ഓഗന്നാന് 10
10
നല്ല മാട്ട്യാന്‌മ് തന്ന് കൊറ്യാഡ്‌ഗാള്‌മ്
1<<നാന് സത്ത്യമായി നിമാക്ക് സൊന്റെ, കൊറ്യാഡ് പട്ടി ബാസ മേലെ പട്ടികുളാക്ക് നൊഗേഗാദെ ബേ്റേദാറ്റ ദിന്‌സ്‌ല് ഉളാക്ക് നൊഗേന്റവാനെല്ല ത്‌റ്‌ട്ടാന്‌മ് പ്‌ഡിങ്കിപറ്‌ത്ത് എ്ഡ്‌ത്ത് പോന്റവാന്‌മ്‌ത്തെ. 2കൊറ്യാഡ് പട്ടി ബാസെ മേലെ നൊഗേന്റവാന്‌ത്തെ കൊറ്യാഡ് മാട്ട്യാന്. 3ബാസ കാവഗാറാന് അയാള്‌ക്ക് ബാസ ത്‌റാന്ത് കൊഡുക്കുന്റാന്. തന്ന് കൊറ്യാഡ്‌ഗാള് മാട്ട്യാന് ജദ്ദാത്തെ എന്റ് നെപ്പ്‌കെ്ഡേസ്‌ന്റ്. തന്ന് കൊറ്യാഡ്‌ഗാള്‌ന മാട്ട്യാന് പേര് സൊല്ലി ബ്‌ളിത്ത് ബെ്ളിഗെ എ്ഡ്‌ത്ത് പോന്റാന്. 4തന്ന് കൊറ്യാഡ്‌ഗാള്‌ന ബെ്ളിഗെ എ്ഡ്‌ത്ത് പോന പ്‌റ അയാള് അയി കൊറ്യാഡ്‌ഗാള് മുന്നുക്കു പോന്റാന്. മാട്ട്യാന് ജദ്ദാത്തെ എന്റ് കൊറ്യാഡ്‌ഗാള്‌ക്ക് നെപ്പ്‌കെ്ഡേക്കുവാദ്‌നാലെ അയി കൊറ്യാഡ്‌ഗാള് മാട്ട്യാന് പിന്ന്‌ മേലെ പോന്റു.>> 5ആന ബേ്റാള് മാഡുവ ജദ്ദ മാട്ട്യാന് മാഡുവ ജദ്ദ അല്ല എന്റ് നെപ്പ്‌കെ്ഡേക്കുവാദ്‌നാലെ കൊറ്യാഡ്‌ഗാള് അയാള് പിന്ന്‌മേലെ പോഗാദെ അയാള്‌ന തെ്റിന്ത് തള്ളി ഓഡി പോമു. 6ഈ കദെന ഏസ്സ് അവാര്‌ക്ക് സൊന്നാന്. എന്റാല്‌മ് അയാള് സൊന്നാദ് എന്തെന്റ് അവാര്‌ക്ക് തെര്യാലെ.
7ഏസ്സ് പിന്നേമ് അവാര്‌ക്ക് ഇത്തെ സൊന്നാന്: <<നാന് സത്ത്യമായി നിമാക്ക് സൊന്റെ, നാന്‌ത്തെ കൊറ്യാഡ്‌ഗാള് നൊഗേവാദ്‌ക്കുള്ള ബാസ. 8എനാക്ക് മുദാല് ബന്തവാര് ഒട്ടുക്കു ത്‌റ്‌ട്ടാര്‌മ് പ്‌ഡിങ്കിപറ്‌ത്ത് എ്ഡ്‌ത്ത് പോന്റവാര്‌മ്‌ത്തെ ആയിന്താര്. അദ്‌നാലെ കൊറ്യാഡ്‌ഗാള് അവാര് നായന കേ്ള്‌ക്കാലെ. 9നാന്‌ത്തെ ബാസ. നാന് എന്നുവ ഈ ബാസ മേലെ നൊഗേന്റവാന് തപ്പിസി കഡാക്കുവാന്. അയാള് ഈ ബാസമേലെ ഉളാക്ക്‌മ് പോവാന് ബെ്ളിഗേമ് ബരുവാന്. അയാള്‌ക്ക് നല്ല മേസിമ് കെ്ഡേക്ക്‌മ്. 10ത്‌റ്‌ട്ടാന് ബരുവാദ് ത്‌റ്‌ഡ്യാമ്, കൊല്ല്യാമ് അളിക്ക്യാമ് ബേ്ണ്ടിത്തെ. നാന് ബന്താദ് കൊറ്യാഡ്‌ഗാള് ആയിര്‌ക്കുവ നിമാക്ക് ഉജുരു കെ്ഡേക്ക്യാമ് അയി ഉജുരു ഒന്റുക്കുമു കൊറേവു ബരാദെ ഒന്റേപെ്ട്ട് കെ്ഡേക്ക്യാമ്‌ത്തെ. 11നാന്‌ത്തെ നല്ല മാട്ട്യാന്. നല്ല മാട്ട്യാന് കൊറ്യാഡ്‌ഗാള്‌ക്ക് ബേ്ണ്ടി തന്നുജുരുന കൊഡുക്കുന്റാന്. 12ആന കൂലിക്ക് ബേ്ണ്ടി മേസ്‌ന്റവാന് കൊറ്യാഡ്‌ഗാറാന്‌മല്ല മാട്ട്യാന്‌മല്ല. അയാള് സെന്നായി ബരുവാദ്‌ന കാണ്‌ഗാട്ടി കൊറ്യാഡ്‌ഗാള്‌ന തള്ളി ഓഡി പോന്റാന്. സെന്നായി അയി കൊറ്യാഡ്‌ഗാള്‌ന പ്‌ഡിത്ത് ആങ്കീങ്ക് ഓഡിസി ബ്‌ഡ്‌ന്റ്. 13അയാള് കൂലിക്ക് മേസ്‌ന്റവാന്‌മ് കൊറ്യാഡ്‌ഗാള്‌ന പറ്റി നെനേവു ഇല്ലത്തവാന്‌മ്‌ത്തെ. അദ്‌നാലെ അയാള് ഓഡി പോന്റാന്.
14-15നാന്‌ത്തെ നല്ല മാട്ട്യാന്. എന്നപ്പാന് സാമിക്ക് എനാന തെരിമ്. എനാക്ക്‌മ് എന്നപ്പാന് സാമിന തെരിമ്. അദേപാസെത്തെ എനാക്ക് എന്ന് കൊറ്യാഡ്‌ഗാള്‌ന തെരിമ്. എനാന എന്ന് കൊറ്യാഡ്‌ഗാള്‌ക്ക്‌മ് തെരിമ്. കൊറ്യാഡ്‌ഗാള്‌ക്ക് ബേ്ണ്ടി നാന് എന്ന് ഉജുരുന കൊഡുക്കുന്റെ. 16ഈ പട്ടിലില്ലാത്ത ബേ്റെ കൊറ്യാഡ്‌ഗാള്‌മ് എനാക്കിര്‌ക്ക്‌ന്റ്, അയി കൊറ്യാഡ്‌ഗാള്‌നാമ് നാന് ഓട്ടി എ്ഡ്‌ത്ത് ബരുഡൊ. അയി കൊറ്യാഡ്‌ഗാള് നാന് സൊല്ലുവാദ്‌ന കേ്ള്‌ക്ക്‌മ്. അത്തെ അയി കൊറ്യാഡ്‌ഗാള് ഒന്റായി എ്ണേന്ത് ഒന്റു കൂട്ട കൊറ്യാഡ്‌ഗാള് ആമ്. അവാര്‌ക്ക് ഒന്റു മാട്ട്യാന്‌മ് ഇര്‌ക്കുവാന്. 17എന്ന് ഉജുരുന മറിസിമ് കെ്ഡേസ്യ ബേ്ണ്ടി നാന് എന്ന് ഉജുരുന കൊഡുക്കുവാദ്‌നാലെ അപ്പാന് സാമി എനാന സീവാന്‌പഡ്‌ന്റാന്. 18എന്ന് ഉജുരുന എന്നോഡിന്ത് ആര്‌മ് എ്ഡ്‌ത്ത് പോഗമാട്ടാര്. ആന നാന് താനെത്തെ എന്ന് ഉജുരുന കൊഡുക്കുവാദ്, അത്തെ കൊഡുക്കുവാദ്‌ക്കുള്ള അദിഗര എനാക്കിര്‌ക്ക്‌ന്റ്. അദ്‌ന തിരിക്കി എ്ഡ്‌ക്ക്യാമ് എനാക്ക് അദിഗര ഇര്‌ക്ക്‌ന്റ്. ഇദ്‌ത്തെ നാന് ഗേയ ബേ്ണ്ടി എന്നപ്പാന് സാമി എനാക്ക് സൊല്ലിര്‌ക്കുവാദ്.>>
19ഏസ്സ് സൊന്ന ഈ നായഗാള്‌ന കേ്ട്ട് പിന്നേമ് എഗുദാര് കുള്ളുക്കു ആങ്കൊന്റു കച്ചിമ് ഈങ്കൊന്റു കച്ചിമ് ആറ്റ്. 20അവാര്‌ല് എഞ്ചോ ആള്‌ഗാള്: <<അയാള്‌ക്ക് കെ്ട്ടജാദി തട്ടിര്‌ക്ക്‌ന്റ്. അയാള്‌ക്ക് പിരാന്ത്‌ത്തെ. അദ്‌നാലെ എന്ത്‌ക്ക് അയാള് നായന കേ്ള്‌ക്കുവാദ്?>> എന്റ് സൊന്നാര്.
21ആന ലേസ ആള്‌ഗാള്: <<ഇദ് കെ്ട്ടജാദി തട്ടിര്‌ന്റവാന് സൊല്ലുവ നായഗാളല്ല, കെ്ട്ടജാദിക്ക് കുറുഡാര് കണ്ണ്‌ന തെ്ളിസ്യ മുഡിമ?>> എന്റ് സൊന്നാര്.
എഗുദാര് ഏസ്സ്‌ന നമ്പുവാദില്ലെ
22എര്‌സലേമ്‌ല് സാമിബീ്ഡ്‌ന സുത്താപ്പ് മാഡ്‌നാദ്‌ന നെനേക്കുവ നോമ്പി ഗേന്തിന്താര്. അദുക്കുള സളിഗളിഗെ ആയിന്ത്‌ദ്. 23സാമിബീ്ഡ്‌ലിര്‌ക്കുവ സലോമോനു പാഡില് ഏസ്സ് നഡാന്ത് കൊണ്ടിന്താന്. 24അദുക്കുള എഗുദാര് അയാള്‌ക്ക് സുറ്റീല് ബന്ത് നിന്റ്: <<നീ ആരെന്റ് പ്‌ഡി കെ്ഡേക്കാദെ എമ്മ എഞ്ച് നാള് ഇത്തെ ഇര്‌ക്ക്യ? നീ ക്‌റ്‌സ്‌ത്ത്‌ത്തെ ആയിന്തദാന അദ്‌ന നേരെ സൊല്ല്>> എന്റ് കേ്ട്ടാര്.
25അദുക്കുള ഏസ്സ് അവാര്‌ക്ക് ഇത്തെ സൊന്നാന്: <<നാന് അദ്‌ന നിമാക്ക് സൊല്ലിര്‌ക്ക്‌ന്റേനല്ല? ആന നിമ്മ എനാന നമ്പുവാദില്ലെ. എന്നപ്പാന് തന്ത അദിഗരാത്ത്‌ല് നാന് ഗേവ കാര്യഗാള് നാന് ആര് എന്റ് കാട്ടി തന്റ്. 26ആന നിമ്മ എന്ന് കൊറ്യാഡ്‌ഗാള് അല്ലത്താദ്‌നാലെ നിമ്മ എനാന നമ്പുവാദില്ലെ. 27എന്ന് കൊറ്യാഡ്‌ഗാള് എന്ന് നായന കേ്ള്‌ക്ക്‌ന്റ്. അയി കൊറ്യാഡ്‌ഗാള്‌ന എനാക്ക് തെരിമ്. അയി ആഡ്‌ഗാള് എന്ന് പിന്ന്‌മേലെ നഡാക്ക്‌ന്റ്. 28നാന് അവാര്‌ക്ക് എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന കൊഡുക്കുന്റെ. അവാര് എന്നാല്‌ക്ക്‌മ് അളിന്ത് പോഗമാട്ടാര്. എന്ന് കയിലിന്ത് അവാര്‌ന പ്‌ഡിത്ത് എ്ഡ്‌ത്ത് പോയ ആര്‌ക്ക്‌മ് മുഡ്യാമാട്ട. 29അവാര്‌ന എന്ന് കയിക്ക് തന്ത്‌റ്‌ക്കുവ എന്നപ്പാന് സാമി എല്ലാവാര്‌ന ബ്‌ഡ ദൊഡ്ഡവാന്‌ത്തെ. അപ്പാന് സാമി കയിലിന്ത് അവാര്‌ന പ്‌ഡിത്ത് എ്ഡ്‌ക്ക്യ ആര്‌ക്ക്‌മ് മുഡ്യാമാട്ട. 30നാന്‌മ് അപ്പാന് സാമിമ് ഒന്റുത്തെ.>>
31അദുക്കുള എഗുദാര് അയാള്‌ക്ക് എ്റ്യ പിന്നേമ് കല്ലെ്ഡ്‌ത്താര്. 32അദുക്കുള ഏസ്സ്: <<അപ്പാന് സാമി ഗേയ സൊന്ന പല നല്ല കാര്യഗാള്‌മ് നാന് നിമ്മ് കണ്ണ്‌ മുന്നുക്കു ഗേന്ത്‌റ്‌ന്റെ. അയി കാര്യഗാള്‌ല് ഏദ് കാര്യ ഗേന്താദ്‌ക്ക് നിമ്മ എനാക്ക് കല്ലെ്റിന്റ്‌റ്>> എന്റ് അവാര്‌ന കേ്ട്ടാന്.
33അദ്‌ക്ക് എഗുദാര്: <<നീ ഗേന്ത ഏദൊന്റു നല്ല കാര്യഗാള്‌നാലെ അല്ല, നീ സാമിന കുറ്റ സൊല്ലുവാദ്‌നാലെത്തെ എമ്മ നിനാക്ക് കല്ലെ്റിവാദ്. എന്ത്‌ക്കെന്റ് സൊന്ന നീ ബെ്റ്‌മൊന്റു മന്‌സാനായിന്ത് ഗുഡി നീ നിനാന താനെ സാമി എന്റ് സൊന്റായി>> എന്റ് സൊന്നാര്.
34അദ്‌ക്ക് ഏസ്സ് അവാര്‌ക്ക് ഇത്തെ സൊന്നാന്: << <നിമ്മ സാമിഗാള്‌ത്തെ എന്റ് നാന് സൊന്നേന്>#സാമി പാട്ട് ബൊക്കു 82:6 എന്റ് മോസെ നിമാക്ക് ബെത്ത സട്ടാത്ത്‌ല് എ്ള്‌ദിര്‌ക്ക്‌ന്റല്ല? 35സാമി സൊല്ലുസുലാക്ക സത്ത്യത്തെ എന്റ് നമാക്ക് തെരിമ്. സാമി സേദി കെ്ഡേസ്‌നവാര്‌ന സാമിഗാള് എന്റ് സാമി ബ്‌ളിത്ത്‌റ്‌ന്റാന്. 36അത്ത്യാനദാന സാമി തനാക്ക് ബേ്ണ്ടി അലാക്ക പ്‌റ്‌ത്ത് ഉലഗാക്ക് സൊല്ലി ബ്‌ട്ട്‌റ്‌ക്കുവ എനാന <നാന് സാമിമഗാന്> എന്റ് സൊല്ലുവാദ്‌നാലെ <നീ സാമിന കുറ്റ സൊന്റവാന്> എന്റ് നിമ്മ സൊല്ലുവാദ് എന്ത്‌ക്ക്? 37എന്നപ്പാന് സാമി ഗേവ ഗിലാസാന നാന് ഗേഗാദിന്തദാന നിമ്മ എനാന നമ്പ ബേ്ഡ. 38ആന അയി കാര്യഗാള്‌ന നാന് ഗേവദാന നിമ്മ എനാന നമ്പാദെ പോനാല്‌മ് നാന് ഗേവ കാര്യഗാള്‌ന നമ്പ്‌ന്. അത്തെ നമ്പ്‌നദാന അപ്പാന് സാമി എന്നോഡാമ് നാന് അപ്പാന് സാമ്യോഡാമ് ഇര്‌ക്കെന്റ് എന്റ് നിമാക്ക് ഒറേപ്പായിമ് തെരിമ്.>> 39അദുക്കുള എഗുദാര് പിന്നേമ് ഏസ്സ്‌ന പ്‌ഡിക്ക്യ ഓരാഡ്‌നാര്. ആന അയാള് പ്‌ഡി കെ്ഡേക്കാദെ ബെജിക്കി പോനാന്.
40പ്‌റ ഏസ്സ് ഓറ്‌ദ്ദാന് ബാനിക്ക് അയ്യെ്ട്ടി കഡാന്ത് ഓഗന്നാന് മുദാല് നീര്‌ക്ക് മുളുഗുസിന്ത പട്ട്‌ക്ക് പോയി അദ്‌ല് തങ്ക്‌നാന്. 41എഞ്ചോ ആള്‌ഗാള് അയാള് പട്ട്‌ക്ക് പോയി: <<ഓഗന്നാന് അദിസ്യമാന അഡ്യാള ഒന്റുമു ഗേഗാലെ. ആന ഓഗന്നാന് ഇയാള്‌ന പറ്റി സൊന്നാദെല്ലെ നേര്‌ത്തെ>> എന്റ് സൊന്നാര്. 42അദ്‌ല് എഞ്ചോ ആള്‌ഗാള് ഏസ്സ്‌ന നമ്പ്‌നാര്.
বর্তমানে নির্বাচিত:
ഓഗന്നാന് 10: സാമി സേദി
হাইলাইট
শেয়ার
কপি
Want to have your highlights saved across all your devices? Sign up or sign in
New Life Computer Institute
