാദൊ? ഇല്ലെ ബേ്റെ ആരാറ്റ എനാന പറ്റി നിനാക്ക് സൊല്ലി തന്ത്‌റ്‌ന്റാര?>> എന്റ് കേ്ട്ടാന്.
35അദ്‌ക്ക് പീലത്തോസു: <<നാന് ഒന്റു എഗുദാര് ജാദിക്ക് പട്ട ഒരുത്താന? നിന്ന് കൂട്ടാര്‌മ് അവാര് പൂസാരി തലെവാര്‌ഗാള്‌മ്‌ത്തെ നിനാന എന്ന് പട്ട്‌ക്ക് എ്ഡ്‌ത്ത് ബന്ത്‌റ്‌ക്കുവാദ്. നീ എന്ത് ഗേന്തായി?>> എന്റ് കേ്ട്ടാന്.
36അദ്‌ക്ക് ഏസ്സ്: <<നാന് ആളുവ നാഡ് ഈ ഉലഗാക്ക് പട്ടാദല്ല, നാന് ആളുവ നാഡ് ഈ ഉലഗാക്ക് പട്ടാദ് ആയിന്തദാന എനാന എഗുദാര് കയിക്ക് കൊഡുക്കാദിര്‌ക്ക്യ ബേ്ണ്ടി എന്ന് ഗിലാസഗാറാര് എനാക്ക് ബേ്ണ്ടി ജുദ്ദ ഗേന്ത്‌റ്‌ക്കുവാര്. ആന നാന് ആളുവ നാഡ് ഈ ഉലഗാക്ക് പട്ടാദല്ല>> എന്റ് സൊന്നാന്.
37അദുക്കുള പീലത്തോസു ഏസ്സ്‌ന: <<അന്നാപ്പ് നീ രാജാവുത്തേഗ?>> എന്റ് കേ്ട്ടാന്.
അദ്‌ക്ക് ഏസ്സ്: <<സെരിത്തെ, നീ സൊല്ലുവ പാസെത്തെ. ആന സെരിക്ക്‌മ് സത്ത്യന പറ്റി ആള്‌ഗാള്‌ക്ക് സൊല്ല്യ ബേ്ണ്ടിത്തെ നാന് പ്‌റാന്തെ. അദ്‌ക്കായി നാന് ഉലഗാക്ക് ബന്ത്‌മിര്‌ക്ക്‌ന്റെ. സത്ത്യാക്കുള്ളവാനെല്ല എന്ന് നായന കേ്ള്‌ക്ക്‌ന്റാന്>> എന്റ് ബദ്‌ല് സൊന്നാന്.
38പീലത്തോസു അയാള്‌ന: <<സത്ത്യ എന്റ് സൊന്ന എന്ത്?>> എന്റ് കേ്ട്ടാന്. പ്‌റ അയാള് പിന്നേമ് ബെ്ളിഗെ എഗുദാര് തലെവാര് പട്ട്‌ക്ക് പോയി: <<നാന് അയാള്‌ല് ഒന്റു കുറ്റാമ് കാണുവാദില്ലെ. 39ആന എല്ലാ പെസഗെ നോമ്പി നാള്‌മ് ജെയില്‌ല് ഇര്‌ക്കുവ ഒന്റാള്‌ന നാന് നിമാക്ക് ഇ്റാക്കി ബ്‌ട്ട് തന്റേനല്ല. നാന് നിമാക്ക് എഗുദാര് രാജാവുന ബ്‌ട്ട് തര്യ നിമ്മ ആസെപഡ്‌ന്റ്‌റ?>> എന്റ് അവാര്‌ന കേ്ട്ടാന്.
40അദുക്കുള അവാര് <<ഇയാള്‌നല്ല, ബറവാസ്‌ന എമാക്ക് ഇ്റാക്കി ബ്‌ട്ട മദി>> എന്റ് ദൊഡ്ഡാദ്‌ക്ക് ആലാത്ത് സൊന്നാര്. ആന ബറവാസ് പ്‌ഡിങ്കിപറ്‌ത്ത് എ്ഡ്‌ക്കുവ ഒരുത്താന് ആയിന്താന്.
বর্তমানে নির্বাচিত:
ഓഗന്നാന് 18: സാമി സേദി
হাইলাইট
শেয়ার
কপি
Want to have your highlights saved across all your devices? Sign up or sign in
New Life Computer Institute
