Matiye 27

Nje gə no ngɔ gangə tar gə lə Jiibije d-uwa dɔ naa gə ndɔɔ-sḭ

Mrk 15.1

1Gə ndɔɔ-sḭ baa ja, buba njekapoloje gə buba ɓeje tɔ̰y d-uwa dɔ naa d-un ndu-je mba kar ꞌtɔl ne Jeju. 2Logə ꞌtɔ-ɛ ɗɔdə ɗaa, d-aw sə-a d-aw d-ula-a ji njeko̰ ɓe gə ri-a na Pilad.

Judas ila kula

Kɗn 1.16-20

3Be ɓa Judas gə njekun dɔ Jeju le, logə o to gə ꞌgangə tar dɔ Jeju gə ɗaa, m-e gangə man ar təl gə mbɛl ka munda le aw ne ar buba njekapoloje gə buba ɓeje, 4n-pa ne tar na: Dəw gə tar uwa dɔ-ɛ ang ja m-un dɔ-ɛ m-ar d-um məs-e nangə, ɗaa m-ɗa neɗa gə kṵra̰y. ꞌTəl d-ila-a kəne na: A ɗi ɓa ɔsə-sije kəne wa? To tar lə-i ꞌi ja. 5Be ɓa Judas ja̰rɛ̰ lar le mə kəy gə lə Luba, ɗaa ɔdə aw ila kula gɔb-e gə tɔl rɔ-ɛ. 6Buba njekapoloje d-odo lar le ɗaa ꞌpa na: Kəm kum naa gə gə lar gə kəy gə lə Luba ang, mba to lar məsə. 7Gə go ndu-je gə asə naa ɗaa, d-odo lar le d-aw ndogo ne ndɔ lə nje kuba jo, mba kar-ɛ to lo dubu mbaje. 8Gəl-e gə ne ɓa ꞌɓar ne ndɔ nee le na: Ndɔ məsə saar ce ɓogəne. 9Be ɓa tar lə pajambərə Jurumi gə pa le oso ne lo-e na: D-odo mbɛl ka munda, to gad-ɛ ngan Ijirayɛlje d-uji kar ndog-e ne 10d-ar mba ndogo ne ndɔ lə nje kuba jo, to to gə Mbayɓe un ne ndu-e ar-m.#27.10 Oje Jur 32.6-9; Jak 11.12-13

Jeju ar no Pilad gə

Mrk 15.2-20; Lug 23.1-4,13-25

11D-aw gə Jeju no njeko̰ ɓe gə. Ɗaa njeko̰ ɓe le dəji-e na: ꞌTo mbay lə Jiibije wa? Jeju ila-a kəne na: ꞌI ja ꞌpa. 12Ngaa tar gə buba njekapoloje gə buba ɓeje ꞌgangə d-um t-ɛ gə le, n-ar t-ɛ munduru. 13Be ɓa Pilad le pa ar-ɛ na: Tarje tɔ̰y gə ꞌgangə d-um ta-i gə nee le o ang wa? 14Ngaa Jeju ar t-ɛ munduru ɗaa, lo tar igi Pilad sɛl.

15Ndɔ ɗa nay ja taar nama, njeko̰ ɓe ɔr dəw kara kəy kula gə ila-a taar-taar, mba to pa ɗ-ɛ lə-a. Dəw gə bula dəwje ꞌdəji-e ɓa n-ɔr-ɛ n-ɔr-ɛ. 16Be ɓa, dɔ ndɔ-ɛ gə əng le, dəw kara to kəy kula gə, ri-a na Jeju Barabas gə dəwje ꞌpa tar lə-a ya̰. 17Pilad dəji bula dəwje gə d-ar le na: Na ɓa ꞌnjigije kar m-ɔr-ɛ m-ar-si wa? Jeju Barabas ose Jeju gə ꞌɓar-ɛ Kirisi le wa? 18Mba n-gərə to gə nər mə ɓa d-uwa ne Jeju d-ula-a ji-a gə. 19Dɔ kar-ɛ gə njeko̰ ɓe gə ri-a na Pilad le aw isi ngəndəng gangə tar gə ɗaa, jene lə-a ula-je ar d-aw ꞌpa d-ar-ɛ na: Əw rɔ-i kula rɔ-i mə tar lə dəw gə gadə-gadə nee le, mba m-o ko̰ ne ɓogəne ya̰ gə nḭ mba tar lə-a. 20Buba njekapoloje gə buba ɓeje ꞌsula bula dəwje mba kar ꞌdəji Barabas ɓa d-ar d-ɔr-ɛ ɗaa ꞌtɔl Jeju. 21Njeko̰ɓe təl un tar dəji-je na: Horo dəwje gə joo nee le, na ɓa ꞌnjigije kar m-ɔr-ɛ m-ar-si wa? Ɗaa ꞌpa na: Barabas. 22Pilad le təl dəji-je na: A ɗi ɓa m-a ɗa gə Jeju gə ꞌɓar-ɛ Kirisi le wa? Ɗaa d-ila kəne tɔ̰y gə ndu-je kara baa ja na: Kar ꞌɓər-e kagə dəsə gə ja! 23Pilad le təl pa na: Ngaa ɗi ɓa to ne gə kṵra̰y gə n-ɗa wa? Ɗaa ꞌtəl d-uru ꞌkuwi gə singa-je ja cibi na: ꞌƁər-e kagə dəsə gə ja! 24Logə Pilad o to gə n-asə ɗa ne kara ang, ngaɓa dəwje d-unda bula gə kede-kede kar ce wungu ɗaa, uba nangə ḭ taar, ta man, togo ne ji-a kəm dəwje gə tɔ̰y ja ngaɓa pa na: Tar məsə dəw gə gadə-gadə gə ar nee le uwa dɔ-m ang. Tar-ɛ uwa dɔ sisəy ja#27.24 Ji Pilad gə togo to torondu lə Jiibije gə to mə Ttt 21.6-8 gə.. 25Ɗaa dəw mə ɓeje d-ila kəne na: May kar tar məs-e uwa dɔ sijee gə dɔ ngan si ja! 26Be ɓa Pilad ɔr Barabas ila-a taar ɗaa, ar-je ꞌlabə Jeju gə ndəy abəlay ɗaa ula-a ji-je gə mba karəje ꞌɓər-e kagə dəsə gə.

27Be ɓa d-ar njeɗɔje lə njeko̰ ɓe Pilad d-aw gə Jeju kəy mbay gə ɗaa, ꞌmbo̰ njeɗɔje gə kɛm tɔ̰y ja d-ar gugu dɔ-ɛ mbugu. 28ꞌTɔrə kubu rɔ-ɛ gə ngaɓa d-un kubu gə kasə gə boy yul d-ula-a. 29D-uji kun gə jɔgə d-ula dɔ-ɛ gə ngaɓa ꞌcɛdə kɔb d-ula ji kɔl-ɛ gə; ngaɓa ꞌtəl d-um məkəji-je nangə no-ɛ gə ꞌkog-e na: J-o si ɓa ɓo mbay lə Jiibije! 30Ngaɓa ꞌcibi yoro dɔ-ɛ gə, cibi ɓa ꞌta kɔb gə ji-a gə le d-unda ne dɔ-ɛ. 31Go kogo gə kog-e ɗaa ꞌtəl d-ɔr kubu gə boy yul gə ꞌdəb-e ne le, ngaɓa ꞌtəl d-ula-a kubuje lə-a ɗaa d-aw sə-a mba kaw ɓər-e kagə dəsə gə.

ꞌƁərə Jeju kagə dəsə gə

Mrk 15.21-41

32Logə d-aw ꞌce mə ɓebo gə gə ɗaga ɗaa, d-inga dəw kara gə ɓe lə-a Sirɛn, ri-a na Simo, ɗaa d-uwa gə singa d-ar-ɛ odo kagə dəsə lə Jeju. 33ꞌCe lo gə ꞌɓar-ɛ Gɔləgota, gə kɔr gəl-e na: Lo Ka dɔ. 34D-ar-ɛ man bḭyə̰ gə ꞌpolo ne gə adə ɓa mba kar-ɛ n-ay, ngaa logə n-na#27.34 Jeju mbadə kay ne mba n-njigi ko̰ lə-a ɔr sṵra̰ ar ce yo gə. n-o ɗaa, n-njigi kay ang.

35Logə ꞌɓər-e kagə dəsə gə ɗɔdə ɗaa ꞌɗa ꞌya̰a̰ ꞌkay ne naa kubuje lə-a be ɓa gə mba kar tar gə pajambərə pa na: ꞌKay naa kubuje nəm, cibi ɓa ꞌɗɔ-je ne mbay#27.35 Paj 22.19 le aw ne lo-e gə#27.35 Bar-ɛ gə nee le godo mə mbedeje gə ləw gə kɛm gə ꞌɗa ndo̰ tar gərɛk gə kɛm.. 36Ngaɓa ꞌtəl d-isi nangə gə lo-e gə əng ꞌngəm t-ɛ.

37D-unja ne bəgərə gə d-unda dɔ-ɛ gə taar ꞌtɔji ne gəl tar gə d-ila dɔ-ɛ gə na: Dəw gə nee le to Jeju, mbay le Jiibije.

38ꞌƁərə gayimje joo kagə dəsə gə mbɔr Jeju gə, ꞌye gə kara dɔ ji kɔl, ꞌye gə kara dɔ ji gəl tɔ.

39Nje nday ɗəw booje ꞌtaj-ɛ ꞌtuga ne dɔ-je, 40ꞌpa na: ꞋI gə na a cḭ kəy lə Luba, ɗaa ndɔ munda baa ja a təl kunda gugu le, aji darɔ-i ngaa ləma! To gə ɓo ꞌto ngon lə Luba ja nama, ḭ kagə dəsə gə ꞌɗisi nangə! 41Buba njekapoloje, gə njekɔr gəl toronduje, gə buba ɓeje kara d-unda Jeju ꞌkogo ne ngaɓa ꞌpa na: 42N-aji dəwje gə ɗangə, ɗaa n-asə kaji darɔ-ɛ ang! To gə ɓo n-to mbay lə Ijirayɛlje ja nama, n-ḭ kagə dəsə gə n-uru nangə ja ɓa ja ta kag-ɛ ɓi. 43N-unda m-e dɔ Luba gə le ɗaa, may kar Luba le t-ɛ ta yo ngaa, to gə ɓo Luba njigi-e. Mba n-pa na: N-to ngon lə Luba. 44Gayimje gə ꞌɓərə-je sə-a kagə dəsə gə le kara ꞌtaj-ɛ to gə bənəng tɔ.

45Un kud-e dɔ kar gə ar lum dɔ gə saar ce ne kar gə ila mbɔr-ɛ gə ja cil ciməri oso dɔ nangə nee tɔ̰y. 46Logə kar ila mbɔr-ɛ ɗaa Jeju uru ꞌkuwi ɓolong na: Eli, Eli, lama sabakətani kɔr m-e na: Luba lə-m, Luba lə-m, na ɗi ngaa ꞌmbadə-m wa?#27.46 Oje Paj 22.2 47Nje gə kɛm horo dəwje gə d-ar lo-e gə le d-o ndu-e ɗaa ꞌpa na: N-ɓar Eli. 48Gə ngɔdə baa, dəw kara a̰y aw ula nekibi man mə man bḭyə̰ gə masə, ɗe ula ta kɔb gə ngaɓa ula ta Jeju gə mba kar-ɛ ibi. 49Ngaa nje gə kɛm ꞌpa na: Ar-si j-oje, se Eli a ɗe kaj-ɛ wa?

50Jeju təl uru ꞌkuwi ɓolong to gə ɗangə ngaɓa kəm lə-a oso.

51Be ɓa bal dɔ kubu gə mə kəy gə lə Luba ḭ taar ja cir dana njarara uru nangə, ngaɓa dɔ nangə yəgə, ərəje kara tɔ dana ɓəgəgə-ɓəgəgə, 52ta dɔbarəje cɛ̰ ngaɓa dəwje bula gə ꞌto njerɔsangəje gə d-uy le, ꞌtəl ndol tɔ̰y. 53Ngaɓa ꞌce mə buwa yo gə, ngaa gə go ce gə Jeju ce mə buwa yo gə, d-aw d-andə mə ɓebo gə to gə losang-ɛ, ngaɓa ꞌtɔji rɔ-je d-ar dəwje bula d-o-je.

54Njekun dɔ njeɗɔje gə tɔl gə nje gə d-ar sə-a mba ngəm ta Jeju le, d-o dɔ nangə gə yəgə gə neje gə nday le ɗaa ɓəəl unda-je bad gangə-je ngaɓa ꞌpa na: Dəw gə nee ɗaa, to Ngon lə Luba ja tɔgərɔ.

55Lo-e gə əng le jeneje bula d-ar dɔ ji ndə̰w̰ ɓa d-a lo: To jeneje gə d-ḭ gə Jeju dɔ nangə gə Galile nu ja, ꞌdan-ɛ mba la sə-a. 56Horo jeneje gə əng le Məri gə Magədala, gə Məri gə ko̰ Jagə je gə Jəjəb je ngaɓa ko̰ nganje lə Jebede.

D-ila yo Jeju mə buwa yo gə

Mrk 15.42-47; Lug 23.50-56; Ja̰ 19.38-42

57Kar kumatagə ɗaa, dəw gə njenekinga kara, Jəjəb gə Arimate gə to ngon njenendo lə Jeju ɗe. 58N-aw n-inga Pilad, n-dəj-e mba kar iya̰ ɗəw ar-ɛ n-un nin Jeju le. Be ɓa Pilad un ndu ar-je d-ar-ɛ. 59Jəjəb un nin Jeju, ɓiri gə ta kubu gə sigi. 60Ngaɓa n-aw n-ila mə buwa yo gə ꞌsɔɔ sigi ɓi. To buwa gə Jəjəb ar-je ꞌsɔɔ mə ər gə ɔji dɔ darɔ-ɛ ja. Cibi, n-nduburu pil ər n-ila t-ɛ gə ɓa n-ɔdə n-aw#27.60 Ɓe lə Jiibije le d-uru buwa yo ang ngaa mbal ɓa ꞌsɔɔ mə ɗa d-ar to gə mə kəy be, ɗaa d-ila yo kəne tar. Bawje le ꞌgɔl buwa yo-je kede nam d-ar to gə lo ndo.. 61Məri gə Magədala je gə Məri gə kara d-isi ta buwa yo gə le.

62Ndɔ kara nday, ndɔ gə or-e go ndɔ gɔl rɔ mba ndɔ kuwa kɔr ɗaa, buba njekapoloje gə Parijiyɛ̰je mbo̰ naa d-aw d-inga mbay Pilad 63ɗaa ꞌpa na: Mbay, mə-si ole dɔ tar gə nje kərə dəwje le pa, logə isi ne gə təbə baa ɓi na: To gə ɓo ndɔ munda go kuy gə lə ne nama, n-a kɔsə lo ce buwa yo gə. 64May kar un ndu-i ar-je ꞌngəm ta buwa yo le gə maj-ɛ saar ndɔ gə munda le ja nday tɔ̰y ɓa na, ngan njenendoje lə-a d-a ɗe kɔr nin-e gugu baa kaw kiya ngaɓa təl ɗe kula dəw mə ɓeje na: N-ndol n-ce buwa yo gə tɔgərɔ ja. Be ang nama tar gə ɗəgərə lə-je gə dɔ gugu nee ɗa, a nday ꞌye gə kede piyu. 65Pilad ila-je kəne na: M-ar-si njeɗɔje, ɗaa awje gə je ar-je ꞌngəm ta buwa yo le gə maj-ɛ to gə mə-si njigi. 66Be ɓa d-ɔdə d-aw ꞌgɔl njeɗɔje kar ꞌngəm ta buwa le. Ɗaa ꞌrɛ̰ ta buwa le gə pil ər ngaɓa d-unda njengəm loje t-ɛ gə.

বর্তমানে নির্বাচিত:

Matiye 27: lap

হাইলাইট

কপি