Naanearü ügüchiga 6
6
Chixexü̃ naxügü ga duü̃xü̃gü
1Rü yexguma ga duü̃xü̃gü rü inanaxügü ga nax yamuxü̃ ga guxü̃ ga naanewa rü yaxãxacüxü̃.
2Rü yexguma Tupanaarü duü̃xü̃gü ngĩxü̃ daugügu ga yema ngecügü nax yamexẽchixü̃, rü ngĩxü̃ nidexechi ga yema nüxü̃́ ngúchaü̃cü nax ngĩmaxã yaxãmaxü̃ca̱x.
3Natürü nüma ga Cori ya Tupana rü ñanagürü: —Taxũtáma guxü̃gu chanamaxẽxẽ ya yatü, erü nüma ya yatü rü namachimare nixĩ. Rü ngẽmaca̱x 120 ya taunecüxica tátama namaxẽ —ñanagürü.
4Rü yexguma Tupanaarü duü̃xü̃güaxü̃́ yaxãxacügu ga yema ngexü̃gü ga ñoma ga naanecüã̱x, rü yéma nixĩ ga nangóexü̃ ga yema yatügü ga imáchanexü̃chixü̃. Rü yema yatügü nixĩ ga nũxcüma tachigagüxü̃ rü iporaxüchixü̃.
5Natürü ga Cori ya Tupana rü nüxü̃ nadau nax ñoma ga naanewa poraãcü chixexü̃ naxügüxü̃ ga duü̃xü̃gü rü chixexü̃guxicatama naxĩnüexü̃.
6Rü yemaca̱x ga Tupana rü poraãcü nangechaü̃ rü nüxü̃́ nangu̱x ga nax naxüaxü̃ ga gumá duü̃.
7Rü poraãcü nangechaü̃ãcüma ñanagürü: —Tá ichayanaxoxẽxẽ i ngẽma duü̃xü̃gü i chango̱xẽẽxü̃, rü ngẽxgumarüxü̃ tá ta ichayanaxoxẽxẽ i ngẽma naxü̃nagü, rü naeü̃gü, rü ngẽma naeü̃gü i waixü̃müanegu nügü itúgüxü̃, rü naeü̃gü i ixãxpe̱xatüxü̃ erü choxü̃́ nangu̱x nax chanango̱xẽẽxü̃ —ñanagürü.
8Natürü ga Tupana rü Noéxü̃ nadau nax mexü̃ naxüxü̃ ga nape̱xewa.
Noéweü̃
9Rü ñaa nixĩ i Noéchiga. Rü nüma ga Noé rü wüxi ga yatü ga mecü nixĩ, rü guxü̃guma Cori ya Tupanaga naxĩnü. Rü natanüwa ga yema duü̃xü̃gü ga yexgumaxü̃cüü maxẽxü̃, rü nüxicatama nixĩ ga Cori ya Tupana naxwa̱xexü̃ãcü namaxü̃xü̃.
10Rü nüma ga Noé rü nüxü̃́ nayexma ga tomaepü̱x ga nane: Chéü̃, rü Cáü̃, rü Yapéx.
11-12Rü Cori ya Tupana rü nüxü̃ nadau ga ñoma ga naane ga nax chixexü̃maxã napaxü̃, yerü guxü̃ma ga duü̃xü̃gü rü chixexü̃gu namaxẽ. Rü yema taxü̃ ga chixexü̃xü̃ nax nadauxü̃ ga Cori ya Tupana ga ñoma ga naanewa,
13rü yemaca̱x ga Tupana rü Noéxü̃ ñanagürü: —Ñu̱xma rü marü tá chayanaxoxẽxẽ i guxü̃ma i duü̃xü̃gü erü nagagu nangẽxma i taxü̃ i máeta i ñaa naanewa. Rü ngẽmaca̱x tá chayanaxoxẽxẽ i ngẽma duü̃xü̃gü wüxigu namaxã i guxü̃ma i ñoma i naanewa ngẽxmaxü̃.
14¡Rü naxü ya wüxi ya wapuru nawa ya nai ya ãgüne! ¡Rü yaxüarü ucapuã̱x i naxmachiãgüwa! ¡Rü o̱xwümaxã nawa i nacuchitagü i aixepewa rü düxétüwa nax tama yachuruxü̃ca̱x!
15Rü ñaa tá nixĩ i norü ta ya yima wapuru: Rü 135 metru tá nixĩ i norü ma̱x, rü 22 metruarü ngãxü̃ tá nixĩ i norü taxmachiã, rü 13 metruarü ngãxü̃ tá nixĩ i norü máxchane.
16¡Rü tomaepü̱xgu tá cunaxü̃nagüchixü̃! ¡Rü guxü̃cüwawa i naaxü̃arü ngaicamana tá cunaxü i norü beü̃tánaxacügü! ¡Rü wüxicüwawa tá cunaxü i naã̱x!
17Erü núma tá chanamu ya taxüchicü ya mucü nax guxü̃wama inanguanexü̃ca̱x, rü nayuexü̃ca̱x i guxü̃ma i ta̱xacü i maxü̃ã́xü̃ i guxü̃ i naanewa. Rü guxü̃táma nayue.
18Natürü cumaxã ichaxuneta rü yima wapuruwa tá cuxü̃ chamaxẽxẽ tümamaxã ya cuxma̱x rü cunegü rü cuneã̱xgü.
19Rü ngẽxgumarüxü̃ tá ta wapurugu cuyamuü̃ i taxrechigü i naguxü̃raü̃xü̃ i naeü̃gü i ñoma i naanewa ngẽxmagüxü̃, rü wüxi i yatüxü̃ rü wüxi i ngexü̃ nax curüxü̃ namaxẽxü̃ca̱x.
20Rü ngẽmaãcü tá wapurugu nichoü̃ i taxrechigü i naguxü̃raü̃xü̃ i naeü̃gü, rü naxü̃nagü, rü werigü i taxü̃ rü íxraxü̃, rü ngẽma naxtanecamaxã waixü̃mügu itúgüxü̃ nax ngẽmaãcü namaxẽxü̃ca̱x.
21¡Rü ñu̱xmachi nanutaque̱xe i naguxü̃raü̃xü̃ i nawemü rü namaxã nanguxü̃ nax cuma rü guxü̃ma i ngẽma naeü̃gü rü ngẽmamaxã pexãwemüxü̃ca̱x! —ñanagürü.
22Rü nüma ga Noé rü nayanguxẽxẽ ga guxü̃ma ga yema Tupana namaxã nüxü̃ ixuxü̃.
বর্তমানে নির্বাচিত:
Naanearü ügüchiga 6: tcaP
হাইলাইট
শেয়ার
কপি
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
