Banɔkpɛkpɛ Axɔ̃ɛ 25
25
Paulo Akɔ Asɛ Balɔkɔ Yɛibuiɛ Avɛnɔ Romanɛ Ekusiɛ
1Ewui tata ede gɛ ediku kesiakpa nabha, Festo alɔ ede kaisarea ewu avɛ Yerusalem, 2ɛkɛlɛ banɔlũazazã gbagbla nɛ̀ Yudanɛ otugbà banunɔ aba yɛɔkɔ nɛ̀ ebuiɛ gɛ balɔkɔ ebhui Paulo ulũ nɔ. 3Odunu ɔlɛ bebisi Festo kɛtɔ ɔsɛ tɛ̀ bekù yɛawɔ̃ tɛ̀ akɔ bebú Paulo asɛsɛ Yerusalem, ɔmɔsɛ bazã tikpukpũ mɛ pɛ bezepo yɛ, tɛ̀ beyii nɛ kidzoɔ mɛ. 4Festo ebuiliulũ asɛ, “Paulo akpasɛ ɔɖavũ mɛ nɛ Kaisarea, kɛlɛ mɛtsyɛ ɛvɛ ɛkɛlɛ otsiɛ tsiɔ̃. 5Nɔkɔ wɔnɔ otugbànɛ teli aba aplɛnɔ mɛ, tɛ̀ bɔlɔkɔ ebuiɛ nɛishu nɛ ɛkɛlɛ, tɛ̀ buɖì ɔsɛ̀ kibui kpa tili lɛ yɛishu dza.”
6Gɛ aŋã ewui asɛ tasɛ alo kɛfɔ̀ nɛ balɛ ɔbhaa, ezhi avɛ Kaisarea nɛ̀ besheshèɛ, kɛlɛ gɛ keliɛ azaa, ɛkulu kebhu kazãa, kɛlɛ akɔ ɔsha asɛ bagbana Paulo amana yɛamɛ. 7Kibeɛ gɛ Paulo ebekuɔ, Yudanɛ gɛede Yerusalem abaa ebeshogò nɛishu, pɛ balɔkɔ ebui gagalĩ nɛishu, ebuiɛ gɛ batɛ alà alɛ mɛ ebú tsyɛ.
8Kɛlɛ Paulo ebu yɛishu ulũ asɛ, “Ɛgɛ bhɛtɛ kibui kpa nanà nɛ Yudanɛ ɔsha, alo Akaavũɔ alo Kaisaro shu.”
9Festo gɛapɛ asɛ tɛ̀ ekù Yudanɛ awɔ̃ soɔ, etseɖe Paulo asɛ, “Ɔpɛ ɔsɛ tɛ̀ owù ɔvɛ Yerusalemuɔ tɛ mɛidì kulu kebhu nɛ̀wɔ nɛ ebui alɛ gɛ balɔkɔ nɛ wɔshuɔ nɛ ɛkɛlɛ dza?”
10Paulo ebuiliulũ asɛ, “Kaisaro yɛ kebhu okulukɔ mɛ lɛ otsiɛ, ɛkɛlɛ kɛlɛ ɔsɛ bekulu kebhu nɛ mɛ. Ɛgɛ bhɛtɛ kibui kpa nanà nɛ̀ Yudanɛ shu, asɛ gɛ nɔonyi piapii nɔ. 11Onupɛ edzi asɛ kibui kpa tili mɛbhɛtɛ pɛ kɛshɔnɔ ɔkɔ butsì tsyɛ elo, ɛgɛɖɔ ɔsɛ ititsì. Pɔ onupɛ edzì asɛ ebuiɛ gɛ Yudanɛ alɔkɔ nɛ mɛishu etinu ebui gbãa, anɔ nanà agɛmɔ kidzo tɛ̀ alɔkɔ mɛ akpɛ balɛ ahɔɛ mɛ. Ɛkɔ wɔ Kaisaro kɛtakpu ɔsɛ tɛ olũ mɛ kibui ɛlɛ!”
12Kibeɛ gɛ Festo adɛtɔ̃ kɛtakpu nɛ̀ yɛ ɔmaesheshèɛ ebekeɛ, adalɛ ɛlɛ mɛ asɛ, “ɔkɔ kɛtakpu ɔsɛ kebhuɔ avɛ Kaisaro ɔkɔ kliso, Kaisaro ɔkɔ wɔbɔ̀ vɛ!”
Festo Adɛtɔ̃ Kɛtakpu Nɛ̀ Ekusi Agripa
13Ewui gulũi tieli edeɛ, Ekusi Agripa nɛ̀ Bernike ebekù Kaisarea tɛ̀ badɛ sɛnɔ Festo. 14Gɛ babàzã ɛkɛlɛ ewui kpekpè mɛ soɔ, Festo adɛ tsaɖakɛ Paulo ebuiɛ gɛ balɔkɔ nɛishuɔ nɛ̀ Ekusiɛ. Aɖɔ asɛ, “Anyɛ teli alɛ ɛkɛlɛ gɛ Felike ashɛnɛ ahɔɛ elù asɛ ɔɖavũmɛ azazã. 15Kibeɛ gɛ ɛbawù ɔvɛ Yerusalemuɔ, banɔlũazazã gbagbla nɛ̀ Yudanɛ besheshèɛ alɔkɔ ebui nɛ yɛishu, kɛlɛ bezebisi kidzo asɛ tɛ̀ beyìi.
16“Itseɖe balɛ ɔsɛ, kitinu Romanɛ ɔkɔ̀ ɔsɛ tɛ̀ balɔkɔ anɔ nanà akpɛ ahɔɛ tɛ̀ atsyɔa kitemɛ bamɛ nɛ̀ bamɛ, nɛ̀ bagɛ bebhui yɛuluɔ flogo tɛ̀ amɔ kidzò edibu yɛishu ulũ, nɛ̀ ebuiɛ gɛ balɔkɔ nɛishuɔ. 17Gɛ mɛ nɛ alɛ ba ɛkɛlɛ̀, ɛgɛ kɔ kebhuɔ awɔ̀ kidè, pɔ ikulu kebhu kazãa nɛ kelizaza mɛ pɛ ɛkɔ ɔsha sɛ̀ bagbana anyɛ amana. 18Kibeɛ gɛ bagɛ bebhui yɛulũ alɔɛtití asɛ tɛ baɖɔaɖɔɔ, bagɛ ìbhui yɛulũ nɛ̀ kibui kpa nanà shu asɛ kana gɛ ɖiɛ ana. 19Pɔ, ebuiɛ teli gɛ lakpà aplɛnɔ balɛ ɛkɔɔ baza wlɔãkɛ niyɛ, nɛ̀ anyɛ teli gɛetitsí pɛ beekulu yɛasɛ Yesuɔ shu, anɔ gɛ Paulo xɔnɔ aɖɔ asɛ akalɛ nɛkpã. 20Itinyi kɛgɛ babhɛtɛ nɛ ebui alɛ nɛidi mɛ nyɔnyɔ̃ shu, kliso ibisi yɛ ɔsɛ, adɛmɛ asɛ abavɛ Yerusalemuɔ tɛ̀ bedi kulu kebhu niyɛ, nɛ̀ ebui alɛ gɛ balɔkɔ nɛ yɛishuɔ dza? 21Kibeɛ gɛ Paulo ebisi asɛ tɛ̀ bashɛnɛ ahɔɛ nɛishu ɔkɔ kɛmadi ekusi gbagbla tɛ̀ ebhui kibui mɛ kɔyɛɛ, akɔ ɔsha asɛ, batɛ̀ shɛnɛ ahɔɛ nɛishu odiyinɔ ɔsɛ̀ ɛlɔkɔ yɛ sɛsɛ Kaisaro.”
22Kɛlɛ Agripa etseɖe Festo asɛ, “Mɛtsyɛ bapɛ sɛ tɛ̀ ilũ anyɛ alɛ ebuiɛ.” Ebuiliulũ asɛ, “Kivũ tsyɛ òbolũ yɛebuiɛ.”
Paulo Avɛ Agripa Amɛ
23Gɛ keliɛ azaa, Agripa nɛ̀ Bernike aba, nɛ bɔdɔ̃ kpɛkpɛ gbangbã mɛ̀, kɛlɛ yɛ nɛ̀ ɛzãkɔ ɖaɖama eleteɛ nɛ̀ bagɛ baagbanà ɔmaa etsoku buvũɔ mɛ gɛ bebèlũ kibuiɛ. Nɛ Festo ɔshakɔkɔ mɛ̀ koɔ, kɛlɛ badɛgbanà Paulo amana. 24Festo aɖɔ asɛ, “Ekusi Agripa, nɛ̀ bagɛ alɛ bɔlɔ ɔbha nɛ ɛkɛlɛ, nɔɔmɔ anyɛ alɛ dza! Yudanɛ petee, ebhui yɛulu nɛ Yerusalem nɛ̀ Kaisarea ɛkɛlɛ, nɛ ozĩ kpɛkpɛ shu gɛ kɛma ɔsɛ tɛ̀ ewlui azã nɛkpã. 25Ɛbamɔ ɔsɛ̀ agɛ bhɛtɛ kibui kpa nanà, gɛ kɛshɔnɔ ɔkɔ butsí, pɔ gɛ ebisi asɛ kɛmadi Ekusi Gbagbla elũ yɛibuiɛ soɔ, ɛbhɛtɛ ekpeɖekpeɖe mɛ ɔsɛ ɛbalɔkɔ yɛ sɛsɛ Roma. 26Pɔ kibui nanà pɔtìi ma mahɔɛ gɛ ɛba fɔnɔ nɛishu sɛsɛ Ekusi Ohumi eleteɛ. Kliso ɛgbana yɛ mana wɔnɔ petee amɛ, asɛ wɔ Ekusi Agripa amɛ ana, sɛ tɛ̀ odenɔ kibui ɛlɛ mɛ nyɔnyɔ̃ niyɛɛ, ɛbà mɔ kibui tili fɔnɔ. 27Ɔmɔsɛ gɛnɛ bubuti ibui kinù ɔsɛ tɛ̀ ɛlɔkɔ ɔɖavũmɛ azazã ɔsɛsɛ gɛ onupɛ ɛgɛ mɔ kibui nɔnɔ gɛ balɔkɔ ebhui yɛulũ nɔ.”
বর্তমানে নির্বাচিত:
Banɔkpɛkpɛ Axɔ̃ɛ 25: nyb
হাইলাইট
শেয়ার
কপি
Want to have your highlights saved across all your devices? Sign up or sign in
© (Active), Ghana Institute of Linguistics, Literacy and Bible Translation. All rights reserved.
