Matius 4
4
Iblis nen Yesus akla kagaligiluk oba waga lageikhe wene
(Markus 1:12-13; Lukas 4:1-13)
1Ima usa'isikhemo, Yesus Iblis nen akla kagaluagaluk, Allah Agoreke nen wolok o limo akhuni dekma etoma lageikhe. 2Etoma 'bi lageikhemo dogolik, o hi ageik, wi ageik, hagakhe korlek iki 40 hari hipiri nikidek welageikhe iti nen hipiri abu motok ageikhe. 3Itithogon hipiri abu motok werekma, at Iblis inakla kagalik nekherek meke etnogo oba wageikhesik nen,
“Hat Allah a'but eberogonat halok he, helekit ethoma hipiri roti meke hakene hagatlasuak nen yogosin o,” iluk yogokhikhemo, 4#Ulangan 8:3 at Yesus nen,
“Allah nen,
Akhuni hipiri anek neke dogolik iniluk motok
welageikharek dek o. An nane egerek meke
iti tha'bokhogonat waganho halok, iniluk
motok dogogun o,
iluk isikhemo holal waganogo 'bisukhama werek o,” iluk yogokhikhe. 5Yogokhikhemo, yabokane at Iblis nen Yesus wolok, o Allah ekaerek ai ukul kokma lageikhesik nen, Yesus ebe o Allah ai halekma uanat upu warleke thalek isiken obaat wolok dageisikhesik nen, 6#Mazmur 91:11-12 men yogokhikhe,
“At Allah nen,
Hat hisok helekit oba tamukhogon waraunogo
iluk, an nagarumi malaikat emenogo nen
iniki talek oba wokhabuak nen
yogeisagein,
iluk isikhemo holal waganek werek iti, hat eberogonat Allah a'but halok he, pok wema ethoma usan ta,” iluk yogokhikhe. 7#Ulangan 6:16 Yogokhikhemo, at Yesus nen,
“Allah nen ekhe dogolik,
Hit nen, an hinopase Allah Netagapogot nanini
werek a? Dek a, iluk, nobabut palusak motok
dek o,
iluk isikhemo holal waganogo 'bisukhama weregat o,” iluk yogokhikhe. 8Itithogon yogokhikhemo, yabokane at Iblis nen Yesus wolok tom kok uanat meke ukul oba dageiluk, o agat oba yi ai ti ai ap koktek inetagapogot nen hagasik welageikharek obake dopok tha'bokhogonat, yi meke ti meke doalegat werekma ileken lakhoagaluk yakulekhe dogolik,
9“Yesus. Hat hitibagal yukukhogon napma ukitluk hogotnabigin halok, hileken lakhegen meke ethoma tha'bokhogonat hat wokhesigin o,” iluk yogokhikhemo, 10#Ulangan 6:13 at Yesus nen,
“Hat Iblis yi horla lan o. Allah nen ekhe dogolik,
Hit nen, hinopase Allah Netagapogot anat
hinitibagal yukukhogon napma ukitluk
hogotnakhe dogolik, an nobasik anek
hagakhe dogono o,
iluk isikhemo holal waganogo 'bisukhama werek o,” iluk yogokhikhe. 11Itithogon yogokhikhemo Iblis etnogo Yesus here'isalok horla lageikhemo, malaikat pogot oba nen Yesus oba usa'agoukhasik therogo welagoukha.
At Yesus o Galilea dagei ageikhesik hagakhe lageikhe wene
(Markus 1:14-15; Lukas 4:14-15)
12“At Yohanes etnogo iki herle wakhama,” iluk isukhama, at Yesus asuk holhikhesik nen, o Galilea eloke dagei ageikhe. 13Dagei ageikhesik, o ukul Nazaret etnogo thogotdiluk nen, o ukul Kapernaum i Galilea yekelek aik obake etoma, it ap inukuloak etaga Zebulon meke inom, Naftali meke inom, inaila etoma dogeigiluk dagei ageikhe. 14Dagei ageikhe iti, at Yesaya Allah ane yogeisekhe lageikhe meke etnogo nen holal waganhe dogolik,
15“Hit ap hinukuloak etaga Zebulon meke inom,
Naftali meke inom, hinaila i Yordan aik
ilibaganke halek meke inom, i laut kok
yekelekma usegarekma halek meke inom,
hinaila o Galilea eloke ethoma, it ap
itikmanke meke nen thebelek werek
yomarani.
16 #
Yesaya 9:1-2
O mummo welagathep meke iti, o liathinabigin
meke kok meke ageikhe hegep o. Hit o
etoma watlasuogoluk hinoba mumat
agasikmo, liathinabigin meke ageikhe waga
iti o,”
isikhe etnogo tak-tagat hagatlasuagaluk Yesus etoma dagei ageikhe iti. 17Dagei ageikhesik dogolik, hurli iti hurli nen, akhuni etoma yogeisekhe dogolik,
“At kok pogot oba meke nen apma 'bisagein etnogo yogotak arat apma 'bisagein o. Halok he, weak hagakhe lagap meke here'isalok hinobabut hebelatni o,” iluk yogeisilik nekhe lageikhe.
Yesus nen agarumi alebageik inayoko 'bisikhe wene
(Markus 1:16-20; Lukas 5:1-11)
18At Yesus i Galilea yekelekma aik obake laga dogolik, ap inebe pere, Simon etaga ageikhe Petrus ekhe lago etnogo agot Andreas ipisak hibiku-yogoku ikanat waganharethekma nogo nen, itinem ikan waganuogoluk, su yoge meke ima usakhunem ileken lageisasikhe. 19Lageisasikhesik nen,
“Ikan waganhe lagap iti hak, akhuni itithogonat woginabik nekhe dogobageik nen he, yakulhisak nen noporlik witni o,” iluk yogeisasikhemo, 20inasu yoge meke etnogo here'isalok eranogoat at oporlik lagoukha. 21Lagoukhama, at Yesus ileken lageisasikhe meke, ap inebe pere Zebedeus a'buri Yakobus agot Yohanes ipisak inopase inom, ku akla dogolik, su yoge ikan waganhe lagoukha meke etnogo 'bugukakhunem lageisalok nen, waisasikhe. 22Waisasikhemo, ku etnogo inom, inopase Zebedeus etnogo inom, eranogoat here'isalok, it Yesus oporligat lagoukha.
At Yesus nen wene yakulisigik, u warek meke hano hagarinakhik, hagakhe lageikhe wene
(Lukas 6:17-19)
23Lagoukhama, at Yesus o Galilea eloke o tomok etoma nekhe dogolik, akhuni Yahudi meke sembayan egarekma ukisikhesik, wene hano wene yabokane ninopase Etagapogot apma 'binanigin etnogo wene yogeisigik, yi u ti u hano hagarinakhik, hagakhe lageikhe. 24Itithogon hano hagarinabik lagunem, o Siria etoma abok motok thak-pak isikhemo, yi u ti u, yi hinet ti hinet wakhe lagoukha meke inom, mokat obabut weak meke inakla ukiluk inobabut dugurlugi palharek meke inom, watlageik iniluk ageik hagakharek meke inom, iniki inisok ut warek meke inom, inebe doalegat wogosik at oba wagunem tha'bokhogonat hano hagarinakhe lageikhe. 25Itithogon hano hagarinakhe korlek, akhuni tha'bokhogonat o Galilea nen, o kota 10 etoma nen, o Yerusalem nen, Yudea nen, i Yordan aik ilibaganke etoma nen, inebe motok doalegat wagoukhasik Yesus oporlik nekhe lagoukha.
বর্তমানে নির্বাচিত:
Matius 4: LAIDNT
হাইলাইট
শেয়ার
কপি
Want to have your highlights saved across all your devices? Sign up or sign in
