Luka 11

Uluputo lwa Mwene

1Lumo lelʼuwene ahaputa kumo, ilelo lwʼamazile pe woka muvasundikwa vakwe ahayanga nawo ahati: Mwene, naswe utusambilizyajʼukuputa, inza shʼuYohani avasambilizizyʼavasundikwa vakwe.

2-4: Mat. 6,9-13.

2Uwenʼahavavuzya ahati: Inga mukuputa pe mutinji:

Tata [witu wa kumwanya],

izina lyaho lifinjilwaje,

uvumwene vwaho vwinzaje

[zyʼukasimʼiwe zye zivombelwaje

napansʼipa fwe kwe kumwanya].

3Niṿwa musanyʼunʼiṿintʼutupanje kwisiku kwisiku,

4uswilʼamalandu gitu, inza she naswe tukuswilʼamalandu ga vamwitu,

unʼizyakwe unʼizyakwe,

utatuvishe mulutazyo [nkandʼutuposhe nakumbivi].

Ukusyelemetela muluputo, nishiholanyo sha mujenzi we ngakwinza pavusiku pahati

5PʼuYesu ahati: Wokʼunanʼimwe avanje nuwamwavo avale kukwakwe pavusiku pahati, atinji: Weya, umpavilʼamakati gatatu, 6yenya, uwamwitu uwʼidala ayinzile ali kukwane, ilelʼine visoṿilʼiṿwa kumutetela. 7Uwenʼuwa munyumba ayamule atinji: Weya, utandisyajʼiwe, shʼulwiji lwigalilwe Itali, ine navana vane tukasite swenti. Pe nati mbushe nohavili nkupanje? 8Leshʼimbavuzye lelʼine: Nashengʼatakuvuhʼukumupa she mujenzi wakwe, pope akuvuha shʼamusinjilizizye, akumupa ṿiṿwo ṿwʼakwanza.

9-13: Mat. 7,7-11.

9Zye nane nkuvavuzya lelo nkuti: Simulavaje, pe mulipelwa; simulondaje, pe muliyaga; simuhonyonsyaje kulwiji, pe muliyigulilwa. 10She vonti ava venga vakulava, ve vakuposhela; vonti nava venga vakulondola, ve vakuṿwaga; vonti nava venga vakuhonyonsya kulwiji, ve vakwigulilwa. 11Imwe mwe muvaliye amwʼalipʼunanʼumuntʼumupapamwana, ingʼuwenʼumwana alaṿilʼumukati, wʼakumupʼivwe, havili uwenʼumwana ingʼalaṿilʼinswi, wʼakumupʼinjoha? 12Ingʼuwenʼala-ṿilʼiji, wʼakumupʼinkonya? 13Apene lelo inga namwenemwe, mwe vanyala vwelele, ingʼavana vinyu mukuvapʼiṿwa kuvapʼi-ṿwinza, pʼuSo wa kumwanya asite ukupitilizyʼukuvapʼuMupepʼuMufinjile vuvo, venga vakulava kukwakwe?

UYesu akwamula lwe vakuti akuvombʼimbombo kuvutuli vwa Setano

14-26: Mat. 12,22-30; 43-45. Mal. 3,22-27.

14LumʼuYesu ahafumwʼimpepʼimbivi ye yali wʼushinunu. Ilelo lwʼifumilʼimpepʼimbivi, pʼumuntu ahayanga. Pe vahasukumilʼavantu impuga yonti. 15Nkandi vamo vahati: Impepʼimbivi akuzifumwa mwa Belizibuli mwa songo wa mpepʼimbivi. 16Vamʼavamwavo vahati tumulinje, pe vahalava shokʼishimanyilo sha kumwanya kukwakwe. 17Uwene nyene lwʼaziwenyʼinsivo zyavo, pʼahavavuzya ahati: Vwontʼuvumwene inga vululinkine vwuvo vutupu, pe vukusamuha, ilelo pe ninyumba zijende nukugwilana. 18Apene lelo inga nawe Setano alulinkine wuyo mutupu, pʼishinamwene shakwe shishindame vuli? She mukuti: Impepʼimbivi akuzifumwa mwa Belizibuli ine. 19Apene lelo ingʼimpepʼimbivi ine nkuzifumwa mwa Belizibuli, pʼavenʼavana vinyu imwe vakuzifumwa mwa nanu? Zinizi valivalonga ve vana vinyu. 20Apene nyene ingʼimpepʼimbivi nkuzifumizya lwe lwove lwa Mulungu ine, pe fwane lelo uvumwene vwa Mulungu vuvafishiye. 21Uwa nguṿu ingʼayipatinkinyʼimpalala zyakwe, ingʼakusungʼinyumba yakwe, pe ṿwontʼiṿijela ṿwakwe ṿikuva mwa. 22Apene nyene inga akumwinzila uwamwavo wʼamulusizyʼinguṿu, akujenda nukumpota, pʼakusompola nimpalala zyakwe zyonti zyʼahasimpilagʼuwene, akusampa ṿwonti akugavanya. 23Uno we tute swenti nane, we tugunjiline. Uno: wengʼatakuntulʼukuvunganiha, wʼakunyampanya.

Amahosi ge gakuloleha muvuyananyi uvusita kulunjiha

24Lwengʼimpepʼinkandamanu ifumile mumuntu, pʼikuyeluha ikumala muvuyo uvusitaminzi, ikwanzʼapa kutuzya. Ilelo ikulinga itapazile napamo, pʼikuti: Nkuvwela kunyumba yane mwe nafumile. 25Ilelo lwʼiyinzile, pʼihaga yusilwe inonelezilwe. 26Ilelo pʼikuvalʼukusendʼizinjʼimpepo zisano nazivili izyamwavo indusyi uvunyala nakukwakwe. Pe zikwinjila, zikudila mumwo, ilelo pʼumuntʼuno ulwa pisinda shinishi pʼakuhalambana akulusya kuzya lulwo.

27Ilelo lwʼakuyanga zinizi, pe wokʼumwantanda wʼali mumpuga yiyo ahavilishilʼizwʼipiti ahati: Lusangalusʼulwanda lwe lwakunyatuyʼiwe, masangalusu namavele ge wonsilʼiwe. 28Uwenʼahamula ahati: Vasangalusu vuvo venga vakwiṿwʼizwi lya Mulungu ve vakulisunga.

Insoshe kuzya kulondolʼiṿimanyilo

29-32: Mal. 12,38-42.

29Ayazile lelo vakumukululushilʼavantu, pʼahandʼukuyanga ukuti: Avantu va shinishi ve vantu vanyala. Vakwanzʼishimanyilo, vatalipelwa nashimʼishimanyilo nkandʼishimanyilo sha Yona sheka. 30Shʼinza shʼuYona ali shimanyilo kuvantu vamu-Niniṿe, shʼalihonzyaga vovulo nuMwanamuntu kuvantu va shinishʼiva. 31Umwenʼumwantanda wa munsi ya kumumongo alivuha poka navantu va shinishʼiva pavulonzi, alivalonga ilya kuvatupula, shʼuwenʼafumile kwʼipeleleyʼinsi, ahinzʼukutejelezyʼinjele zya Solomoni. Nkwʼali panapa umupiti nakwa Solomoni. 32Avantu vamu-Niniṿe valivuha poka navantu va shinishʼiva pavulonzi, valivalongʼilya kuvatupula, shʼavene vapindusile pala pʼuYona ahavavuzyagʼinongwa. Nkwʼalipo panapa umupiti nakwa Yona.

Insambilizyo kufuma mushiholanyo sha nyale

34-36: Mat. 6,22; 23.

33Yope ninyale ingʼumuntu ayiholelezizye, pʼatakuyizyiha mwizyungululu, atakuyikupishila nishivo ndali, akuyiviha pamwanya pashilemo sha nyale, vonti ve vakwinjila munyumba ukuti vayilolʼukwaha. 34Inyale ya mumuvili lye lyinso lyaho. Ilelo lwengʼilyinso lyaho lizelu, pe wope numuvili waho akuva muzelu. Nkandʼingʼilyinso lyaho linyala, pe wope numuvili waho akuva nishisi. 35Uyandaje lelo uluhozyo lwʼuli nalwo ukuti lutayipelajʼukuva shisi. 36Ilelo ingʼumuvili waho wonti akuhozya ate nishipembe nashimo isha shisi, pʼuwene wonti lukuvʼuluhozyo lutupu, inza shenga yope ninyale ikuhozya mululangalilo lwakwe.

UYesu akuvapilila avaFalisayi navamanyakalata

39-52: Mat. 23,1-36.

37Ilelo lwʼalemilʼukuyanga zinizi, pe wokʼumuFalisayi ahamwita ukulya nawo iṿintu ṿwa kulavuha mumwakwe mula. Pʼuwenʼahinjila ahatendama. 38UwenʼumuFalisayi lwʼamuwenyi, pʼahasukumila shʼayazile atakutalihʼukugeza munyove lwʼakuti alye. 39Pʼuwenʼahamuvuzya ahati: Imwe mwe vaFalisayi mukwozya nishikombe nimbakuli kunzi, nkandi muhati mumwinyu vwe vupumaṿintu vutupu, vwe vunyala vutupu vwizuye mumwo. 40Mwe vawelewele imwe, wʼapezile kwe kunzi atapezile mwope namwe muhati lelo? 41Ywenga yili muhati, ṿwe fwane muvapanjʼavantu ṿivanje ṿwa shikuku, pe ṿwonti ṿikuva ṿizelu kulʼimwe. 42Ye mwe, mwe vaFalisayi mwe, napampilipili napanyunzu napaṿiyavo ṿwonti mukusavula iṿwa pishumi, nkandʼizyene izya vulonzi nizya kumukundʼuMulungu—zye mukuzishilanya. Inga mwatinji zimʼizi tuzivombaje, Zyope nizyamwavo zila zye mutazishilaje. 43Ye mwe, mwe vaFalisayi, mumasinagogi mwe mukwanzʼiṿitengo ṿwa vupiti, napamasolo ukutʼavantu vavalamushe. 44Ye mwe, mwe muli fwe mbipa zye zitakuloleha, zyʼavantu vakuhanya pamwanya, vatakuzimanya. 45Pʼahamula wokʼumumanyankomelezyo ahati: Musambilizi, amazwʼiga gʼukutuliga naswe iwe. 46Uwenʼahati: Ye mwe, namwe mwe vamanyankomelezyo, mwe mukuvavegazyʼamaligʼamaṿunzavantu, imwe nyene mutakugapalamansyʼamaligo nulwove lwinyu nga lwoka vwelele. 47Ye mwe, mwe mukuzenjelʼimbipa zya vakuvwi, nkandʼavaso lelo ve vavagozile. 48Kwe kuva mukuziṿumbulʼapazelu havili mukuzyitishila namwenemwe zye vavomṿilʼavaso. Shʼavene vavagozile, imwe mukuvazenjelʼimbipa zyavo. 49Zye zizyo ziyanzile nzila injele zya Mulungu zihati: Nkuvatumila navakuvwi navapositili. Vamo valivagoga, vamo valivayumṿanya, 50amavanda ga vakuvwi vonti, ge gitisile shima ukufuma pe yalizilwʼinsi, ge galanduzilwe kuvantu va shinishʼiva, 51ukufuma pamavanda ga Hebeli ukwinzʼukufiha kumavanda ga Zahaliya uku, we vamugozile pahati nishifinjilo ninyumbʼimfinjile. Ena nalyoli nkuvavuzyʼine nkuti: Valilanduzilwaga avantu va shinishi vanava. 52Ye mwe, mwe vamanyankomelezyo, mwe muzyisilʼishigulilo sha kuvusinkamizyo; namwe mutinjiye mumwo, havili vope nava ve vakuti twinjile muvahandanizizye. 53Ilelo lwʼuYesu afumile pala, pe navamanyakalata avaFalisayi vahandʼukumuṿitililwa nkani nukumuvuzilizyʼinyinji, 54ukuti vamwambambe nukwaga zimo mwilomu lyakwe.

বর্তমানে নির্বাচিত:

Luka 11: NYi1965

হাইলাইট

কপি