يوحنا 17

سِيذِيثْنغ عِيْسَى يتْࢲَادْجَا عْلَاحْسَاب يمحْضَارن نّس اَذ يڒِين ذ يجّن

1وَامِي يسِّيوڒ عِيْسَى خ مَانَايَا، ئِيْسِي ثِيطَّاوِين نّس غَار وجنَّا ينَّا: "آ بَابَا، ثُوْوض-د ڒْوقْث. سمْغَار مِّيش حمَا اَش يسمْغَار. 2مِينْزِي ثُوْشِيذ-اَس جّْهذ خ كُڒ بْنَاذم حمَا اَذ يُوْش ثُوْذَارْث ن ڒبْدَا إِ مَارَّا يِنِّي إِي ذَاس ثُوْشِيذ. 3ثُوْذَارْث ن ڒبدَا ذ ثَا يعْنِي اَش سّْنن بلِّي شك ذ أَربِّـي نِيشَان وَاحْذش، أَذ سّْنن عَاوذ عِيْسَى لْمَسِيح يعْنِي ونِّي إِي ثسّكّذ. 4نش سمْغَارغ-ش ذَا ذِي ثْمُوْرْث، كمّْڒغ ڒْخذْمث إِي ذَايِي ثُوْشِيذ. 5سمْغَار-اَيِي ڒخُّو اَكِذش آ بَابَا س لْعَظَمَا نِّي تُوْغَا غَارِي وَامِي دْجِيغ اَكِذش قْبڒ مَا ٱذ تِيڒِي دُّنشْت.

6سْبيّْنغ-د يسم نّش إِ يمحْضَارن-أَ إِي ذَايِي ثُوْشِيذ زِي دُّنشْت-أَ. شك ثدْجِيذ ذ بَاب نْسن قْبڒ، ثُوْشِيذ-اَيِي-ثن، قَا طَاعن إِ وَاوَاڒ نّش. 7ڒخُّو سّْنن بلِّي مَارَّا مِين ذَايِي ثُوْشِيذ يُوْسَا-د زِي غَارك. 8مِينْزِي نش سِّيوْضغ-اَسَن اَوَاڒ إِي ذَايِي ثُوْشِيذ، نِثْنِي قبْڒن-ث. سّْنن ذ صَّح بلِّي نش زِي غَارك إِي د ؤُسِيغ، ؤُمْنن عَاوذ بلِّي ذ شك إِي ذَايِي د يسّكّن.

9تتَّارغ عْلَاحْسَاب إِ نِثْنِي. وَار تتَّارغ شَا عْلَاحْسَاب إِ دُّنشْت-أَ؛ لَّا، تتَّارغ عْلَاحْسَاب إِ يِنِّي إِي ذَايِي ثُوْشِيذ مِينْزِي نِثْنِي نّش. 10كُڒْشِي مِين غَارِي، غَارك. أُو كُڒْشِي مِين غَارك، غَارِي. نش تْوَاسمْغَارغ زَّايْسن. 11وَار تْغِيمِيغ شَا نش ذِي دُّنشْت، أَذ قِّيمن نِثْنِي ذَايس أُو نش ݣُّوْرغ-د غَارش. آ بَابَا اَمْقدّس، حْضَا-ثن س يِيسم نّش إِي ذَايِي ثُوْشِيذ حمَا اَذ يڒِين ذ يجّن اَم نشِّين. 12وَامِي كِذْسن دْجِيغ، حفْضغ خَاسن س يِيسم نّش إِي ذَايِي ثُوْشِيذ. حْضِيغ-ثن، ؤُڒَا ذ يجّن مَا يودَّر غِير ونِّي تُوْغَا يودَّرن حمَا اَذ يكمّڒ مِين يقَّار لْكِتَاب.

13ڒخُّو ݣُّوْرغ-د غَارك. سَّاوَاڒغ اَوَاڒن-أَ أُو نش عَاذ اَقَايِي ذِي دُّنشْت حمَا اَغَارْسن ثِيڒِي ڒفْرَاحث ينُو ثكْمَاڒ. 14سِّيوْضغ-اَسَن اَوَاڒ نّش إِ يمحْضَارن ينُو، نِثْنِي عِيفّن-ثن يِوْذَان مِينْزِي وَار دْجِين شَا زِي دُّنشْت-أَ اَمشْنَاو نش وَار دْجِيغ شَا زِي دُّنشْت. 15نش وَار ذَاش تتَّارغ شَا اَثن ثْسُوْفْغذ زِي دُّنشْت-أَ؛ لَّا، تتَّارغ-اَش اَثن تحْضِيذ زِي شَّرّْ. 16نِثْنِي وَار دْجِين شَا زِي دُّنشْت، أَمشْنَاو نش وَار دْجِيغ شَا زِي دُّنشْت. 17صفَّا-ثن س لْحَقِيقَا، أَوَاڒ نّش نتَّا إِي يدْجَان ذ لْحَقِيقَا. 18مَامّش ذَايِي ثسّكّذ شك غَار دُّنشْت، ؤُڒَا ذ نش سّكّغ-ثن غَار دُّنشْت. 19نش صفِّيغ يخف ينُو خ سَّبَاب نْسن حمَا اَذ تْوَاصفَّان ؤُڒَا ذ نِثْنِي عَاوذ س لْحَقِيقَا.

20وَار تتَّارغ شَا عْلَاحْسَاب إِ نِثْنِي وَاهَا، تتَّارغ عْلَاحْسَاب إِ يِنِّي إِي غَا يقبْڒن اَوَاڒ نْسن حمَا اَذ اَمْنن زَّايِي. 21حمَا اَذ يڒِين مَارَّا ذ يجّن آ بَابَا، أَم شك اَقَاش ذَايِي نش اَقَايِي ذَايك. حمَا اَذ يڒِين نِثْنِي عَاوذ ذ يجّن ذَايْنغ. حمَا اَذ اَمْنن يِوْذَان قَا ذ شك إِي ذَايِي د يسّكّن. 22نش ؤُشِيغ-اَسَن لْعَظَمَا إِي ذَايِي ثُوْشِيذ حمَا اَذ يڒِين ذ يجّن اَم نشِّين ذ يجّن. 23شك اَقَاش ذَايِي نش اَقَايِي ذَايْسن، حمَا اَذ مُوْنن اَذ يڒِين ذ يجّن. حمَا اَذ سّْنن يِوْذَان قَا شك ثسّكّذ-اَيِي-د غَار يمحْضَارن-أَ، تْحِبِّيذ-ثن اَمشْنَاو مَامّش ذَايِي تْحِبِّيذ نش.

24آ بَابَا، يِيْنَا ذَايِي ثُوْشِيذ خْسغ اَذ يڒِين اَكِذِي مَانِي مَا دْجِيغ نش حمَا اَذ ࢲرن لْعَظَمَا ينُو إِي ذَايِي ثُوْشِيذ مِينْزِي شك ثْحِبّذ-اَيِي قْبَڒ مَا ٱذ تِيڒِي دُّنشْت. 25آ بَابَا يدْجَان نِيشَان، دُّنشْت وَار ش ثسِّين شَا وَلَكِن نش قَا سّْنغ-ش. يِيْنَا اَكِذِي سّْنن قَا ثسّكّذ-اَيِي-د شك. 26نش سْبيّْنغ-اَسن-د يسم نّش أُو عَاذ اَث سْبيّْنغ حمَا اَذَايْسن ثِيڒِي ڒمْحِبّث نِّي إِي زِي ذَايِي تْحِبِّيذ، أَذَايْسن يڒِيغْ نش س يِيخف ينُو."

বর্তমানে নির্বাচিত:

يوحنا 17: ريف

হাইলাইট

কপি