Jenesesi 1
1
Pandutchiwa wa jatene
1Voroma vene, Mulugu ohopandutcha ilambo ya zulu na ilambo ya vati. 2Mbwenye Mulugu agapandutchile, ilambo ya vati yali yahanasakanyedeye eto kamwalive yengo. Tchoira ilambo ya vati yohozala mahindje odiha. Eto ilambo yatene yohokana isi ilukulu. Mwa ora yenno, Munemba wa Mulugu oviravira vazulu va mahindje.
3Evale Mulugu ohowonga ira: <<Wareya ukalewo!>> Evale wareya wohokalawo. 4Noira enne, Mulugu ohoona ira: <<Wareya kwa pama.>> Muwari mowareya mule, ohogawamo wareya na isi.#1:4 ohogawamo wareya na isi: Mulugu ohosakanya wareya ahanapandutche nzuwa nne mwedi nne nyenyedi. So wareya uzenle muwari mwa kopolo daye bahi. Tchi yengo imohive inafuna za ireya sogolro. Tchoira nimburo nogomiheda Mulugu unafuna liye avaha atwaye nnaza nikale Jeruzalemu Muxa. Muwari mwa Jeruzalemu Muxa kamunafuneya nzuwa nne mwedi mwasiwa wareya uwa unakala Nabwiya Mulugu mwinnya. (Jowandeliwa 22:5) 5Mulugu ohovaha wareya nzina na ntana, isi ohovaha nzina na mahiyu. Noira eno, yohozawo isi, unde tcha. No nali siku noroma.
Siku nanembinli
6[Siku nanembinli] Mulugu ohowonga ira: <<Vikale madilre zela mahindje ira mahindje amohi kakale zulu, mahindje amohi kakale vati.>> 7Mulugu ohosakanya ira pandi imohi ikale mahindje a zulu, mahindje amohiwa kakale mwilamboni ya vati ira vihale nimburo eno vari viwa. Mwa enne yohoireya nnga mwafunele liye. 8Nimburo nali vari va mahindje a zulu na mahindje a vati,#1:8 Nimburo nali vari va mahindje a zulu na mahindje a vati: Nimburo nnawongiwa ti neno nnafwanyeya roma vazulu va teya, vevo vinanyingala hiyo dowa zulu wewo unavava mbalrame. Ku wonga Mulugu ohopandutcha nimburo nokana mwelra ira hiyo niwande vuma. Eto hiya ilambo ya vati, kanilivo nimburo mutu unawanda liye vuma. Mbwenye mwa ora yenno ilambo yatene yalive yokuneleyene na mahindje. Mulugu ohovaha nzina na zulu. Noira eno, yohozawo isi, unde tcha. No nali siku nanembinli.
Siku naneraru
9[Siku naneraru] Mulugu ohowonga ira: <<Mahindje a ilambo ya vati kagumanele nimburo nimohive ira nioneyege nimburo noumma.>> Evale yohoireya nnga mwawongele liye. 10Nimburo noumma nne, Mulugu ohovaha nzina na teya. Nimburo na mahindje kagumanne nne, ohovaha nzina na bara. Agairile eno, Mulugu ohoona ira tchapama.
11Evale Mulugu ohowonga ira: <<Mwilamboni ya vati nnafuna teya imelege jomela. Muwari mwa jomela jile, jikalemo jalo jovaha mbewu eto dikalemo mitengo dokana jovaha eto jovaha jiwa jikayegena kongolo diwa ira kada yomela imelege na ikalelo yaye yaye.>> Mwa enne yohoireya nnga mwawongele liye. 12Teya yohomela jomela. Muwari mwa jomela jile johooneya jalo jovaha mbewu na mitengo dovaha jalo jokana kongolo diwa. Kada yomela yohokana yovaha ya ikalelo yaye yaye. Agairile eno, Mulugu ohoona ira tchapama. 13Noira eno, yohozawo isi, unde tcha. No nali siku naneraru.
Siku nanennayi
14[Siku nanennayi] Mulugu ohowonga ira: <<Jikalewo jomoneya nimburo na zulu ira jigawe ntana na mahiyu. Jomoneya jile jitonyihedege matempu na malambwiwa na yaka diwa.#1:14 Jomoneya jile jitonyihedege matempu na malambwiwa na yaka diwa. Nzuwa nakumaga nnovayela iziwa ira nili tempu ya mabebehi. Nzuwa nafiya vamuru, nnoiziwa ira nili tempu ya ntana. Nzuwa namalelawo, nnowanda iziwa ira ninna tempu ya mahiyu. Umahiyu wamalaga nnowanda iziwa ira ninna siku nanembinli, ante dowagave eno, hiyo fiyedaga iziwa mwedi na yaka. Jatene ejo jinawanda iziweya na mwasa wa jomoneya jinafwanyeya zulu. 15Jomoneya jile jikalege nimburo na zulu ira jimoneyege ilambo ya vati.>> Mwa enne yohoireya nnga mwawongele liye. 16Eto Mulugu ohosakanya jomoneya mbinli jilukulu. Yomoneya imohi ilukulu inairiwa nzuwa ira imoneyege na ntana. Yomoneya imohiwa ing'onong'ono inairiwa mwedi ira imoneyege na mahiyu. Eto Mulugu ohosakanya nyenyedi. 17Jatene jejo Mulugu ohela nimburo na zulu ira jimoneyege ilambo ya vati, 18eto ira jikalegewo ntana na mahiyu ira jigawege moneya na isi. Agairile eno, Mulugu ohoona ira tchapama. 19Noira eno, yohozawo isi, unde tcha. No nali siku nanennayi.
Siku nanetanu
20-21[Siku nanetanu] Mulugu ohowonga ira: <<Mwiko mukale somba dohiyana-hiyana na jatene jene johiyana hiyana jinafuna wendaga emo. Jikale pwi pwi.>> Vevale na ibaribari dohooneya somba da mbara dile, dilukulu, ding'onong'ono na jatene jene jinawenda mwiko, kada yengo na ikalelo yaye yaye. Tempu imohive, Mulugu ohowonga eto ira: <<Nimburo na zulu ukale mbalrame dohiyana-hiyana na jatene jene johiyana hiyana jovava zulu. Jikale pwi pwi.>> Vevale na ibaribari dohooneya mbalrame dile, dilukulu, ding'onong'ono na jatene jene nnavava zulu, kada yengo na ikalelo yaye yaye. Agairile eno, Mulugu ohoona ira tchapama. 22Evale Mulugu ohoreliha jatene ejile eraga: <<Somba direlane eto diindjivihane mmahindjeni a bara. Eto mbalrame diindjivihane mwilamboni.>> 23Noira eno, yohozawo isi, unde tcha. No nali siku nanetanu.
Siku nanetanu na nimohi
24[Siku nanetanu na nimohi] Mulugu ohowonga ira: <<Mwilamboni mukale anavinyama ohiyana-hiyana, kada mwanainyama na ikalelo yaye yaye. Mukale anavinyama a vande eto mukale anavinyama a mukokolani. Mukale anavinyama alukulu na ang'ining'ini, jomburunuwa, na anavinyama atene anno anafwanyeya mwilamboni ya vati, kada mwanainyama na ikalelo yaye yaye.>> Mwa enne yohoireya nnga mwawongele liye. 25Mulugu ohosakanya anavinyama a mukokolani na a vande, kada mwanainyama na ikalelo yaye yaye. Mulugu eto ohosakanya jomburunuwa jatene ja vati, kada yomburunuwa na ikalelo yaye yaye. Agairile eno, Mulugu ohoona ira tchapama.
Pandutchiwa wa atu
26Eto Mulugu ohowonga ira: <<Ndoweni nimusakanye mutu olingana na hiyo, ofwalrafwana na hiyo,#1:26 Ndoweni nimusakanye mutu olingana na hiyo: Va Mulugu unawonga nnga atu ambinli owu araru. Mulugu para wongaga ira: Ndoweni, tchoira muwari mwa Mulugu, agalive Mulugu mmohive, ukalawo Mulugu Baba, Mulugu Mwana (Yesu) na Mulugu Munemba Otchena. Ku wonga Mulugu apandutchaga jatene ali vamohi na Yesu eto ali na Munemba Otchena. Zela ibaribari ira Yesu Mwana Mulugu ohopandutcha jatene, nione eto Juwawu 1:1-3; Koloso 1:16; Eberewu 1:2. Mulugu awongaga olingana na hiyo, ofwalrafwana na hiyo ku wonga anipandutchile hiyo atu olingana na liye muwari moira liye gu mutu otonga eto liye anivahile ira nikale ambwiye otonga jatene jinafwanyeya mwilamboni ya vati. Eto fwanyeya ira Mulugu gu mutu okana zelru no umbuwela. Na hiyene nihikana zelru no umbuwela kwaranya vinyama na jatene jinafwanyeya mwilamboni ya vati. ira atongege somba da mbara, mbalrame da zulu, vinyama, na jatene ja ilambo ya vati na jomburunuwa jatene jinamburunuwa mwilamboni ya vati.>> 27Mwa eno, Mulugu ohompandutcha mutu olingana na liye. Mwa ibaribari Mulugu ohompandutcha mutu olingana na liye. Ohompandutcha mulombwana na muhiyana.
28Evale Mulugu ohareliha aawongagana eraga: <<Mubalihane, muindjivihane, muzale ilambo ya vati.#1:28 Mubalihane, muindjivihane, muzale ilambo ya vati. Zela mazu a Mulugu, gumana wa mulombwana na muhiyanaye kahi yengo yabure. Mwasiwa Mulugu aarumile ira karome gumana kahanamutegele. (Jenesesi 2:24) Zela muselu mmohive owonga zela gumana, nione eto 1 Korinto 7:4-5. Mukalege ambwiye a jatene. Mutongege somba da mbara, na mbalrame da zulu, na vinyama datene dokana ingumi nnawenda mwilamboni ya vati.>>
29Eto Mulugu ohawandela atwale eraga: <<Kaing'anani miyo nnouvahani udja watene unadjege nyo. Munerege dja jalo jatene jinafwanyeyana mbewu na jovaha jatene ja mitengo dili datene.>>#1:29 Munerege dja jalo… na jovaha jatene ja mitengo: Voroma vene Mulugu kaavahile atu ira kadjege anavinyama. So atu kadja jalo bahi. Ora yenno ukwa kwaliwo, mwasiwa tega wali wahanakalewo. Mwa tempu yenne anavinyama na atu kali kahanaiziwe ukwa. 30Eto Mulugu ohawandela atwale zela jodja jafuna djaga vinyama, liye ira: <<Zela anavinyama ali atene, roma anavinyama a mukokolani, nari mbalrame datene dovava zulu, nari jowambaza, malringana mwanainyama uli watene ovuma, okana ingumi, jodja jiwa miyo nnaavaha jengo jomela jititi ira kadjege.>> Mwa enne yohoireya nnga mwawongele liye.#1:30 Zela anavinyama… miyo nnaavaha jengo jomela jititi ira kadjege: Sawasawa nnga voroma vene atu tchadja mwanainyama, muwari mwa anavinyama, kwaali takunana. Roma mbuzi, dowa podogoma dowa mwanainyama uli watene, jodja jiwa kadja jomela jititi bahi.
31Evale Mulugu ohoona jengo jatene japandutchile liye. Agaonne, Mulugu ohowonga ira: <<Jatene jene jipandutchile miyo, jihikala pama mayiji.>> Noira eno, yohozawo isi, unde tcha. No nali siku nanetanu na nimohi.
বর্তমানে নির্বাচিত:
Jenesesi 1: iLolo
হাইলাইট
শেয়ার
কপি
Want to have your highlights saved across all your devices? Sign up or sign in
© 2018 Visão Integral
