متى 4

إِبْڒِيس يتْجَرَّاب سِيذِيثْنغ عِيْسَى

1سّنِّي اَرُّوْح نِّي ن أَربِّـي يُوْوِي عِيْسَى غَار ڒخْڒَا حمَا اَث يجَرّب إِبْڒِيس. 2وَامِي يࢲُوْمّ عِيْسَى اَرْبعِين يُوْم جَار دْجِيَاڒِي ذ وُوْسَّان يُوْسَا-ٱس-د جُّوْع. 3ئِكَّر ونِّي يتْجَرَّابن يقَارّب-د غَار عِيْسَى ينَّا-ٱس: "مڒَا شك ذ مِّيس ن أَربِّـي، إِنِي-يَاسن إِ يزْرَا-يَا اَذ ذوْڒن ذ اَغْرُوْم."

4ئِنْدق-د عِيْسَى ينَّا-ٱس: "لَّا، لْكِتَاب يقَّار: <بْنَاذم وَار يتْعِيش شَا س وغْرُوْم وَاهَا، ئِتْعِيش س مْكُڒ اَوَاڒ إِݣ يقَّار أَربِّـي.>"#4‏.4 خْزَر أَفسَّار ن شَّرِيعَا ن مُوْسَى (التثنية) 8‏:3. س ثَيُوْنَانِيث، يعْنِي بْنَاذم يدَّر س مْكُڒ اَوَاڒ إِي د يتفّْغن زݣ وقمُّوْم ن أَربِّـي.

5سّنِّي إِبْڒِيس يُوْوِي عِيْسَى غَار ثنْدِينْت ن لْقُدْس، ئِسِيڒِي-ث خ ثْقِيشَّات ن ثمْزِيذَا ثَمقّْرَانْت. 6ينَّا-ٱس: "شك مڒَا ذ مِّيس ن أَربِّـي نْݣز سَّانِيتَا غَار ثْمُوْرْث. أَقَا لْكِتَاب يقَّار: <قَا أَربِّـي اَذ يوصَّا بَاش اَش حْضَانْت لْمَلَائِكَاث نّس. أَش يْسِينْت خ يفَاسَّن نْسنْت بَاش وَار ثڒْقِيفذ ؤُڒَا ذ يج وزْرُو س وضَار نّش.>"#4‏.6 خْزَر زَّبُوْر 91‏:11‏-12.

7ينَّا-ٱس عِيْسَى: "لَّا، لْكِتَاب يقَّار: <وَار تْجَرَّاب شَا سِيذِي أَربِّـي نّش.>"#4‏.7 خْزَر أَفسَّار ن شَّرِيعَا ن مُوْسَى (التثنية) 6‏:16.

8سّنِّي إِبْڒِيس يُوْوِي عِيْسَى غَار ثْقِيشَّات ن يِجّن ن وذْرَار يُوْعْڒَا اَطَّاس. ئِسْمظْهَار-اَس-د مَارَّا لْممْلَكَاث ن دُّنشْت-أَ ذ ثُوْصُبْحَانت نْسنْت. 9ينَّا-ٱس: "أَذَاش ؤُشغ مَارَّا ثِيْنَا مڒَا ثوْضِيذ خ يفَادّن نّش ثْسجّْذذ-اَيِي."

10ئِنْدق-د عِيْسَى ينَّا-ٱس: "رُوْح، بعّذ-اَيِي آ شِّيطَان. أَقَا لْكِتَاب يقَّار: <سجّذ إِ سِيذِي أَربِّـي نّش، عْبذ-يث نتَّا وَاحْذس.>"#4‏.10 خْزَر أَفسَّار ن شَّرِيعَا ن مُوْسَى (التثنية) 6‏:13.

11سّنِّي يبعّذ خَاس إِبْڒِيس. ؤُسِينْت-يد لْمَلَائِكَاث بْذَانْت تْسخَّارنْت خ عِيْسَى.

سِيذِيثْنغ عِيْسَى يتْڒَاغَا-د إِ يمحْضَارن نّس يمزْوُوْرَا

12وَامِي يسْڒَا عِيْسَى بلِّي يَحْيَى اَقَا يتْوَاحبّس، ئِعْقب غَار نَاصِرَا غَار ثْمُوْرْث ن لْجَلِيل. 13وَلَكِن وَار يقِّيم شَا ذِي نَاصِرَا، ئِرُوْح اَذ يزْذغ ذݣ يِجّن ن وبِيلَاج قَّارن-اَس كَفرْنَاحُوْم إِݣ يدْجَان خ طَّارْف ن ڒبْحَر ن لْجَلِيل، جِّهث ن ثْمُوْرْث ن زَفُلُوْن ذ نَفْتَالِي. 14أَمنِّي يكمّڒ وَاوَاڒ نِّي إِي ينَّا سِيذِي أَربِّـي إِ نَّبِي ؤُمِي قَّارن إِشَعْيَا ذݣ يِجّن ن زْمَان:

15<ثَمُوْرْث ن زَفُلُوُن ذ ثْمُوْرْث ن نَفْتَالِي،

ثِنِّي ؤُمِي قَّارن ثَمُوْرْث ن لْجَلِيل،

خ وبْرِيذ ن ڒبْحَر ذِي شَّرْق ن يِغْزَار ن لْأُرْدُن،

مَانِي إِي زدّْغن ؤُڒَا ذ يِنِّي وَار يدْجِين زِي أَيث-إِسْرَائِيل.

16شَّعْب-أَ إِي يزدّْغن ذِي ثَادْجسْت،

أَذ يࢲر ثْفَاوْث ذ ثَمقّْرَانْت.

يِيْنَا يزدّْغن ذِي ثَادْجسْت ن ڒْموْث

أَذَاسن د يمظْهَار نُّوْر.>#4‏.16 خْزَر إِشَعْيَا 9‏:1‏-2.

17زِي سّنِّي يبْذَا عِيْسَى يتْبشَّر يقَّار-اَسن: "تُوْبث، أَقَا يُوْذس-د ڒْمُلْك ن وجنَّا."

18يݣُّوْر عِيْسَى خ شّطّ ن ڒبْحَر ن لْجَلِيل، يُوْفَا ذِنِّي ثْنَاين ن يحدْجَاقن ن يسڒْمَان نِثْنِي ذ اَوْمَاثن. ئِجّن قَّارن-اَس سِمْعَان تْڒَاغَان-اَس س بُطْرُس، اَكذس ؤُمَاس قَّارن-اَس أَنْدْرُس. نطَّرن ثْرَاشَّا ذِي ڒبْحَر. 19ينَّا-ٱسن عِيْسَى: "ذْفَارم-اَيِي-د، أَقَا ڒخُّو إِي كنِّيو غَا اَرّغ ذ يحدْجَاقن ن يِوْذَان." 20ڒخْدّنِّي سمْحن ذِي ثْرَاشِّيوِين نْسن ذْفَارن-ث.

21ئِعْذُو اَغِيڒِين، يُوْفَا ثْنَاين ن وَاوْمَاثن نّغْنِي، ئِجّن قَّارن-اَس يَعْقُوْب ئِجّن قَّارن-اَس يُوْحَنَّا. نِثْنِي ذ ثَارْوَا ن يِجّن ن ورْيَاز ؤُمِي قَّارن زَبَادِي. أَقَاثن ذِي ثْغَرَّابُوْت اَك بَابَاثْسن عدّْڒن ثِڒَاشِّيوِين نْسن. ئِڒَاغَا-يَاسن-د عِيْسَى، 22ذݣ ومْشَان سمْحن ذِي ثْغَرَّابُوْت نْسن ذ بَابَاثْسن ذْفَارن عِيْسَى.

23ئِݣُّوْر عِيْسَى ذِي لْإِقْلِيم ن لْجَلِيل مَارَّا، ئِسڒْمَاذ ذِي ثمْزِيذَاوِين ن أَيث-إِسْرَائِيل يتْبشَّر-يثن س لْإِنْجِيل ن ڒْمُلْك ن أَربِّـي يسْݣنْفَا مَارَّا ڒهْڒَاشَاث ذ دِّعَان ن دَّات ذݣ يِوْذَان. 24ئِفّغ ڒخْبَار نّس ذِي سُوْرْيَا اَمن-ثكْمَاڒ. تَّاوْين-د غَارس مَارَّا يِنِّي يهڒْشن تْعدَّابن س لْأَنْوَاع ن ڒهْڒَاشَاث ذ ڒحْڒِيقَاث، مْكُڒ يمَرْيَاحن ذ يمجْنُوْنن ذ ينشْرُوْفن نتَّا يسْݣنْفَا-ثن. 25ذْفَارن عِيْسَى اَطَّاس ن ڒْغَاشِي زِي لْجَلِيل ذ لْإِقْلِيم ؤُمِي قَّارن دِيكَاپْـلِس ذ ثنْدِينْت ن لْقُدْس ذ يَهُوْذِيَا ذ جِّهث ن شَّرْق ن يِغْزَار ن لْأُرْدُن.

বর্তমানে নির্বাচিত:

متى 4: ريف

হাইলাইট

কপি