Yosua 11
11
Yosua rrampa tana Kanaan jajanna liu
1Ia tonna sa'dingngi Yabin, rajana to-Hazor, to kapataloanna to-Israel, nasuami to tau male lako Yobab rajana to-Madon, na rajana to-Simron sola rajana to-Akhsaf, 2sola sininna raja jajanna liu to jao membuntunna, raja to jiong Lombok Yordan llo'na liu Tasik Galilea#11:2 Tasik Galilea llan basa Ibrani disanga Kinerot., raja to jao awa' buntu sola raja to jao membuntu-buntunna llan kalambunan siandah kota Dor. 3Nasua tooi Raja Yabin to taunna male sipangkada rajana to-Kanaan jio kadellekan sola llan kalambunan, na rajana to-Amori, to-Het, to-Feris sola to-Yebus to torro jao membuntunna, sola to-Hewi to torro jao awa' Buntu Hermon jio Mizpa. 4Ratumi joo sininna raja sola surudadunna liwa' buda susi budanna kassi' jio randan tasik. Moi nyarang sola kareta to dipake parari liwa' too buda. 5Sirempunmi sola ngasan namale mangtenda jio siandah mata wai Merom, la rrarii to-Israel.
6Mangkada-Mi PUANG Allataala lako Yosua, Nakua, “Danggi' mumalaja' nnewai joo raja sola surudadunna. Wattu susi una tee masawa, Kupupangngelohnai to to-Israel mpatei ngasanni. Sininna aje nyarangna la mure'joan, na ia to karetana sumpun ngasanni.” 7Ta'pa malemi Yosua sola sininna surudadunna lako siandah mata wai Merom rrarii to ewana. 8Napapataloi PUANG Allataala to to-Israel. Naula'i to ewana ratu re' kota Sidon Tonggo, kota Misrefot-Maim llan kalambunan, na lako Lombok Mizpa jio kadellekan. Narari tarruhhi arannai mate ngasan to ewana, moi mesa' te'da lalo tuo. 9Napugaukmi Yosua lako ewana susi to Nasuanni PUANG Allataala, nare'joanni to nyarangna, nasumpunni to sininna karetana.
10-11Mangkai joo too polemi Yosua rrarii to-Hazor, nasaba' ia joo wattu ia to kota Hazor sola rajana ngkuasai sininna karajaan mengguririkkina. Nasumpunni Yosua joo kota. Ia to raja sola sininna taunna napatei ngasanni Yosua, moi mesa' tau te'da dieloran tuo.
12Sininna to kota natalo ngasanni Yosua, napateii to rajana sola sininna taunna to torro llan kota, susi to nasuanni Nabi Musa, tompangjaman PUANG Allataala. 13Apa ia to kota jao buntu-buntu#11:13kota jao buntu-buntu iamo to kota to mangka roqpok namembuntu-buntu nadikabuaq kota baru namawatang dinii mentilendung ke narariki' ewa. te'da nasumpunni to-Israel, ia manda napangparentan Yosua to kota Hazor disumpun. 14Sininna tau llan joo kota dipatei ngasan, te'da lalo dieloran tuo. Apa ia to sininna ewanan to makeangga' sola sininna patuoanna naala ngasanni to-Israel napuapai. 15Sininna to Napangparentan PUANG Allataala lako Nabi Musa, tompangjaman-Ni, mangkami napau Nabi Musa lako Yosua. Na sininna joo napugauk ngasan Yosua, te'da bang moi mesa' to tangnapugauk.
Sininna kampong to natalo Yosua
16Susimi joo, Yosua rrampa tana Kanaan: membuntunna tana Yehuda, padang makase Negeb, tana Gosyen, membuntu-buntunna tana Yehuda, Lombok Yordan na membuntunna tana Israel. 17-18Maluahna joo tana narampa Yosua, mangpamula llo' mai Buntu Malenyu' siandah tana Edom#11:17-18 Edom llan basa Ibrani disanga Seir. , ratu re' Baal-Gad jio Lombok Libanon sau'na Buntu Hermon. Gaja sainni Yosua sirari rajana joo kota, apa nang nataloi, najokkoi to rajana napateii. 19Te'da bang to kota to mpaden basse la sisoba' to-Israel, ia mandara to to-Hewi to torro jio Gibeon. Ia to kota laenna narari ngasanni to-Israel, nataloi. 20Napupembattukki PUANG Allataala penawanna to ewana to-Israel nasirari to-Israel, dikua na dipatei ngasan, te'da lalo dikamasei, napura lanynya', susi to Napangparentan PUANG Allataala lako Nabi Musa.#Ulangan 7:16
21Ia joo wattu male tooi Yosua llanynya'ii to to-Enak, to sigaja tonggo pangkaleanna, to torro ntuu de' kota Hebron, Debir, Anab sola to torro jio sininna kota laen ntuu de' membuntunna Yehuda sola sininna membuntunna Israel. Napatei ngasan Yosua to to-Enak, naancuru'i to kotana. 22Te'da bang to to-Enak tuo moi mesa' to torro jio Israel, apa ia to torro jio Gaza, Gat na Asdod den unapa te'da nadipatei.
23Susimi joo Yosua rrampa ngasanni joo kota, susi to Napangparentan PUANG Allataala lako Nabi Musa. Nabenni Yosua lako to-Israel joo kota, natawanni pantan suku napuapai. Mangkai joo too pajami to to-Israel massirari, te'damo nnapa-apai to kotana.
বর্তমানে নির্বাচিত:
Yosua 11: mvpAD
হাইলাইট
শেয়ার
কপি
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.