Yosua 9
9
To-Gibeon nnakkalanni Yosua
1Ia tonna sa'dingmi to kapataloanna to-Israel to sininna raja llan kalambunanna Sa'dan Yordan, la jaona buntu, la jiongna garonto' buntu, la jiona randan Tasik Tangnga ratu re' Buntu Libanon, iamo to rajana to-Het, rajana to-Amori, rajana to-Kanaan, rajana to-Feris, rajana to-Hewi na rajana to-Yebus, 2mesa' kadami to raja nasirempun la rrarii Yosua sola to-Israel.
3Apa ia to-Hewi to torro jio Gibeon nasa'ding tooi to apa mangka napugauk Yosua lako to-Yerikho sola to-Ai. 4-5Napugaukmi to akkattana nnakkalanni Yosua. Nnalami karung maluse bangmo sola sepu' kuli' ngenan anggoro' to dikarempumora napade'i keledai. Na mpukinallo roti makase to bulu manukan bangmo, na ia to sapatu napake ditampih-tampih bang toomo sola mangpakean simaluse toomo. 6Susimi joo napugauk namale sitammu Yosua to mangtenda jio Gilgal. Nakuamo lako Yosua sola lako to-Israel, “Ia tee kami' to jiokan mai kampong mambela, ratukan ssitammuanki' tampaden basse.” 7Apa mebalii to to-Israel nakua, “Mbai ntee unariki' mai torro, te'da kiwa'ding sibasse to totorro ntee mai.”#Kamessunan 23:32, 34:12; Ulangan 7:2 8Apa nakua mebali joo tau lako Yosua, “Ia tee kami' kaunanta'.” Nakutanaimi Yosua nakua, “Indara kamu', na topole umbora kamu'?” 9Mebalimi nakua, “Ia tee kami' kaunanta', gaja bela to kampongki'. Ratukan, nasaba' kisa'dingmi to apa mejangngaran Napugauk PUANG Allataala to misompa. Kisa'dingmo to sininna apa Napugauk lako to-Mesir, 10sola to Napugauk lako dua rajana to-Amori jio kadellekanna Sa'dan Yordan, iamo to Sihon rajana to-Hesybon na Og rajana to-Basan to torro jio Asytarot.#Bilangan 21:21-35 11Iamo joo nasuakan tomangparentaki' sola sininna totorro jio kampongki' nakua, ‘Mangkinallo kamu' mimale ssitammuanni, mikuanni: Ia tee kami' kaunanta'. Meta'dakan, ia ke wa'dingngi, tasibasse.’ 12Takita bangmi tee roti kipukinallo, ia tongkimane' ke'deh jio mai kampongki' malussu bangpa, na ia too makasemi nabulu manukan toomo. 13Takita toomi to sepu' kuli' anggoro' baru unapa tongkimane' ke'deh jio mai kampongki', apa ca'ce-ca'cemi too, ia to pakeanki' sola sapatungki' simaluseanmi, nasaba' gaja bela kinii lumingka.”
14Naalami to-Israel ci'di' to kinallona to-Gibeon.#9:14 Naalami to-Israel ci'di' to kinallona to-Gibeon tandana kumua situjui la sibasse ba'tu naalami to-Israel ci'di' to kinallona to-Gibeon la nanii nnissenni kumua malaunmoraka joo roti. Apa te'da nameta'da pangpatujun-Na PUANG Allataala jolo' napugaukki. 15Mpadenmi basse Yosua sola to-Gibeon kumua, la sisoba'i na te'da naladipatei to to-Gibeon. Napada massapah to tomangparentana to-Israel ssitujui joo basse.
16Apa ia tonna tallung allomo mangkanna sibasse, denmi tau mpaui lako to-Israel kumua mandoppi'ra kampongna to to-Gibeon, inde' bang una tana Kanaan. 17Ia tonna sa'dingngi to-Israel joo kareba, malemi mpangngujuii joo kota. Ia tonna tallung allomo ratumi lako kota Gibeon, kota Kefira, kota Beerot na kota Kiryat-Yearim. 18Apa te'damo nawa'ding to-Israel mpatei to-Gibeon, nasaba' mangkami to tomangparentana massapah mpau sangan-Na PUANG Allataala to nasompa to-Israel. Sipangnuku-nukuanmi to to-Israel lako tomangparentana. 19Apa mebalii to tomangparenta nakua, “Bua'raka na mangkamokan massapah mpau sangan-Na PUANG Allataala to tasompa. Te'damo tawa'ding nggaukkii. 20Ma'namo nada'tan tuo to tau, dikua danggi' Nasessaki' Puang Allataala, nasaba' mangkamiki' massapah. Susi tee to la tagaukanni: 21Danggi' tapateii, apa taputomangpiak kajumira sola tompewaianki'.” Susimi joo to napattantu tomangparentana to-Israel.
22Natambaimi Yosua to to-Gibeon naratu mangngolo. Nakuanmi Yosua, “Ciapari miuragakan mikua, ‘Mambela to kampongki',’ na tontee kamu' pale' mai? 23Toditangdoi kamu', nasaba' mangnguraga kamu' susi joo. La dipukaunan tarruh kamu' ratu lako bati'mi, mimenjaji tomangpiak kaju sola tompewaian Bola Puang Allataala to kisompa.” 24Mebalimi to to-Gibeon nakua, “Iamo kipugaukki susi joo, nasaba' kisa'dingmo kumua ia to PUANG Allataala to misompa mangka mangkada lako Nabi Musa, tompangjaman-Ni kumua, la Naben kamu' tee sininna kampong na la mipatei ngasan to taunna, iamo kipumalaja' ke mipateikan. 25Na takuasaimokan too. Iami tasanga melo, iamo tagaukankan.” 26Jaji nakuanni Yosua to to-Israel nadanggi' napateii to to-Gibeon. 27Naputomangpiak kajumi sola tompewaian to-Israel. Napupenjaji tooi tomangpiak kaju na tompewaian ngenan to dinii mangkaroba lako PUANG Allataala. Na iamo napujaman to-Gibeon ratu lako too allo jio ngenan to Napattantu PUANG Allataala dinii mangkaroba.
বর্তমানে নির্বাচিত:
Yosua 9: mvpAD
হাইলাইট
শেয়ার
কপি
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.