Yosua 13
13
Kampong to te'dapa nataloi Yosua
1Ia tonna gaja tuamo Yosua, mangkada-Mi PUANG Allataala Nakua, “Ee Yosua, gaja tuamoko too, na budapa kota sola kampong tana Kanaan to parallupa mutaloi, 2iamo to sininna tanana to-Filistin na tanana to-Gesur. 3Ia joo tana pamula llo' mai Sa'dan Sikhor kadellekanna tana Mesir, ratu re' kota Ekron. Sininna joo tana mentama ngasan tanana to-Kanaan. Na den lima rajana to-Filistin torro llan kota Gaza, kota Asdod, kota Askelon, kota Gat na kota Ekron. Na te'da toopa naditalo to tana to-Awi 4tana Kanaan llo'na liu. Moi to tana Kanaan pamula jio mai Meara padangna to-Sidon, ratu lako Afek to mandoppi' jio mai katonan padangna to-Amori parallu toopa mutaloi. 5La mutaloi toopa tanana to-Gebal, na sininna kotana to-Libanon jio kadellekanna, mangpamula jio mai Baal-Gad jiong garonto' Buntu Hermon, ratu lako lalan mangnguju lako Hamat, 6na sininna kotana to-Sidon, to torro ntuu de' membuntunna, mangpamula jao Buntu Libanon ratu lako Misrefot-Maim. Sininna to tontorroi to tana, la Kuula'ii ke natamaimi to-Israel. Apa la mutawa mpake undi jolo' lako to-Israel to tana napumanahhi, susi to mangka Kupangparentan lako iko.#Bilangan 33:54 7Iamo joo, tawanni lako kaserapa suku to-Israel na sitangnganapa suku Manasye, to tana napumanahhi.”
Tana to mangka ditawan suku Ruben, suku Gad na sitangngana suku Manasye
8Ia to suku Ruben, suku Gad na sitangngana suku Manasye, mangkami ntarima tawa padang jio mai Nabi Musa tompangjaman PUANG Allataala, jio kadellekanna Sa'dan Yordan.#Bilangan 32:33; Ulangan 3:12 9Ia joo padang to dibenni pamula jio mai kota Aroer jio randan Sa'dan Arnon, sola kota llan tangnga lombok na sininna padang membuntu pamula jio mai Medeba ratu lako Dibon. 10Na sininna kota kaparentanna Sihon, rajana to-Amori, to torro jio Hesybon, ratu lako tanana to-Amon jio kadellekan, 11tarruh lako tana Gilead sola tana to-Gesur na tana to-Maakha, sininna Buntu Hermon, na sininna tana Basan ratu lako Salkha, 12sola sininna karajaanna Raja Og jio Basan, to mangparenta jio Asytarot sola Edrei. Ia tee Raja Og, to mangparenta tonna taloi Nabi Musa naula'ii. Ia tee Raja Og cappa'na bati' to-Refaim to sigaja tonggo pangkaleanna. 13Apa ia to to-Gesur sola to-Maakha, te'da naula'ii to-Israel, iamo joo nada'tanpa torro sola ratu lako too allo.
14Ia to suku Lewi te'da tana manah nabenni Nabi Musa, nasaba' mangkami Napattantu Puang Allataala kumua, ia to naputawa suku Lewi, iamo to karoba to dipassompan lako PUANG Allataala to nasompa to-Israel.#Ulangan 18:1
Tana to diben suku Ruben napumanahhi
15Ia to tana pura Nabasse Puang Allataala lako to-Israel, sangtawan mangkami naben Nabi Musa lako suku Ruben, napumanahhi pantan sisangrapu. 16Ia joo tana diben suku Ruben mangpamula llo' mai kota Aroer jio randan Sa'dan Arnon, sola kota llan tangnga lombok na sininna padang membuntunna jio siandah kota Medeba, 17ratu re' Hesybon sola sininna kota jao padang membuntunna, iamo to kota Dibon, Bamot-Baal, Bet-Baal-Meon, 18Yahas, Kedemot, Mefaat, 19Kiryataim, Sibma, Zeret-Hasahar jao membuntunna joo lombok, 20Bet-Peor, sininna awa' Buntu Pisga, na Bet-Yesimot, 21na kota laen jao joo padang membuntu sola tana kaparentanna Sihon, rajana to-Amori, to torro jio Hesybon tonna tee. Mangkami natalo Nabi Musa Raja Sihon sola sininna tomangparentana to-Midian iamo to: Ewi, Rekem, Zur, Hur na Reba. Ia joo tau mangka nasibawan Raja Sihon mangparenta. 22Sininna to tonapatei to-Israel tonna tee, jio toomi to Bileam anakkana Beor, mesa' topakita-kita. 23Ia to angge tana manahna suku Ruben llan kalambunan iamo to Sa'dan Yordan. Ia ngasanmo joo to kota sola kampong to diben sininna rapunna suku Ruben napumanahhi.
Sininna tana to diben suku Gad napumanah
24Mangka toomi naben Nabi Musa sangtawan to tana naputawai suku Gad, pantan sisangrapui la napumanah. 25Ia to suku Gad mpumanahhi kota Yaezer na sininna kota jio tana Gilead na sitangngana tanana to-Amon ratu lako kota Aroer kadellekanna kota Raba. 26Napumanah too to tana mangpamula jio mai kota Hesybon ratu lako kota Ramat-Mizpa na kota Betonim, na jio mai Mahanaim ratu lako Lodebar.#13:26 ratu lako Lodebar iarika ratu lako tana Debir 27Ia too to kota Bet-Haran, Bet-Nimra, Sukot, Zafon jiong Lombok Yordan, na torronapa karajaanna Raja Sihon to mangparenta jio kota Hesybon. Sa'dan Yordan ratu re' Tasik Galilea#13:27 Tasik Galilea llan basa Ibrani disanga Kineret., iamo angge tanana to-Gad llan kalambunan. 28Iamo to kota sola kampongna to diben sininna rapunna suku Gad napumanahhi.
Sininna tana to diben sitangngana suku Manasye jio kadellekanna Sa'dan Yordan
29Mangka toomi naben Nabi Musa sangtawan tana to sitangngana suku Manasye pantan sisangrapui la napumanah. 30Ia to angge tana dibenni mangpamula jio mai kota Mahanaim ratu lako sininna padang Basan to nakuasai Raja Og tonna tee, na annanpulona kampongna Yair to mentamapa kaparentan Basan. 31Sitangngana tana Gilead, na kota Asytarot na Edrei, diben too lako Manasye. Ia tee kota Asytarot na Edrei nakuasai Raja Og jio Basan tonna tee. Ia ngasanmo joo to tana diben lako sitangngana rapunna Makhir, anakkana Manasye.
32Susimi joo Nabi Musa ntawa tana jio merrantena tana Moab, jio kadellekanna Sa'dan Yordan sioloan kota Yerikho. 33Apa ia to suku Lewi, te'da padang nabenni Nabi Musa la napumanah, nasaba' mangkami Napattantu PUANG Allataala to nasompa to-Israel kumua, PUANG Allataala Ia la mpasadianni to naputuona suku Lewi.#Bilangan 18:20; Ulangan 18:2
বর্তমানে নির্বাচিত:
Yosua 13: mvpAD
হাইলাইট
শেয়ার
কপি
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.